Yehow wiitujaajaadikil neey wiiyiiy kufutulul bulab bwa bushaal Paradiiz

1. I musah kaay waakady muprofet Yeshaay mwambil biin Izaleel?

MUPROFET Yeshaay uleeleeb bwa Yehow neey: i “Mawej a biin-biin.” Mwaak udyobw baalabul neey: “biin-biin” umvumvwiij bituh neey “amen.” (Ye. 65:16) “Amen” umvumvwiij neey “biikal teng naak,” eecy “bidy naak.” Hakaakalobw mudimw ni mwaak “amen” mu Bibl bwa Yehow eecy Yeez, i bwa kujaadik neey bwaal kaahand i bwa biin-biin. Nook, musah a Yeshaay wambiiley biin Izaleel waakady wa biin-biin wa neey: Bwaal budy Yehow muman ni kuleeb i bwa kuteekel micim. Cya biin-biin, Yehow ukuukumbaj teng milay yindiy.

2. Bwabiny tudy mwa kuteekel Yehow micim mu myand yidyey mwiitulay mu mafuk miiyiiy, ni i majooj kaay matwiiyiiy kukontonon?

² Tudy mwa kuteekel byeet Yehow micim mu milay yindiy bwa mafuk maciiyiiy eeny? Habwiih ni mivw 800 haanyim ha ciisang cya Yeshaay, mupostol Pool umvwiijil bwabiny milay ya Mawej yidyaakal teng ya kuteekel micim. Pool uleebel neey: ‘Mawej kiish mwa kudingomw ning bikeeh.’ (Ebr. 6:18) Lang ket neey: kasul kakiin mwa kutwaaloh bend mwanz mutalal ni wa mukel. Bya mushind aakaabumw, Yehow i humb a myand ya biin-biin, ni kiin mwa kudingomw. Nook, tudy mwa kuteekel Yehow micim yiitut yoos mu myand yoos yileeleebey, ni myand yikaley bwa kwiitulongel kuuhal ookw. Mu ciin bwaal eecy, twiiyiiy kutal majooj aam: I biny bidy Yehow mulay bwa kwiiy kwiitwaakish mu mafuk maciiyiiy? I cijaadik kaay cicy Yehow mwiitwaakish cileeleej neey wiiyiiy kukumbaj mulay indiy?

I BINY BIDY YEHOW MULAY?

3. a) Bilondeshel Myand Yisokolweel Jah 21:3, 4, i mulay kaay udy ni buseeb buvul kudy biin mudimw ba Yehow? b) I biny bidy bakwaabw balong hatwiibadidiil mulay oow?

³ Mulay utwiiyiiy kutal udy ni buseeb kudy biin mudimw boos ba Mawej ha bulab butuutulul. (Bal Myand Yisokolweel 21:3, 4.) Yehow i mulay neey mu mafuk miiyiiy ’lufw kalwiishoh bend lwiikalok, kakwiishoh bend kuhing kwiikal kudil kwa lufw, ning kwaabakan, ning biitiit.’ Bavul ba kutudy bakaakal mudimw ni verseh eey bwa kukashish baat badyobw badiil musah ku micim habitaatal shikacil a mu Paradiiz. I biny bidy baat bakwaabw balong hatwiibaabambil bwa mulay oow? Bady mwa kuleeb neey: “Myand eey i yilengel ki ciishoh bend niitab neey yiiyiiy kulongek biin-biin.”

4. a) I biny byakaady Yehow mumanyik ni muman kutal? b) Cikwaabw yiy muman kulay bwaal oobw, i biny bikwaabw bilongeley?

