“Kasakanaay micim, kanuzakal bend”

1-2. Bilondeshel 1 Biin Korent 15:58, i mushind kaay udy mwiin Krist mwa kwiikal bu nzubw mutam udy muy mwiiwul?

MU MUVW a 1978, baakady biibak nzubw mutam wa kwiiwul mu cimeng cya Tokyo, mu cibunj cya Japon. Baat baakady bamutal baakady biyihanguj bwa mushind wiikaley mwa kushaal mushimat hakutal mudy bulab buhit kuzakal mu tawuny aaw. I biny bilongel bamwiibakil bwindiy kushaal mwiimanakan hady bulab buzakal? Baaejenyeer baakady bamulong bamwiibakil mwiikal mukasakan ni kay mwa kubukuk hady bulab buzakal. Biin Krist bady teng bu nzubw mutam wa mwiiwul oow. Mu mushind kaay?

² Bikaam mwiin Krist iikal ni kacy-kacy habitaatal kwiikal ni mucim mukasakan ni kwiikal habwiih bwa kukooyel. Iikal ni mucim mukasakan ni kay uzakaloh bend hadyeby bikaam bwa kukooyel mikenj ya Yehow ni may mindiy matam. (Bal 1 Biin Korent 15:58.) I ”‏mwiihang bwa kukooyel”‏ ni kay uhing bend hanyim. Mu mushind mukwaabw, bikaam iikal ni “meej malengel,” hady shikacil ukaam bwa kulong nook eecy hadyeby ni buseeb. (Jak 3:17, NWT) Mwiin Krist udy mulong bwa kwiikal ni kacy-kacy kiin mwa kwiikal teng mulamat ku butamb kaahand eecy wiitabakan myand yoos. Mu ciin bwaal eecy, twiiyiiy kutal mutudy katuy mwa kuzakal. Twiiyiiy cikwaabw kumanyik mishind yitaan yidy Sataan ukal naay mudimw bwa kukooyesh dihangadik diitut ni bwiitut kumanyik mutudy mwa kumukasakeen.

I MUSHIND KAAY UTUDY MWA KWIIKAL NI MUCIM MUKASAKAN?

3. I mikenj kaay ya Yehow yitusaasangan mu Myand yilongel Bapostol 15:28, 29?

³ Bu mudyey Yehow wiituutumin May, udyaakal waakish baat bindiy mikenj yiheehel bwa kwiiyumvw. (Ye. 33:22) Cileejel, mu siyekel a kuuhal biin mu kasumbw kaludik baleejel myand yisat: 1) kulek kuhambidil kish, kuhambidil teng Yehow, 2) kuneemek mukenj a Yehow wa neey mash i majilang, ni 3) Kukooyel mukenj wa mu Bibl wa kulek kwend masandy. (Bal Myand yilongel Bapostol 15:28, 29.) I mushind kaay udy biin Krist mwa kukooyel Yehow leel oow mu myand yisat eey?

4. Bilondeshel Myand yisokolweel Jah 4:11, i mushind kaay utudy mwa kuhambidil teng Yehow?

⁴ Kulek kuhambidil kish, kuhambidil teng Yehow. Waakady mwambil biin Izaleel bwa kumuhambidil teng yiy. (Mmu. 5:6-10) Ni haakady Dyaabol muteet Yeez, umwaalabwiil biin-biin neey: tudy ni bwa kuhambidil teng Yehow. (Mat. 4:8-10) Ki bwaabiny, katwiin mwa kuhambidil kish. Ni cikwaabw katwiin mwa kuhambidil baat—ning bab biikal baafumw ba bitendeleel, baafumw ba cidiidy, eecy baat bady bay lutumb ha bulab mu myand ya mazab ni mu myand yikwaabw ya kuhitij naay luleng—twiibangat bu baamawej. Tudy balamat ku butamb bwa Yehow ni tumuhambidil teng yiy “ubaahangil biit byoos.”‏—Bal Myand yisokolweel Jah 4:11.

