Yehow​—I Cileejel Cilengel Cyeeh bwa Kufwiilangan Lus

1. Bilondeshel Muleej 7:20, i bwaal kaay bwa biin-biin budy Mukaleng Salomon mwiitulongweesh?

MUKALENG Salomon ufundil neey: “Bwaal kakwiish muut ning waakaabumw hiwul a bulab udy muwaakan muhwiiloh bwa kulong myand yilengel kay ulongoh myand yibiih.” (Mul. 7:20) Bwaal oobw i bwa biin-biin! Tut boos tudy bamulong a bibiih. (1 Jah 1:8) Ki bwabiny tut boos tukaakaam bwa Mawej itufwiil lus ni baat bakwaabw byaabw.

2. Wiiyumvumvw bicy hady mulund neeb a ha micim ukufwiil lus?

² Biin-biin uvuuvuluk diib diwaakady mulongel mulund neeb a ha micim bibiih. Ukaamin bwa kulongolol bubiih aabw ni kuyingajilul bulund bwiinun, nook udy mumulomb lus ni mucim aakaabumw. I mushind kaay uwaakady mwiiyumvw haakady mulund neeb mukufwiil lus ni mucim haakaabumw? Waakady mwiiyumvwok musulakan eeny? Ing, numvwiil cikwaabw musangal!

3. I myand kaay yitwiiyiiy kwiisambil mu ciin bwaal eecy?

³ Tukaakaam bwa Yehow iikal menmen mulund neet a ha micim, ki mu biisang bikwaabw, tudy mwa kwiiy kuleeb eecy kulong myand yidy mwa kumubungamij. Ning biby naak, bwabiny tudy mwa kwiikal batwiishibw neey, Yehow i mukat kwiitufwiil lus? I mushind kaay udy kufwiilangan lus kwa Yehow kushilangan ni kwiitut? Ni bwa kuman, twiiyiiy kutal neey: i bangany bady Mawej ufwiil lus?

YEHOW UDY HABWIIH BWA KUFWIILANGAN LUS

4. Bwabiny bikaam twiikal batwiishibw neey, Yehow udy teng habwiih bwa kwiitufwiil lus?

⁴ Diiy dya Mawej ditujaajadikil neey: Yehow udy habwiih bwa kwiitufwiil lus. Haakady Yehow mwiileej kudy Moyiiz ku Mulund a Sinaay, Utumin mwanjel bwa kumwambil neey: “I mim [Yehow] Mawej! Nady Mawej, ufwiifwiilangan lus, udy micim yimwiit mund bwa mal mamoomon baat, wa ciineng mu kumvw kwa cinj, udy mulamacil ku kulong kwa myand yilengel yivul. Naleeleej hatook micim yaam yilengel kudy baat teng ni ku twiikululwiil cinun hakuvulamin myand yaababw yibiih, kukufwaabal kwaababw ni mpekaat yaabab.’ (Cim. 34:6, 7) Yehow i mulengel ni i Mawej mwiin lus ni udy teng habwiih bwa kufwiil lus biin mpekaat balaalabul micim yaababw.​—Neh. 9:17; Mis. 86:15.

5. Bu mudy Yehow mumanyik baat bilengel, biimusaasak bwa kulong biny bilondeshel Misambw 103:13, 14?

⁵ Bu mudyey Cyakahang iitut, Yehow i mumanyik myand yoos yitudy naay. Bitukekemesh bwa kutal neey, Yehow i mumanyik mu katon ni mu katon myand yidy naay muut woos ha bulab. (Mis. 139:15-17) Nook, utaatal bilem boos bitudy bahyaan kudy balel biitut ba kuuhal. Cikwaabw, i mumanyik myand yoos yitufiifiikil mu shikacil yidy yishiitulul buumuut bwiitut. Bu mudy Yehow mwiitumanyik bilengel biimusaasak bwa kulong biny? Biimusaasak bwa kwiitulongeley myand ni lus.​—Mis. 78:39; bal Misambw 103:13, 14.

