Îsraêlî ji Çiyayê Sînayê, beriya Paranêra çûn heta ciyê bi navê Kadeş. Wêderê Yehowa gote Mûsa: “Donzdeh mêra bişîne, ji her qebîlekê merivekî bişîne, wekî cesûsîya erdê Kenanê bikin, ya ku ezê bidime Îsraêliya”. Mûsa 12 mêr jibart û gote wan: “Herin erdê Kenanê û pêbihesin ew erd çawa ye, xweyî deremet e yan bê ber e. Merivên wî erdî qewat in yan sist in, şeherên wan hene yan çadirada dijîn”. Ew 12 cesûs çûne Kenanê, Yêşû û Kaleb jî nav wan cesûsada bûn.

Paşî 40 rojî ewana paşda vegeriyan û tevî xwe hêjîr, hinar û tirî anîn. Cesûsa gilî kir: “Erdê wan baş e, lê ewana gelek qewat in û dîwarê şeherên wan zef bilind in”. Lê Kaleb got: “Em dikarin wana alt kin. Werên em hema niha jî herin!” Tu zanî çira Kaleb usa got? Çimkî Kaleb û Yêşû îtbariya xwe Yehowa dianîn. Lê deh cesûsên din gotin: “Na! Merivên wêderê gelek terikî ne! Me xwe mîna kuliya texmîn dikir ber wana”.

Îsraêlî ber xwe ketin û sist bûn. Wana destpêkir bikine kute-kut û hevra gotin: “Werên em xwera rêberekî din bijbêrin û paşda herin Misirê. Çira em gerekê herin wî cîyî û bêne kuştinê?” Yêşû û Kaleb gotin: “Miqabilî Yehowa ranebin û netirsin. Yehowa wê me xwey ke”. Lê Îsraêliya guh nedane wan. Hela hê wana xwest Yêşû û Kaleb bikujin!

Hingê Yehowa çi kir? Ewî gote Mûsa: “Min haqas tişt bona Îsraêliya kir, lê yeke wana dîsa guh nedidane min. Seva wê yekê ewana wê 40 sala beriyêda bimînin, heta bimirin. Tenê zarên wan, û usa jî Yêşû û Kaleb wê bikevine wî erdî, kîjan min wanra soz daye”.

Hinek wext şûnda, çaxê Îsraêlî hê beriyêda bûn, Qorax, Datan, Abîram û 250 mêrên din miqabilî Mûsa derketin. Wana gote wî: “Bese, em vestiya ne! Heta kengê tê serwêrtiyê me bikî û Harûn jî kahîntiyê me bike? Yehowa tevî me her kesî ye, ne ku tenê tevî te û Harûn e”. Ew yek Yehowa xweş nehat. Xwedê hesab kir, wekî ewana miqabilî wî rabûn, ne ku miqabilî Harûn û Mûsa.

Mûsa gote Qorax û peyçûyên wî: “Sibê bixûrdanê xwe tevî bixûrê hildin û werên ber konê pîroz. Yehowa wê nîşan ke, ewî kê jibartiye”.

Roja din Qorax û 250 peyçûyên wî çûn, wekî ber konê pîroz rastî Mûsa bên. Wêderê wana bixûr şewitandin, çawa ku kahîna dikirin. Wê demê Yehowa gote Mûsa û Harûn: “Dûrî Qorax û peyçûyên wî bin”.

Çaxê Qorax çû ber konê pîroz, kîderê Mûsa bû, Datan, Abîram û neferên wan nexwestin herin wêderê. Yehowa gote Îsraêliya, wekî xwe dûr bigirin ji çadirên Qorax, Datan û Abîram. Ewana pêra-pêra dûrî wan çûn. Datan, Abîram û neferên wan ber çadirên xwe sekinî bûn. Nişkêva erd vebû û ewana têda çûn. Paşê, ji konê pîroz agir derket, Qorax û 250 peyçûyên wî şewitand.

Paşê Yehowa gote Mûsa: “Şivdara her serwêrên bereka hilde û navê wana ser şivdara wan binivîse. Lê ser şivdara ji bereka Lêwî, navê Harûn binivîse. Wan şivdara dayne konê pîroz û ez kê bijbêrim, şivdara wî wê gul bide”.

Roja din Mûsa her şivdar derxist û nîşanî serwêra kir. Şivdara Harûn gul dabû û ber girtibû. Usa Yehowa îzbat kir, wekî ewî Harûn jibartiye ça kahîn.