Iitab ni kwiihweekesh myand yiwudy kuy mumanyik

1. I mushind kaay udy Yehow mwiituhang, ni bwaabiny?

YEHOW i mwiituhang ni mushind iitut kulangil ha bwaal kaahand, kumanyik myand yihyaayihy, kwiiyumvw, ni kwiiyiteek mu bilong. Bwaabiny i mwiituhang mu mushind oow? Bwaal ukaakaam bwiitut ‘kumanyik mwa kuciin Mawej’ ni bwiitut kwiikal twangat mahangadik ma meej mashimatil ha diimany dijaalal ha tumukaakadil mudimw.​—Tus. 2:1-5; Rom 12:1.

2. a) I mikal kaay yitudy naay? (Yoobw 37:23, 24) (Tal cikwaabw cifwaatul.) b) I myand yilengel kaay yituheehet hatwiitaatab ni kwiihweekesh ney katwiish bamanyik myand yoos?

² Ning mudy Yehow mwiitwaakish bukash bwa kumanyik myand yivul, tudy ni mikal habitaatal myand yikwaabw yitudy katuy bamanyik. (Bal Yoobw 37:23, 24.) Tutalaay cileejel cya Yoobw. Yehow umbil Yoobw majooj mavul maakady mamwambulwiish bwa kumvwey ney kwaakady biit bivul byaakadyey kay mumanyik. Bwaal oobw bumwambulwiishil bwa kwiikaley ni kwiihweekesh ni bwa kulongololey mushind indiy a kulang. (Yoobw 42:3-6) Tut byeet, tuheehet myand yilengel hatwiitaatab ni kwiihweekesh ney katwiish bamanyik myand yoos. Hatuvuuvuluk ney kudy biit bivul bitukiish bamanyik, biitwambambulwiish bwiitut kwiikal ni kwiihweekesh ni kuteekel Yehow micim ney wiiyiiy kwiitwambil biin-biin bitukaakaam bwiitut kumanyik mwa kwangat mahangadik malengel.​—Tus. 2:6.

3. I biny bitwiiyiiy kwiisambil mu ciin-bwaal eecy?

³ Mu ciin-bwaal eecy, twiiyiiy kwiisambil ha myand yitudy katuy bamanyik, ni makab matudy mwa kutwiilangan naam bwa mutudy katuy bamanyik myand eey. Twiiyiiy kutal cikwaabw bwaabiny i bilengel mutudy katuy bamanyik myand yikwaabw. Kwiisambil ha myand eey, kwiiyiiy kukashish diitabij diitut kudy Yehow “muut udy ni kumanyik kwiikwiin” kwa myand ney wiitwambambil myand yoos yitudy bakumbanyin bwiitut kumanyik.​—Yoobw 37:16.

KATWIISH BAMANYIK DIIB DIIKAL BULEKEL MWA KWIIY

4. Bilondeshel Matewus 24:36, i bwaal kaay butudy katuy bamanyik?

⁴ Bal Matewus 24:36. Katwiish bamanyik diib diikal bulekel mwa kwiiy. Ning Yeez haakadyey ha bulab, kaakadyoh bend mumanyik “diifuk eecy diib.”a Kuunyim wambiil bapostol ney, Yehow i yiy udy ni bukookesh bwa kulongolol ciisang cidy myand kaahand mwa kwiiy kulongek. (Myil. 1:6, 7) Yehow i mulongolol ciisang ciikal bulekel bwa bulongolody oobw mwa kwiiy, ki tut katwiishoh bend mwa kumanyik ciisang eecy biin-biin.

