Udy mwa Kukumbaj Biihacil Biibuh bya mu Spirit

1. Bavul ba kutudy i bal diivit kaay?

UKAADY mwiifundilok kiihacil ka mu spirit ki mulok diivit bwa kwiikakumbaj eeny?b Biby biikal neey biikaady bikufikilok, manyik neey kwiin teng uw kaayeeb. Cileejel, Philip waakady mukat kulongolol mushind indiy ni misang ya kusambil, ki ulwiil diivit bwa kwiikaley ni diib dya kusambil. Kiihacil ka Erika kaakady ka kwiikal kufik ha diib mu bisangil bya mudimw a bukajaady; cikwaabw, waakady ufik teng kuunyim kwa diib hady bisangil biman kutwaadij. Tomáš waakady muteet misang yivul bwa kubal Bibl mutuutul. Uleeleeb neey: “Cyaakadyoh bend mukat kubal bituh Bibl. Nateetel misang yisat, ki musang woos naakady namubal nafik teng mu mukand a Biin Leevy kuuhal kwa kwiimanyik.”

2. Bwabiny kabiin bikaam tukooyel mu mabok hatudy katuy banj kukumbaj cikwaabw kiihacil kiitut ka mu spirit katudy biifundil?

² Biby biikal neey udy ni kiihacil kaabaak kawudy kuy mwanj kukumbaj, kukooyeloh bend mu mabok. Cikwaabw, kukumbaj kiihacil kaheehel kuloolomb teng diib ni kwiikashishomw. Kumanyik kwa neey udy teng ni micim ya kukumbaj kiihacil kiibuh kuleeleej neey wangangat ni buseeb bulund bwiibuh ni Yehow ni udy mukat kumwaakish cidy cilengel menmen bwiibuh. Yehow wangangat ni buseeb kwiikashishomw kwiibuh. Cya biin, kiish ukulomboh bend bwiibuh kulong ciwudy kuy mwa kuman. (Mus. 103:14; Mik. 6:8) Nook, bikaam wiifundil kiihacil ni meej, kawudy mwa kukumbaj bilondeshel shikacil iibuh. Uw mwiikal muman kwiifundil kiihacil, i biny biwudy mwa kulong bwa kwiikakumbaj? Twiisambilaay kaabaak ha myand kaahand yidyobw baleej.

KWIIKAL NI LUKAT LWA KULONG I BWAAL BWA BUSEEB

3. Bwabiny kwiikal ni lukat i bwaal bwa buseeb?

³ Lukat i bwaal butam budy mwa kusak muut bwa kukumbaj biihacil bindiy bya mu spirit. Muut udy ni lukat udy ni micim ya kukumbaj kiihacil kindiy, wiiyiiy kukal mudimw bikasakan bwa kwiikakumbaj. Tudy mwa kufwanyikij kwiikal ni lukat lwa kulong bwaal kaahand ni luheeh lusaasak majuw ma ha mwanz mady ni cizang cikudik mwiiwul bwa kuyem kafik kuyaayem. Hady luheeh lutungunuk ni kutuut, mwendesh a majuw uyaay kafik misang yikwaabw kuyaayey. Ni kuk kwiikal luheeh lukasakan, udy mwa kufik teng mu kalung kakeeh. Bya mushind aakaabumw, tut biikal menmen ni lukat, lwiiyiiy kwiitusak misang yikwaabw bwiitut kukumbaj biihacil biitut. Mwiin-kweet David wa mu El Salvador uleeleeb neey: “Uw mwiikal ni lukat lwa kulong bwaal kaahand, wiikaakashishomw bikasakan bwa kwiibulong. “Kwiin mwa kwiitab bwaal ning bwaakaabumw bukukakeesh bwa kukumbaj kiihacil kiibuh.” Nook, i biny biwudy mwa kulong bwiibuh kwiikal ni lukat lwa kukumbaj biihacil biibuh?