5. Bwabiny tukookooyel mukenj a Yehow wa neey mash ni buumy i bijilang?

⁵ Tuneemekaay mukenj a Yehow wa neey mash i majilang. Bwabiny? Bwaal Yehow uleeleeb neey buumy budy mu mash, cya bukish cilengel cidyey mwiitwaakish. (Lev. 17:14) Haakady Yehow mwaambil baat bwa kudyobw nyiny ya nyam bwa musang a kuuhal, wiibaleejel bwa kulek kudy mash. (Kbwa. 9:4) Wambulwiil mukenj oow mu May maheeley Moyiiz bwa kuyey kaakish biin Izaleel. (Lev. 17:10) Ni ulombweel biin mu kasumbw kaludik ka mu siyeekel a kuuhal bwa kutuminobw biin Krist boos diiy dya neey ”‏kanudy bend mash.” (Yil. 15:28, 29) Tukookooyel mukenj oow ni mucim mukasakan hatwaangangat mahangadik bwa londah.b

6. I biny biwudy mwa kulong bwa kukooyel may ma Yehow ma kulek kwend masandy?

⁶ Kukooyel mukenj a mu Bibl wa kulek kwend masandy. (Ebr. 13:4) Mupostol Pool wiitubelel bwa “kufwiish”nyeet yiitut—i kuleeb neey kwaangat mahangadik makasakan ma kulek kwaalakan koos kubiih kwa nyeet. Tuleelek kutal eecy kulong bwaal kaay boos budy mwa kwiitufikij ku cyendend cya masandy. (Kol. 3:5; Yoobw 31:1) Hatutwiitwiilangan ni diiteet, tuleeleek kulang kubiih eecy cilong cidy mwa kunyang bulund bwiitut ni Yehow.

7. Tudy biiswiik bwa kulong biny, ni bwabiny?

⁷ Yehow i mutakamin bwa ’tukooyel ni mucim iitut woos.’ (Rom 6:17) Mibel yindiy yidy teng bwa dyaakatook diitut, ni mikenj yindiy katwiin mwa kwiiyishintulul. (Ye. 48:17, 18; 1 Kor. 6:9, 10) Twiikaakashishomw bwa kusangeej Yehow ni kwiiyumvw bu mumb a misambw uleebel neey: “Nakaakaam teng bwa kulong biwudy mukat, i bub bulang bwaam bwa buyiil!” (Mus. 119:112) Ki, Sataan wiiyiiy kuteet bwa kukooyesh dihangadik diitut dya kushaal bakasakan micim. I mishind kaay yidyey ukal naay mudimw bwa kulong naak?

I MUSHIND KAAY UDY SATAAN UTEET BWA KUKOOYESH DIHANGADIK DIITUT DYA KUSHAAL NI MUCIM MUKASAKAN?

8. I mushind kaay udy Sataan ukal mudimw ni bulwiish bwa kukooyesh dihangadik diitut dya kushaal bakasakan?

⁸ Bulwiish. Dyaabol wiitulwiilwiish ku nyeet ni mu meej bwa kukooyesh dihangadik diitut dya kushaal ni mucim mukasakan. Kiihacil kindiy i ka ’kwiitudy,’ bwa kunyang bulund bwiitut ni Yehow. (1 Py. 5:8) Biin Krist ba mu siyekel a kuuhal baakady biibalwiish, biibashatul, ni biibazuh bwaal baakady biiswiik bwa kushalobw bakasakan. (Yil. 5:27, 28, 40; 7:54-60) Sataan utuutungunuk ni kwiitulwiish leel oow. Bwaal oobw i bwa biin-biin bwa mushind udyobw bakabish biin-kweet baan-balum ni baan-bakaj ba mu Russie ni ba mu bibunj bikwaabw ni bulwiish butudy tut biin tutwiitwiilangan naabw.

9. Twaal cileejel cya mushind utudy mwa kukasakeen bulwiish bwa mush-mush.

⁹ Bulwiish bwa mush-mush. Sataan ukaakal mudimw ni “myand ya budimw” ha kufulok bulwiish bwa hal ni hal. (Ef. 6:11, NWT) Twaangat cileejel cya mwiin-kweet Bob, waakady mutweel mu lupitaady bwa kumuhandobw lubeel lukasakan. Wambiil dokteer neey mu mishind yoos kiin mukatoh bend bwa bamumb mash. Dokteer waakady mwiitab dihangaduk dindiy. Ki, bufuk kuuhal kwa kumuhandobw, mungang utwaatwaangan mang maloolong bwa muut kumvwooh bend bitiit hadyobw bamuhand, uyiil kakumbul Bob kuunyim kwa cisak cindiy ciman kuhingomw ku cibel. Wambiil Bob neey, kabiin biiy kumumb mash ki biikaakal naam habwiih bwa kukal naam mudimw hadyobw bikaam. Misang yiikwaabw dokteer waakady ulang neey Bob udy mwa kushintulul mushind a kulang bu mwaakady biin mu cisak cindiy kabayok. Ki Bob kazakeeloh bend, ni uleebel neey kiin mwa kwiitab mash ning mu mushind kaay woos.