⁴ Biin-biin, haakady Yehow mulombol mupostol Jah ku dyambulwiish dya spirit mujilang bwa kufundey mulay oow a kuhet buumy mu Paradiiz, waakady mumanyik neey twaakady mwa kudiil baat bakwaabw kutakamin ook hatwiibadiidiil musah a Bukaleng. Yehow utadil kal neey bavul biiyiiy kutal mulay a “myand yeeny” eey bu yikasakan bwa kwiiyiitab. (Ye. 42:9; 60:2; 2 Kor. 4:3, 4) I mushind kaay utudy mwa kujaadikil bakwaabw—ni tut biin—neey mabenesh madyobw baleej mu mukand a Myand Yisokolweel Jah 21:3, 4 miiyiiy makumban biin-biin? Yehow kiin teng muleeb bwa mulay ukaakashish ku micim oow, ki i mutwaal cikwaabw tubingil tudy mwa kwiitusak bwiitut kwiikal ni diitabij mu mulay oow. I tubingil kaay tudyey mutwaal?

YEHOW WIITUJAAJAADIKIL NEEY MULAY INDIY WIIYIIY KUKUMBAN

5. I tubingil kaay twiitusaasak bwiitut kuteekel Yehow micim mu mulay indy habitaatal Paradiiz, ni i kweeh kutudy mwa kwiituhetel?

⁵ Twiiyiiy kuhet tubingil twiitusaasak bwiitut kweeyeleel Yehow mu mulay indiy wa Paradiiz mu verseh eey. Tubaabal nook: “Naak waakady mushikat mu kwaas a bukaleng uleebel ney: Kaabaak, ‘naloolong myand yoos yihyaahihy.’ Kuunyim uuyambiil ney: ‘Fund, bwaal may ma mim aam i ma biin-biin, i mawaakan kuteekel micim.’ Uhingil waaleeb cikwaabw ney: ‘Byoos biwaakan! Mim nady Alfah ni Omekah, butambwiil ni bulekel.’”—Yis. 21:5, 6a.

6. Bwabiny bijaadik bidy mu mukand a Myand Yisokolweel Jah 21:5, 6, bikaakashish kweyeeleel kwiitut mu mulay a Mawej?

⁶ Bwabiny verseh ya mu Bibl eey yikaakashish kweeyeleel kwiitut mu mulay a Mawej? Mu mukand wa neey: Buakabuluibua—Nkomenu wabu munene ukadi pabuipi! i baleejomw bwa verseh eey neey: Yehow i mulong bu neey i muman kuteek sinyatiir ha mukand a luhang udyey mulongel biin lulamat, mukand wiikal mwa kwiibahetesh bukenj bwa kuhetobw mabenesh mu mafuk miiyiiy.b Mulay a Mawej oow udy mu mukand a Myand Yisokolweel Jah 21:3, 4. Ni cikwaabw mu verseh 5 ni 6, uleeleeb cikwaabw mu may mindiy ma bulekel bwa kwiitujaadikil neey wiiyiiy kukumbaj biin-biin bwaal budyey mulay.

7. I ngany utaatang kuleeb mu verseh mwiitaan ni bwabingany may aam i ma habwaah?

⁷ Mawej wiitujaajadikil mu may mindiy ma butambwiil ma mu verseh 5 ma neey: “Naak waakady mushikat mu kwaas a bukaleng uleebel neey.” (Yis. 21:5a) May aam i ma habwaah bwaal i musang umw a ku misang yisat mu mukand a Myand Yisokolweel Jah yidy Yehow muleeb kaayend. Nook cijaadik eecy kaciin citwaal kudy mwanjel a bukash, ni kudy Yeez usangukil, ki Yehow kaayend ki utwaadileecy! Bwaal oobw buleeleej biin-biin neey may aam i makutekel micim. Bwabiny tuleeleeb nook? Bwaal Yehow ‘kiish udingomw.’ (Tiit 1:2) Bwaal oobw i cijaadik cya neey may matubaabal mu mukand a Myand Yisokolweel Jah 21:5, 6 i makuteekel micim yitut yoos.