4. Bilondeshel Filipw 2:13, tudy mwa kusambil bwabiny? (Tal cikwaabw cifwaatul.)

⁴ Sambil bwiibuh kwiikal ni lukat. Ku dyambulwiish dya spirit indiy, Yehow udy mwa kukwaakish lukat ludy mwa kukusak bwiibuh kukumbaj kiihacil kiibuh. (Bal Filipw 2:13.) Misang yikwaabw twiifufundil kiihacil kaahand bwaal tudy bamanyik neey tudy ni bwa kwiikakumbaj, ni i bwaal bulengel. Ki tudy mwa kwiikal katuy menmen ni micim ya kwiikakumbaj. Oobw i bwaal buhetel mwiin-kweet mwaan mukaj wa mu Uganda diijin dindiy Norina. Waakady mwiifundil kiihacil ka kulombol dilong dya Bibl, waakady wiital neey kiin mukumban bwa kulong mudimw oow, ni kaakadyoh bend ulang neey waakady mulongweesh mulengel. I biny bimwambulwiishil? Uleeleeb neey: “Natwaadijil kulomb Yehow diifuk dyoos bwa kuuyambulwiish bwa mim kuvudij lukat lwaam bwa kulombol dilong dya Bibl. Mu dyumvwangan ni masambil maam, naakadil mudimw bwa kulengej mushind aam wa kulongweesh. Hahitilok suuny yikeeh bituh, natadil neey lukat lwaam lwa kulombol dilong dya Bibl lwiiyiiy kukasakan. Teng mu muvw aakaabumw aaw, natwaadijil kulombol malong ma Bibl mabidy.”

5. Tudy mwa kulangil ha biny biikal mwa kwiitwambulwiish bwiitut kwiikal ni micim ya kukumbaj kiihacil kiitut?

⁵ Langil ha myand yidy Yehow mukulongel. (Mus. 143:5) Mupostol Pool waakady ulangil teng ha bukish bwa Yehow bwaakadyey mumuh, ni cyaakady cimusak bwa kukadiley Yehow mudimw bikasakan. (1 Kor. 15:9, 10; 1 Tim. 1:12-14) Bya mushind aakaabumw, uw ulangil bikasakan ha myand yidy Yehow mukulongel, kulong nook kwiiyiiy kukusak bikasakan bwa kukumbaj kiihacil kiibuh. (Mus. 116:12) Tukontononaay cyaakady cyambulwiish mwiin-kweet mwaan mukaj Honduras bwa kukumbaj kiihacil kindiy ka kushaal seb’ aa njil wa ku diib ni ku diib. Uleeleeb neey: “Naakady nalangil bikasakan ha mushind udy Yehow muukat. I muuyambulwiish bwa mim kwiikal haakaabumw ni baat bindiy. Wiitutaatabaleel ni wiitulaalam. Hanalangil bikasakan, lukat lwaam bwindiy lwiiyiil kukasakan menmen ni naakady mukat bwa kukal mudimw bikasakan bwa kutwaadij mudimw a buuseb’ aa njil.”

6. I biny bikwaabw bidy mwa kuuyambulwiish bwa kuvudijok lukat lwaam?

⁶ Tum meej miibuh ha mabenesh mawiiyiiy kuhet bwa kukumbaj kiihacil kiibuh. Tal cyaakady cyambulwiish Erika, udyobw baleej mu cikos cya kuuhal, waakady mwiifundil kiihacil ka kwiikal ha diib mu bisangil. Uleeleeb neey: “Natadil neey naakady niibudish myand menmen yivul ha kufufik kuunyim kwa diib bwa mudimw a bukajaady. Ki mum mufik kuuhal kwa diib, nady mwa kuhetok mushind a kumbishok biin-kweet baan balum ni baa bakaj mooy ni nady mwa kuhitijok diib naabw. Nady mwa kuhet byaany mushind a kukun mat ku myand ya buseeb yidyobw baleej yidy mwa kuuyambulwiish bwa mim kwiikal ni musangal ni bwa kulongolol mudimw aam wa bukajaady.” Erika utumin meej mindiy ha myand yilengel yaakadyey mwa kuhet habitaatal kwiikal kuuhal kwa diib, ni ukumbajil kiihacil kindiy. Udy mwa kutum meej miibuh ha myand yilengel kaay? Biby biikal neey kiihacil kiibuh i kakulongolol mushind iibuh a kulong Bibl eecy mushind iibuh a kusambil, langil ha mushind wiikal mwa kukashish bulund bwiibuh ni Yehow. (Mus. 145:18, 19) Uw mwiikal ni kiihacil ka kwiikal ni ciikadil kaahand cya bwiin Krist, iimanyin bikasakan ha mushind udyecy mwa kulongolol bulund bwiibuh ni baat bakwaabw. (Kol. 3:14) Bwabiny kwiin mwa kufund tubingil toos tuloolong bwa ukat bwa kukumbaj kiihacil kiibuh? Iikal ni ciibidil cya kutal myand yiibuh yiwudy mufund. Tomáš, udyobw bateel mu cikos cya kuuhal, uleeleeb neey: “Hadyok kwiikaal tubingil tuvul bwa mim bwa kukumbaj kiihacil kaahand, niiyiiy kukal mudimw bikasakan menmen bwa kwiikakumbaj.”

