Îsa Derheqa Axiriyê Pêxembertiyê Dike

ÎSA tevî çar şandiyêd xwe rûniştibû ser çiyayê zeytûnê, ji kîderê ku Orşelîm û paristgeh rind dihatine kifşê. Îsa wanara gilî dikir, derheqa kutasî û “axiriya vê dinya” qelp. Ewî usa jî got, wekî paristgeh wê bê hilşandinê (Metta 13:40, 49). Hingê şagirtêd Îsa ji wî pirsîn: “Nîşana hatina te û axiriya vê dinyayê wê çawa be?” (Metta 24:3).

Îsa şirovekir, wekî pêşiya hilşandina Orşelîmê wê çi biqewime. Lê giliyê wî ne tenê derheqa Orşelîmê bûn, ew gilî di axiriyêda jî gerekê bihatana sêrî li ser temamiya dinyayê. Îsa Mesîh pêxembertî kir, û hûr bi hûr şirovekir, wekî çi wê biqewime rojêd paşinda û halê vê dinyayê wê çawa be, û eva hemû tişt tevayî wê bibûya nîşana destpêbûna Padşatiya Yahowa Xwedê. Bi giliyê mayîn, van nîşana wê eşkere kirana ku Xwedê, Îsa Mesîh kire Padşa di Padşatiya ezmanda, dêmek Îsa wê zûtirekê qira vê dinya xirab bîne, û edilayiya rastî bide meriya. Pêxembertiyêd Îsa, bûn nîşana kutasiya vê dinya xirab, dînêd qelp, hukumeta polîtîkê û sosîologiyê, û usa jî bû nîşana destpêbûna emirê teze.

Îsa got, wekî çaxê ew bibe Padşa, li ser erdê wê şer destpêbin, birçîbûn, erdhejêd qewî, nexweşiyêd giran hemû ciya, û neheqî jî wê zêde bin. Şagirtêd Îsaye rast, li ser temamiya dinyayê mizgîniya derheqa Padşatiya Xwedê wê bela kin. Xilaziyê wê “tengasiya usa mezin” destpêbe, ku ji destpêbûna dinyayê heta niha ya usa tunebûye (Metta 24:21).

Mesîhî ça gerekê fem bikin wekî ev tengasî nêzîk e? Îsa gut: “Ji dara hêjîrê dersekê hîn bin” (Metta 24:32). Çaxê li ser dara hêjîrê belg dertên, ev nîşana wê yekê ye ku havîn nêzîk e. Xût usa jî, çaxê pêşgotinêd Îsa derbekêra biqewimin, ev wê bê hesabê wekî kutasî nêzîk e. Lê xêncî Bav, kesek wê nizanibe roj û siheta destpêbûna tengasiya mezin. Lema jî Îsa Mesîh şîreta usa da şagirtêd xwe: “Hişyar bimînin! Çimkî hûn nizanin kengê wextê pêra bigihîje” (Marqos 13:33).

Li ser hîmê kitêbêd Metta serê 24 û 25; Marqos serê 13; Lûqa serê 21.