NEMA KOLOSIYARA

1 Ez Pawlos, yê ku bi qirara Xwedê bûme şandiyê Mesîh Îsa, tevî birê me Tîmotêyo 2 vê nemê pîrozara û birên aminra dinivîsim, yên ku yektiya Mesîhda nin û Kolosyayêda dimînin:

Bira kerema mezin û edilaya ji Bavê me Xwedê, ser we be!

3 Her gav çaxê em bona we dua dikin, em şikiriyê didine Xwedê, Bavê Xudanê me Îsa Mesîh. 4 Çimkî me derheqa baweriya weye hindava Mesîh Îsa û hezkirina we hindava hemû pîrozada bihîst. 5 Ev bawerî û hezkirina we heye, çimkî gumana we heye, wekî çi ku li ezmana bona we tê xweykirinê, hûnê bistînin. Gava we rastiya vê mizgîniyê bihîst, hûn derheqa vê gumanê pêhesiyan. 6 Ew mizgîniya ku gihîştiye we, nav temamiya dinyayêda bela dibe û berên baş tîne. Ew nav weda jî berên baş tîne, ji roja ku we mizgînî bihîstiye û derheqa rastiya kerema Xwedêye mezin pêhesiyane. 7 Ewê yekê hûn pêhesiyane ji heval-xulamê meyî delal Êpafras, yê ku berdestiyê Mesîhe amin e, û dewsa me alî we dike. 8 Û ewî mera derheqa hezkirina we gilî kir, ya ku bi saya ruhê Xwedê pêşda tê.

9 Bona vê yekê, ji roja ku me ev yek bihîst, me dest ji dua nekişandiye. Em ji Xwedê hîvî dikin, wekî hûn zanebûna rast derheqa qirara wî qazanc kin, usa jî hemû bîlanî û femkirina ruhanî. 10 Em dua dikin ku hûn usa bijîn çawa layîqî Yehowa ye, û dilê wî bi temamî şa kin, bi vê yekê ku hûn her cûre kirên qenc bikin û zanebûna xwe derheqa Xwedê zêde kin. 11 Û em dua dikin, wekî Xwedê pê qewata xweye mezin we qewî ke, seva ku hûn bikaribin bi sebir û bi şabûn teyax kin. 12 Berdewam kin şikiriyê bidine Bav, yê ku hûn kirine hêjayî war, kîjan ku ewî pîrozara soz daye, yên ku ronayêda dimeşin.

13 Ewî em ji teriyê xilaz kirin û derbazî padşatiya Kurê xweyî delal kirin, 14 bi saya kîjanî em pê kirînê hatine azakirinê û gunên me hatine baxşandinê. 15 Ew sûretê Xwedê ye, yê ku nayê dîtinê, û nixurî ye nav hemû efrînada. 16 Bi wî hemû tiştên din ser erdê û ezmana, yên ku têne dîtinê û yên ku nayêne dîtinê, hatine efirandinê: Serwêr, serok, serwêrtî yan hukumetî. Hemû tişt bi wî û bona wî hatine efirandinê. 17 Xêncî wê yekê, ew pêşiya her tiştî hebû û hemû tiştên din bi wî hatine efirandinê. 18 Ew serê bedenê ye, dêmek serê civatê. Ew destpêka her tiştî ye, û yê pêşin e ku ji mirinê hate rakirinê,* wekî her tiştîda bibe yê pêşin. 19 Xwedê xweş hat ku her tiştî wîda temam ke. 20 Û Xwedê bi wî hemû tiştên ser ezmana û ser erdê tevî xwe li hev anîn. Pê xûna Îsa, kîjan ku ser stûna cefê hate rêtinê, edilayî tevî Xwedê hate standinê.

21 Berê hûn jî ji Xwedê dûr bûn. Hûn dijminên wî bûn, çimkî fikirên we bi tiştên xirab tije bûn. 22 Lê niha Xwedê pê mirina Îsaye bedenî hûn tevî xwe li hev anîne. Ewî ev yek kir, wekî hûn ber çevê wî ça cimeteke pîroz, bêleke û bêsûc bin. 23 Hemikî hûn gerekê berdewam kin baweriyêda hîmgirtî û qewî bimînin. Tu cara îzinê nedin, wekî gumana ku we ji bihîstina mizgîniyê qazanc kiriye, ji we bê standinê. Ev mizgînî nav hemû merivada hatiye belakirinê, û ez Pawlos, xizmetkarê vê mizgîniyê me.