6. I mushind kaay uleejel Yehow neey, i mukat kufwiil baat lus?

⁶ Kudy cijaadik cileeleej neey: Yehow i mukat bikasakan kufwiil baat lus. I mumanyik neey, bwa bilong bya muut a kuuhal, Adam, tut boos tudy bamulong a bibiih ni twiiy kufw. (Rom 5:12) Kakwaakadyoh bend mushind wiitut kwiikuuloh eecy muut mukwaabw bwa kwiitukuuloh ku mpekaat ni ku lufw. (Mis. 49:7-9, NWT) Ki, Mawej iitut a lukat uleejel lus ni ulongel bwaal kahand bwa kwiitukuuloh. I biny bilongeley? Teng mudyeby bileej mu mukand a Jah 3:16, Yehow utumin Mwaan indiy a diimung bwa kwiitufwiiley. (Mat. 20:28; Rom 5:19) Yeez wiiyil bwiitut​—kukabey ni kufweey—​bwa kukuuloh muut woos uleeleej ditabij kudyey. (Eb 2:9) I kaakunying kaay kaakady Yehow mwa kwiikal naak hatadiley mwaan indiy waakadyey mukat ufw lufw lubiih, lufw lwa cibaw! Biin-biin, Yehow kaakady mwa kwiitabil mwaan indiy bwa kufwey bu yiiy kay mukat kwiitufwiil lus.

7. Teel bileejel bya baat ba mu Bibl baakady Yehow mufwiil lus ni mucim aakaabumw.

⁷ Bibl i mwiiwul teh ni bileejel bya baat baakady Yehow mufwiil lus ni mucim a kaabumw. (Ef. 4:32) Uvuuvulukok ngany? Misang yikwaabw uvuuvuluk Mukaleng Manaseh. Muut mubiih oow, waakady mulongel Yehow myand yibiih mu mishind yibiih menmen. Waakady uhambidil baamawej ba makos, ni kusakey baat bakwaabw bwa kulongobw byaabw naak. Uzuhil baan bindiy, kwiibalambuley kudy baamawej ba makos bu milambw. Cikwaabw, uteekel luhing lwaakadyey musong lwa mawej a makos mu tempel mujilang a Yehow. Bibl uleeleeb bwindiy ney: “utukil Mawej ni kulong kwa myand yibiih kuuhal kwindiy.” (2 Cif. 33:2-7) Nook, haalabwiil biin-biin Manaseh micim yindiy, Yehow umufwiidil lus ni mucim aakaabumw. Mawej umwiitabil bwa kushaaley cikwaabw mukaleng. (2 Cif. 33:12, 13) Misang yikwaabw udy mwa kulangok cikwaabw bwa Mukaleng Davih, ulongel mpekaat yitam ku mees kwa Yehow, wendel masandy ni waakady muzuhangan. Nook, haakady Davih mwaalabul biin-biin mucim indiy ni mumanyik biin-biin bubiih bulongeley, Yehow umufwiidil lus. (2 Sam. 12:9, 10, 13, 14) Cya biin, tudy batwiishibw neey, Yehow i mukat kwiitufwiil lus. Teng mutwiiyiiy kwiibital, mushind udy Yehow ufwiilangan lus i mushilangan ni mushind udy baat bafwiilangan lus.

KUFWIILANGAN LUS KWA YEHOW I KUSHILANGAN NI KWA BAAT

8. Bwabiny Yehow i Zuj udy mukumban bwa kufwiilangan lus?

⁸ Yehow i ‘Zuj a bulab butuutul.’ (Kbwa. 18:25) Bikaam zuj mulengel iikal mumanyik may bilengel menmen. Ki mudyeby biin-biin bwa Yehow, bwaal i yiy Zuj iitut, ni cikwaabw i yiy wiitutuutumin May ma kulond. (Ye. 33:22) Kakwiish muut udy mumanyik myand yilengel ni yibiih mubondok mu mushind wiiyitaatal Yehow. Bikaam zuj mulengel halong bwaal kaay bukwaabw? Bikaam amanyik bilengel myand yoos kuuhal kwa kulumbulwiishey. Nook, Yehow i yiiy kayend Zuj mulengel.

