O Kisangusangu Kijila mu Kusosolola o Ima ku Muenhu

DANIIELE NI MIRIAM, a tungile mu ixi ia Espanha, akexile ni jimbote javulu. a kazala mu mbeji ia Katutu ka muvu ua 2000. Daniiele uambe: “Tua kexile mu nganhala kitadi kiavulu, mukonda dia kiki, tua kexile mu dia kúdia kuambote, kuenda mu jixi jengi, ni kusumba izuatu ia fuama. Tua kexile ue ni kithangana kia soko phala kuboka.” Maji sai kizuua o ima ia lunguluka.

Mu kiônge kia dikota kia muvu ua 2006, a bhange-mu diskursu dia bhangesa Daniiele kuxinganeka ku muenhu uê. O mulongexi ua bhange o kibhuidisu kiki: “O kuila tua mu bhanga ioso phala kukuatekesa o athu ala mu njila ia kalunga, kubokona mu njila ia muenhu?” (Jisabhu 24:11) O diskursu dia jimbulula kuila, tua tokala kuboka o njimbu ia Bibidia ku athu, n’a tambule ue o muenhu ua kalelaku. (Ikalakalu 20:26, 27) Daniiele uambe dingi: “Nga divu kuma Jihova ua kexile mu zuela phala eme.” O diskursu dia londekesa ue kuila, kioso ki tu kalakala ni kusuina kuoso mu sidivisu ia Jihova, o kisangusangu kietu ki di bandekesa dingi. Daniiele uejiidile kuila, kiexile muene kidi, mukonda o muhatu’ê Miriam, ua sangulukile kiavulu mu kukalakala kála muboki ua thembu ioso.

O diskursu dienhódio dia mu suinisa kiavulu. Mukonda dia kiki, Daniiele ua mono kuila ua tokalele kulungulula o ukexilu uê ua muenhu. Muene ua sosolola o kikalakalu kiê, iu ua mateka kukalakala kála muboki ua thembu ioso. Daniiele ni Miriam a kexile ue mu banza mu kisangusangu kieji kala na-kiu, se endele mu boka kuoso kua bhingile dingi aboki a Utuminu.

IBHIDI NI MABESÁ

Mu mbeji ia Kasambuadi ka muvu ua 2007, Daniiele ni Miriam, a xisa o salu iâ ai mu tunga mu ixi ia Panamá, kididi mua ile kiá mu kunda. Ene a tokalele kuboka mu ji sanzala javulu, benge-benge mu kididi a k’ixana Arquipélago Bocas del Toro, mu kalunga ka tokala mu mbanza ia Caribe. Athu avulu a tungu mu ididi iii, akua Guaymi. Daniiele ni Miriam, akexile mu mona kuila, o kitadi kiâ, kia sokele phala kukala mu ixi ia Panamá dinake dia jimbeji.

Ene akexile mu bhanga njila ni ulungu ni jibixi. Ene ambe kuila, mu veji ia dianga endele 30 a jikilómetulu ni bixi, ia a tokalele kubanda milundu ia makota, ni muanha uatu. Mukonda dia kiki, Daniiele ua bhuidile. Maji akua Guaymi a tungile bhu mbandu a ikoka, akexile mu a tambulula kiambote, benge-benge kioso kia dilongo tu izuelu ia dimi dia akua Guaymi. Mu kubhita ithangana, ene akexile mu longa kiá 23 kia athu.

Ihi ia bhiti kioso o kitadi kiâ kiabhu? Daniiele uambe: “Ni masoxi, tua kexile mu banza kuvutuka mu ixi ietu ku Espanha. Ki tu mesenene kuxisa o maxibulu metu a Bibidia.” Maji mu kubhita mbeji, ene a tambula njimbu iambote. Miriam uambe: “A tu solo phala kukalakala kála aboki a katunda. Tua sanguluka kiavulu, mu kusuluka kusidivila mu ixi ia Panamá.”

ENE A SANGULUKA KIAVULU

Mukonda dia ima kulunguluka mu kilunga kia Jihova, ku muvu ua 2015 Daniiele ni Miriam a xisa o kikalakalu kia aboki a katunda. Ihi ia bhange mu kithangana kieniókio? Ene a dielele mu kikanenu ki tu sanga mu divulu dia Jisálamu 37:5. O divulu didi dizuela: “Njila ié i uenda bhakula-iu kua Jihova. u mu dielele muene, a bhange-bhu kioso kia tokala.” Ene a sange salu ia a kuatekesa kusuluka mu kukalakala kála aboki a thembu ioso. Lelu a mu sidivila mu mbanza ia Veraguas, mu ixi ia Panamá.

Daniiele uambe: “Ande dia kutunda mu ixi ietu, ku Espanha, tua kexile ni phata se tueji tena kusosolola o ima ku muenhu uetu. Maji lelu, tu mona kuila, tua tena kubhanga kiki. Tuala ni ima ioso i tua bhindamena.” Ihi iene mua bhekela dingi kisangusangu ku muenhu? Ene ambe: “Tu sanguluka kiavulu mu kukuatekesa o athu a lenduka, kuijiia Jihova.