Diisambil: I Dyakatook Didy Mawej Mwiitwaakish

1, 2.a) Bwiibuh uw, bwabiny diisambil i cya bukish cilengel cyeeh? b) Bwabiny i bya buseeb bwa kumanyik cidy Bibl uleeb habitaatal diisambil?

BULAB i bukeeh menmen hatwiibufwaafwanyikij ni cibwaash-bwaash. Hady Yehow wiibutal, bis bya baat boos bidy bu kamat ka mwanz kudyey. (Misambw 115:15; Yeshaay 40:15) Ning mutudy bakeeh menmen kudy cibwaash-bwaash, Misambw 145:18, 19 uleeleeb neey: “Udy habwiih ni boos bamubiibiikan, ni boos bamubiibiikan biin-biin. Boos bamuciiciin wiibaakaakish byoos bidyobw naaby bwaal, umvw may maababw mamumbumbobw, umb wiibakuuloh.” Yehow, Cyakahang a bukash boos, i mukat kwiikal habwiih neet: i mukat kwiikal mulund neet! Ni i mukat kumvw masambil miitut! Diisambil i cya bukish cilengel cyeeh cya biin-biin ni dyakatook dilengel diidiin dyeeh didy Yehow mwiitwaakish.

² Ki Yehow wiiyiiy wiitukun mat teng tut bamwambil myand mu mushind udyey mukat. Tutalaay cidy Bibl uleeb habitaatal diisambil.

BWABINY KUSAMBIL YEHOW

3. Bwabiny bikaam usambil Yehow?

³ Yehow i mukat bwa twiisamb nend mu diisambil. I mushind kaay utudy bamanyik nook? Bal Filipw 4:6, 7. Langil ha cidy Mawej wiitukashish bwa kulong: Mukaleng a diiwul ni bulab wiitaatacish menmen bwiibuh ni mukat bwa umwambil mushind uwiiyumvumvw ni myand yiwudy naay.

4. Uw mwiikal usambil Yehow misang yoos, bulund bwiibuh nend bwiiyiiy kukasakan bicy?

⁴ Diisambil dikukwaakwanjok bwa kukashish bulund bwiibuh ni Yehow. Hady balund biisamb diib dyoos bilaalangobw, bambilangan makab maababw ni mushind udyobw bidyumvw, bulund bwaabab bwiiyiiy kukasakan. Ki mudyeby hatusasambil Yehow. Ku dyambulwiish dya Bibl, ukwaakwambil cilaalangey, mushind udyey wiiyumvw ni ciikaley mwa kulong mu mafuk miiyiiy kuuhal. Udy mwa kwiisamb nend misang yoos, umuleej mushind uwiiyumvumvw menmen. Uw mulong nook, bulund bwiibuh nend bwiiyiiy kukasakan menmen.​—Jak 4:8.

TUDY MWA KULONG BINY BWA MAWEJ ITUKUN MAT?

5. I mu mushind kaay utudy bamanyik neey Yehow kiin ukunoh bend mat ku masambil moos?

⁵ Yehow ukukun mat ku masambil moos eeny? Waakweeh. Mu ciisang cya muprofet Yeshaay, Yehow wambiil biin Izaleel neey: “Ning nun balomboh bicy, ciishoh bend nakunok mat, bwaal bikam biinun bidy ni mash.” (Yeshaay 1:15) Tut katuy badimuk, tudy mwa kulong myand yidy mwa kutufweej kuleeh ni Yehow. Mu mushind oow, Yehow kakukunoh bend mat ku masambil miitut.

6. a) Bwabiny diitabij didy ni buseeb? b) I mushind kaay uwudy mwa kuleej neey udy ni diitabij kudy Mawej?

⁶ Tut bakat neey Yehow akun mat ku masambil miitut, tudy ni bwa kwiikal ni diitabij kudyey. (Mark 11:24) Mupostol Pool umvwiijil neey: “Ki, muut ning waakaabumw kiishoh bend mwa kutookel Mawej ku micim biikaley kay mwiitabij Mawej. Bwaal, muut ufweefweej kudy Mawej bikaam iitabij ney Mawej udyok; iitabij ney Mawej uhwaah bamukaakaam bulang bwindiy.” (Ebreh 11:6) Ki kabiin bikumban teng kuleeb neey tudy ni diitabij kudy Mawej. Tudy mwa kuleej diitabij hatukokooyel Mawej diifuk dyoos.​—Bal Jak 2:26.

