Mizgîniya ku Tera Hewas be Bizanibî

Kesekî qe carekê tera tiştekî usa gotiye, wekî tu kesîra nebêjî?—a Mesele Kitêba Pîrozda jî tê gotinê, ku carekê Xwedê tiştekî usa got, derheqa çi jî tu kesî nizanibû. Hela hê meleka jî dixwestin hê zêde derheqa vê yekê pêbihesin. Ev mizgînî bû. Lê tu dixwazî bizanibî ev çi mizgînî bû?—

Wedê berê Xwedê mêr û jina pêşin efirandin. Navê wan Adem û Hêwa bû. Xwedê maleke bedew da wan, yê ku baxçê Êdênê dihate navkirinê. Hergê Adem û Hêwa gura Xwedê bikirana, hingê ewana û zarên wan wê bikaribûna erd pêda bikirana cinet, û heta-hetayê bijîtana. Lê tê bîra te Adem û Hêwa çi kirin?—

Adem û Hêwa gura Xwedê nekirin, lema jî em îro cinetêda ser erdê najîn. Lê Xwedê got ku ewê erdê pêda bedew ke, û her kes wê heta-hetayê bijî û bextewar be. Gelo Xwedê wê ça ev yek bike? Gelek wext meriv vê yekê nizanibûn, çimkî ev wanra eyan nîbû.

Çaxê Îsa hate ser erdê, ewî gelek tişt derheqa vê mizgîniyê merivara gilî dikir. Ewî wanra got, ku ev mizgînî derheqa Padşatiya Xwedê bû. Îsa wanra digot ku dua bikin, wekî ev Padşatî bê. Çimkî ev Padşatî wê erdê bike cinet.

Gava tu derheqa vê mizgîniyê pêhesiyayî, ev te xweş hat?— Bîra xweda xwey ke, wekî tenê ew meriv wê Cinetêda bijîn, yên ku gura Yehowa dikin. Kitêba Pîroz mera gelek serhatiya gilî dike derheqa wan jin û mêra, yên ku gura Yehowa dikirin. Tu dixwazî derheqa wan pêbihesî?— Werê em derheqa hineka ji wan pêbihesin, û bizanibin ku çawa em dikarin çev bidine wan.