“KAABAAK, NALOOLONG MYAND YOOS YIHYAAYIHY”

8. Bilondeshel Yeshaay 46:10, i mushind kaay udy Yehow uleej neey mulay indiy wiiyiiy kukumban biin-biin?

⁸ Tukotononaayaak diiy dya neey “Talaay!” (Yis. 21:​5, NWT) Mwaak wa mu ciin Krek udyobw baalabul neey “Talaay!” I bakal nend mudimw misang yivul mu mukand a Myand Yisokolweel Jah. Mukand mukwaabw udyobw balayidil uleeleej neey mwaak a cikem oow i bakal nend mudimw bwa kukok meej ma ubaabal ku bwaal budyobw baleej buloolond.” I bwaal kaay bwiiyiiy haanyim ha mwaak a cikem oow? Mawej uleeleej neey: “Naloolong myand yoos yihyaayihy.” Biin-biin, Yehow uleeleeb bwa mwiikal myand mwa kwiiy kushintuluk, ki kudyey mulay oow i wa biin-biin bwa kukumban diib didyey uleeb neey myand yiiyiiy kushintuluk ni kudyey bidy bu neey yikaady yitwaadij kulongek.—Bal Yeshaay 46:10.

9. a) Mu cyambil eecy: “Naloolong myand yoos yihyaayihy,” i midimw kaay yibidy yidy naay Yehow yidyobw baleejomw? b) I biny biikal mwa kufikil “diiwul” ni “bulab” bidyok kaabaak?

⁹ Tukontononaay cyambil ciloolond cidy mu Myand Yisokolweel Jah 21:5 cya neey: “Naloolong Myand yoos yihyaayihy.” Mu shapitil wa mu Bibl oow, mu cyambil oomw baleeleeb bwa midimw yibidy yidy naay Yehow—cya kuuhal, kubutul bulongolody bwa kal, ni ciibiidy kuteek bulongolody buhyaabuhy. Cya kuuhal, i biny biikal Yehow mwa kwiiy kubutul? Mu Myand Yisokolweel Jah 21:1, yoow tubal nook: “Diiwul dya kuuhal ni bulab bwa kuuhal bijimbanyin.” “Diiwul dya kuuhal” I makaleng ma cidiidy mady ni bwenzej bwa Sataan ni bademoh bindiy. (Mat. 4:8, 9; 1 Jah 5:19) Hadyobw baleeb bwa “bulab” mu Bibl, bady mwa kuleeb bwa baat badyoh. (Kbwa. 11:1; Mis. 96:1) Nook, “bulab bwa kuuhal” buleeleej baat babiih badyok leeloow. Yehow kaakwiiy kwiibufutululoh bend, eecy kulongolol “diiwul” ni “bulab” bidyok leeloow; ki, wiiyiiy kwiibifulok. Wiiyiiy kuhingij ha cyaab cya biby “diiwul dihyaadihy ni bulab buhyaabuhy”—mwaamw neey, mbul-matady muhyaamuhy ni baat bawaakan.

10. I biny biiyiiy kulong Yehow bwa biiy bihyaabihy?

¹⁰ Mu Mukand a Myand Yisokolweel Jah 21:5, tubaabalomw cikwaabw bidy Yehow uleeb bwa biit bihyaabihy biikaley mwa kulong. Tal cidy Yehow kay muleeb: “naloolong myand yihyaahihy yoos.” Ki, i muleeb neey: “Naloolong myand yoos yihyaayihy.” Yehow wiiyiiy kulong bwa biit byoos biiy bihyaabihy, i bwiin kuleeb neey wiiyiiy kondah bulab ni baat bwa kushaalobw bawaakan. Teng muleebel Yeshaay, bulab butuutul bwiiyiiy kushaal cyaab cilengel cyeeh—bu mwaakady budimy bwa Eden. Cikwaabw wiiyiiy kulong bwiitut kushaal baat bahyaabahy hakondah muut woos wa kutudy. Balemen, bafw mees, ni bipoop biiyiy kwiibondah, ni bafw byaabw biiyiiy kwiibabuush bwa kwiikalobw ni buumy.—Ye. 25:8; 35:1-7.