7. a) Bwabiny tudy ni bwa kwiikal ni kwiihweekesh ni kaneemw hatusasambil Yehow? b) I mushind kaay utudy mwa kuleej neey tuleeleeb myand teng mudyey hatusasambil?

⁷ Tut tusambil Yehow, tudy mwa kwiikal ni kwiihweekesh ni kaneemw. Bwabiny? Tut bakaam kwiisamb ni mukaleng eeny kalombol, twiisasamb nend ni kaneemw. Yehow i Mawej mwiin bukash boos. Nook, tudy mwa kwiisamb nend ni kaneemw kavul ni kwiihweekesh. (Kutang kwa Bwanjil 17:1; Misambw 138:6) Tudy mwa kusambil cikwaabw Yehow ni mucim iitut woos. Tut bikal tumwambil myand mudyey, katwaakwambululoh bend misang yoos masambil mamw-mamw.​—Matewus 6:7, 8.

8. Hatusasambil bwa bwaal kahand tudy mwa kulong biny?

⁸ Hatusasambil bwa bwaal kahand, tulong myand mu dyumvwangan ni masambil miitut. Cileejel, tut tulomb Yehow bwa iitwaakish cyakudy, katwiish mwa kwiikal bakoh. Katwiish mwa kwindil teng iitwaakish hatudy katuy tukal mudimw. Tudy ni bwa kukal mudimw mukasakan ni kwiitab bwa kukal mudimw woos utudy mwa kulong. (Matewus 6:11; 2 Biin Tesalonik 3:10) Tut biikal tusambil, tudy mwa kulong biny bwa Yehow itukwanjok bwa kulek kulong myand yibiih? Tudy mwa kulek myand yoos yibiih yidy mwa kwiituteet. (Kolos 3:5) Kabaak, twaalabulaay majooj kahand madyakal baat biyihanguj habitaatal diisambil.

MAJOOJ KAHAND MADYAKAL BAAT BIYIHANGUJ HABITAATAL DIISAMBIL

9. a) Tudy bwa kusambil ngany? b) Jah 14:6 wiituloolongweesh biny habitaatal diisambil?

⁹ Tudy mwa kusambil ngany? Yeez wiitulongweeshel bwa kulomb “Taat iitut udy mu diiwul.” (Matewus 6:9) Uleebel cikwaabw neey: “Mim nady njil, nady biin-biin, nady buumy. Kakwiishoh bend muut udy mwa kuy kudy Taat hadyey kay muhicil kunady mim.” (Jah 14:6) Tudy ni bwa kusambil teng Yehow. Ni tudy mwa kusambil ku dyambulwiish dya Sambakany Yeez, eecy mu diijin dya Yeez. Bidy ni dyumvwiij kaay? Bwa Yehow kwiitabey masambil miitut, tudy mwa kuneemek mudimw udyey mwaakish Yeez. Teng mutwiibilongel, Yeez wiiyiil ha bulab bwa kwiitukuuloh ku pekaat ni ku lufw. (Jah 3:16; Biin Rom 5:12) Yehow umutekel cikwaabw Mutam a balambul ba milambw ni Mulumbulwiish.​—Jah 5:22; Ebreh 6:20.

10. Kudyok mushind musunguluk utudy mwa kwiikal nend hatusasambil eeny?

¹⁰ Kudyok mushind musunguluk utudy mwa kwiikal nend ha tusasambil eeny? Waakweeh. Yehow kiish wiitulomboh bend bwa kwiikal bat bin, bashikat eeny biiman kwiiwul hatusasambil. Bibl wiituloolongweesh neey, tudy mwa kusambil mu mushind woos utudy bakat ciby ni kaneemw. (1 Cifuk 17:16; Nehemih 8:6; Danyel 6:10, NWT; Mark 11:25) Cidy ni buseeb kudy Yehow, kiin mushind utudy mwa kwiikal hatumusasambil, cidy ni buseeb i kumusambil ni meej malengel. Tudy mwa kusambil ni diiy dikasakan eeny mund-mund, ha cyaab cyoos citudy mwa kwiikal eeny diib dyoos mu munyiny eeny bufuk. Tudy mwa kwiikal bajaadik neey Yehow wiiyiiy kwiitukun mat, ning biikal muut mukwaabw kay mwiitukun mat.​—Nehemih 2:1-6.