9. I bwaal kaay budy naabw Yehow mu meej, hadyey wangat dihangadik dya kufwiil eecy kulek kufwiil muut lus?

⁹ Bishilangan ni ba zuj ba baan ba baat, Yehow umvumvw teng mu mushind muwaakan bijaadik byoos bya bwaal boos budyobw bamukwaacil. (Kbwa. 18:20, 21; Mis. 90:8) Kiishoh bend wiimanyin habidy baat batal eecy bumvw. I mumanyik bilengel neey, bilong bidy naaby muut, udy mwa kwiikal mwiibihetel kudy balel bindiy, ku bidyobw bamulongweesh, ni ha cyaab cidyey mushikacil, ni cikwaabw bwa mushind udyey wiiyumvw ni ulang. Yehow ukookontonon cikwaabw mu micim ya muut. I mumanyik bilengel menmen cisaasak muut bwa kulong bwaal kaahand. Kakwiinoh bend bwaal ning bwaakaabumw budy mwa kusokot ku mees kwa Yehow. (Eb 4:13) Nook, hady Yehow ufwiil muut lus, bwaal i mumanyik myand yoos yimutaatal.

10. Bwabiny tudy mwa kuleeb neey, kulumbulwiish kwa Yehow kudy teng kuwaakan ni kulengel? (May Mumbulul 32:4)

¹⁰ Kulumbulwiish kwa Yehow kudy teng kuwaakan ni kulengel. Kiishoh bend ni kabow. Yehow kiishoh bend ufwiil muut lus bwaal udy ni hal mulengel, udy ni bihak, bwa buseeb budyey naabw eecy bwa biheel bivul bidyey naaby. (1 Sam. 16:7; Jak 2:1-4) Kakwiish muut udy mwa kulongweesh Yehow myand kumakand bwa kulongey bwaal kahand eecy kumukos mishik. (2 Cif. 19:7) Mahangadik mindiy kiish wiimangatoh bend bwa i bamumbw mwanz ku makas eecy bwa mudyey wiiyumvw. (Cim. 34:7) Biin-biin, Yehow i Zuj mulengel weeh bwaal i mumanyik myand yoos yitutaatal ni shikacil iitut.​—Bal May Mumbulul 32:4.

11. I mu mushind kaay udy kufwiilangan lus kwa Yehow kushiilangan ni kwa baat?

¹¹ Bafundil Mifund ya mu ciin Ebreh bamanyikil neey, kufwiilangan lus kwa Yehow i kushiilangan ni kwa baat. Baakady bakal mudimw ni mwaak wa mu ciin Ebreh oow, bwa kumvwiij neey: “Yehow ufwiifwiil baat lus luvul, bishilangan ni mushind udy baat balongel baat naab.” Teng Yehow ki udy ni bukash bwa kufwiil mulong a biibiih waalaalabul biin-biin mucim indiy lus. I bihet kaay bituheehet hady Yehow wiitufwiil lus?

12-13. a) I bwaal kaay busaasangeel muut hady Yehow umufwiil lus? b) I bihet kaay bitwiiyiiy kuhet hady Yehow wiitufwiil lus?

¹² Hatwaanyanyish mushind udy Yehow wiitufwiil lus, tusaasangal bwa “biisang bikaakashish,” ni bya kwiikal ni diitalal mu meej ni mucim a mund mutook. Baat kabiin mwa kufwiilangan lus mu mushind udy muut mwa kwiiyumvw nook, teng “Yehow kaayend.” (Yil. 3:19, NWT) Hady Yehow wiitufwiil lus, wiitaatab bwiitut kushaal cikwaabw balund bindiy hakuvulamin mpekaat yiitut yoos, bilong teng bu neey, katwaakadyoh bend balong mpekaat.

