Tungunuk ni kuy kuuhal ha kwiikal ni lukat

1. I myand ya biin-biin kaay yiwulongel hawutwaadijil kulong Bibl?

UDY muvulukok hawutangil kulong Bibl eeny? Waakady misang yikwaabw mukem hawumvwiil neey Mawej udy ni diijin. Cikwaabw misang yikwaabw waakady musulakan hakumanyik neey Mawej kiishoh bend ukabish baat mu Ifernoh wa mudil. Ni umvwiil bilengel hawumanyikil neey kudy mushind iibuh kwiiy kutalangan cikwaabw ni baat bawudy mukat baakady baman kufw ni bwiibuh kwiiy kushikat naabw ha bulab bufutulul Paradiiz.

2. Bilondeshel Biin Efez 5:1, 2, leej muwudy mulong myand ya biin-biin ni muy cikwaabw bikasakan kuuhal mu myand ya mu spirit?

² Uw mulong Diiy dya Mawej bikasakan, wiiyiiy kukat cikwaabw bikasakan Yehow. Lukat ool ludy mwa kukusak bwa kukooyel biwudy mulong. Udy mwangat mahangadik malengel mashimatil mu may matam ma mu Bibl. Udy mwiiy kwiikal ni mushind mulengel wa kutal myand ni udy mwiikal ni biikadil bilengel bwaal udy mukat bwa kusangeej Mawej. Teng bu mudy mwaan wiidikij mulel udy ni lukat, ki muwaakady wend wiidikij Taat iibuh udy mu diiwul.—Bal Biin Efez 5:1, 2.

3. I majooj kaay matudy mwa kwiiyihanguj?

³ Tudy mwa kwiiyihanguj neey: ‘lukat lwaam bwa Yehow i lwiiy kukasakan menmen ni luhit lunaakady naal haniiyil mwiin Krist eeny? Kacy nahet baatiisumw, mushind aam wa kulang ni wa kulong myand i mwiiy kufwaanakan menmen ni wa Yehow—nang-nang hakuleej biin-kweet baan-balum ni baan-bakaj lukat eeny?’ Biby biikal neey kuciishoh bend “muukat bu muwaakady muukat koosook,” kukooyeloh bend mu mabok. Bwaal bwaakaabumw bwa bwiin nook bufikil biin Krist ba mu siyekel a kuuhal. Yeez kaakadyoh bend mwiibalek, ni kiishoh bend mwa kwiitulek. (Yis. 2:4, 7) I mumanik neey tudy mwa kwiiy kwiikal cikwaabw ni lukat lutwaakady naal hatutwaadijiloh kulong myand ya biin-biin.

4. I biny bitwiiyiiy kukontonon mu ciin bwaal eecy?

⁴ Mu ciin bwaal eecy twiiyiiy kwiisambil ha mushind utudy mwa kutungunuk ni kukashish lukat lwiitut bwa Yehow ni bwa baat bakwaabw. Kuunyim twiiyiiy kumanyik mabenesh kaahand matwiikal tut ni baat bakwaabw mwa kuhet hatukaakashish lukat lwiitut.

KASHISH LUKAT LWIIBUH BWA YEHOW

5-6. I makab kaay maakady mupostol Pool muhet mu mudimw indiy a bukajaady, ki i biny bimwambulwiishil bwa kutungunukey ni kukadil Yehow mudimw?

⁵ Mupostol Pool waakady mukat shikacil a musangal mu mudimw a Yehow, ki waakady ni makab mavul maakadyey mwa kutaatameen. Pool waakady ni ciibidil cya kulong lwend ni uy byaab bya kuleeh, ni kabyaakadyoh bend bihehel bwa kulong ngend mu ciisang aacy. Mu ngend yaakadyey ulong, Pool waakady misang yikwaabw ’ukaam kufwiil mu misul yitam’ ni ’biin micim yibiih baakady bakaam kumuzuh.’ Misang yikwabw baakady bamushatul kudy balwiish. (2 Kor. 11:23-27) Ni biin Krist nend kabaakady teng banyish mudimw waakadyey ulong ni mucim aakaabumw bwa kwiimbambulwiish.—2 Kor. 10:10; Fili. 4:15.