7. I biny byambulwiishil Julio ni macimen indiy bwa kukumbaj kiihacil kaabab?

⁷ Iikal uhitij diib ni baat bady mwa kukukashish mu mabok bwiibuh kukumbaj kiihacil kiibuh. (Tus. 13:20) Langil ha cyaakady cyambulwiish Julio ni macimen indiy bwa kukalobw bikasakan mu mudimw a bukajaady. Uleeleeb neey: “Tusungwiil balund baakady biitukashish bwiitut kukumbaj kiihacil kiitut, ni twiiyiiy kwiisambil naabw ha kiihacil kiitut. Bavul ba kudyobw baakady bakumbaj kal biihacil byaakaabumw eeby, nook biiyiiy kwiituleej myand ya buseeb yidy mwa kwiitwambulwiish byeet. Balund neet baakady mwa kwiiy kwiituhanguj cikwaabw habitaatal lwend lwa myand yitwaady balong mu program iitut, ni baakady biitukashish mu mabok diib ditwaakady tukaam dyambulwiish.”

HADYOBW KABAY BIITUKASHISH MU MABOK

8. I biny bidy mwa kulongek tut biikal tukal mudimw teng diib ditutaatal neey i biitukashish?

⁸ Nook, mu kuleeb kulengel, tut boos tudyaakal ni mafuk makwaabw matumvumvw neey kabiin biitukashish mu mabok. Bidy mwa kumvwiij neey katwiin mwa kukal mudimw bwa kukumbaj kiihacil kiitut eeny? Waakweeh. Cileejel: Luheeh ludy mwa kwiikal ni bukash bwa kwendesh majuw teng ni ku cyaab cidyem makafik. Cikwaabw, luheeh ludyaakal ni bukash budyaakal bushintuluk, ni mu mafuk makwaabw, kudy mwa kwiikal kakuy luheeh. Byumvumvwiij neey mwendend a majuw kiin mwa kutungunuk ni kwiibwendesh eeny? Kabiish naak. Cileejel, majuw makwaabw mendend ni moteer; makwaabw mady ni bituh bya mitond bidyobw bimendesh naaby. Mwendesh a majuw ma ha mwanz udy mwa kukal mudimw ni moteer eecy bituh bya mitond bwa kwendesh majuw ni bwa kufikem kuyaayem. Lukat lwiitut lwiitusaasak bwa kulong bwaal ludy bu luheeh; ludy mwa kwiikal luvul menmen mafuk makwaabw. Ni mafuk makwaabw, tudy mwa kwiiyumvw katuy bakashish mu mabok bwiitut kutungunuk ni kukal mudimw bilondeshel kiihacil kiitut. Nook, tut biikal tutungunuk ni kukal mudimw bwa kiihacil kiitut teng hadyobw biitukashish mu mabok, katwiin mwa kwiikakumbaj. Ki teng bu mudy mwendesh a majuw ma ha mwanz uhet mishind yikwaabw bwa kukumbaj kiihacil kindiy ka kafikey kuyaayey, tudy mwa kutungunuk kulong mudimw bilondeshel kiihacil kiitut ning hatudy katuy ni lukat lwa kulong nook misang yikwaabw. Biin-biin, kabiin teng biheehel bwa kulong nook, ki bikaam wiibel kaayeeb bwiibuh kwiikal ni musangal bwa kukumbaj kiihacil kiibuh. Kuuhal kwa kwiisambil ha citudy mwa kulong, twiisambilaay ha dijooj kaahand didy bakwaabw mwa kwiihanguj.