24 Ez şa me ku ez bona we cefê dikişînim. Ez zanim ku gerekê dîsa jî bona bedena Mesîh, dêmek bona civatê cefê bikişînim. 25 Ez vê civatêra xizmet dikim, çimkî Xwedê bona we ev cabdarî daye min, wekî ez xebera Xwedê bi dil û can bela kim, 26 dêmek ev sura pîroz, kîjan ku ji merivên berê û ji nisilên berê veşartî bû. Lê niha ew pîrozên Xwedêra hatiye eşkerekirinê. 27 Xwedê xwest ev sura xweye pîroz nav miletada bide eşkerekirinê. Sur ew e ku Mesîh tevî we yektiyêda ye û gumana we heye, ku hûnê tevî wî bêne rûmetkirinê. 28 Em derheqa wî mizgîniyê bela dikin, rêberiyê didine her kesî, bîlaniya ku me standiye wana hîn dikin, seva ku alî hemû şagirtên Mesîh bikin, wekî ewana bibine merivne ruhanîda gihîştî. 29 Bona vê yekê jî ez gelek xîret dikim, û berdewam dikim xwe bispêrim qewata wî, ya ku nav minda eyan dibe.

2 Ez dixwazim wekî hûn bizanibin ku ez zemetên çiqas mezin dikişînim bona we û birên Lawdikyayêda, usa jî bona hemû kesên din, yên ku min şexsî nas nakin. 2 Ez vê yekê dibêjim, wekî dilê we hemûya rihet be û hûn hezkirinêda nêzîkî hev bin, û wekî baweriya we bi saya femkirina rast ava be. Bawerîke usa kerema tîne, dêmek zanebûna rast derheqa sura pîroz ya ku Xwedê dide. Û ev sur Mesîh e. 3 Bi saya wî em dikarin hemû bîlanî û zanebûna Xwedê bivînin, yên ku mîna xizna veşartî ne. 4 Ez vê yekê dibêjim, wekî tu kes bi zarê şîrin we nexalifîne. 5 Rast e ez bal we nînim, lê dilê min bal we ye. Ez şa me ku nav weda terbetiyê û baweriya qewî hindava Mesîhda divînim.

6 Awa we çawa Xudan Mesîh Îsa qebûl kir, usa jî berdewam kin pey wî herin. 7 Kokên xwe kûr berdin, ser wî ava bin û baweriyêda qewî hîmgirtî bin, çawa ku hûn hatine hînkirinê. Û her gav bona her tiştî ji Xwedê razî bin.

8 Haj xwe hebin! Bira tu kes bi bîlaniya vê dinyayê, ya ku ser hîmê edetên merivaye derew û pûç in, we nexapîne. Fikirên wan li gora nihêrandina vê dinyayê ne, li gora hînkirinên Mesîh nînin. 9 Çimkî Mesîh bi temamî xeyset-hunurên Xwedêva tije ye. 10 Hûn bi saya wî temam dibin. Ew ser hemû serwêrtî û hukumetiyara ye. 11 Û bi vê yekê ku hûn Mesîh bawer dikin, hûn hatine sinetkirinê, lê ne bi destê meriva. Ev sinetkirin ya Mesîh e, û we ji bedena weye gunekar aza dike. 12 Gava hûn mîna wî hatine nixumandinê, hûn tevî wî hatine definkirinê, çimkî hûn tevî Mesîh yektiyêda nin û we baweriya xwe qewata Xwedê anî, yê ku wî ji mirinê rakir.

13 Xêncî vê yekê, hûn bona gunên xwe û bona vê yekê ku hûn nesinetkirî bûn, mirî bûn, lê Xwedê hûn tevî Mesîh sax kirin. Ewî bi dilovanî hemû gunên me baxşande me, 14 û qanûna nivîsar ku miqabilî me bû, resît kir.* Ewî ev Qanûn bi saya mirina Mesîhe ser stûna cefê, betal kir. 15 Ewî serwêrtî û hukumetî bindest kir û eşkere nîşan kir, ku ewî ewana bi saya stûna cefê bindest kirine. Niha ew wana meşa serketinêda dibe.