⁶ I biny byambulwiishil Pool bwa kutungunuk ni kukadil Yehow mudimw? Pool umanyikil myand yivul habitaatal buumuut bwa Yehow mu Diiy dya Mawej ni ku dyambulwiish dya myand yaakadyey mumanyik. Cikwaabw, Pool wiiyil kutwiishibw neey: Yehow Mawej waakady mumukat. (Rom 8:38, 39; Ef. 2:4, 5) Ni wiiyil kukat Yehow bikasakan. Pool uleejel neey waakady mukat Yehow ku ’midimw yikadiley ni yikadiley biin Krist nend.’—Ebr. 6:10.

7. I biny bitudy bwa kulong bwa kukashish lukat lwiitut bwa Yehow?

⁷ Tudy mwa kukashish lukat lwiitut bwa Mawej hakulong bikasakan Diiy dindiy. Hawubaabal Bibl, teet bwa kujingunun cidy verseh woos uleeb habitaatal Yehow. iyihanguj neey: ‘I mushind kaay udy bwaal oobw buleej neey Yehow i muukat? I tubingil kaay tuusaasak bwa kukat Yehow bilondeshel verseh oow?’

8. I mushind udy kusambil mwa kwiitwambulwiish bwiitut kukashish lukat lwiitut bwa Mawej?

⁸ Mushind mukwaabw utudy mwa kukashish lukat lwiitut bwa Yehow i hakumwambil myand yitudy naay ku micim yidy yitutond menmen. (Mus. 25:4, 5) Ni Yehow wiiyiiy kwaalabul masambil miitut. (1 Jah 3:21, 22) Mwiin-kweet mwaan-mukaj diijin dindiy Khanh, udy mushikacil mu Azih, uleeleeb neey: “Lukat lwaam bwa Yehow lwaakady cya kuuhal lushimatil ha diimany, ki lukat lwiiyil kukasakan menmen hanatadil mwaakadyey mwaalabul masambil maam. Kulong nook kwaakady kulong bwa nakat bwa kulong myand yimusaasangeej.”b

KASHISH LUKAT LWIIBUH BWA BAKWAABW

9. I mushind kaay uleejel Timoteh neey waakady uy kuuhal mu myand ya mu spirit ha kwiikal ni lukat?

⁹ Mivw kaahand kuunyim kwa Pool muman kufutuluk, uhetelangan ni sangwiilum mulengel diijin dindiy waakady Timoteh. Timoteh waakady mukat Yehow, ni waakady mukat baat. Pool wambiil biin Krist ba mu Filipw neey: “Ciishoh bend ni muut mukwaabw, teng yiyaaw [Timoteh] i utukeekeng nend ni utukaakabakan nend cya biin-biin bwiinun.” (Fili. 2:20) Pool kiin uleeb hiinaah bwa ciheel cidy naacy Timoteh cya kwiikal mulongolol a myand eecy cya kwiikal mulong a miisambw ya hatook, ki bwaal bwaakady bumukemesh Pool menmen i mushind waakady Timoteh mukat baan baabw baan-balum ni baan-bakaj. Kakuy kulandul, bisumbw byaakady Timoteh ukadil mudimw byaakady teng bimwiimanyin bwa yiy kuy kibikumbul.—1 Kor. 4:17.

