Haakady baakateetekel biin Izaleel bay mu cibunj cya Yerikoh, bayiil baakatuudil kwa mwaan-mukaj mukwaabw dindiy Rahab. Haakady mukaleng a Yerikoh mumvw bwaal oobw, utumin basalaay ku cibel kwa Rahab. Rahab usokokel baakateetekel aab hamut ha nzubw indiy ni kutumey basalaay butamb bukwaabw. Ki kwambiley baakateetekel aab ney: ‘Ninukwaakwanjok bwaal nady mumanyik ney Yehow udy neen ni nwiiyiiy kukwaat cibunj eecy. Layaanyaay ney nwiiyiiy kukuuloh cisak cya mim.’

Baakateetekel bambiil Rahab ney: ‘Tukujaajaadikil ney kabaakwiiy kulongel muut ning waakaabumw wa mu nzubw mwiibuh bibiih.’ Bamwambiil ney: ‘Swiik monj musunz ku fenetr iibuh, ni biin mu cisak ciibuh biiyiiy kuhanduk.’

Rahab wiitulujil baakateetekel aab ha fenetr ni monj. Bayiil baakasokot ku milund mafuk masat kuuhal kwa kuhingobomw kudy Jozuweh. Kuunyim biin Izaleel basabukil musul a Yurdaan ni kwiilongololobw bwa kukwaat cibunj. Cibunj cya Yerikoh i cicy cibunj cya kuuhal cikwaacilobw. Yehow wiibambiil bwa kunyungulokobw cibunj eecy musang aakaabumw ku diifuk mund mwa mafuk masambombw. Diifuk dya mwandamuteket banyungulukil cibunj eecy misang mwandamuteket. Kuunyim balambul ba milambw bumbil bihuuny, ni basalaay kumbobw mukuund bikasakan. Biman bya cibunj kwiihukeby! Ki nzubw a Rahab waakady mwiibakil mu ciman cya cibunj, kaakadyoh bend mwiihuk. Rahab ni biin mu cisak cyaababw bahandukil bwaal waakady muteekel Yehow micim.

Baat ba mu bibunj bikwaabw bya mu Kanaan bumvwiil bwa cyaakady cilongek ku Yerikoh. Bakaleng baababw baswiikil diiy bwa kwiikongobw bwa kalwiishobw biin Izaleel. Ki biin Kabawon bahetel lungeny lukwaabw. Bavwaadil bizang bisusuk ni kuyobw kambil Jozuweh ney: ‘Twaalaalukil kuleeh. Tudy bumvw luumw lwa Yehow ni byoos byaakadyey mwiinulongel mu Ejipit ni mu Mowaab. Iitulayaak ney kwaakwiiiy kwitulwiish, ni twiiyiiy kushaal biin mudimw biibuh.’

Jozuweh wiitabil cyaakadyobw bamwambil ni kulayey bwa kulek kwiibalwiish. Kuunyim kwa mafuk masat baamwambiil ney, baat aab kabaakadyoh bend baalukil kuleeh. Baakady baalukil mu bulab bwa Kanaan. Jozuweh ujoojel biin Kabawon ney: ‘Bwaabiny nubiitudingomw?’ Bamwaalaabwiil ney: ‘Twaakady bumvw mooy! Tudy bamanyik ney Yehow Mawej iinun wiinulwiilwiil diivit. Bwa lus kanulong nwiituzuh.’ Jozuweh ukumbajil cyaakadyey mwiibalay, waalek kwiibazuh.

Kuunyim, bakaleng bataan ba biin Kanaan ni basalaay baababw, bayiil bwa kalwiish biin Kabawon. Jozuweh ni basalaay bindiy bendel bufuk butuutul bwa kuy kiibambulwiish. Haciilebw teng kuhacy ni bweh, diivit ditangil. Biin Kanaan batangil kuy luubil bay ook ni ook. Koos kwaakadyobw bayiil lubil Yehow waakady wiibatoheshelok mvul a mabw matam. Ki Jozuweh kulombey Yehow bwa iimanyik diib. Ning mudyaakal diib kadiy dyanj kwiimanoh, bwaabiny ulombel bwa Yehow kwiidimanyikey? Bwaal Jozuweh waakady muteekel Yehow micim. Diib dyaakady diiman diifuk dituutul teng ni haakady biin Izaleel bacimun bakaleng ba biin Kanaan ni basalaay baababw.