16 Lema bira tu kes wera nebêje ku hûn gerekê çi bixwin yan çi vexwin, yan gerekê hûn xwe li cejinekê, yan cejina hîva teze, yan roja Şemiyê bigirin yan na. 17 Ev hemû tişt siya van tişta ne, yên ku wê bên û wê Mesîhda bêne sêrî. 18 Nehêlin wekî kesekî ku xwe milûk dide kifşê, yan jî meleka dihebîne, xelata we ji we bistîne. Kesê usa xwe tenê li tiştên ku ewî dîtine digire, û bi fikirên xweye pûç payê xwe dide. 19 Û ew pey Mesîh, yê ku serê me ye, naçe. Mesîh ew kes e, yê ku hewcên temamiya bedenê, dêmek civatê razî dike, wekî ew rind bixebite. Bi wî temamiya bedenê bi pevgirêk û movika hevva girêdayî tê xweykirinê û bi qewata Xwedê mezin dibe.

20 Hergê hûn tevî Mesîh mirin û ji nihêrandina vê dinyayê aza bûn, îja hûn çira usa dijîn, têbêjî hûn hê para dinyayê ne? Hûn çira pey qeydên dinyayê diçin? Qeydên ku usa dibêjin: 21 “Hilnede, tem neke, destê xwe nedê!” 22 Ewa tenê temî û hînkirinên meriva ne derheqa tiştên ku merî dixwin û vedixwin, û paşê betavedibin. 23 Ev qeyde dibeke bi bîlanî têne kifşê, û merivên ku li gora wan hereket dikin xwe usa didine kifşê, ku yançi bi milûktî Xwedê dihebînin. Lê bi rastî ewana dixwazin xwexa safî kin, ku çawa Xwedê bihebînin. Ewana bedena xwe ceza dikin, lê dîsa jî nikarin miqabilî xwestinên xweye gunekar şer kin.

3 Awa ku hûn tevî Mesîh ji mirinê hatine rakirinê, li tiştên ezmanî bigerin, kîderê ku Mesîh li milê Xwedêyî rastê rûniştî ye. 2 Berdewam kin derheqa tiştên ezmanî bifikirin, ne ku derheqa tiştên ku ser erdê ne. 3 Çimkî hûn mirine, û emirê we Mesîhra hatiye dayînê, yê ku tevî Xwedê yektiyêda ye. 4 Gava Mesîh, yê ku emirê me ye, rûmeta xwe eyan ke,* hingê hûnê jî tevî wî rûmetêda eyan bin.

5 Lema jî hemû xwestinên xirab bikujin: Zinêkariyê,* heramiyê, temê xirab, xwestinên zirar, û timayê, çi ku pûtparistî ye. 6 Ji bo van tişta xezeba Xwedê tê. 7 We jî wextekê ew tişt dikirin û usa dijît. 8 Lê niha gerekê hûn terka van hemû tişta bidin: Xezeb, hêrs, xirabî, giliyên bêhurmetî û xeberdana necayîz. 9 Hevdu nexapînin, merivê kevin kirên wîva ji xwe bêxin, 10 û merivê nû li xwe kin, kîjan ku bi saya zanebûna rast tê nûkirinê, wekî hê zêde bibe mîna Efirandarê xwe. 11 Firqî tune meriv Yûnan yan Cihû be, sinetkirî yan nesinetkirî be, xerîb be, Îskît* be, xulam yan jî aza be, lê Mesîh ye her tişt û ew hemûyada ye.

12 Awa çawa bijartiyên Xwedêye pîroz û hezkirî, hûn dilşewatiyê, qenciyê, milûktiyê, nermiyê û sebirê li xwe kin. 13 Her gav hevdu sebir kin û bi dil bibaxşînine hev, hergê jî meniya weye gazinkirinê heye. Çawa ku Yehowa bi dil baxşande we, gerekê hûn jî usa bibaxşînine hev. 14 Xêncî van hemû tişta, hezkirinê li xwe kin, çimkî hezkirin meriva dike yek.

15 Usa jî, bira edilaya Mesîh rêberiyê dilê we bike, çimkî hûn çawa endemên bedenekê bona vê edilayê hatine gazîkirinê. Timê şêkirdar bin. 16 Bira hînkirina Mesîh dilê we bi temamî tije ke û bîlaniyê bide we. Berdewam kin hîn kin û hevdu qewî kin bi zebûra, bi pesindayîna Xwedêra û bi stiranên şikirdariyê. Bi temamiya dilê xwe* Yehowara bistirên. 17 Her tiştê ku hûn dikin û dibêjin, bi navê Xudan Îsa bikin, û bi saya wî şikiriyê bidine Bavê me Xwedê.

