Тә Тьрс у Тʹәнебун сәр Хԝә Тʹәхмин Кьрийә?

Һәла дина хԝә бьдә шькьл. Тӧ гәде бьчʹук дьвини? Те кʹьфше ԝәки әԝ тʹәне йә у дьтьрсә, ӧса нинә? Ле тә тьрс у тʹәнебун сәр хԝә тʹәхмин кьрийә?— Һәр кәс жь мә, щарна әв йәк сәр хԝә тʹәхмин дькә. Кʹьтеба Пирозда жи те гьликьрьне дәрһәԛа һәвалед Йаһоԝа, йед кӧ тʹәне манә у тьрсийанә. Йәк жь ԝан мәрийа Елйас бу. Ԝәре әм дәрһәԛа ԝи пебьһʹәсьн.

Һе гәләк сал пешийа буйина Иса, Елйас Исраеледа дьжит. Аһаб пʹадше Исраеле, Хԝәдайе рʹаст демәк Йаһоԝа нәдьһʹәбанд. Әԝ у кʹӧлфәта ԝи Изабел, сәре хԝә бәр хԝәдане ԛәлп Баәʹл, датанин. Ләма гәләк мәри жи Исраеледа дәстпекьрьн Баәʹл бьһʹәбиньн. Жьн-пʹадша Изабел зӧлмкʹар бу, у дьхԝәст ԝан һʹәму мәрийа бькӧшта, йед кӧ Йаһоԝа дьһʹәбандьн. У әԝе дьхԝәст Елйас жи бькӧшта! Ле тӧ зани Елйас чь кьр?—

Елйас рʹәви! Әԝ чу кʹурайа бәрʹийе у шкәфтеда хԝә вәшарт. Ча тӧ дьфькьри әԝ чьрʹа рʹәви?— Бәле, әԝ тьрсийа. Ле Елйас гәрәке нәтьрсийа. Чьрʹа? Чьмки әԝи заньбу, ԝәки Йаһоԝа дькарьбу али ԝи бькьра. Һе пешийа ԝе йәке, Йаһоԝа ԛәԝата хԝә Елйасрʹа нишан кьр. Щарәке Йаһоԝа агьр жь әʹзман баранд, у бь ве йәке щаба дӧайе Елйас да. Ләма ньһа жи Йаһоԝа дькарьбу али ԝи бькьра!

Чахе Елйас шкәфтеда бу, Йаһоԝа тʹәви ԝи хәбәр да у жь ԝи пьрси: «Тӧ вьра чь дьки?» Елйас щаба хԝә да: «Тʹәне әз мамә жь ԝан мәрийа, йед кӧ тәрʹа хьзмәт дькә. У әз дьтьрсьм, чьмки мьн дьхԝазьн бькӧжьн». Елйас дьфькьри, ԝәки һʹәму хьзмәткʹаред Йаһоԝа ида һатьнә кӧштьне. Ле Йаһоԝа готә Елйас: «На, әв ӧса нинә. Хенщи тә диса 7 000 мәрийед дьн жи һәнә, йед кӧ мьнрʹа хьзмәт дькьн у мьн дьһʹәбиньн. Мерхас бә. Щәм мьн диса гәләк шьхӧл сәва тә һәйә кӧ бьки!» Ча тӧ дьфькьри, Елйас ша бу чахе дәрһәԛа ве йәке бьһист?—

Жь мәсәла Елйас тӧ чь дькари һин би?— Тʹӧ щар нәтьрсә у нәфькьрә ԝәки тӧ тʹәне йи. Һәвалед тә һәнә, йед кӧ тә у Йаһоԝа һʹәз дькьн. Хенщи ԝе йәке, ԛәԝата Йаһоԝа зәʹф ә, у әԝе һәртʹьм али тә бькә! Бәле, Йаһоԝа ԝе тʹьме тʹәви тә бә у пьштоване тә бькә! Жь бо ве йәке тӧ бәхтәԝар у ша йи?—