Ини, 26 Илоне
Бәрбанге, гава һе тәʹри бу, Иса рʹабу чу щики ӧса, кʹидәре тʹӧ кәс тʹӧнә бу, у дәстпекьр дӧа бькә (Марк. 1:35).
Иса мәсәләкә баш шагьртед хԝәрʹа һишт, кӧ чаԝа дӧа бькьн. Әԝи гәләк щар дӧа дькьр. Иса ԛә бәтал нәдьма, чьмки гәләк мәрьв дьһатьн щәм ԝи, у ләма жи лазьм бу, кӧ әԝ бона дӧакьрьне ԝәʹдә бьвинә (Маркос 6:31, 45, 46). Мәсәлә, әԝ бәрбанге рʹадьбу, ԝәки башԛә дӧа бькә. Щарәке, пешийа кӧ сафикьрьнәкә фәрз бькә, әԝи тʹәмамийа шәве дӧа дькьр (Луԛа 6:12, 13). Ӧса жи, шәва пешийа мьрьна хԝә Иса гәләк щара дӧа дькьр, сәва кӧ щабдарийа хԝәйә һәрә фәрз бинә сери (Мәтта 26:39, 42, 44). Мәсәла Иса нишан дькә, кӧ чьԛас жи шьхӧлед мә һәбьн, әм гәрәке бона дӧакьрьне ԝәʹдә бьвиньн. Мина Иса, әм жи дькарьн бона дӧакьрьне мәщала бьвиньн. Мәсәлә, әм дькарьн шәбәԛе һьнәки зу рʹабьн, йан жи пешийа рʹазане ԝәʹдә бона дӧакьрьне вәԛәтиньн. Ӧса әме Йаһоԝарʹа бьдьнә кʹьфше, кӧ әм мәщала дӧакьрьне ԛимәт дькьн. w23.05 3 ¶4-5
Шәми, 27 Илоне
Һʹьзкьрьна Хԝәде сәр мәда бь ԝи Рʹӧһʹе Пироз барийә, йе кӧ мәрʹа һатийә дайине (Рʹом. 5:5).
Зьмане орижиналеда, ве рʹезеда фькьрәкә ӧса те дайине, кӧ һʹәзкьрьна Йаһоԝа һьндава кәсед бь рʹӧһʹ кʹьфшкьри ӧса мәзьн ә, ԝәки бәрамбәри ава чʹәм дьбә. Кәсед бь рʹӧһʹ кʹьфшкьри баԝәр ьн, кӧ әԝана жь алийе «Хԝәдеда һʹьзкьри» нә (Щьһуда 1). Йуһʹәннайе шанди бь ван гьлийа һәстед ԝан әʹйан кьр: «Бьньһерʹьн, Баве әм чаԝа һʹьз кьрьн, ԝәки әм зарʹед Хԝәде бенә готьне» (1 Йуһʹәнна 3:1). Гәло Йаһоԝа тʹәне кәсед бь рʹӧһʹ кʹьфшкьри һʹәз дькә? На. Йаһоԝа избат кьрийә, ԝәки әԝ мә һʹәмуйа һʹәз дькә. Гәло избатийа лапә мәзьн йа һʹәзкьрьна Йаһоԝа чь йә? Һәмьки кʹьрʹин, демәк ԛӧрбана Иса Мәсиһ! Бь сайа ԛӧрбане, Йаһоԝа нишан кьр, ԝәки әԝ мә чьԛас һʹәз дькә (Йуһʹәнна 3:16; Рʹомайи 5:8). w24.01 28 ¶9-10
Ләʹд, 28 Илоне
Нәйаред мьне пашда һәрʹьн, гава әз һәԝара хԝә Тә дайньм. Әз бь ве йәке пе дьһʹәсьм, кӧ Хԝәде тʹәви мьн ә (Зәб. 56:9).
Әв рʹез дина мә дькʹьшинә сәр тьштәкә дьн, йа кӧ али Даԝьд кьр, кӧ әԝ жь тьрсед хԝә хьлаз бә. Рʹаст ә әʹмьре ԝи бьн хофеда бу, әԝи дьда бәр чʹәʹве хԝә кӧ ахьрийеда, Йаһоԝа ԝе бона ԝи чь бькә. Даԝьд заньбу, ԝәки ԝәхта рʹастда, Йаһоԝа ԝе ԝи хьлаз кә. Йаһоԝа хԝәха готьбу, ԝәки Даԝьд ԝе бьбә пʹадше Исраеле (1 Самуйел 16:1, 13). Даԝьд баԝәр бу, ԝәки һәр созед Йаһоԝа ԝе бенә сери. Гәло Йаһоԝа чь соз дайә мә? Һәмьки әм заньн, ԝәки иро Йаһоԝа мә жь һʹәму тәнгасийа хьлаз накә. Ле әԝи соз дайә, кӧ дьнйа тʹәзәда әԝе мә жь һʹәму кӧл-дәрда хьлаз кә (Ишайа 25:7-9). Әм баԝәр ьн, кӧ Хԝәде ԝе мьрийа рʹакә, мә жь нәхԝәшийа ԛәнщ кә у жь дьжмьн-нәйара хьлаз кә (1 Йуһʹәнна 4:4). w24.01 6 ¶12-13