10. Bilondeshel 1 Biin Korent 3:19, 20, bwabiny meej ma baat mady ni buuhund?

¹⁰ Meej ma baat. Tut tulangil ha mushind udy baat batobolol may ma Yehow tudy mwa kulek byeet kukooyel may mindiy aam. (Bal 1 Biin Korent 3:19, 20.) “Meej ma ha bulab” makaakaamish teng kwaalakan kwa nyeet. Bamw biin Krist ba mu Perkam ni ba mu Tiyaatiir biitabil bwa kwiikalobw balong cyendend ni kuhambidil kish bu mwaakady baat ba ha cyaab cyaakadyobw bashikaciil balong. Yeez waakishil bisumbw bibidy eeby mibel yikasakan bwa mushind waakadyobw biitabil bwa kulong myand ya cyendend cya masandy. (Yis. 2:14, 20) Leel oow baat bady biitunyunguluk bady mwa kwiitusak bwa tut kwiitaab meej maabab mabiih. Biin mu cisak ciitut ni baat batudy bamanyikangan naabw bady mwa kwiitwiitabij neey tudy biin ciikaak ni bikaam tulek kukooyel mikenj ya Yehow. Cilejeel, bady mwa kuleeb neey, kulong myand yalaalakan nyeet kakwiishoh bend kubiih ni mikenj ya mu Bibl yileeleeb bwa kulek kwend kwa masandy neey kayiciin ni buseeb mu ciisang ciitut eecy.

11. Bwiitut kushaal bakasakan mu diitabij, bikaam tulek kulong biny?

¹¹ Misang yikwaabw tudy mwa kulang neey buludik butwaatwaal Yehow kabwiish bulengel. Tudy mwa kwiiy kuhon mu diiteet dya kulek “kwiimanyin ha myand yidy yifund.” (1 Kor. 4:6) Baafumw ba bitendeleel ba mu mafuk ma Yeez baakady baamulong a bibiih. Bakaakashish mikenj bwa kukasakeeney baat bwa kwiiyikooyel. (Mat. 23:4) Yehow wiitwakaakish may ma kulond matookesh bilengel ku dyambulwiish dya Diiy dindy ni bulongolody bwindiy. Katwiish mwa kwiiyeelel tut kaayeet mikenj yivul ya bituh. (Tus. 3:5-7) Nook, katwiish mwa kulek kwiimanyin ha myand yidy yifund mu Bibl eecy kumbil biin-kweet mikenj habitaatal kutal kwiitut kwa myand.

12. I mushind kaay ukaakal Sataan mudimw ni “myand ya makos”?

¹² Myand ya makos. Sataan ukaakal mudimw ni “myand ya makos” ni “myand ya butambwiil ya ha bulab” bwa kudingomw ni kukabulul baat. (Kol. 2:8) Mu siyekel a kuuhal, bakadil mudimw ni malongweesh ma meej ma baat, malongweesh ma biin Yuud makiish ma mu Bibl, ni balongweeshel biin Krist bwa kukooyelobw ku May ma Moyiiz. Baakady biin makos bwaal kabaakady batum meej ma baat kudy Yehow, humb a meej ma biin-biin. Leel oow, Sataan ukaakal mudimw ni Enternet bwa ku mwangalajey myand ya makos yileeleeb batam ba biin cidiidy. Tudy bamanyik myand yivul bwa bwaal oobw mu ciisang cya cihuh cya COVID-19.c Batemw ba Yehow baakady balond teng buludik bwa kudy bulongolody bwiitut ni baakady balek kwiikal ni kaakunying hakukun mat maabab ku myand ya makos.—Mat. 24:45.

