Йерәмйа Тʹьме Дәрһәԛа Йаһоԝа Хәбәр Дьда

Чахе әм мәрийарʹа дәрһәԛа Йаһоԝа хәбәр дьдьн, щарна жь бо ве йәке әԝана дькарьн ԛәрфе хԝә мә бькьн йан жи сәр мә һерс кʹәвьн. У әв йәк дькарә сәр мә ӧса һʹӧкӧм бә, ԝәки әм ида нәхԝазьн дәрһәԛа Йаһоԝа хәбәр дьн. Тʹәви тә ԛә тьштед ӧса ԛәԝьмийә?— Кʹьтеба Пироз гьли дькә дәрһәԛа хортәки, йе кӧ Йаһоԝа һʹәз дькьр, ле һьндьк мабу әԝи хԝә кәрʹ кьра. Наве ԝи Йерәмйа бу. Дьхԝази һе зедә дәрһәԛа ԝи пебьһʹәси? Ԝәре әм бьньһерʹьн.

Чахе Йерәмйа һе гәләк щаһьл бу, Йаһоԝа готә ԝи, кӧ әԝ гәрәке мәрийарʹа әʹлам кә, ԝәки шьхӧлед хԝәйи хьраб бьһельн. Йерәмйарʹа чәтьн бу әве йәке бькә, у әԝ тьрсийа. Әԝи готә Йаһоԝа: «Әз ньзаньм чь у ча бежьм. Нә әз һе гәләк щаһьл ьм». Ле Йаһоԝа готе: ‹Нәтьрсә. Әзе али тә бькьм›».

Паши ԝе йәке Йерәмйа дәстпекьр бежә мәрийа, кӧ һәрге әԝана шьхӧлед хԝәйи хьраб нәһельн у нәйенә гӧһастьне, ԝе бенә щәзакьрьне. Тӧ ча дьфькьри, мәрьва гӧһ данә Йерәмйа у шьхӧлед хьраб һиштьн?— На. Ԝана дәстпекьр ԛәрфе хԝә ԝи бькьн у сәр ԝи һерс кʹәвьн. Һьнәка жи һәла һе жи дьхԝәстьн ԝи бькӧжьн! Ле гәло һьнге Йерәмйа чь сәр хԝә тʹәхмин кьр, ча дьфькьри?— Әԝ тьрсийа у гот: «Әзе ида дәрһәԛа Йаһоԝа тʹӧ щар хәбәр нәдьм». Ле бь рʹасти, әԝи хԝә кәрʹ кьр?— На, әԝи хԝә кәрʹ нәкьр. Йерәмйа гәләк Йаһоԝа һʹәз дькьр, ләма жи нькарьбу хԝә кәрʹ кьра у дәрһәԛа Йаһоԝа хәбәр нәда. Йерәмйа шьхӧле хԝә нәда сәкьнандьне у дәсте хԝә данәхьст, ләма жи Йаһоԝа әԝ да баԝәркьрьне, кӧ ԝе ԝи хьлаз кә.

Мәсәлә, щарәке һьнә мәрьвед хьраб Йерәмйа гьртьн у авитьнә чʹәʹла кʹур, йа кӧ бь һʹәрʹийе тʹьжә бу. Ԝедәре Йерәмйа бе нан-ав һиштьн. Әԝ меред хьраб дьхԝәстьн ԝәки Йерәмйа чʹәʹледа бьмьрә. Ле бь аликʹарийа Йаһоԝа әԝ хьлаз бу!

Тӧ чь дәрсе дькари жь Йерәмйа һин би?— Рʹаст ә щарна әԝ дьтьрсийа жи, ле йәкә нәдьсәкьни у тʹьме дәрһәԛа Йаһоԝа хәбәр дьда. Чахе тӧ жи мәрийарʹа дәрһәԛа Йаһоԝа хәбәр ди, дьԛәԝьмә әԝана ԛәрфе хԝә тә бькьн, йан жи сәр тә һерс кʹәвьн. Жь бо ве йәке дьбәкә тӧ дәстпеки бьтьрси у тʹәвиһәв би. Ле чь жи һәбә тʹӧ щар нәсәкьнә у дәрһәԛа Йаһоԝа тʹьме мәрийарʹа хәбәр дә. Чаԝа кӧ Йаһоԝа али Йерәмйа кьр, ԝе али тә жи бькә.