Iidikij Yehow hakwiikal kutal myand mu mushind mulengel

1. I mushind kaay udy biin Krist bafwaanakan ni mutond? (Tal cifwaatul.)

“LUHEEH kalwiishoh bend mwa kukosol mutond ning yiy mwiikal mubendam.” Kasumw aak kaleeleej neey, mutond udy mwa kubendam hady luheeh lukubul bikasakan bwa kushaaley mukasakan. Bikaam tut byeet twiikal ni kacy-kacy hatuheehet makab mu shikacil iitut bwa tutungunuk ni kukadil Yehow mudimw ni musangal. I mushind kaay utudy mwa kulong nook? Bikaam tutal myand mu mushind mulengel ni twiibidilangan ni shikacil hady myand yishiituluk mu shikacil iitut ni tuneemek mahangadik ma bakwaabw ni mushind udyobw batal myand.

2. I biikadil kaay biikal mwa kwiitwambulwiish bwa kwiibidilangan ni shikacil yishiishiituluk? Ni i biny biitwiikal mwa kulong mu ciin bwaal eecy?

² Bu mutudy baat ba Yehow, Tudy bakat kutal myand mu mushind mulengel. Tudy bakat cikwaabw kwiihweekej ni kwiikal ni lus kudy baat bakeekeng. Mu ciin bwaal eecy, twiiyiiy kutal mudy biikadil eeby byambulwiish bamw biin Krist bwa kuhit bilengel ni shikacil aabab waakady mushiituluk. Twiiyiiy kutal cikwaabw mudy biikadil eeby mwa kwiitwambulwiish. Cya kuuhal, twanjaay kuhetel dilongweesh ku cileejel ciwaakan cya Yehow ni cya Yeez cya kutal myand mu mushind mulengel.

YEHOW NI YEEZ BATAATAL MYAND MU MUSHIND MULENGEL

3. I mushind kaay utudy bamanyik neey, Yehow utaatal myand mu mushind mulengel?

³ Babiibiikan Yehow neey, “Diibw” bwaal udy ni mucim mukasakan kay uzakal. (Mmu. 32:4) Ning naak, udy cikwaabw utal myand mu mushind mulengel. Bu mudy myand yishiituluk ha bulab, Yehow uloolong myand bilondeshil shikacil oow bwa kihacil kindiy kakumban. Yehow wiituhangil bamufwaanok ni biikal ni mushind a kwiibidilangan ni shikacil yiy mushiituluk. Tuheehet mu Bibl may matam mitwambambulwiish bwa kwangat mahangadik malengel ning tut tutwiilangan ni makab ma bicy. Cileejel cya Yehow kaayend ni may matam madyey mwiitwaakish bitwambambulwiish bwa kumanyik neey, ning mudyey “Diibw,” Yehow udy cikwaabw utal myand mu mushind mulengel.

4. Bilondeshil Biin Leevy 5:7, 11 twaal cileejel cya mudy Yehow utal myand mu mushind mulengel.

⁴ Yehow uloolong myand yiwaakan ni mu mushind mulengel. Kiish ulomb baat bwa kulong myand yihit kukasakan. Tutal cileejel cya mushind waakady Yehow muleej biin Izaleel neey, utaatal myand mu mushind mulengel. Kaakadyoh bend mulomb bahet ni balam-lam bwa kutwaal mulambw wa mushind aakaabumw. Mu mushind mukwaabw waakady mwiitabil baat bwa kutwaalobw milambw bilondeshel shikacil yidyobw naay.—Bal Biin Leevy 5:7, 11.

