NEMA PÊŞIN TÊSALONÎKIYARA

1 Ez Pawlos, Sîlvanûs* û Tîmotêyo vê nemê civata Têsalonîkiyara dinivîsin, ya ku tevî Bavê me Xwedê û Xudan Îsa Mesîh yektiyêda ye:

Bira kerema mezin û edilayî ser we be!

2 Gava em duayên xweda we bîr tînin, em her gav bona we hemûya razîbûna xwe didine Xwedê. 3 Çimkî em ber Bavê me Xwedê tu car bîr nakin şixulên weyî bi baweriyê û kirên weyî bi hezkirinê. Em usa jî bîr nakin, ku we bi saya gumana hindava Xudanê me Îsa Mesîh tengasiyada sebir dikir. 4 Gelî birên ku hezkiriyên Xwedê ne, em zanin ku ewî hûn bijartine. 5 Çimkî gava me mizgînî wera bela kir, me ne tenê bi giliya, lê bi qewat, bi ruhê pîroz û bi baweriya qewî gîhande we. Hûn zanin ku em nav weda bona xatirê we bûne merivne çi cûreyî. 6 We nava gelek tengasiyada xebera Xwedê bi şabûnê, kîjan ku ruhê pîroz dide, qebûl kir. Vê yekêda we çev da me û Xudan. 7 Bi vî cûreyî, hûn bona hemû bawermendên Makedonyayêda û Axayayêda bûne mesele.

8 Bi we xebera Yehowa ne tenê Makedonyayêda û Axayayêda hate bihîstinê, lê hemû dera. Û bi vî cûreyî, meriva derheqa baweriya weye hindava Xwedê bihîst, û îda nelazim e ku em tiştekî bêjin. 9 Çimkî ewana xwexa gilî dikin, ku me ça cara pêşin hevdu dît û ça we terka pûtên xwe daye, wekî Xwedayê rast û sax bihebînin, 10 û ji ezmana hîviya hatina Kurê wî bin, dêmek Îsayê ku ewî ji mirinê rakir. Belê, Îsa wê me xilaz ke ji xezeba ku tê.

2 Birano, hûn rind zanin ku hatina meye bal we badîhewa nîbû. 2 Çawa ku hûn zanin, me Fîlîpyayêda cefa kişand û em hatine bêhurmetkirinê, lê bi saya Xwedayê xwe mêrxas bûne, wekî nava zêrandineke mezinda mizgîniya Xwedê bigihînine we. 3 Giliyên me ji nihêrandina şaş yan ji nêta xirab nînin, û nav giliyên meda tu fêlbazî tune. 4 Lê çawa ku Xwedê em qebûl kirine û ev mizgînî tesmîlî me kiriye, em ne ku li gora xwestina meriva, lê li gora xwestina Xwedê xeber didin, yê ku dila divîne.

5 Hûn xwexa zanin ku me hûn tu cara bi giliyên şîrin nexapandine, me ne jî usa dikir ku ça merivne baş bêne kifşê, wekî tiştekî ji we qazanc kin. Xwedê şede ye! 6 Em dikaribûn aliyê xercada wera bibûna bargiranî, çimkî em şandiyên Mesîh ne. Lê em naxwazin ku meriv, dêmek ne hûn û ne jî kesekî din, bi cûrekî mexsûs dîna xwe bidine me. 7 Em hindava weda bi hezkirin û heyf bûn, çawa ku dayîka destdergûş, bi dilşewatî zarên xwera diricife. 8 Û çimkî em we gelek hez dikin, me dixwest ne tenê mizgîniya Xwedê bigîhanda we, lê hazir bûn emirê xwe jî bidine we, wekî alî we bikin.

9 Birano, hemikî tê bîra we, wekî me çiqas cefa kişand. Gava me mizgîniya Xwedê wera bela dikir, em şev û roj dixebitîn, wekî aliyê xercada tu kesîra nebine bargiranî. 10 Hûn xwexa şede ne, usa jî Xwedê şede ye, ku em hindava we bawermenda amin bûn, û rabûn-rûniştina me rast û bêqisûr bû. 11 Hûn rind zanin, wekî me timê her yek ji we hêlan dikir, dilbînî dida we û şîret dikir usa, çawa bav zarên xwe. 12 Me ev yek dikir wekî hûn li gora xwestina Xwedê, yê ku gazî we dike, bijîn, seva ku bikevine Padşatiya wî û rûmetê bistînin.

13 Bona vê yekê em hertim şikiriyê didine Xwedê, çimkî gava we xebera Xwedê ji me bihîst, we ew ne ku ça xebera meriva, lê ça xebera Xwedê qebûl kir. Çimkî ew bi rastî jî xebera Xwedê ye û ser we bawermenda hukum dike. 14 Birano, hûn jî mîna civatên Xwedê yên li Cihûstanê, ku tevî Mesîh Îsa yektiyêda nin, rastî tengasiya hatin. Çawa ku ewan bira ji destê Cihûya cefa kişandin, we jî ji destê miletê xwe cefên usa kişand. 15 Wan Cihûya him Xudan Îsa, him jî pêxember kuştin û em zêrandin. Xêncî wê yekê ewana dilê Xwedê şa nakin, û kirên wan zirarê didine hemû meriva. 16 Çimkî ewana riya me digirin, wekî em mizgîniya ku dikare meriva xilaz ke, nav miletên dinda bela nekin. Bi vî awayî ewana gunên xwe zêde dikin. Lê axiriya-axiriyê xezeba Xwedê ser wanda hatiye.