¹³ Hady Yehow muman kwiitufwiil lus, kakwiitulumbulwiish eecy kakwiitunyok cikwaabw bwa mpekaat aaw. (Ye. 43:25; Jer. 31:34) Yehow “imufweej bibiih biitut kuleel neet.”b (Mis. 103:12) Hatulaalangil ha mushind udy Yehow wiitufwiil lus bikasakan, tumvumvw musangal muvul bwa kumufwiijok ni bwa kumuciin. (Mus. 130:4) Ki, i bangany bady Yehow mukat kufwiil lus?

I BANGANY BADY YEHOW MUKAT KUFWIIL LUS?

14. I biny bitubalong habiitaatal dihangadik dya Yehow dya kufwiil eecy kulek kufwiil muut lus?

¹⁴ Teng mutubiibilong, dihangadik dya Yehow dya kufwiilangan lus kadiin dimanyin teng a mpekaat mutam eecy mukeeh udy muut mulong. Tudy balong cikwaabw neey, Yehow ukaakaal mudimw ni diimany didyey naady bu mudyey Cyakahang iitut, wiitwaakaakish May ma kulond, ni udy cikwaabw Zuj hadyey wangat dihangadik dya kufwiil eecy kulek kufwiil muut lus. I myand kaay yidy Yehow ukontonon kuuhal kwa kwangatey dihangadik dya kufwiil eecy kulek kufwiil muut lus?

15. I bwaal kaay budy Yehow ukontonon bilondeshel Luuk 12:47, 48?

¹⁵ Bwaal budy Yehow ukontonon i bwa kumanyik ning mulong a mpekaat i mumanyik neey: cyaakadyey ulong, cyaakady cibiih. Yeez i mutookesh bwaal oobw mu Luuk 12:47, 48. (Bal.) Muut wangangat dihangadik ku lukat lwindiy bwa kulong bwaal kahand bubiih ni mumanyik bilengel neey, bwaal buloolongey aabw kabwiin busangeej Yehow, uloolong mpekaat mutam. Yehow udy mwa kwangat dihangadik dya kulek kumufwiil lus. (Mark 3:29; Jah 9:41) Nook, bikaam twiikal bamanyik neey, misang yikwaabw twaakady bamanyik bubiih butwaakady balong. Tudy mwa kutakaminok neey, bady mwa kwiitufwiilok lus mu bwaal oobw eeny? Ing, bidy naak! Bwaal oobw bwiitusaasak bwa kukontonon bwaal bukwaabw budy mwa kulong bwa Yehow angat dihangadik dya kufwiil eecy kulek kufwiil muut lus.

16. Kwaalabul micim i biny, ni bwabiny i bya buseeb kulong nook bwa Yehow i tufwiil lus?

¹⁶ Bwaal bukwaabw budy neey, Yehow ukokontonon ning mulong a mpekaat i mwaalabul biin-biin micim. Kwaalabul micim kumvumwiij biny? Kwaalabul micim i “kwaalabul meej, biikadil, eecy myand yibiih yitudy bahangadij bwa kulong.” Mudy lungeny lwa neey, muut i mumvw bibiih ni wiikukunying bikasakan bwa myand yibiih yidyey mulong, eecy kulek kulong myand yilengel yaakadyey mwa kulong. Muut udy mwaalabul micim udy ni kaakunying kiin teng bwa myand yibiih yidyey mulong, ki cikwaabw i bwa kubotot kwindiy kwa mu myand ya mu spirit kudy kumusak bwa kulong myand yibiih eey. Vuluk neey, bakaleng babidy aab: Manaseh ni Davih balongel mpekaat yitam; nook, Yehow wiibafwiidil lus bwaal baakady baalabul biin-biin micim yaabab. (1 Bak 14:8) Ing, Yehow wiitufwiifwiil lus teng yiy mutal neey, tudy baalabul micim. Ki kwiikunying bwa bwaal eecy bwa mpekaat utudy balong kiin bwaal boos butudy mwa kulong, bikaam kuleej bilong kahand bileeleej neey, tudy bifwiij naay.c Kaabaak tutaatal bwaal bukwaabw budy Yehow ukontonon hadyey ukaam kufwiil muut lus.