5. Twaal cileejel cya mudy Yehow wiihweekej ni mwiikal ni lus luvul.

⁵ Kwiihweekej kwa Yehow ni lus luvul ludyey naal biloolong bwa iikal utal myand mu mushind mulengel. Cileejel, Yehow uleejel kwiihweekej kwindiy ha ciisang ciikaaminey kubutul baat babiih mu Sodom. Ku dyambulwiish dya mwanjel indiy, Yehow wambiil Loot bwa kuyey lubil ku bulab bwa mu milund. Loot umvwiil mooy bwa kuy kwiinaak. Nook, waakady mwiisanz bwa kumwiitabilobw yiy ni cisak cindiy bwa kuyobw kasokot mu cibunj cikeeh cya Sowaar cyaakadyobw bakaam kubutul. Yehow kaakadyoh bend mutungunuk ni kwambil Loot bwa along teng cyaakadyey mumwambil bwa kulong. Ki Yehow wiitabil bwa Loot kuyey mu Sowaar ni kaakadyoh bend mubutul cibunj eecy. (Kbwa. 19:18-22) Kuunyim kwa mivw kam yivul, Yehow uleejel lus luvul kudy baat baakady bashikacil mu cibunj cya Niniiv. Utumin muprofet Jonas bwa kwiibambiley baat babiih ba mu Niniiv neey: Bab ni cibunj cyaabab biiyiiy kubutuk. Ki haakady baat ba mu Niniiv biikunying bwa myand yaabab yibiih, Yehow ushiitulwiil meej mindiy ni kaakadyoh bend mubutul cibunj cya Niniiv.—Jon. 3:1, 10; 4:10, 11.

6. Twaal cileejel cileeleej mwaakady Yeez ulond mu diikas dya Yehow hakutal myand mu mushind mulengel.

⁶ Yeez ulondel mu diikas dya Yehow dya kutal myand mu mushind mulengel. Bamutumin ha bulab bwa kudiil “mikook ya mu nzubw a Izaleel yidy yihamban” musah. Ki uleejel mwaakadyey utal myand mu mushind mulengel ha kudiil baat boos musah. Cileejel, maam mukwaabw waakady kay mwiin Izaleel umwiisanjil bwa kondahey mwaan indiy mwaan-mukaj “waakady demoh ukabish.” Yeez umvwiil lus luvul ni kulongey cyaakady maam ukaam, kondahey mwan indiy. (Mat. 15:21-28) Tutal cileejel cikwaabw. Hatangiley mudimw indiy, Yeez uleebel neey: ‘muut woos waakaalek . . . , Niiyiiy byaany kumulek.’ (Mat. 10:33) Ulongelok nook bwa Pyeel waakady mumutun bikuuk bisat eeny? Waakweeh. Yeez umanyikil neey Pyeel waakady mwiikunying bwa cilongeley ni waakady muut a diitabij dikasakan. Hasangukil Yeez, waakady mumweekel Pyeel ni kumujadikiley neey, waakady mumufwiil lus ni mumukat.—Luuk 24:33, 34.

7. Bilondeshil Biin Filipw 4:5, tudy bakat bwa baat bakwaabw bitumanyik bu baat ba bicy?

⁷ Tubatal neey, Yehow Mawej ni Yeez bataatal myand mu mushind mulengel. Ki bwiitut naabw? Yehow i mutakamin bwa twiikal tutal myand mu mushind mulengel. (Bal Biin Filipw 4:5.) Mu Bibl mukwaabw i baalabul verseh oow neey: “Leejaay munudy biin maleej malengel.” Tudy mwa kwiiyihanguj neey: ‘Baat bakwaabw baataatalok bu muut utaatal myand mu mushind mulengel ni ukiish ni micim yikasakan ni ukiish ulondolol myand eeny? Eecy baataatal bu muut mukaayakan ni mwiin ciikaak eeny? Nadyaakalok natungunuk ni kwambil bakwaabw bwa kulongobw myand teng mu mushind unaalaalang bwa balong eeny? Eecy nadyaakal nakun bakwaabw mat ni niitab meej malengel matwaatwaalobw eeny?’ Tut tutal myand mu mushind mulengel, twendend twiidikij Yehow ni dya Yeez. Tulalaay shikacil yibidy yiloolomb bwiitut kutal myand mu mushind mulengel—hady shikacil iitut ushiituluk ni hady baat bakwaabw batal myand mu mushind mushilangan ni wiitut ni hadyobw bangat mahangadik mashilangan ni miitut.