5. Bu mutudy katuy bamanyik diib diikal bulekel mwa kwiiy, i biny bidy mwa kwiitufikil?

⁵ Hatutaatal may maleebel Yeez aam, katwiish bamanyik bul bwa ciisang citwiikal mwa kwindil teng ni hiikal bulekel mwa kwiiy. Nook tudy mwa kukaakal lutuul eecy kukooyel mu mikon nang-nang tut baman kwindil diifuk dya Yehow mafuk mavul. Eecy misang yikwaabw, bidy mwa kwiitukasakeen bwiitut kutaatameen tusek twa biin mu cisak ciitut eecy baat bakwaabw bwa mudy bulekel kabuy bwanj kwiiy. (2 Py. 3:3, 4) Tudy mwa kulang ney tut biikal bamanyik diifuk didy bulekel mwa kwiiy twaakady mwa kwiikal ni lutuul luvul ni kutaatameen tusek biheehel menmen.

6. Bwaabiny i bilengel mutudy katuy bamanyik diib diikal bulekel mwa kwiiy?

⁶ Hakulek kwiitwambil diifuk diikal bulekel mwa kwiiy, Yehow i mwiitwaakish mushind iitut kuleej ney tumukaakadil mudimw bwaal tudy bamukat ni tudy bamuteekel micim. Tudy bakat kukadil Yehow mudimw buyiil, kabiish ney diitabij diitut kudyey diiyiiy kuh hiikal bulekel mwa kwiiy. Biikaakal bilengel tut batum meej ku myand yiikal mwa kulongek mu “diifuk dya Yehow” hamut hiitut kwiimatum nang-nang ku diib diikal diifuk eedy mwa kwiiy. Kulong nook kwiiyiiy kwiitwambulwiish bwiitut kudy bulund bukasakan ni Yehow, ni kulong mwiitut moos bwiitut kumusangeej.​—2 Py. 3:11, 12.

7. I biny bitudy bamanyik?

⁷ Tutumaay meej ku myand yitudy bamanyik. Tudy bamanyik ney mafuk ma bulekel matangil mu 1914. Mu Bibl, Yehow i mufundishomw may ma buprofet majaajaadik ney muvw a 1914 i yiy muvw waakady mafuk ma ku bulekel mwa kutang, ni i mufundishomw cikwaabw myand yivul yileeleej mwaakady myand mwa kwiikal yilongek ha bulab kuunyim kwa muvw aaw. Nook, tudy batwiishiibw ney ‘diifuk ditam dya Mawej dikaady habwiih.’ (Sef. 1:14) Tudy bamanyik cikwaabw ney mudimw udy Yehow mukat bwiit kulong i wa kudiil baat “musah mulengel a bukaleng.” (Mat. 24:14) Mwiin musah oow, bendend ni kumudiil baat mu bibunj bit bu ku 240 mu bileebel bihit ha 1 000. Kabiish bikaam ney tumanyik teng diifuk eecy diib bwiitut kwiitwaal bikasakan mu mudimw a bukajaady.

KATWIISH BAMANYIK MWIIKAL YEHOW MWA KULONG MYAND

8. Cyambil cya ney “biloolong mawej” cyumvumvwiij biny? (Muleej 11:5)

⁸ Katwiish teng bamanyik byoos “biloolong Mawej.” (Bal Muleej 11:5.) Cyambil eecy, cyumvumvwiij myand yidy Yehow ulong ni yidyey wiitab bwa ney yilongek bwa kukumbaj lukat lwindiy. Katwiish bamanyik biin-biin tubingil tusaasak Yehow bwa kulekey myand yikwaabw yilongek, eecy mushind wiikaley mwa kulong myand bwa kwiitwambulwiish. (Mis. 37:5) I bikasakan bwa kumvw myand eey teng bu mudyeby bikasakan bwa kumanyik mudy mwaan wend ukuluuh mund mwa maam indiy, bwaal budy ni biin siyans kabay banj kumvw bilengel menmen teng ni kaabaak.