“MAY MA MIM AAM, I MA BIIN-BIIN, I MAWAAKAN KUTEEKEL MICIM. . . . BYOOS BIBAAWAAKAN!”

11. I diiy kaay ni kabingil kaay byaakady Yehow mwaakish Jah?

¹¹ I biny bikwaabw bidy Mawej wiitujaadikil? Yehow wambiil Jah neey: “Fund, bwaal may ma mim aam i ma biin-biin, i mawaakaan kuteekel micim.” (Yis. 21:5) Yehow katwaadiloh bituh Diiy dindiy eedy bwa “kudifundobw.” Ki waakady mutwaal cikwaabw kabingil. Uleebel neey: “Bwaal may ma mim aam i ma biin-biin, i ma kuteekel micim”—i bwiin kuleeb neey: May ma Mawej i ma kweeyeleel ni i majaalal. Tuleeleej dyanyish bwa mwaakady Jah mukooyel diiy dimwambilobw bwa “kwiidifund.” Tudy mwa kubal myand habitaatal mulay a Mawej bwa Paradiiz ni kulangil ha mabenesh malengel mady miitwimanyin kuuhal ook.

12. Bwabiny Yehow waakady mwa kuleeb hatook neey: “Byoos bibawaakan!”

¹² I biny bileeleeb Mawej kuunyim? “Byoos bibaawaakan!” (Yis. 21:6) Kaabaak Yehow uleeleeb bu neey myand yoos yidyobw baleej habitatal Paradiiz ulayilobw yikaady yiman ni kukumban. Ni udy mwa kuleeb bilengel mu mushind oow bwaal kakwiin bwaal ning bwaakaabumw budy mwa kumukaakadish bwa kukumbajey kiihacil kindiy. Yehow uleeleeb bwaal bukwaabw bwiitujaajadikil neey mulay indiy wiiyiiy kukumban biin-biin. I biny bidyey muleeb?

“MIM NADY ALFAH NI OMEKAH”

13. Bwabiny Yehow uleebel neey: “Mim nady Alfah ni Omekah”?

¹³ Teng bu mutubiibital ku butambwiil, Yehow kaayend wiisambil ni Jah mu myand yital bu mu cilot bikuuk bisat. (Yis. 1:8; 21:5, 6; 22:13) Ku cikuuk cyoos cya ku bikuuk bisat eeby, Yehow uleeleeb bwaal bwaakaabumw oobw neey: “Mim nady Alfah ni Omekah.” Dilet dya alfah i dya kuuhal mu alfabeh wa ciin Krek, ni dilet dya Omekah i dilet dya bulekel dya alfabeh. Hady Yehow ukal mudimw ni dyumvwiij dya “Alfah ni Omekah,” uleeleej neey hadyey utang kulong bwaal kaahand, wiibumaaman mu mushind mulengel.

14. a) Twaal cileejel cya ciisang cileebel Yehow neey: “Alfah” ni ciisang ciikaley mwa kwiiy kuleeb mu mushind kaahand neey: “Omekah?” b) I biny bidyobw biitujaadikil mu Kutang kwa Bwanjil 2:1-3?