IIKAL UTAL MYAND MU MUSHIND MULENGEL HADY SHIKACIL USHIITULUK

8. I biny bidy mwa kwiitwambulwiish bwa kutal myand mu mushind mulengel hady shikacil ushiituluk? (Tal diimanyish dya kuush kwa diibij.)

⁸ Kutal myand mu mushind mulengel kuloolomb kwiibidilangan ni shikacil hady myand yishiituluk mu shikacil iitut. Kushiituluk ookw kudy mwa kwiitukamin makab matwaakady katuy batakamin. Tudy mwa kubeel lubeel lukasakan. Eecy myand ya mushind a kuhet fwalang yidy mwa kushiituluk ni myand ya cidiidy yidy mwa kushiituluk ni kwiitukamin kavwambw mu shikacil iitut. (Mul. 9:11; 1 Kor. 7:31) Bidy mwa kwiitukasakeen bwiitut kwiitab mashiituluk hady bulongolody bwiitulomb bwa kukadil Yehow mudimw mu mushind mushilangan utwaakady tulong kuuhal eecy hadyobw biitulomb bwa kwambuluk bwa kuy kakadil mudimw cyaab cikwaabw. Ning tut bahet mashiituluk ma bicy, tudy mwa kwiibidilangan bilengel ni shikacil muhyaamuhy, tut balong myand yinaay yiloolond eey: 1) Iitabil shikacil iibuh wa kaabaak, 2) langil ha myand yiwiikal mwa kulong mafuk kuuhal hamut ha kulangil ha yiwaakady muman kulong, 3) tum meej miibuh ku myand yoos yilengel ya mu shikacil iibuh, ni 4) ambulwiish bakwaabw.b Tutalaay mudy bamw biin-kweet baan-balum ni baan-bakaj bahet mabenesh halongelobw nook.

9. I mushind kaay waakady biin maluw baloolong mudimw a bu misiyoneer bataatamen makab maakadyobw kabay batakamin?

⁹ Anyish shikacil iibuh wa kaabaak. Batumin Emanuele ni Francesca bu ba misiyoneer mu cibunj cikwaabw. Teng hatangilobw kulong ciileebel ni kumanyikangan ni biin mu cisumbw cyaabab cihyaacihy, cihuuh cya COVID-19 citangil ni kwiibatekobw ha cyaab cya kaayaabw. Maam indiy a Francesca ufwiil. Francesca ukaamin bwa kuy kudy cisak cindiy, ki bwa cihuuh, kaakadyoh bend mwa kulong lwend. I biny byaakady bimwambulwiish bwa kutaatameen makab moos aam? Cya kuuhal, bu mwaakady Emanuele ni Francesca biin maluw, baakady basambil aakaabumw bwa kuhetobw meej maakady mwa kubambulwiish diifuk dyoos bwa kuhit bilengel ni kaakunying. Yehow waalabwiil diisambil dyaabab ha ciisang ciwaakan ku dyambulwiish dya bulongolody bwindiy. Cileejel, baakady biibakashish kudy mwiin-kweet waakadyobw bumb majooj mu video uleebel neey: “Tut biitabil lwang-lwang shikacil iitut muhyaamuhy, tuheehetulul lwang-lwang musangal iitut ni tuhehet mushind a kulong myand yilengel mu shikacil iitut muhyaamuhy aaw.”c Ciibiidy, bangacil dihangadik dya mushind iitut a kudiil baat musah ku telefon ni tutangil kulombol malong ma Bibl. Ciisat, baakady biitab bwa biin-kweet baan-balum ni baan-bakaj biibambulwiish ni banyishil bikasakan lukat lwaabab. Mwiin-kweet mwaan-mukaj mukwaabw mulengel myand waakady wiibatumin diifuk dyoos mesaaj miikal ni verseh wa mu Bibl mukacy mwa muvw mutuutul. Tut biitab byeet shikacil iitut muhyaamuhy, twiiyiiy kuhet musangal mu biitwiikal bakumban mwa kulong.