9. Bu mutudy katuy bamanyik biin-biin ciikal Yehow mwa kulong, tudy mwa kutang kulang bicy?

⁹ Bu mutudy katuy bamanyik mwiikal Yehow mwa kulong myand, tudy mwa kweelakan bwa kwangat mahangandik makwaabw. Tudy mwa kweelakan bwa kwiitwaal ni kuvudij mudimw iitut, eecy kushintulul myand mu shikacil iitut bwa kuy kambulwiish cyaab cidyobw bakaam bakajaady bavul. Eecy tudy mwa kutang kweelakan ney katwiish ni dyanyish dya Mawej tut katuy bakumbaj biihacil biitut bya mu spirit, katuy bahet bihet bilengel mu mudimw iitut mukasakan a bukajaady, eecy tut batwiilangan ni makab mu midimw yiitut ya Bukaleng.

10. I biikadil kaay bya buseeb bituheehet bu mutudy katuy bamanyik ciikal Yehow mwa kulong biin-biin?

¹⁰ Bu mutudy katuy bamanyik biin-biin ciikal Yehow mwa kwiiy kulong, biitwambambulwiish bwiitut kwiikal ni biikadil bya buseeb buvul, bu mudy kwiihweekesh. Kwiihweekesh kwiitwambambulwiish bwiitut kumvw ney, Yehow i yiy udy mumanyik cidy cilengel bwiitut. (Ye. 55:8, 9) Tuheehet cikwaabw ni mushind iitut kuteekel Yehow micim bikasakan bwindiy kwiitwambulwiish. Hatuheehet bihet bilengel mu mudimw a bukajaady, eecy mu mudimw a Mawej mukwaabw, tutuutumbish Yehow bikasakan. (Mis. 127:1; 1 Kor. 3:7) Myand yiy kayiy yilongek mu mushind utwaakady batakamin, bikaam tuvuluk ney Yehow i mutal myand yoos. (Ye. 26:12) Tuloolong cituh citudy bakumban mwa kulong ni tutungunuk ni kuteekel Yehow micim ney wiiyiy kulong cindiy cituh. Tudy batwiishiibw ney Wiiyiy kwiitwaakish teng ni buludik butukaakaam, ning Yiy kay mwiitwaakishebw mu mushind ukeekemesh bu Mwaakadyey wiibilong misang yikwaabw hakal.​—Myil. 16:6-10.

11. I biny bitudy bamanyik bidy mwa kwiitwambulwiish?

¹¹ Tudy bamanyik ney Yehow udyaakal teng ni lukat, muwaakan, ni mwiin meej. Tudy bamanyik ney wangangat myand yitumuloolongel ni yituloolongel biin Krist neet ni buseeb buvul. Tudy bamanyik cikwaabw ney, Yehow wiiyiiy kufut baat bady ni lulamat kudyey.​—Ebr. 11:6.

KATWIISH BAMANYIK CYAAKIIY KULONGEK MAALAB

12. Bilondeshel Jak 4:13, 14, i biny bitudy katuy bamanyik?

¹² Bal Jak 4:13, 14. Biin-biin katwiish bamanyik mwiikal shikacil iitut maalab. Bwaal mu bulongolody bwa myand oobw, “myand yitukiish batakamin yiitukwaakwaat tut boos.” (Mul. 9:11, NWT). Nook, katwiish mwa kumanyik ning myand yitudy balongolol yiiyiiy kukumban, eecy ning twiiyiiy kwiikal ni buumy bwiitut kwiiyikumbaj.

13. I mushind kaay utudy mwa kwiiyumvw bu mutudy katuy bamanyik myand yiikal mwa kulongek mu mafuk maciiyiy?

¹³ Bidy mwa kwiitukasakeen bwiitut kutaatameen hatudy katuy bamanyik ciikal mwa kulongek mafuk maciiyiiy. Mushind kaay? Tudy mwa kutang kwiitish mut bwa ciikal mwa kwiiy kulongek, ni biineeby bilong bwa ney tujimbaj musangal iitut. Shiikacil iitut udy mwa kushintuluk, myand yibiih yitudy katuy batakamin yidy mwa kwiitukwaat ni biineeby bidy mwa kwiitukaamin kaakunying, ni hady myand yitudy batakamin kayiy yikumban tudy mwa kumvw bu biitumb mwanz ku makas ni bakooyel mu mikon.​—Tus. 13:12.