9. I bibiih bwiitut kutungunuk ni kukal mudimw bwa kukumbaj kiihacil kaahand ning hatudy katuy biin-biin ni lukat bwa kwiikakumbaj eeny? Umvwiij.

⁹ Yehow i mukat bwa tumukadil mudimw ni musangal ni mucim aakaabumw. (Mus. 100:2; 2 Kor. 9:7) Nook bikaam tutungunuk ni kukal mudimw bwa kukumbaj kiihacil kiitut ka mu spirit ning tut katuy ni lukat bwa kwiikakumbaj eeny? Tukontononaay cileejel cya mupostol Pool. Uleebel neey: “Nakaakabish nyeet ya mim niiyilaam bikasakan ni niiyilombol bu muhik.” (1 Kor. 9:25-27, NWT.) Pool waakady wiikashishomw bwa kulong cidy ciwaakan ning haakady baat bakwaabw kabay bamukashish bwa kulong cyaakady Yehow ukaam bwa along. Yehow waakadyok ni musangal bwa mudimw waakady Pool ulong eeny? Ing! Cikwaabw Yehow umwaakishil bulang bwa kwiikashishomw kwindiy.—2 Tim. 4:7, 8.

10. I myand kaay yilengel yitudy mwa kuhet hatukaakal mudimw bwa kukumbaj kiihacil kaahand ning hatudy katuy bakashish mu mabok kudy bakwaabw bwa kulong nook?

¹⁰ Bya mushind aakaabumw, Yehow udy ni musangal hadyey wiitutal tukal mudimw bwa kukumbaj kiihacil kiitut ning hadyok kakuy baat bady mwa kwiitukashish bwa kulong nook. Udy ni musangal bwaal i mumanyik neey ning tut katuy bakat mudimw utuloolong, i mumanyik neey tumuloolong bwaal tudy bamukat. Teng bu mwaakady Yehow mufiil Pool kis, wiiyiiy kwiitufiil byeet kis bwa kwiikashishomw kwiitut. (Mus. 126:5) Ni hatutaatal mudy Yehow wiitufiil kis, bidy mwa kwiitusak cikwaabw bwa kumukadil mudimw. Mwiin-kweet mukwaabw mwaan-mukaj wa mu Poland diijin dindiy Lucyna uleeleeb neey: “Misang yikwaabw, ciin mukat kuy mu mudimw a bukajaady, amanaman nady mukooy. Ning naak, musangal unumvumvw hanamaaman kudiil baat musah, i cya bukish cikeekemesh.” Ki bwabingany tutalaay citudy mwa kulong hadyok kakuy biitukaakashish mu mabok bwa kukadil Yehow mudimw.

11. I mushind kaay udy Yehow wiitwambulwiish bwiitut kwiikal kwiikand bikasakan?

¹¹ Sambil bwa wiikal wiikand. Cyambil eecy citwaatwaal teng lungeny lwa neey: kwiikand bwa kulek kulong bwaal bubiih. Nook, kwiikand kwiitusaasak cikwaabw bwa kulong bwaal bulengel, amanaman hatudy ni mudimw a kulong mukasakan eecy hatudy katuy bakat bwa kumulong. Vuluk neey, kwiikand i cimw cya ku biikadil bya dimum dya spirit, nook lomb Yehow bwa akwambulwiish ni spirit mujilang bwiibuh kwiikal ni ciikadil cya buseeb eecy. (Luuk 11:13; Kal. 5:22, 23) David, udyobw baleeb mu bikos bya ku butambwiil, umvwiijil mwaakady diisambil dimwambulwiish. Waakady mukat bikasakan bwa kwiikaley ni ciibidil cya kwiilongel. Uleeleeb neey: “Niiyiiy kulomb Yehow bwa ayaambulwiish bwa niikal ni ciikadil eecy cya kwiikand. Ku dyambulwiish dindiy, naakady muhet mushind a kulong program mulengel habitaatal kwiilongel ni mushind a kwiikal kumukumbaj.”

12. I mushind kaay udy Diiy ditam didy mu mukand a Muleej 11:4 ditwambulwiish bwa kukumbaj biihacil biitut bya mu spirit?