13. Bwabiny bikaam kulek kuhitij diib diitut mu myand yikiish ni buseeb?

¹³ Kuhitij kwa diib mu myand ya bituh. Bikaam tutum meej miitut ku ”‏myand yidy yilengel [yidy ni buseeb buvul].” (Fili. 1:9, 10) Kuhitij kwa diib diitut mu myand ya kuhitij naay luleng kudy mwa kwiitwangat diib divul ni makand matwaakady mwa kulong naam myand yidy ni buseeb buvul. Myand yitudyaakal tulong haciibidil mu shikacil iitut bu mudy—kudy, kun, kuhitij kwa luleng mu myand kaahand, ni mudimw iitut—tut bahit kutum meej miitut ku biit eeby, tudy mwa kwiiy kukaakal bwa kulong myand yidy ni buseeb mu shikacil iitut. (Luuk 21:34, 35) Cikwaabw, mafuk moos tumvumvw ni tubaabal misah ya mudy baat batombokel baafumw ba mbul-matady ni ya myand ya cidiidy. Katwiin mwa kuhitij diib ku myand ya mushind oow. Bwaal tudy mwa kwiiy kulamat ku butamb kaahand mu lungeny lwiitut ni mu micim iitut. Sataan ukaakal mudimw ni mishind yoos eey ni kiihacil ka kukooyesh dihangadik diitut dya kulong myand yilengel. Tutalayaak mushind utudy mwa kumukasakeen ni kushaal teng bakasakan.

I MUSHIND KAAY UTUDY MWA KUSHAAL NI MUCIM MU KASAKAN?

14. I biny bidy mwa kukwambulwiish bwa kushaal mukasakan ku butamb bwa Yehow?

¹⁴ Lang bwa muwudy mwiilambul kudy Yehow ni muhet baatiisimw. Udy mwangat dihangadik eedy bwaal waakady mukat kwiikal ku butamb bwa Yehow. Vuluk cyaakady cikwambulwiish bwa kwiitabij neey udy muhet myand ya biin-biin. Uhetel diimany dya biin-biin habitaatal Yehow ni wiiyil kumuneemek ni kukat Taat iibuh a mu diiwul. Waakady mukashish diitabij diibuh ni wangacil dihangadik bwa kulek kulong myand yiibiih. Mucim iibuh ukwambulwiishil bwa kulek bilong biibiih ni kulong myand yaakady yumvwangan ni lukat lwa Mawej. Wiiyumvwiil musulakan haakady Mawej mukufwiil lus. (Mus. 32:1, 2) Waakady utweel mu bisangil bya biin Krist ni wambil baat bakwaabw myand yilengel yiwaakady ukalongomw. Bu muwaakady mwiilambul kudy Yehow ni muhet baatiisumw a bwiin Krist, ukaady kaabaak wendel mu njil a buumy, ni wangacil dihangadik dya kulek kwaalukomw.—Mat. 7:13, 14.

15. Bwabiny kubal ni kulangil mu Diiy dya Mawej kwiituheehetesh musangal?

¹⁵ Long Diiy dya Mawej ni langiloh. Teng mudy mutond mwa kwiikal mukasakan hady mij yindiy yishimat mu bulab bikasakan, tudy mwa kushimacish diitabij diitut bikasakaan mu Diiy dya Mawej. Hady mutond wend ni kukasakan, mij yikaakasakan byaay bikasakan ni yivuuvulangan. Hatubaabal ni tulangil ha bitubaabal, tukaakashish diitabij diitut ni tukashish cikwaabw menmen kwiitabij kwa neey njil ya Mawej i yilengel menmen. (Kol. 2:6, 7) Langil ha mushind waakady may ma kulond ma Yehow ni mibel bilam ni byambulwiish biin mudimw bindiy ba ha kal. Cileejel, Ezekiyeel ukuukun mat kudy mwanjel waakady umumvwiij mwaakady mwa kwiikal tempel wa mu ciifwaany. Bwaal butal bu mu cilot oobw bukashishil Ezekiyeel, ni bwiitwambambulwiish ni malongweesh ma mushind utudy mwa kut kuhambidil kwa Yehow kujilang nyam ku mikon.d (Ezek. 40:1-4; 43:10-12) Tuheehet musangal hatubaabal ni tulangil ha myand yikasakan ya mu Diiy dya Mawej.