10. I mushind kaay waakady mwiin-kweet mwaan-mukaj mukwaabw mwiibidilangan ni mashiituluk matam maakady malongek mu shikacil indiy?

¹⁰ Langil ha myand yiwiikal mwa kulong mafuk kuuhal ni tum meej ku myand yilengel. Mwiin-kweet mwaan-mukaj Christina wa mu cibunj cya Roumanie udy mushikacil mu Japon, ukooyel mu mabok hazuhilobw cisumbw cya Angleh mwaakadyey utweel. Ki ning naak, katungunukiloh bend ni kulang bwa cyaakady cilongek aacy. Ki wangacil dihangadik dya kuy mu cisumbw cya mu ciin Japon hakulongey mwindiy moos bwa kudiil baat musah mulengel mu ciin Japon. Wambiil mwaan-mukaj mukwaabw waakady mwiin mudimw nend bwa kumulongweeshey bwa kuboobol bilengel ciin Japon. Mwaan-mukaj oow wiitabil bwa kukal mudimw ni Bibl ni broshir wa Iikal ni Buumy Buyiil! bwa kulongweesh Christina ciin Japon. Nook Christina umanyikil kuboobol ciin Japon bilengel, ki bwaal bwa buseeb menmen budy neey, mwaan-mukaj oow ukaamin kumanyik bivul habitaatal Bibl. Tut katuy batungunuk ni kulangil ha shikacil iitut wa kal ni biikal ni meej malengel, mashiituluk aam mady mwa kwiituhetesh myand yilengel yitwaakady katuy batakamin.

11. I biny byaakady byambulwiish biin maluw bakwaabw baakady bahet lutat lwa fwalang?

¹¹ Ambulwiish baat bakwaabw. Biin maluw bady bashikacil mu cibunj mudyobw balekesh midimw yiitut, batwaadijil kuhet lutat lwa fwalang haakady cibunj cyaabab cihet lutat lwa fwalang. I mushind kaay waakadyobw biibidilangan ni shikacil oow? Cya kuuhal, bateetel bwa kukeehesh biit byaakadyobw baland. Kuunyim, hamut aabab kutum meej teng ku myand yaabab, bangacil dihangadik dya kutum meej ku mushind waakadyobw mwa kwambulwiish baat bakwaabw hakwiikal ni bivul bya kulong mu mudimw a kudiil baat musah. (Yil. 20:35) Taat uleebel neey: “Bu mutwaakady tuhitij diib divul mu mudimw a kudiil baat musah mulengel, twaakady teng ni diib dikeeh dya kulang bwa makab miitut ni biikal ni diib divul dya kulong myand yidy Mawej mukat bwa tulong.” Hady shikacil iitut ushiituluk, bikaam tuvuluk buseeb bwa kutungunuk ni kwambulwiish baat bakwaabw amaanaaman hakwiibadiil musah mulengel.

12. I mushind kaay udy cileejel cya mupostol Pool mwa kwiitwambulwiish bwa kwiibidilangan ni shikacil yituheehet mu mudimw a bukajaady?

¹² Mu mudimw iitut, bikaam twiikal twiibidilangan ni shikacil hadyey ushiituluk. Baat batudiidiil musah mulengel, bady ni kwiitabij kushilangan habitaatal Mawej ni i baluk ha byaab bishilangan ni bady ni bilel bishilangan. Mupostol Pool waakady wiibidilangan ni shikacil yoos ni tudy mwa kuhetel malongweesh ku cileejel cindiy. Yeez utekel Pool bu “mupostol a baat bakiish biin Yuud.” (Rom 11:13) Nook Pool waakady udiil biin Yuud, biin Krek, baat bady balong mukand, biin ku misok ni batam ba mbul-matady musah mulengel. I bwiin kuleeb neey: Bwa Pool kuhet baat ba mishind yoos, waakady ‘wiitwaal yiy woos bwa baat ba mishind yoos.’ (1 Kor. 9:19-23) Waakady ulang bikasakan habitaatal cyaab cyaakady baat baakadyey wiisamb naabw balukil ni ha myand yidyobw biitabij. Biineeby bimwambulwiishil bwa kwiikal ni kacy-kacy ni kwiisamb ni muut woos mu mushind waakady mwa kumukok kudy Mawej. Tut byeet, tudy mwa kulengej mudimw iitut a bukajaady tut twiibidilangan ni shikacil yoos ni tuteet bwa kulangil ha mushind mulengel utudy mwa kwambulwiish muut woos.