10. I mushind kaay uleejel Anna ni mbaayend lukat lwaakadyobw naal bwa baan baabw baan-balum ni baan-bakaj?

¹⁰ Tukaakaam byeet mishind kaahand bwiitut kwambulwiish biin-kweet baan-balum ni baan-bakaj biin Krist. (Ebr. 13:16) Twangat cileejel cya Anna, udyobw baleej mu ciin bwaal cishaal. Kuunyim kwa ciheeh cikasakan ciman kukushil, yiy ni mbaayend bayiil kakumbul cisak cya Temw a Yehow ni batadil mwaakady ciheeh cinyang musak a nzubw a biin mu cisak aacy. Bu cihet, biin mu cisak kabaakady ni bizang bitook. Anna uleeleeb neey: “twangacil bizang byaabab, twiibiteedyel, ni twaakady biibikom ni twaakady biibicibul. Citulongel aacy cyaakady bwaal bukeeh bwiitut, ki cilongel bwa bulund bwiitut naabw bukasakan teng ni ku leel oow.” Lukat lwaakady naal Anna ni mbaayend bwa baan baabw baan-balum ni baan-bakaj lwaakady lwiibasak bwa kwiibambulwiish mu bilong.—1 Jah 3:17, 18.

11. a) Kwiikashishomw kwiitut kwa kulongel bakwaabw myand ni lukat kudy mwa kwiibalongel biny? b) Bilondeshel Tusumw 19:17, i biny bidy Yehow ulong hatuloolongel bakwaabw myand yilengel?

¹¹ Hatuloolongel baat bakwaabw myand ni lukat ni biikal naabw bilengel, badyaakal teng batal kwiikashishomw kwiitut kwa kuleej mushind udy Yehow ulang ni ulong myand. Ni bady mwa kwanyish bikasakan myand yilengel yituloolong mu mushind utudy katuy mwa kwiiy kumanyik. Khanh, udyobw baleeb ku butambwiil, uvuuvuluk ni lukat aab bady bamwambulwiish. Uleeleeb neey: “Nady ni dyanyish divul bwa biin-kweet boos baan-bakaj bady baatwaalok ku mudimw. Biiyil kuuyangat, ni babiikeen bwa kudy byaakudy biheehel eecy bwa kudy naabw ciit kaahand, ni biiyil kuuhingij cikwaabw kwaam ni kakuy lutat. Nataatal neey i biikashishomw bikasakan menmen. Ni i lukat ki ludy lwiibasak bwa bab kulong nook.” Cya biin-biin, kiin baat boos biikal mwa kwiitufwiijok bwa myand yitubaloolongel. Khanh uleeleeb bwa aab baakady biibambulwiish neey: “Nady mukat bwa kwiibafut bwa myand yaabab yoos yilengel yivul yidyobw baalongel, ki ciin mumanyik cyaab cidyobw bashikacil bab boos. Ki Yehow i mumanyik, ni nasaasambil neey Yehow wiiyiiy kwiibafut bwa cidyobw baalongel.” Khanh udy ni kabingil ka kuleeb nook. Yehow utaatal cikwaabw cilong cilengel cya lukat cituloolongel baat bakwaabw ning cicy ciikal cikeeh menmen. Wiicitaatal bu mulambw a buseeb buvul ni bu diibanj didyey wiiy kuh bulang.—Bal Tusumw 19:17.