¹² Kutakaminoh bend bwa myand yiiy yiwaakan mu shikacil. Mu bulongolody oobw, katwaakwiikaloh bend ni shikacil muwaakan. Tut batakamin teng neey myand yiiyiiy kuwaakan kuuhalok mu bulongolody oobw, katwiin mwa kukumbajoh bend kiihacil kiitut. (Bal Muleej 11:4.) Mwiin-kweet mukwaabw diijin dindiy Dayniel uleeleeb neey: “Kakwiishoh bend shikacil yiwaakan. Nook kabiin bikaam kutakamin teng biisang bilengel bifik, bikaam twiibikaam musang umw.” Mwiin-kweet mukwaabw a mu Uganda diijin dindiy Paul i muleej kabingil kakwaabw kady mwa kulong bwa tulek kwiikal ni ciibidil cya kuladikij myand: “Hatutwaatwaadij kukal mudimw ning tut bahet shikacil ya makab, Yehow wiiyiiy kwiitufiil kis muvul.”—Mal. 3:10.

13. Bwabiny i bilengel bwa kutwaadij ni biihacil biheehel?

¹³ Iifundil biihacil bihehel. Tudy mwa kwiikal katuy biiyumvw bilengel bwaal kiihacil kiitut i kamweek kakasakan menmen bwa kwiikakumbaj. Biby biikal neey ki mudyeby bwiibuh, udy mwa kulek kiihacil kawudy naak kady kakasakan bwa kwiifundilok biihacil bihehel eeny? Iikaleby neey kiihacil kiibuh i ka kwiikal ni ciikadil kaahand, bwabiny kwiish mwa kwanj kwiikaleejok mu mishind yihehel eeny? Iikaleby neey kiihacil kiibuh i ka kubal Bibl, udy mwa kutwaadij kulong program bwa biisang bya mafuk makeeh bwa kwiikalok ni diib dya kubal eeny? Tomáš, udyobw baleej ku butambwiil, ulwiil diivit ni kiihacil ka kubal Bibl mu muvw aakaabumw. Uleeleeb neey: “Natadil neey naakady musungul mushind waakady wa lwang-lwang bwaamim. Nook, nangacil diihangadik dya kuteet cikwaabw, ki ciisang eecy, nalongel program a kubal cituh cya shapitil diifuk dyoos ni nalangiloh. Bu cihet, natwaadijil kukat kubal kwaam.” Bu mwaakady Tomáš’ mutwaadij kukat kubal kwa Bibl, ukacil bwa kwiikal ni diib divul bwa kumubal. Kuunyim kwa mafuk, ubadil Bibl mutuutul.c

KUNEEKENOH BEND MU MABOK BWA KUTUNGUNUK NI KWIIFUNDIL BIIHACIL HADY BIISANG BIBIIH BIKUTULUKIL

14. I myand kaay yidy mwa kulongek yidy mwa kulong bwa biitukasakeen menmen bwiitut kukumbaj kiihacil kiitut?

¹⁴ Dyaakaby, ning tut biikal ni lukat eecy biibel mu kulong kwiitut kwa myand, tudy teng mwa kutungunuk ni kwiifundil biihacil. Cileejel, “muut woos udy mwa kwend teng dyaakaby” ni myand yidy mwa kwiitwangat diib divul ditukaakaam bwa kukumbaj kiihacil kiitut. (Mul. 9:11) Tudy mwa kutwiilangan ni lutat kaahand ludy mwa kwiitukooyesh mu mabok ni tudy mwa kukaakal ni diikand. (Tus. 24:10) Bu mutudy baat bakiish bawaakan, tudy mwa kulong myand yibiih yidy mwa kulong bwa bitukasakeen menmen bwiitut kukumbaj kiihacil kiitut. (Rom 7:23) Eecy tudy mwa kwiiyumvw bakooy. (Mat. 26:43) I biny bidy mwa kukwambulwiish bwa kutaatameen ciisang kaahand cibiih?

15. Bilondeshel Musambw 145:14, bwaal kaahand bub bukufikil, byumvumvwiij neey kwiin bend mwa kukumbaj kiihacil kiibuh eeny? Umvwiij.