NEEMEK MUSHIND UDY BAKWAABW BATAL MYAND

13. Teel bwaal bubiih budyobw baleej mu 1 Biin Korent 8:9 butudy mwa kulek tut tuneemek mushind udy bakwaabw batal myand?

¹³ Kutal myand mu mushind mulengel kwiitwambambulwiish cikwaabw bwa kuneemek mushind udy baat bakwaabw batal myand. Cileejel, bamw biin-kweet baan-bakaj i bakat kwiipeent, ki bakwaabw naabw kabiish bakat. Bamw biin Krist i bakat kun maal mu mushind mukumban, ki bakwaabw naabw kabiishoh bend bakat kwiimab. Biin Krist boos i bakat kwiikal ni makand ma nyeet malengel, ki kabiishoh bend basungul mishind yaakaabumw habitaatal londah. Tut tulang neey myand yiitut yoos yiyaay teng bilengel ni tusak biin-kweet baan-balum ni baan-bakaj bwa balong myand teng bu baatut, tudy mwa kuhambwiish bakwaabw ni kukabulul biin-kweet. Biin-biin, katwiish bakat kulong nook! (Bal 1 Biin Korent 8:9; 10:23, 24) Tutalaay bileejel bibidy bileeleej mudy kukooyel ku may matam ma mu Bibl mwa kwiitwambulwiish bwa kwiikal ni kacy-kacy ni kulam diitalal.

14. I may matam kaay mady mwa kwiitulombol habitaatal kuvwaal kwiitut ni kulongolol kwiitut kwa sik?

¹⁴ Bizang ni sik. Yehow kiishoh bend mwiitwambil bwa bizang bitudy mwa kuvwaal, ki i mwiitwaakish may matam ma kulond. Bikaam tuwaal mu mushind udy mulengel bwa biin mudimw ba Mawej, mushind uleeleej mutudy ni meej malengel ni twiihweekej ni ‘meej malengel.’ (1 Tim. 2:9, 10; 1 Py. 3:3) Nook katwiish bakat bwa bizang biitut bikok meej ma baat boos kutudy. May matam ma mu Bibl miiyiiy kwambulwiish bakul bwa kulek kumb yaabab mikenj habitaatal mushind a kuvwaal ni wa kulongolol sik. Cileejel, bakul ba cisumbw kaahand bakaamin bwa kwambulwiish bamw baasand baakady babeyesh sik bu basaand boos bady ni sik yikeeh ki yilam bibiih. I mushind kaay udyobw mwa kwiibambulwiish kabay biibumbil yaabab mikenj? Mulombol a cijeng ubelel bakul bwa kwambilobw biin-kweet, “Uw mwiikal kuuhal kwa baat bavul ni meej ma baat boos mam miikal kamay matum ku biwuleeleeb , ni baat bab bashaal bakulengamin bituh, manyik neey: Bizang biibuh ni sik yibuh kabiin biiwaah.” May maheehel aam mambulwiishil biin-kweet basangwiilum bwa kumvwobw cyaakadyobw mwa kulong ni mambulwiishil bakul bwa kumvw cyaakadyobw kabay mwa kulong.d

15. Bilondeshil Biin Rom 14:5, i mikenj ni may matam kaay madyobw bateel mu Bibl mady mwa kwiitwambulwiish bwa kusungul mishind ya londah yitudy bakat?