17 Birano, gava em ser wextekî kin ji we başqe bûn (rast e me hûn nedidîtin, lê hûn dilê meda bûn), me gelek dixwest we bivînin û bona vê yekê çi ji destê me dihat, me dikir. 18 Belê, me gelek dixwest bihatana bal we û hûn bidîtana. Û min Pawlos, ne tenê carekê, lê du cara xîret dikir bême bal we. Lê Şeytan riya me digirt. 19 Kî ye gumana me, yan jî şabûn, yan ew tac pê kîjanî em firnaq dibin ber Xudanê me Îsa, wedê hatina wî? Ne hûn in? 20 Belê, rûmet û şabûna me hûn in.

3 Me îda nikaribû sebir kira, lema jî me safî kir wekî wê diha baş be em Atînayêda bimînin, 2 û birê xwe, xizmetkarê* Xwedê Tîmotêyo, yê ku mizgîniya derheqa Mesîh bela dike, bişînin bal we, wekî ew we bişidîne û berdiliyê bide we. Bi vî cûreyî ewê baweriya we qewî ke, 3 wekî ji bo wan tengasiya tu kes ji we sist nebe. Çimkî hûn xwexa zanin, wekî em nikarin ji tengasiyên usa birevin. 4 Gava em tevî we bûn, me pêşda wera digot, ku emê rastî tengasiya bên, û usa jî qewimî, çawa hûn xwexa jî zanin. 5 Lema gava min îda nikaribû sebir kira, min Tîmotêyo şande bal we, wekî derheqa aminiya we bibihêm. Ez ditirsiyam ku Yê Dicêribîne, dibeke hûn kirine nava gune û cefê me badîhewa bûya.

6 Lê niha Tîmotêyo ji we vegeriya û hate bal me û derheqa aminî û hezkirina we, tiştên baş mera gilî kir. Ewî got ku hûn me her gav tînin bîra xwe û hizreta dîtina me ne, çawa em jî hizreta dîtina we ne. 7 Lema jî birano, ji bo aminiya we ku hûn didine kifşê, me nava hemû cefa û tengasiyada berdilî stand. 8 Niha ku em zanin, wekî hûn riya Xudanda qewî disekinin, dilê me rihet e.* 9 Bi rastî em şikiriyê didine Xwedê seva we, çimkî we dilê me gelek şa kir. 10 Em şev û roj bi dil û can dua dikin, ku we bivînin û alîkariya lazim bidine we, wekî baweriya we diha qewî kin.

11 Bira Bavê me Xwedê û Xudanê me Îsa, riya me rast kin, wekî em bikaribin bêne bal we. 12 Usa jî bira Xudan alî we bike, wekî hûn hê zêde hevdu û hemûya hez bikin, çawa ku em we hez dikin. 13 Bi vî cûreyî, ew wê dilê we qewî ke, bêqisûr ke û pîroz ke ber Bavê me Xwedê, wedê hatina Xudanê me Îsa tevî hemû pîrozên xwe.

4 Birano, we ji me rêberî stand ku hûn gerekê çawa bijîn, wekî dilê Xwedê xweş bên, û hûn hema usa jî dikin. Lê niha em bi navê Xudan Îsa ji we hîvî dikin, wekî hûn vê yekêda hê zêde pêşda herin. 2 Çimkî hûn zanin ku me bi saya Xudan Îsa çi rêberî dane we.

3 Qirara Xwedê ev e ku hûn pîroz bin û xwe ji zinêkariyê* dûr bigirin. 4 Her kes ji we gerekê bizanibe ku çawa bedena xwe zeft ke, wekî pîroziyêda û namûsiyêda xwey ke. 5 Hûn gerekê pey wan mileta neçin, yên ku Xwedê nas nakin û dikevine pey temê xirab, pê çi jî têr nabin. 6 Tu kes gerekê aliyê namûsiyêda ji sînora dernekeve û vê yekêda zirarê nede birê xwe. Çawa me berê temî daye we, Yehowa kesên ku van tişta dikin, ceza dike. 7 Belê, Xwedê gazî me kiriye, wekî em ne ku bi jîyîneke heram bijîn, lê bi pîroziyê bijîn. 8 Îja kesê ku vê yekê înkar dike, ew ne ku meriva înkar dike, lê Xwedayê ku ruhê xweyî pîroz dide we.