18 Kulfetno, gura mêrên xweda bin, çimkî Xudan vê yekê dixwaze. 19 Mêrno, her gav jinên xwe hez bikin û hindava wanda sert nîbin.* 20 Zarno, her gav gura dê-bavê xweda bin, çimkî ev yek dilê Xudan xweş tê. 21 Bavno, hêrsa zarên xwe ranekin, wekî ewana ber xwe nekevin. 22 Xulamno, her gav gura axayên xweda bin, ne ku tenê ber çevê wan, wekî hûn dilê meriva xweş bên, lê bi dilê sax û bi xofa Yehowa guhdar bin. 23 Û hûn çi jî bikin, bi dil û can bikin çawa bona Yehowa, ne ku bona meriva. 24 Vê yekê bikin, çimkî hûn zanin ku hûnê ji Yehowa war bistînin çawa xelat. Axayê mezinra, dêmek Mesîhra xulamtiyê bikin. 25 Bîr nekin, kesê ku xirabiyê dike, wê bona kirên xwe bê cezakirinê, çimkî Xwedê firqiyê nake orta meriva.

4 Axano, hûn zanin ku Axayê we jî heye li ezmên, lema xulamên xwera heyf û heq bin.

2 Hertim dua bikin, vê yekêda hişyar bimînin û şikiriyê bidine Xwedê. 3 Seva me jî dua bikin ku Xwedê bona xebera xwe derî veke, wekî em sura pîroz derheqa Mesîh gilî kin, bona çi jî ez kelêda me. 4 Dua bikin wekî çawa ku lazim e, ez bi zelalî vê xeberê bela kim.

5 Hindava nebawermendada serwaxt bin, û wedê* xwe bi cûrê herî baş bidine xebatê. 6 Bira giliyên we timê xweş bin, ça xwarineke xwêkirî, wekî hûn bizanibin çawa caba her kesî bidin.

7 Birê minî delal Tixîko, yê ku xizmetkarekî amin e û mîna me xulamê Xudan e, wê derheqa min hemû tiştî wera gilî ke. 8 Ez wî dişînim bal we ku hûn haj me hebin û wekî ew dilê we rihet ke. 9 Ew tevî birê minî delal û amin, Onîsîmo, tê, yê ku yek ji we ye. Ewê wera gilî ke hemû tiştên ku vira diqewimin.

10 Erîstarxo, yê ku tevî min kelêda ye, we silav dike, û usa jî Markos, merivê* Barnabas (derheqa kîjanî we rêberî stand, ku hergê ew bê bal we, hûn wî qebûl kin), 11 û Îsayê ku jêra Yûsto dibêjin, we silav dikin. Ewana ji kesên sinetkirî ne. Şixulê Padşatiya Xwedêda tenê ewana hevalkarên min in, û wana dilbîniya mezin* daye min. 12 Êpafras, yê ku xulamê Mesîh e û yek ji we ye, silavên xwe wera dişîne. Ew hertim bi dil û can bona we dua dike, wekî hûn ça merivne ruhanîda gihîştî qewî bimînin, û baweriya xwe wan her tişta bînin, çi ku qirara Xwedêva girêdayî ye. 13 Ez şedê vê yekê me, ku ew him bona kara we, him jî bona kara kesên li Lawdikya û Hîrapolîsê gelek cefê dikişîne.

14 Hekîmê delal Lûqa û Dîmas jî silavên xwe wera dişînin. 15 Silavên min bigihînin birên li Lawdikyayê, xûşka me Nîmfayê û civata ku mala wêda top dibe. 16 Û çaxê ew neme nav weda bê xwendinê, wê bişînin civata Lawdikyayê, wekî wêderê jî bê xwendinê. Lê nema ku min Lawdikyayêra şand, bira nav weda jî bê xwendinê. 17 Arxîpora bêjin: “Haj xwe hebe wekî xizmetiya ku te ji Xudan standiye, bînî sêrî”.

18 Ez Pawlos, silavên xwe bi destê xwe dinivîsim. Bîr nekin ku ez bi zincîra girêdayî me. Bira kerema Xwedêye mezin ser we be!