¹⁴ Ahangil Yehow Adam ni Eev, uleejel kiihacil kindiy ka ku butambwiil bwa baat ni bwa bulab. I baleeb mu Bibl neey: “[Mawej] wiibafiidil kis, wiibambil ney: ‘Lelanganaay, nuvulanganaay, nwiiwujaay bulab teeteet, dyaacilaay bya ha bulab byoos haash.’” (Kbwa. 1:28) Nook, ha ciisang aacy, Yehow uleebel neey: “Alfah.” Uleejel biin-biin kiihacil kindiy ka neey: Kwiikaakal ciisang ciikaal lelakan ya Adam ni Eev yikookoyel Mawej mwa kushaalobw bawaakan ni kwiiwuj bulab ni kwiibufutulul Paradiiz. Mu mafuk ma ciiyiiy Yehow wiiyiiy kuleeb mu mushind kaahand neey “Omekah.” Hamanyiney kuhang “diiwul ni bulab, ni byoos bidy ha bulab,” Yehow utwaadil cijaadik. Cidy mu Kutang kwa Bwanjil 2:1-3. (Bal.) Yehow uleebel neey diifuk dya mwandamuteket dyaakady dijilang. Byumvumvwiij biny? Yehow wiitujaajadikil neey wiiyiiy kukumbaj kiihacil kindiy bwa baat ni bulab. Kiihacil aak kaakady mwa kwiiy kukumban koos ku bulekel kwa diifuk dya mwandamuteket.

15. Bwabiny bimweekel misang yikwaabw bu neey Sataan waakady mukaakesh Mawej bwa kukumbajey kiihacil kindiy bwa baat?

¹⁵ Kuunyim kwa Adam ni Eev baman ni kukufwabeel Mawej, biiyil ba mulong a bibiih ni basambulujil lelakan yaabab bubiih oobw ni lufw. (Rom. 5:12) Nook, bimweekel misang yikwaabw neey Sataan waakady mukaakadish kiihacil kaakady naak Mawej ka kwiiwuj bulab ni baat bawaakan ni bakookooyel. Bimweekel neey Sataan waakady ulong bwa Yehow akaakal bwa kuleebey neey “Omekah.” Sataan waakady misang yikwaabw ulang neey Yehow kaakady ni mushind a kukumbaj mulay indiy. Umw a ku mishind waakady wa kuzuhey Adam ni Eev ni kuhangey biin maluw bakwaabw bawaakan bwa kukumbajey kiihacil kindiy bwa baat. Bu Mawej mulong naak, Dyaabol waakady an mwa kwiiy kumufundomw neey i mwiin makos. Bwabiny? Bwaal, bilondeshil may madyobw bafund mu Kutang kwa Bwanjil 1:28, Yehow wambiil Adam ni Eev neey, lelakan yaabab yaakady mwa kwiiy kwiiwuj bulab.

16. Bwabiny Sataan waakady mwa kulang neey waakady mwa kufundomw Yehow neey i mukaakal kukumbaj myand yidyey ulay?

¹⁶ I dihangadik kaay dikwaabw dyaakady Sataan ulang neey Yehow waakady mwa kwangat? Misang yikwaabw Sataan waakady ulang neey Yehow waakady mwa kwiitabil Adam ni Eev bwa kulelobw baan bakiish bawaakan baakady kabay ni mushind a kushaalobw bawaakan. (Mul. 7:20; Rom. 3:23) Mu bwaal oobw, Dyaabol waakady mwa kwiiy kufundomw Yehow neey i mukaakal. Bwabiny? Bwaal kulong nook kakwaakady mwa kukumbaj kiihacil ka Mawej, ka kwiiwuj Paradiiz ni baat bawaakan, lelakan ya Adam ni Eev yaakady mwa kukooyel Mawej.

17. I biny bilongel Yehow bwa kuman cilumbw cya buntomboj bwa Sataan ni bwa baat ba kuuhal, ni i biny biiyiiy kulongek ku bulekel? (Tal cikwaabw cifwaatul.)