17. Kufutuluk kumvumvwiij biny, ni bwabiny kudy ni buseeb hatuleelek kulong cikwaabw mpekaat yitulongel? (Yeshaay 55:7)

¹⁷ Kufutuluk i bwaal bukwaabw bwa buseeb ku mees kwa Yehow. Kufutuluk kumvumvwiij “kwaalabul biikadil.” Mu mushind mukwaabw, tudy mwa kuleeb neey: bikaam muut alek kulong myand yibiih, ni iikal ni shikacil udy Yehow mukat bwa baat bindiy. (Bal Yeshaay 55:7.) Biikaam muut hafutulul meej mindiy, ki alek meej ma Yehow mamulombol. (Rom 12:2; Ef. 4:23) Bikaam iikal mwiiswiik bwa alek kulang kubiih ni bilong bibiih. (Kol. 3:7-10) Cya biin, i diitabij diitut dishimacil mu mulambw a Krist diloolong bwa Yehow iitufwiil lus ni iitutookesh ku bibiih biitut. Yehow wiiyiiy wiitufwiil lus ku dyambulwiish dya mulambw oow, hataataley neey, twendend twiikashishomw bwa kufutulul bilong biitut.​—1 Jah 1:7.

IIKAL MUTWIISHIIBW NEEY, YEHOW WIIYIIY KUKUFWIIL LUS

18. I myand kaay yitubakontonon habitaatal kufwiilangan lus kwa Yehow?

¹⁸ Tuleebayaak mu may makeeh bwa myand yitam yitubisambil mu ciin bwaal eecy. Biin-biin, Yehow ki ufwiifwiilangan lus kuhitok baat boos. Bwabiny tuleeleeb nook? Cya kuuhal, udy teng habwiih bwa kufwiilangan lus. Bwaal bwiibiidy, i mumanyik myand yoos yitudy naay. I mumanyik bilengel menmen kudy kwaaluk mpekaat iitut, i yiy muut mulengel weeh udy mwa kumanyik ning tudy baalabul biin-biin micim. Ni bwaal bwiisaat, hady Yehow wiitufwiil lus, ku mees kwindiy bidy teng bu neey, katwiin balongoh bend mpekaat ning waakaabumw. Bwaal oobw, bwiitwambambulwiish bwa kwiikal ni mucim a mund mutook ni bwiitut kuhet bulang bwindiy.

19. Ning mutudy baat bakiish bawaakan ni tutungunuk ni kulong mpekaat, bwabiny bikaam twiikal ni musangal?

¹⁹ Biin-biin, bu mutucidy baat bakiishbawaakan, twiiyiiy kulong teng mpekaat. Cikwaabw, tudy mwa kukasakan ku micim mu may matusaasangan mu mukand iitut wa Étude perspicace des Écritures, Volum 2, diibij 765 mu (Franseh): “Yehow ukookontonon ni lus kukooyel kwa nyeet kwa biin mudimw bindiy, i mumanyik neey: kabiin bikaam bwa biikal teng bilumbulwiish bwa bilem biloolongobw bya ku mpekaat udyobw bahyaan kudy Adam. (Mis. 103:8-14; 130:3) Bab biikashishomw bwa kwiikal ni shikacil uheehetangan ni lukat lwa Mawej, biiyiiy kwiikal ni musangal. (Fil 4:4-6; 1Jah 3:19-22).” Bwaal oobw bwiitukaakashish menmen!

20. I biny bitwiiyiiy kukontonon mu ciin bwaal ciiyiiy?

²⁰ Tudy ni dyanyish dya kumanyik neey, Yehow udy teng habwiih bwa kwiitufwiil lus hatwiikukunying bwa mpekaat yitudy balong. Nook, i mushind kaay utudy mwa kwiidikij Yehow habitaatal kufwiilangan kwa lus? I mu mishind kaay mudy kufwiilangan kwiitut kwa lus kufwaanakan ni kwa Yehow, ki i mushind kaay udyek kushilangan ni kwiitut? Bwabiny i bya buseeb bwa kumanyik kushiilangan ook? Ciin bwaal ciloolond ciiyiiy kwaalabul majooj aam.