¹⁵ Londah. Mwiin Krist woos udy ni bwa kwangat dihangadik bwa makand ma nyeet yindiy. (Kal. 6:5) Kudy teng mikenj yikeeh mu Bibl bu mudy mukenj wiituloolomb bwa kulek kudy mash ni myand ya miidim, ni mikenj yitaatal mishind ya londah yitudy mwa kwiitab. (Yil. 15:20; Kal. 5:19, 20) Ki bwa myand yikwaabw eey, bady mwa kwiisungwiil bab kaayaabw mishind ya londah yidyobw mwa kwiitab. Bamw baat bayaay teng ku lupitaady bwa kwiibondahobw, bakwaabw naabw i bakat mishind yikwaabw ya londah. Tudy mwa kwiikal batwiishibw kaayeet keet neey: Mushind kaahand wa londah wambambulwiish eecy udy ni buuhund kaahand, ki bikaam tuneemek bukenj budy naabw biin-kweet baan-balum ni baan-bakaj bwa kwiiyangacil mahangadik mataatal londah lwaabab kaayaabw. Nook bikaam tuvuluk myand yinaay eey: 1) Teng Bukaleng bwa Mawej ki bwiikal mwa kondah mabenj moos mady naam baat buyiil. (Ye. 33:24) 2) Bikaam mwiin Krist woos iikal mutwiishibw menmen bwa cidy cilengel bwindiy hadyey wangat dihangadik ditaatal makand ma nyeet yindiy. (Bal Biin Rom 14:5.) 3) Katwiin mwa kulumbulwiish bakwaabw bwa mahangadik maabab ni katwiin mwa kulong bwaal kaay boos budy mwa kwiibahambwiish. (Rom 14:13) (4) Biin Krist baleeleejangan lukat ni i bamanyik neey: Kaacyumw ka cisumbw kady ni buseeb buvul kuhitok ni meej malaalangobw. (Rom 14:15, 19, 20) Tut bavuluk myand yinaay eey, twiiyiiy kulam bulund bwiitut ni biin-kweet baan-balum ni baan-bakaj ni diitalal diiyiiy kwiikal mu cisumbw.

16. I mushind kaay udy mukul mwa kuleej mudyey ni meej malengel hadyey mu cisangil ni bakul bakwaabw? (Tal cikwaabw cifwaatul.)

¹⁶ Bikaam bakul batwaal cileejel cilengel cya kwiikal kutal myand mu mushind mulengel. (1 Tim. 3:2, 3) Cileejel, mukul kiish mwa kutakamin neey biiyiiy kwiitab teng dihangadik dindiy bwaal i mukuluuh kudy bakul bakwaabw. I mumanyik neey spirit a Yehow udy mwa kusak mukul kaay woos bwa kuleeb bwaal kaahand bwiikal mwa kwiibambulwiish bwa kwangat dihangadik dya meej. Hiikal bakul boos biitab dihangadik eedy ni iikal dihangadik eedy kadiy dilekangan ni may matam ma mu Bibl, mukul udy ni meej malengel wiiyiiy kut dihangadik eedy nyam ku mikon ning yiy mwiikal mukat ni dihangadik dikwaabw.

MABENESH MATUHEEHET HATUTAATAL MYAND MU MUSHIND MULENGEL

17. Biin Krist bataatal myand mu mushind mulengel baheehet mabenesh kaay?

¹⁷ Kutal myand mu mushind mulengel, Kwiiyiiy kwiitwambulwiish mu mishind yivul. Twiiyiiiy kudy bulund bulengel ni biin-kweet baan-balum ni baan-bakaj ni twiiyiiy kwiikal ni diitalal mu cisumbw. Twanyanyish baat ba mishind yishil-shilangan ni ba bilel bishilangan bady mu baat ba Yehow. Ni i bilengel bwa kumanyik neey: Ning mutudy bashilangan, tumuhaahambidil mu kacayumw bu biin mu cisak. Tut boos tudy ni musangal a kumanyik neey tuloolond mu diikas dya Yehow Mawej utaatal myand mu mushind mulengel.