12. I mushind kaay udy biin-kweet baan-balum baleej mudyobw ni lukat bwa cisumbw? (Tal cikwaabw bifwaatul.)

¹² Uw mwiikal mwiin-kweet mwaan-mulum, udy mwa kulongelok bakwaabw myand ni lukat ni ulongok mwiibuh moos bwa kwiibambulwiishok eeny? Mwiin-kweet mukwaabw sand diijin dindiy Jordan wiihangujil mukul kaahand habitaatal mushind waakadyey mwa kulong bivul bwa kwambulwiish cisumbw. Bakul baakady bamumb kalumbady bwa mwaakady muy kuuhal mu myand ya mu spirit ni kuunyim bamwaakishil mibel habitaatal mushind waakadyey mwa kulong bivul. Cileejel, uleejel neey Jordan ufiifik ku Nzubw a Bukaleng kuuhal kwa diib ni umbumbish baat bakwaabw mooy, waalaalabul mu bisangil, uloolong mudimw a bukajaady ha ciibidil ni kasumbw kaabab, ni ukaakaam mishind yilengel yidyey mwa kutal yikumban bwa kwambulwiish bakwaabw. Hakooyedyel Jordan mibel eey, kaakady ulong bituh biheel bihyaabihy eeby ki cikwaabw waakady wend ni kukuluuh mu lukat lwaakadyey naal bwa baan baabw baan-balum ni baan-bakaj. Jordan ulongel ni kumanyikey neey hady mwiin-kweet mwaan-mulum ushaal mukwanjok a mudimw, kiinoh bend utwaadij ni kwambulwiish bakwaabw; ki, utuutungunuk ni kwiibambulwiish.—1 Tim. 3:8-10, 13.

13. I mushind kaay udy lukat lusak cikwaabw mwiin-kweet Christian bwa kukumbajey cikwaabw myand yilomb bwa kulongey cikwaabw mudimw a bukul?

¹³ I biny biwudy mwa kulong biby biikal neey waakady ukal mudimw bu mukwanjok a mudimw eecy mukul? Yehow i muvuluk mudimw ulongel ha kal ni lukat lwaakady lukusak bwa kumulong. (1 Kor. 15:58) Utaatal cikwaabw lukat luwutuutungunuk ni kuleej. Mwiin-kweet mukwaabw mwiin Krist umvwiil bibiih haakadyobw bamuful bukul. Cikwaabw, uleeleeb neey: “Nangacil diihangadik dya kulong cyoos cinaakady mwa kulong bwa kukadil Yehow mudimw ni lukat—hakwiikal ni majit kaahand eecy nansh ciy ni majit kaahand.” Hahitil mafuk, bamungijil cikwaabw mu mudimw a bukul. Christian wiitaatab neey: “Naakadyok ni mooy bwa kukal cikwaabw mudimw bu mukul. Ki nangacil dihangadik dya neey biby biikal neey i ku lus lwa Yehow, bileeleej neey i muyiitabil bwa kukal cikwaabw mudimw bu mukul, nady mukat bwa kulong mudimw aaw bwa lukat lunady naal bwindiy ni bwa biin-kweet naany baan-balum ni baan-bakaj.”

14. I biny biwuloolongel ku maalabul matwaal kudy mwiin-kweet mwaan-mukaj wa mu cibunj cya Georgie?

¹⁴ Biin mudimw ba Yehow baloolong cikwaabw myand yileeleej neey i bakat baat naabw. (Mat. 22:37-39) Cileejel, Elena, mwiin-kweet mwaan-mukaj wa mu cibunj cya Georgie, uleeleeb neey: “Cya kuuhal, bwaal bwaakaabumw bwaakady buusak bwa kudiil baat musah cyaakady i lukat lwaam bwa Yehow. Ki haakady lukat lwaam bwa Taat aamim a mu diiwul lwend ni kukasakan, lukat lwaamim bwa baat lwaakady lwend lukasakan byaal. Nateetel bwa kufwanyikij myand yaakadyobw bataatameen ni ciin bwaal cyaakady mwa kuteng micim yaababw. Hanaakady nalang bikasakan bwaabab mu mushind oow, naakady numvw cikwaabw micim yiisak bwa kwiibambulwiish.”—Rom 10:13-15.

MABENESH MATUHEEHET HATULEELEEJ LUKAT HAKWAMBULWIISH BAAT BAKWAABW

15-16. Teng mudyeby mu bifwaatul, i mabenesh kaay matuheehet hatuleeleej lukat hakwambulwiish bakwaabw?

