Qirna yekêda Endrawis yek ji merivên pêşin bû, yê ku fem kir wekî Îsa ew heye Mesîh. Gelo kêra ewî derbêra derheqa wê yekê gilî kir? “Ewî [Endrawis] pêra-pêra birê xwe Şimhûn dît û jêra got: ‘Me Mesîh dît’, ku tê femkirinê: ‘Yê Kifşkirî’”. Endrawis birê xwe, Petrûs, bire cem Îsa û bi wê yekê mecal da Petrûs, wekî ew bibe şagirtê Îsa (Yûhenna 1:35-42).

Ji mesela Endrawis û Kornêlyo em çi ders hîn dibin derheqa wê yekê, ku ça xwe bidine kifşê hindava merivatiya xwe?

Ne Endrawis û ne jî Kornêlyo mecal ji destê xwe bernedidan. Endrawis nasiya Petrûs da Îsa. Kornêlyo jî xem kir, wekî hemû bira-pismamên wî gotara Petrûs bibihên. Endrawis û Kornêlyo ne bi destê zorê, ne jî bi fêlbazî usa dikirin, wekî neferên wan bibine şagirtên Îsa. Ji mesela wan em dikarin çi ders xwera hildin? Em gerekê çev bidine wan. Em dikarin hine fikira bira-pismamên xwera gilî kin yan jî mecala çêkin, wekî ewana rastiya ji Xebera Xwedê pêbihesin û tevî xûşk-birên meye ruhanî bibine nas. Lê em qedirê azaya bijartina wan digirin û naxwazin zorê wan bikin rastiyê qebûl kin. Ji mesela jin-mêrekî ji Almaniyayê, bi navê Yûrgên û Pêtra, em dikarin bivînin, wekî ça alî merivatiya xwe bikin rastiyê qebûl kin.