¹⁷ Yehow umanyin cilumbw cya buntomboj bwa Sataan ni bwa baat ba kuuhal mu mushind waakady a kukemesh Sataan bilondeshel meej mindiy. (Mus. 92:5, NWT) Ki bwa kuleej mudyey kay mwiin makos, Yehow uleejel mudyey mwiin myand ya biin-biin hakwiitabil Adam ni Eev bwa kwiikalobw ni baan. Ni cikwaabw Yehow uleejel neey yiy muleeb neey bwaal kaahand bwiiyiiy kulongek, kakwiish cidy mwa kumukaakeesh. Utungunukil ni kwiikal ni kiihacil kindiy hakutwaal “lelakan” waakady mwa kwiiy kukuuloh lelakan ya Adam ni Eev yikookooyel Mawej. (Kbwa. 3:15; 22:18) Sataan waakady mwa kumvw bibiih umvwiiley neey Yehow waakady ni bwa kutwaal cya kwiitukuloh naacy! Bwabiny? Bwaal, mushind udyeh mulong myand oow i mushimatil a lukat lwa biin-biin. (Mat. 20:28; Jah 3:16) Ciikadil eecy kaciinoh bend ciikadil cidy Sataan mwa kwiikal naacy. I bingany biikal mwa kulongek ku dyambulwiish dya cya kukuul naacy baat? Ku bulekel kwa mivw cinun lelekan yiwaakan ya Adam ni Eev yikookooyel Mawej yiiyiiy kushikat ha bulab bufutulul Paradiiz—teng mwakaady Yehow muman ni kwiibilongolol ku butambwiil Ciisang aacy, Yehow wiiyiiy kuleeb teng mwaakadyeh muleeb neey: nady “Omekah.”

MUTUDY MWA KUKASHISH DIITABIJ DIITUT MU MULAY A YEHOW WA KUFUTULUL BULAB BWA BUSHAAL PARADIIZ

18. I bijaadik kaay bisat bidy Mawej mwiitwaakish? (Tal cikwaabw kazubw ka neey: “Tubingil tusat twiitusaasak bwa kuteekel Yehow micim mu mulay indiy.”)

¹⁸ Mu myand yitubaaman kukontonon eey, i mushind kaay utudy mwa kujaadikil aab balaalandul bwa kukumban kwa mulay a Mawej wa Paradiiz? Cya kuuhal, Yehow kaayend i yiy udy mulay. Mukand a Myand Yisokolweel Jah uleeleeb neey: “Naak waakady mushikat mu kwaas a bukaleng uleebel neey: ‘Kaabaak! naloolong myand yoos yihyaayihy.’” Udy ni meej, bukash ni micim kwiiwul kwiiwul bwa kukumbaj mulay indiy. Ciibiidy, Yehow i mumanyik neey byoos bidyey muleeb biiyiiy bikumban. Uleeleeb cikwaabw neey: “Fund bwaal may ma mim aam i ma biin-biin, i mawaakan kuteekel micim. . . . Byoos bibaawaakan!” Ciisaat, Hady Yehow utang kulong bwaal kaahand, wiiyiiy teng kwiibukumbaj ni kubulekel kwa bubw, teng mwiitujaajaadikil cyambil cya neey: “Mim nady Alfah ni Omekah.” Yehow wiiyiiy kuleej neey Sataan i mwiin makos ni baakaakal kukumbaj byoos.

19. I biny biwudy mwa kulong hady baat balandul mulay a Mawej wa Paradiiz?

¹⁹ Vuluk neey, diib dyoos diwendend ni kujaadikil baat bawutwiitwiilangan naabw mu mudimw habitaatal myand yidy Yehow mulay, ukaakashish bikasakan diitabuj diibuh mu myand yidyey mulay. Nook, musang mukwaabw hawubaabal mulay ukaakashish ku micim habitaatal kwiiy kwa Paradiiz teng mudyeby biibileej mu mukand a Myand Yisokolweel Jah 21:4 ni muut yiy muleeb neey: “Myand eey yumvumvwiik yilengel menmen bwa kwiiyey kukumban,” I biny biwudy mwa kulong ang? Bwabiny kwiin mwa kubalok nend ni kumumvwiijok verseh 5 ni 6? Muleej mudy Yehow mwiitujaadikil mulay indiy udyey muleej mu may mindiy ma bulekel aam, teng mwaakadyey muman kuleeb.—Ye. 65:16.