Çi Bikim Hergê Dê-Bavê Min ji Hev Diqetin?

Çaxê jin-mêr ji hev diqetin ser zara ev yek gelek xirab hukum dike. Hergê malbeta te jî rastî wê yekê hatiye, çi dikare alî te bike teyax kî?

Vê gotarêda

• Sê tişt çi ku tu gerekê nekî

• Sê tişt çi ku tu gerekê bikî

• Cahilên din çi dibêjin

Sê tişt çi ku tu gerekê nekî

1. Xwe sûcdar neke

“Carekê diya min gote min, ku problêmê wê tevî bavê min paşê bûyîna min destpêbûn. Lema jî ez difikirim ku ewana riyê minda hev qetiyan”—Dîana.

Vê yekê bîr neke: Riyê teda nîne ku dê-bavê te hev qetiyan, çimkî problêm orta wanda qewimî. Tu nikarî problêmên wan safî kî, çimkî ewana xwexa cabdar in bona problêmên ku orta wanda pêşda tên.

2. Hêrsê dilê xweda xwey neke

“Ez ser bavê xwe gelek hêrs ketim, çaxê ewî nemamiya diya min kir. Û ez ne jî zanim ku ezê bikaribim wî bibaxşînim yan na”—Rîanna.

Vê yekê bîr neke: Ev tiştekî normal e hergê tu hêrs dikevî û dilteng dibî ji bo vê yekê, ku orta dê-bavê teda tiştek diqewime. Lê hergê tu berdewam kî hêrs kevî, ev yek wê xirab hukum ke ser sihet-qewata teye fîzîkî û êmosiyalî. Hêrsketin mîna vê yekê ye, hergê tu jer bixwî û bifikirî wekî ew yek wê ziyanê bide kesekî din.a

3. Nefikire ku tuyê jî mîna dê-bavê xwe şaşiya berdî

“Ez gelek ditirsim, wekî ezê jî mîna bavê xwe şaşiya wî cûreyî berdim. Ez ber xwe dikevim çaxê difikirim, ku gava ezê mêr kim û zarê min hebin, ezê jî mîna dê-bavê xwe bikevime dereca usa, kîjan ku wê ber bi hevqetandinê bibe”—Cêssîka.

Vê yekê bîr neke: Hergê dê-bavê te hev qetiyane, ev yek nayê hesabê wekî axiriyê tê jî ji hevalzewacê xwe biqetî. Dewsê tu dikarî ji wan hîn bî û şaşiyên usa nekî. Mesele pêşiya ku rastî kesekî bêyî, tu dikarî dîna xwe bidî ser xeyset hunurên usa, yên ku tu dixwazî nav wî merivîda bivînî. Xêncî wê yekê tuyê bikaribî hunurên usa nav xweda pêşda bînî, yên ku wê axiriyê alî tê bikin bibî hevalzewacekî baş.

Sê tişt çi ku tu gerekê bikî

1. Derheqa hestên xwe gilî ke. Ew merivên ku hestên nêgatîv dilê xweda dihêlin û tu kesîra dilê xwe venakin, heçî zef merivê usa îçkêva yan jî narkotîkêva mijûl dibin. Dewsê wê baş be vê yekê bikî:

Derheqa hestên xwe dê-bavê xwera gilî ke. Hergê dê yan bavê te dixwazin te bikine nava problêmên xwe, bê şer-dew wanara bêje, wekî ev yek ça ser te hukum dike. Lê hergê tera çetin e vê yekê bêjî, tu dikarî wanra neme binivîsî.

Derheqa hestên xwe, hevalê xweyî bi îtbarra bêje. Çaxê heye ev kes, kê hazir e guh bide te, tera îda diha hêsa dibe. Kitêba Pîrozda tê gotinê ku “heval her gav hiz dike, bira bûye bona roja oxirmê giran” (Metelok 17:17).

Derheqa hestên xwe Efirandarê xwera gilî ke. Ew her tim hazir e guh bide te (Zebûr 65:2). Kitêba Pîrozda tê gotinê, wekî hûn dikarin “hemû xemên xwe bavêjine ser wî, çimkî ew bona we xem dike” (1 Petrûs 5:7).

• Gelo teyê bikaribûya tevî diya xwe, yan bavê xwe rihet xeber da?

• Bi texmîna te kîjan hevalê teyî nêzîk, firqî tune ji te mezintir e yan weke teye, dikare piştgiriya te bike?

• Derheqa kîjan tiştên konkrêt tu dikarî Xwedêra dua bikî?

2. Hînî guhastina be

Ji bo hevqetandina dê-bavê te, dibeke tera lazim be hînî mala teze bî, mekteba teze, cûrê emirê teze usa jî hevalên teze. Ew yek strêseke mezin pêşda tîne û dikare usa bê kifşê, ku emirê teda her tişt paşopê diçe. Dereceke usada gelo çi dikare alî te bike? Dîna xwe bide ser vê yekê, wekî ça hînî wan guhastina bî.

• Kîjan guhastineke mezin tu mecbûr bûyî bikî, gava dê-bavê tê hev qetiyan?

• Çi tu dikarî bikî seva ku tera hêsa be hînî wan guhastina bî?

3. Nav xweda hunurên baş bivîne

Rast e hevqetandina dê-bavê te dikare berxweketinê pêşda bîne, lê usa jî ew dikare alî te bike hunurên qîmet nav xweda bivînî. Ev yek usa jî dikare alî te bike, nav xweda hunurên teze bivînî. Cêrêmî dê-bavê kîjanî hev qetiyan gava ew 13 salî bû usa dibêje: “Ji bo hevqetandina dê-bavê min ez diha bûme yekî cabdar. Ez birê xwe mezintir bûm, lema jî min gerekê alî diya xwe bikira û usa jî miqatî birê xwe bûma”.

• Ji bo hevqetandina dê-bavê xwe, te çi hunurên qîmet nav xweda dît?

• Kîjan hunur tu dixwazî nav xweda pêşda bînî?