14. I biny bitudy mwa kulong bwiitut kwiikal ni musangal muvul? (Tal cikwaabw bifwaatul.)

¹⁴ Hatutaataatameen makeng, tuleeleej ney tukaakadil Taat iitut a mu diiwul mudimw bwaal tudy bamukat. Myand ya mu Bibl yileeleej ney, kabiish bikaam twiikal tulang ney Yehow wiiyiiy kwiitulam ku myand yoos yibiih yidy mwa kwiitufikil, eecy ney i muman kulongolol myand yoos yiikal mwa kwiitufikil. Ki i mumanyik ney, musangal iitut waalaalukil ku kukaam kwa buludik bwindiy ni kwiibukooyel, ki kiish waalukil ku kumanyik kwa ciikal mwa kwiitufikil mu mafuk maciiyiiy. (Jer. 10:23) Hatuloolomb Yehow dyambulwish diib ditwangangat mahangadik, katwiish twiiy twiitishoh bend mut bwa ciikal mwa kwiitufikil, twiiyiiy kutal myand mu mushind mulengel teng bu mwaakady Jak wiiyital haleebeley ney: “Biikal Mawej mwiituteekok twiiyiiy kulong eecy eeny aacyah.”​—Jak 4:15.

15. I biny bitudy bamanyik habitaatal mafuk maciiyiiy?

¹⁵ Ning mutudy katuy bamanyik ciikal mwa kwiitufikil diifuk dyoos, tudy bamanyik ney Yehow i mwiitulay buumy bwa mwendelel mu diiwul eecy ha bulab. Tudy bamanyik ney, kiish mwa kudingomw ni kakwiish ciit cidy mwa kumukaakeesh bwindiy kukumbajey milay yindiy eey. (Tiit 1:2) Teng yiy ki ‘udy mwa kuleeb bulekel bwa bwaal ku butambwiil bwa bubw, ni kuleej kuuhal menmen myand yidy kayiy yanj kulongek.’ Myand yilongekel kal yileeleej ney bwaal oobw i bwa biin-biin. Ki mwiikaleby kabidy bwa myand yiikal mwa kulongek mu mafuk maciiyiiy. (Ye. 46:10) Tudy bamanyik bilengel ney kakwiish bwaal budy mwa kukaakeesh Yehow bwa kwiitukatey. (Rom 8:35-39) Wiiyiiy kwiitwaakish meej, kwiitukashish ku micim, ni kwiitwaakish diikand ditukaakaam bwiitut kutaatameen bwaal kaay boos bwiikal mwa kwiitufikil mu shiikacil iitut. Twiikalaay batwiishiibw ney, Yehow wiiyiiy kwiitwambulwiish ni kwiitubenesh.​—Jer. 17:7, 8.

KATWIISH MWA KUMVW MUDY YEHOW MWIITUMANYIK BILENGEL

16. I biny bidy Yehow mumanyik habiitutaatal, ni wumvumvw bicy bwa bwaal oobw? (Misambw 139:1-6)

¹⁶ Bal Misambw 139:1-6. Cyaakahang iitut i mumanyik myand yiitut yoos, meej matulaalang, ni mutwiiyumvumvw. I mumanyik myand yituleeleeb, ni yidy mu micim yiitut. I mumanyik cikwaabw myand yoos yituloolong, ni bwaabiny twiiyiloolong. Mukaleng Davih uleebel ney: Yehow udy teng habwiih neet ni i mukumban bwa kwiitwambulwiish. Wumvumvw bicy hawumaamanyik ney Mawej a bukash boos, Jam-jam a mu diiwul, Cyaakahang a biit byoos ukutaatabaleel! Davih uleebel ney: “Bwa mim, i bihit kulengel, i bihitok myand yoos yinady mwa kumvw.”​—Mis. 139:6.