11. Tudy mwa kusambil bwa myand kaay?

¹¹ Tudy mwa kusambil bwa myand kaay? Tudy mwa kusambil Yehow bwa myand yishiil-shiilangan, hikal disambil diitut dyumvwangan ni lukat lwindiy. Bibl uleeleeb neey: “I bwaal tudy bamanyik ney wiitumvumvw hatumuloolomb ciit cya ha micim indiy.” (1 Jah 5:14) Tudy mwa kusambil bwa ciit kahand cisunguluk bwiitut eeny? Ing. Kusambil Yehow, bidy bu kwiisamb ni mulund a biin-biin. Tudy mwa kumwambil myand yoos yidy mu meej miitut ni yitudy naay mu micim. (Misambw 62:8) Tudy mwa kumulomb bukash bwa spirit mujilang bwa kulong cidy cilengel. (Luuk 11:13) Tudy mwa kumulomb cikwaabw meej bwa kwangat mahangadik malengel ni diikand bwa kutatameen makab. (Jak 1:5) Tudy mwa kumulomb bwa i tufwiil lus bwa pekaat yiitut. (Efez 1:3, 7) Tudy ni bwa kusambil cikwaabw bwa bakwaabw, cileejel bwa cisak ciitut ni bwa biin kweet baan-balum ni baan-bakaj ba mu cisumbw ciitut.​—Myand yilongel Bapostol 12:5; Kolos 4:12.

12. I biny bidy mwa kwiikal ha cyaab cya kuuhal mu masambil miitut?

¹² I biny bidy mwa kwiikal ha cyaab cya kuuhal mu masambil miitut? I Yehow ni lukat lwindiy. Bikaam tumufwiijok ni mucim aakaabumw bwa byoos bidyey mwiitulongel. (1 Cifuk 29:10-13) I mushind kaay utudy mwa kumvw bwaal oobw? Haakady Yeez ha bulab, ulongweeshel biiyij bindiy mwa kulomb. (Bal Matewus 6:9-13.) Uleebel neey bikaam tulomb bwa diijin dya Mawej diikal dijilang, cikwaabw bwa Bukaleng bwindiy bwiiy ni bwa lukat lwindiy lulongek ha bulab. Umvwiijil neey teng hanyim a tut baman kusambil bwa myand eey ya buseeb buvul, ki hatudy mwa kusambil bwa bitukakaam. Hatuteteek Yehow ni lukat lwindiy ha cyaab cya kuuhal mu masambil miitut, tuleeleej neey, ki bidy ni buseeb buvul kutudy.

13. Masambil miitut mady mwa kwiikal bul kaay?

¹³ Masambil miitut mady mwa kwiikal bul kaay? Bibl kiin muleej bul bwa masambil butudy mwa kulong. Masambil miitut mady mwa kwiikal miihiih eeny maleeh bilondeshel myand yitudy mwa kwiikal naay. Cileejel, kuuhal kwa kudy, diisambil didy mwa kwiikal diihiih, ki didy mwa kwiikal dileeh hatufwiifwiijok Yehow eeny hatumwamwambil myand yiitut. (1 Samweel 1:12, 15) Katwiin mwa kulong masambil maleeh bwa kukemesh baat, bu mwaakady baat bakwaabw bibilong mu ciisang cya Yeez. (Luuk 20:46, 47) Masambil ma nook kaamishoh bend ni buseeb kudy Yehow. Cidy ni buseeb kudyey, i masambil malaalukil mu micim yiitut.

14. Tudy mwa kusambil misang yoos eeny? Bwaal oobw bwiituloolongweesh biny habitaatal Yehow?

¹⁴ Tudy mwa kusambil misang yoos eeny? Ing. Yehow wiitukakashish bwa kwiisamb nend misang yoos. Bibl wiitwambambil neey: “Nwiikal nulomb,” “suminyinaay ni kulomb” ni “Nulomb teng kulomb.” (Matewus 26:41; Biin Rom 12:12; 1 Biin Tesalonik 5:17) Yehow udy teng habwiih bwa kwiitukun mat. Tudy mwa kumufwiijok diifuk dyoos bwa lukat lwindiy ni bwa byoos bidyey wiitulongel. Tudy cikwaabw mwa kumulomb bwa itulombol, itukashish ku micim ni iitwaakish diikand. Tut batal diisambil bu dyakatook, twiiyiiy kusambil Yehow misang yoos hady mushind umweek.