¹⁵ Vuluk neey bwaal bubiih budy mwa kukufikil budy mwa kukukakesh bwa kukumbaj kiihacil kiibuh, byumvumvwiij neey udy mwa kulek bwiibuh kwiikakumbaj eeny. Bibl uleeleeb neey tudy mwa kutwiilangan ni makab mavul. Ki, bimweemweek cikwaabw neey tudy mwa kukumbaj cikwaabw kiihacil kiitut, nang-nang ku dyambulwiish dya Yehow. (Bal Musambw 145:14.) Mwiin-kweet mukwaabw diijin dindiy Philip, udyobw baleeb mu cikos cya butambwiil, uleeleeb nook: “Musangal aam kiin mwiimanyinoh bend ha ciisang cinady ciy nakumbaj kiihacil kaam. Ki, i mushimatil ha misang yinatwaatwaadij kulong mudimw bwa kukumbaj kiihacil kaam aak cikwaabw.” David, udyobw baleeb mu bikos bya butambwiil, uleeleeb neey: “Biisang bibiih bifiifikil, ciin ni biital bu bihumbish, ki ni biitaatal bu mushind unady mwa kuleej munady mukat Yehow bikasakan.” Ying, hawutuutungunuk ni kukumbaj kiihacil kiibuh, ning hadyeby bikasakan, ujaajadikil Yehow neey udy mukat kumusangeej. Yehow wiikaakal ni musangal hadyey ukutal utungunuk ni kwiikashishomw bwa kukumbaj kiihacil kiibuh!

16. I biny biwudy mwa kulongel ku bwaal bukufiifikil bukukaakakesh bwiibuh kukumbaj kiihacil kiibuh?

¹⁶ Tal biisang bikasakan biikutuutulukil bikukaakakesh bwa kukumbaj biihacil biwudy mulongolol bu mushind ukwakwambulwiish bwiibuh kutal muwudy mwa kukat Yehow. Langil ha bwaal budy bukaamish lutat, ni iiyihanguj neey: ‘I biny binady mwa kulong bwa bwaal oobw kabulong bwa longek cikwaabw?’ (Tus. 27:12) Ki misang yikwaabw iikaleby neey kiihacil kiibuh i kakasakan menmen bwiibuh kwiikakumbaj, bidy mwa kumweek neey kaakady kakumban bwiibuh. Uw mutal neey bwaal oobw budy mwa kwiikal bwa biin-biin bwiibuh, langil ha kiihacil kawudy naak cikwaabw bwiibuh kutal ning i kakumban bwiibuh kukumbaj.d Yehow kakwiiy kukutal bu udy mukaakal bwaal mukumbaj kiihacil kawaakady kuy mwa kukumbaj.—2 Kor. 8:12.

17. Bwabiny bikaam kuvuluk myand yitukaady baman kulong?

¹⁷ Vuluk myand yiwukaady muman kulong. Bibl uleeleeb neey: “Mawej kiishoh bend kabow. Kiish uvulamin midimw yiinun.” (Ebr. 6:10) Nook, uw byeeb kuvulaminoh bend myand yoos yiwukaady mulong. Langil ha biihacil biwukaady muman kukumbaj—yidy mwa kukwambulwiish bwa kudy bulund ni Yehow, bwa kwambil baat bakwaabw myand yindiy, eecy bwa kuhet baatiisumw. Teng muwudy muy kuuhal ni mukumbaj biihacil bya mu spirit ha kal, udy mwa kutungunuk ni kuy kuuhal bwiibuh kukumbaj kiihacil kawudy naak kaabaak.—Fili. 3:16.

18. I biny bitudy ni bwa kulong hatuloolong bwa kukumbaj kiihacil kiitut?

¹⁸ Ku dyambulwiish dya Yehow, udy mwa kukumbaj kiihacil kiibuh, teng bu mwendesh a majuw ma ha mwanz ufiifik ni musangal kwaakadyey uy. Ki vuluk neey, bendesh bavul ba majuw ma ha mwanz badyaakal basangal cikwaabw hadyobw balong lwend. Bya mushind aakaabumw, uw utungunuk ni kukal mudimw bwa kukumbaj kiihacil kiibuh ka mu spirit, kuvulaminoh bend hawutaatal mudy Yehow ukwambulwiish ni ukufiil kis hawukaakal mudimw bwa kukumbaj biihacil biibuh. (2 Kor. 4:7) Uw mulek kuhing haanyim, manyik neey wiiyiiy kuhet cikwaabw mabenesh mavul menmen.—Kal. 6:9.