17. Bwaabiny bidy mwa kwiitukasakeen bwiitut kwiitab ney, Yehow i mwiitumanyik bilengel?

¹⁷ Misang yikwaabw, bwa myand yaakady yiitufikil mu cisak ciitut, eecy bwa bilel bya kwiitut, eecy bwa myand yitwaakady biitabij kal, bidy mwa kwiitukasakeen bwa kutal Yehow bu Taat wa lukat wiitutaatabaleel. Misang yikwaabw, tudy mwa kulang ney bilem biitut bitulongel hakal byaakady bibiih menmen ni Yehow kiish mwa kwiitumanyik, eecy ney udy kuleeh neet menmen. Ki manyik ney ning Davih byend wiiyumvwiil nook misang yikwaabw. (Mis. 38:18, 21) Ning muut wiikaakashishomw bikasakan bwa kushintululey shiikacil indiy ni kulond may mawaakan ma Mawej udy mwa kulang ney: ‘Biikal Mawej muumanyik biin-biin, bwaabiny wuuloolomb bwa mim kulek shiikacil unady ciy mwa kuman bwa kulek?’

18. Hatwiitaatab ney Yehow i mwiitumanyik bilengel kuhitok mutudy biimanyik tut kaayeet, i myand yilengel kaay yituheehetelok? (Tal cikwaabw bifwaatul.)

¹⁸ Tumanyikaay ney, Yehow i mwiitumanyik bilengel kuhitok mutudy biimanyik tut kaayeet, ni udy mwa kutal myand yilengel kutudy, yitudy tut katuy mwa kutal. Ki ning mudyey utal bilem biitut ni mumanyik bwaabiny twiiyumvumvw eecy tuloolong myand mu mushind kaahand, udy teng mwiitukat. (Rom 7:15) Hatumaamanyik ney Yehow utaatal teng myand yilengel kutudy, biiyiiy kwiitwaakish diikand ditukaakaam bwiitut kumukadil mudimw ni lulamat ni musangal.

19. I biny bitudy bamanyik ni kutwiishiibw koos habitaatal Yehow?

¹⁹ Kakwiish muut ning waakaabumw udy mwa kulandul ney Yelow i lukat. (1 Jah 4:8) Mikenj yindiy yiwaakan yileeleej mudyey mwiitukat, ni mukat ney twiikal ni shiikacil mulengel. Tudy bamanyik ney Yehow i mukat ney tuhet buumy bwa mwendelel. Utwaadil cya kukuul naacy baat bwiitut kuhet bwiin buumy oobw. Cya bukish cya kukuul naacy baat ciitujaajaadikil ney, tudy mwa kukadil Yehow mudimw mu mushind udyey mukat ning mutudy baat bakiish bawaakan. (Rom 7:24, 25) “Tudy bamanyik ney Mawej i mutam muhitok micim yiitut ni i mumanyik myand yoos.” (1 Jah 3:19, 20) Yehow utaatal myand yoos yiituloolong ni i mutwiishiibw ney, tudy mwa kukookesh bwa kulong lukat lwindiy.

20. I biny biikal bwa kwiitwambulwiish bwiitut kulek kwiitish mut bwa myand yitukiish bamanyik?

²⁰ Yehow kiish mwiitusokok myand yoos yitudy naay diijing. Nook kabiish bikaam twiikal twiitish mut bwa myand yitukiish bamanyik, ki tutumaay meej nang-nang ku myand yidy ni buseeb. Hatuloolong nook, tuleeleej ney tudy beeyeleel Yehow “Muut udy ni kumanyik kwiikwiin” kwa myand, ni mucim iitut woos. (Yoobw 36:4) Ning mutukiish tumvw myand yikwaabw kaabaak, tudy bamanyik ney Yehow wiiyiiy kutungunuk ni kwiitulongweesh myand yihyaayihy buyiil, ni tudy ni musangal bwaal katwiishoh bend twiiy twiimanyik kulong kwiitut kwa myand yihyaayihy habitaatal Mawej iitut mulengel oow.​—Mul. 3:11.