¹⁵ Hatuleeleej lukat kudy biin-kweet, kabiin teng bab baheehet mabenesh. Kuunyim kwa hatwaadijil cihuh cidy cilongek ha bulab butuutul cya COVID-19, mwiin-kweet mukwaabw Paolo ni mukaj indiy bambulwiishil biin-kweet baan-bakaj bakuluuh menmen bwa kwiibalongweesh mushind a kukal mudimw ni byaamw byaabab bwa kudiilobw baat musah. Umw a ku biin-kweet utadil neey byaakady bikasakan kuuhal ni kuunyim wiiyil kumanyik bwa kukal naaby mudimw bilengel. Waakady ni mushind a kubiikan ku dyambulwiish dya cyaamw cindiy baan baabw bwa kwiiyobw kutweel mu Civulukil. Baat makumy masambombw ba kudyobw batweelel ku dyambulwiish dya byaamw bya kwiisamb batalangan! Mwiin-kweet mwaan-mukaj ni baan baabw boos bahetel mabenesh ku dyambulwiish dya kwiikashishomw kwa Paolo ni mukaj indiy. Kuunyim kwa mafuk, mwiin-kweet mwaan-mukaj ufundil Paolo neey: “Waafwaak bwa kwiitulongweesh tut bakaady bakuluuh menmen. Cya kwiiy kuvulaminoh bend mushind udy Yehow mwiitutabaleel ni muwudy mukal mudimw muvul bwa kwiitwambulwiish.”

¹⁶ Myand yikwaabw yimanyikil Paolo bu bwaal bwa buseeb oow yimwaakishil dilongweesh dya buseeb. Uvulukil neey: lukat ludy ni buseeb buvul menmen luyitok diimany eecy biheel bidy muut mwa kwiikal naaby. Uvuuvuluk neey: “Nakadil mudimw bwa kwambulwiish bu mulombol a cijeng. Leel oow, nady mutal neey bakajaady bady mwa kwiikal bavulamin miisamb yinaakady nalong, ki bacidy bavuluk dyambulwiish dya ciit ciniibakishil.”

17. I bangany bakwaabw bady mwa kwiiy kuhet mabenesh hatuleeleej lukat?

¹⁷ Hatuleeleej bakwaabw lukat hakwiibambulwiish, tuhehet mabenesh mu mushind utwaakady katuy batakamin. Jonathan, udy mushikat mu Nouvelle-Zélande, ujaajadik nook. Ku makawul kwa mu diisambombw dikwaabw kwaakady cyuuy, utadil seb’ aa njil wend ni kudiil baat musah mu njil. Jonathan wangacil diihangadik dya kwiikal kuy nend mu disambombw ku makawul bwa kukal nend mudimw haakabumw. Kaakadyoh bend mumanyik ciisang aacy neey waakady mwa kwiiy kuhet mabeenesh bwa cilong cindiy cilengel. “Mu ciisang aacy,” Jonathan uleebel neey, “Cyaakadyoh bend mukat mudimw a buuseb’a njiil. Ki hanaakady mumvw mushind waakady seb’aa njil aaw ulongweesh ni hanatadil bihet byaakadyey muhatul mu mudimw indiy, biisakil biin-biin bwa kukat byaany mudimw oow. Nahetel cikwaabw mulund mulengel weeh unyambulwiishil bwa kuy kuuhal mu spirit, bwa kwiikal ni musangal mu mudimw a buukajaady ni kufweej habwiih ni Yehow.”

18. Yehow i mukat bwa tulong biny?

¹⁸ Yehow i mukat bwa woos wa kutudy atungunuk ni kumuleej lukat ni kwiiluleej baat bakwaabw. Teng bu mutubalong, tudy mwa kukashish lukat lwiitut bwa Yehow hakubal Diiy dindiy ni kulangiloh ni hakwiikal ni ciibidil cya kwiisamb nend ha kumusambil. Tudy mwa kukashish lukat lwiitut bwa biin-kweet baan-balum ni baan-bakaj hatwiimbambambulwiish. Hady lukat lwiitut lukasakan, twiikaakal teng habwiih ni Yehow ni cisak ciitut cya mu spirit. Ni biiyiiy kushaal balund neet buyiil!