16. Bilondeshel Musambw 112:7, NWT, i mushind kaay waakady kwiikal ni mucim mukasakan kwambulwiish Bob?

¹⁶ Iikal ni mucim mukasakan. Mukaleng Davih uleebel neey kaakady mwa kulek lukat lwindiy bwa Yehow umbiley musambw neey: “Micim yaam yibiihweej, a Mawej.” (Mus. 57:7, NWT) Tudy byeet mwa kukashish micim yiitut, hatweeyeleel Yehow bikasakan. (Bal Musambw 112:7.) Tal cyaakady cyambulwiish Bob, udyobw bateel mu bikos bishaal. Hamuleejelobw neey baakady ni bwa kulam mash bwa kukal naam mudimw diib dyaakadyobw mwa kwiimakaam, Bob waalabwiil musang aakaabumw neey: iikaleby bikaam bwa kuuyumb mash, nalaaluk mu lupitaady oomw teng kaabaak. Kuunyim, Bob uleebel neey, “Cyaakadyoh bend muzakal ni cyumvwiiloh bend kaakunying.”

17. I biny bitudy mwa kulongel ku cileejel cya Bob? (Tal cikwaabw cifwaatul.)

¹⁷ Bob uleejel mucim mukasakan bwaal waakady mwangat dihangadik aady kuuhal kwa kuyey ku lupitaady. Bwaal bwa kuuhal, waakady mukat kusangeej Yehow. Bwaal bwiibiidy, waakady ni ciibidil cya kulong myand ya mu Bibl ni mikand yiitut yikwaabw mudyobw bumvwiij buseeb budy naabw mash ni buumy. Bwaal bwiisat, waakady mutwiishiibw neey kulond kwa buludik bwa Yehow kutwaatwaal mabeenesh. Tudy byeet mwa kwiikal ni micim yikasakan ning hatututwiilangan ni makab.

18. I mushind kaay udy cileejel cya Barak citwambulwiish bwa kuteekel Yehow micim? (Tal cifwaatul cya ha cizubw.)

¹⁸ Teekel Yehow micim. Tutalaay mwaakady Barak muhet musangal bwaal waakady muteek micim yindiy mu buludik bwa Yehow. Ning haakadyey kay ni ngabw ning diifum baakady mwa kumutal mu cibunj cyoos, Yehow umwambil bwa kuyey kal diivit ni Siserah Mutam a basalaay ba biin Kanaan ni cisumbw cya basalaay bindiy baakady biihang. (Zuj. 5:8) Muprofet mwaan-mukaj Deborah wambiil Barak bwa kuyey kasambakanomw Siserah ni matempw mindiy 900 ku mulund. Ning mwaakady matempw aam mwa kukasakeen biin Izaleel bwa kucimunobw diivit, Barak wiitabil. Haakady basalaay bend ni kwiituluk ku Mulund udyobw babiikan neey Tabor, Yehow utoheshel mvul muvul menmen. Matempw ma Siserah majaamin mu bitocy, ni Barak ucimwiin ku dyambulwiish dya Yehow. (Zuj. 4:1-7, 10, 13-16) Bya mushind aakaabumw, Yehow wiiyiiy kwiitwambulwiish bwa kucimun tut bamuteekel micim ni balond buludik bwaalaaluk kudy baat badyey muteek.—Mmu. 31:6.

IIKAL MWIISWIIK BWA KUSHAAL MUKASAKAN MICIM

19. Bwabiny tudy bakat kushaal ni micim yikasakan?

¹⁹ Diivit diitut dya kushaal bakasakan micim dicidy teng ditungunuk hatucidy mu bulongolody bwa myand oobw. (1 Tim. 6:11, 12; 2 Py. 3:17) Twiikal biiswiik bwa kukasakeen bulwiish, ni bulwiish bwa mush-mush, kulek meej ma baat, myand ya makos, ni kulek kuhitij kwa diib diitut mu myand ya bituh. (Ef. 4:14) Hamut a kulong nook tushaal bakasakan ni tutungunuk ni kukat Yehow ni kukooyel mikenj yindiy. Ni misang yikwaabw, twiikalaay tutal myand mu mushind mulengel. Mu ciin bwaal ciloolond, twiiyiiy kwiisambil ha mushind udy Yehow ni Yeez biikal cileejel cilengel cya mushind a kuutal myand.