9 Lê derheqa biraheziyê nelazim e em wera tiştekî binivîsin, çimkî hûn aliyê Xwedêda hatine hînkirinê, wekî hevdu hez bikin. 10 Bi rastî hûn îda birên li temamiya Makedonyayê hez dikin. Lê birano, em hîvî we dikin ku hûn vê yekêda hê zêde pêşda herin. 11 Xîret kin ku hûn bi jîyîneke rihet bijîn û pozê xwe nekine nav şixulên xelqê, û çawa ku me temî daye we, xwexa bixebitin. 12 Hergê hûn usa bikin, meriv wê qedirê we bigirin û hûnê hewcê tiştekî nîbin.

13 Birano, em dixwazin wekî hûn bizanibin ku çi hîviya wan meriva ye, yên ku xewa mirinêda nin, wekî hûn mîna kesên ku gumana wan tune ye, dilteng nebin. 14 Çimkî hergê em bawer dikin ku Îsa mir û ji mirinê hate rakirinê, em usa jî bawer dikin ku Xwedê wê şagirtên Îsa, yên ku ketine xewa mirinê, ji mirinê rake, wekî ewana tevî wî bin.* 15 Em vê yekê ser hîmê xebera Yehowa wera dibêjin: Emê, yên ku heta wextê hatina Xudan sax bimînin, tu car pêşiya miriya nekevin. 16 Çimkî Xudan xwexa wê ji ezmana dakeve jêr û boriya Xwedê wê destê wîda be, ewê boriyê xe, û fermana wî wê bi dengê serokê meleka bê bihîstinê. Hingê şagirtên wîye mirî wê pêşiyê rabin. 17 Paşê emê, yên ku sax bimînin, tevî wan ewrava bêne hildanê, wekî li ezmana rastî Xudan bên. Û emê hertim tevî Xudan bin. 18 Lema bi van gotina her gav ber dilê hevduda werên.

5 Birano, hewce nîne ku em derheqa wext û zemana tiştekî wera binivîsin. 2 Çimkî hûn xwexa rind zanin, ku roja Yehowa wê mîna dizê şevê bê. 3 Gava meriv bêjin: “Edilayî û bêxofî ye!”, hingê nişkêva çawa sancûyê kulfeta hemle destpêdibe, wê qira wan bê, û ewana wê nikaribin xilaz bin. 4 Lê hûn birano, teriyêda nînin, lema jî ew roj wê mîna diza nişkêva ser weda neyê. 5 Çimkî hûn hemû kurên ronayê û kurên rojê ne. Em ne para şevê ne, û ne jî para teriyê ne.

6 De were em mîna kesên din ranezên, lê hişyar bimînin û ser hişê xwe bin. 7 Kesên ku radizên, şev radizên, û kesên ku serxweş dibin, şev serxweş dibin. 8 Lê em ku para rojê ne, were em ser hişê xwe bimînin û zirihê baweriyê û hezkirinê li xwe kin û kumzirihê gumana xilazbûnê jî bidine serê xwe. 9 Çimkî Xwedê em ne bona xezebê bijartine, lê bona vê yekê ku em bi saya Xudanê me Îsa Mesîh xilaz bin. 10 Ew bona me mir, wekî em, dixwazî hişyar bin yan jî razayî* bin, tevî wî bijîn. 11 Lema jî berdewam kin dil bidine hev û hevdu qewî kin, çawa ku hûn niha dikin.

12 Niha jî birano, em hîvî ji we dikin, wekî hûn qedirê wan kesa bigirin, yên ku nav weda bi xîret şixul dikin, xizmetiya Xudanda rêberiyê we dikin û we şîret dikin. 13 Wana gelek qîmet kin û hez kin bona şixulê wan. Hevra edilayêda bin. 14 Usa jî em hîvî ji we dikin, birano, ku hûn kesên neguhdar şîret kin, ber dilê dilşkestiyada bên, alîkariyê bidine sista, û hindava hemûyada bi sebir bin. 15 Bira tu kes ber xirabiyêva tu kesîra xirabiyê neke, lê her gav hevdura û hemûyên dinra qenciyê bikin.

16 Timê şa bin. 17 Her gav dua bikin. 18 Bona her tiştî şêkirdar bin. Çimkî Xwedê ji şagirtên Îsa Mesîh vê yekê dixwaze. 19 Agirê ruhê pîroz netemirînin. 20 Pêxembertiya bêhurmet nekin. 21 Her tiştî bicêribînin, têderxin çi qenc e û xwe qayîm li vê bigirin. 22 Xwe ji her cûre xirabiyê dûr bigirin.

23 Bira Xwedayê edilayê we bi temamî pîroz ke. Û bira ruh, nefs* û bedena we, birano, heta wedê hatina Xudanê me Îsa Mesîh, hemû aliyava saxlem û bêqisûr bimîne. 24 Yê ku gazî we dike amin e, û ewê eseyî vê yekê bike.

25 Birano, her gav bona me dua bikin.

26 Bi hezkirinê* silavê bidine hemû bira.

27 Ez bi navê Xudan temiyê didime we, ku hûn vê nemê hemû birara bixûnin.

28 Bira kerema mezin ya Xudanê me Îsa Mesîh ser we be!