15. Bwabiny kuleeb “amen” kubuleekeel kwa diisambil?

¹⁵ Bwabiny kuleeb “amen” ku bulekel kwa diisambil? “Amen” i bwiin kuleeb neey “ing” eeny “biikal naak.” Kuleeb “amen” i mushind wakuleej neey myand yitudy baleeb mu diisambil, tudy biyileeb ni mucim aakaabumw. (Misambw 41:13, NWT) Bibl wiituloolongweesh cikwaabw neey i bilengel bwa kuleeb “amen” (ni diiy dikasakan eeny mu micim yiitut) ku bulekel kwa diisambil dilong bwa baat boos, bileeleej neey tudy bitab ku byoos bidyobw baleeb.​—1 Cifuk 16:36; 1 Biin Korent 14:16.

MUSHIND UDY MAWEJ WAALABUL MASAMBIL MIITUT

16. Yehow waalalabulok masambil miitut eeny?

¹⁶ Yehow waalalabulok masambil miitut eeny? Ing. Bibl uleeleej neey i yiy “umvumvw kuhambidil kwa baat.” (Misambw 65:2, NWT) Yehow ukukun mat ku masambil ma baat miliyo bamusasambil ni meej malengel, ni waalalabul mu mishind yishilangan.

17. I mushind kaay udy Yehow ukal mudimw ni banjel ni biin mudimw bindiy bwa kwalabuley masambil miitut?

¹⁷ Bwa kwaalabul ku masambil miitut, Yehow ukakal mudimw ni banjel ni biin mudimw bindiy ba ha bulab. (Ebreh 1:13, 14) Cileejel, baat bavul i basambil Mawej bwa kumvwoobw Bibl, ni mutancy mukeeh hanyim, temw wa Yehow mukwaabw kwiiyey kwiibatal. Bibl uleeleej neey banjel bady ni mudimw mutam mu kudiil baat “musah mulengel.” (Bal Myand Yisokolweel Jah 14:6.) Cikwaabw, bavul bakutudy baakady basambil Yehow habitaatal bwaal kahand busunguluk ni bwa dijing kahand, hanyim, mwiin kweet mwaan-mulum eeny mwaan-mukaj biiyiil kwiibakwanjok ni biit byaakadyobw bakaam.​—Tusumw 12:25; Jak 2:16.

18. I mushind kaay udy Yehow ukal mudimw ni spirit windiy mujilang ni Bibl bwa kwaalabuley masambil miitut?

¹⁸ ehow ukakal mudimw ni spirit indiy mujilang bwa kwaalabuley masambil miitut. Hatumuloolomb dyambulwiish bwa kutatameen makab, ukakal mudimw ni spirit windiy mujilang bwa kwiitulomboley ni kwiitwaakish diikand. (2 Biin Korent 4:7) Ukakal cikwaabw mudimw ni Bibl bwa kwaalabuley ku masambil miitut ni kwiitukwanjok bwa kwangat mahangadik malengel. Hatubabal Bibl, tudy mwa kusanganomw verseh yiiyiiy kwiitukwanjok. Cikwaabw, Yehow udy mwa kusak muut mukwaabw hadyey utwaal dyaalabul mu bisangil uleeb myand yitudy naay dijing bwa kumvw. Eeny udy mwa kusak mukuluuh kahand wa mu cisumbw bwa kwiitukwanjokey ni lungeny kahand lwa mu Bibl lwiikal ni buseeb kutudy.​—Kalatih 6:1.

19. Misang yikwaabw tudy mwa kwiiyihanguj neey: I bwabingany Yehow kiish mwanj kwaalabulok masambil miitut?

¹⁹ Misang yikwaabw, tudy mwa kwiiyihanguj neey: “I bwabingany Yehow kiish mwanj kwaalabulok masambil mamim?” Yehow i mumanyik ciisang ni mushind a kwaalabuley masambil miitut. Ni i mumanyik bitukakaam. Mu myand yikwaabw, bikaam tutungunuk ni ku musambil bwa kumuleej neey tumwaamwambil myand teng mudyey ni kumuleej neey tudy ni diitabij dya biin-biin kudyey. (Luuk 11:5-10) Misang yikwaabw, waalalabul masambil miitut mu mushind utudy katuy batakamin. Cileejel, Tut basambil ha bwaal budy bwiitukasakeen, hamut hakwiibufuley, udy mwa kwiitwaakish mushind a kwiibutatameen.​—Bal Filipw 4:13.

20. Bwabiny tudy ni bwa kusambil Yehow misang yoos?

²⁰ I dyakatook kaay ditudy naady bwa kwiisamb ni Yehow mu diisambil! Tudy mwa kwiikal bajaadik neey Yehow wiitukukun mat. (Misambw 145:18) Cikwaabw twiiyiiy kumusambil ni mucim aakaabumw, ni bulund bwiitut nend bwiiyiiy kukasakan.