Engulhu Yuwene Ngoku Yahandikawa na Luka
24 Aliwe okwa kiro ky’erimbere eky’ewiki, mubatsinduka okwa yisinda,* bakaletha amanukatu agho babya ibabirithegheka. 2 Aliwe mubeya eribwe iryabirikumbaghalibwa erilhua okw’isinda,* 3 neryo babere bingiramo, mubatheyamo omubiri w’Omukama Yesu. 4 Babere banaswekire kutsibu busana n’eki, lebaya! abalhume babiri abambere esyongyimba esikangabasenie mubimana aho bali. 5 Abakali mububaha kutsibu kandi mubabya ibanunamirye amasu wabo w’ahisi, neryo abalhume mubabugha nabo bathi: “Busana naki mukasonderaya oyuliho y’omwa baholi? 6 Syali hano, aliwe abirilhubukibwa. Mwibuke ngoku akanaya nenyu iniane e Galilaya, 7 athi Omughalha w’omundu atholere iniahirwa omwa byalha by’abakolha-nabi n’erihanikwa okwa muthi n’okwa kiro kyakasathu inialhubuka.” 8 Neryo mubibuka ebinywe biwe, 9 neryo mubalhua eyiri eyisinda,* bamayabwira Erikumi n’Omughuma n’abandi abosi b’emyatsi yosi eyi. 10 Babya Maria Magdalena, Yoana, na Maria mama wa Yakobo. N’abandi bakali ababya nabo, babya ibanemubwira abakwenda b’emyatsi eyi. 11 Aliwe ebinywe ebi mubabilhangira ng’ebituru-turu, kandi babya isibangikirirya abakali.
12 Aliwe Petero mwahangana n’erithibitha eyiri eyisinda,* abere akakengemereryamo mwalhangiramo esyongyimba esy’ekitani sisa. Neryo mwasubayo iniabiribulha ekyabere.
13 Aliwe lebaya! okwa kiro ikyan’ekyo, ababiri b’okw’ibo babya ibanemughenda omwa kyalu ekikahulhawamo Emau, mayiro* nga musanju erilhua e Yerusalemu, 14 kandi babya ibanemukania okwa myatsi yosi eyi eyabere.
15 Neryo babere banemukanirania n’erikania okwa myatsi eyi, Yesu iyuwene-wene mwabahikako n’eritsuka erighendania nabo, 16 aliwe mubathamuminyerera. 17 Mwababulya athi: “Ni myatsiki eyamukaghenda mukakaniako eyi?” Neryo mubimana ibanakwire obulighe. 18 Omughuma w’okw’ibo oyukahulhawamo Kleopa mwamusubirya athi: “Mbwino wuli mugheni oyuwikere iyuwene omwa Yerusalemu oyuthasi* emyatsi eyabere ebiro bino?” 19 Mwababulya athi: “Myatsi yahi?” Mubamusubirya bathi: “Emyatsi eyihambire oku Yesu Omunazareti, oyuwakanganaya ku ni muminyereri w’amaaka omwa mikolere n’omwa binywe embere sya Nyamuhanga n’abandu abosi; 20 kandi ngoku abahereri bakulhu n’abathabali bethu mubamuhamba n’erimutswera olhw’erikwa, n’erimukongomerera okwa muthi. 21 Aliwe thwabya thuwithe amaha thuthi omulhume oyu yukendi lhamya e Israeli. Eryongera okw’ekyo, kino ni kiro kyakasathu emyatsi eyi yalibere. 22 Kandi abakali balebe ab’okw’ithwe nabo babirithuswekya, kundi mubakatsinduka okw’isinda* 23 neryo mubakabya bakeya omubiri wa Yesu isyalimo, mubakasa n’eribugha bathi bamalhangira ekindu ekithe kya buli kiro, abamalaika, abalyababwira bathi abirilhubuka. 24 Neryo abaghuma b’okwa bathulhue nabu mubakaghenda eyiri eyisinda,* bameya ibine ngoku abakali banalyabugha, aliwe mubathethamulholhako.”
25 Neryo mwababwira athi: “Inywe muthawithe amenge kandi ab’emithima eyitheligha lhuba emyatsi yosi eyo abaminyereri babugha! 26 Mbwino Kristo syabya atholere eriaghalhwa omo myatsi eyi n’eryingira omwa lhukengerwa lhwiwe?” 27 Neryo mwatsuka oku Musa n’Abaminyereri abosi, eribakengesya emyatsi eyimuhambireko eyiri omwa Masako wosi.
28 Erighunzerera mubahika hakuhi n’ekyalu ekyo babya bakayamo, neryo mwabya nga kinalholha embere n’olhughendo. 29 Aliwe mubamuhathikana bathi aleke erighenda, bathi: “Ibya nethu, kundi obuthuku buli mw’ira n’ekiro kikayahwa.” Neryo mwingira amabya haghuma nabo. 30 Neryo abere anemulya* haghuma nabo, mwimya omuggati, amatsumulhagho, amatsutsangagho, n’eritsuka eribahagho. 31 Neryo ameso wabo mwalibukalha ndeke bamamuminyerera; aliwe mwababuliranako. 32 Neryo mubabwirana bathi: “Emithima yethu muyithethahuha-huhana omughulhu alhue akakania nethu omwa nzira, akathusoborera ndeke Amasako?” 33 Neryo okwa saha iyan’eyo mubahangana bamasuba e Yerusalemu, bameya Erikumi n’Omughuma n’ababya bahindene nabo, 34 mubabugha bathi: “Kwenene Omukama abirilhubuka, kandi mwakabuthukira oku Simoni!” 35 Neryo mubabugha ebyabya omwa nzira kandi ngoku ayiminyikalhaya okw’ibo akatsutsanga omuggati.
36 Babere banemukania okwa myatsi eyi, iyo iyuwene-wene mwimana omwakathi-kathi kabo n’eribugha nabo athi: “Obuholho bubye nenyu.” 37 Aliwe kundi babya ibanemutukumira n’eryubaha, mubalengekania bathi bamalhangira omulimu. 38 Neryo mwababwira athi: “Busana naki mukubaha, kandi busana naki mukathika-thika omwa mithima yenyu? 39 Mulebaye ebyalha byaghe n’ebisandu byaghe, ngoku n’ingye owenyine-nyine; munyihambeko mwanalhangira, kundi omulimu syalithunga omunyoku n’amakuha ngoku mwamanyilhangira.” 40 Neryo abere abugha eki, mwabakangania ebyalha biwe n’ebisandu biwe. 41 Aliwe babere bathe bikirirya busana n’etseme nene n’erisweka mwababwira athi: “Munawithe aho h’eky’erirya?” 42 Neryo mubamuha eyiswe eyikalirire, 43 neryo mwimyayo amalyayo ibanasamalire.
44 Neryo mwababwira athi: “Ebi by’ebinywe byaghe ebya nababwira ingakine nenyu, ngoku emyatsi yosi eyinyihambireko eyiri omwa Mighambo ya Musa n’omwa Baminyereri n’omwa Syonyimbo yitholere iyabererera.” 45 Neryo mwakyungulha obulengekania bwabu nuku bayitheghereraye ndeke ekyo Amasako akamanyisaya, 46 kandi mwababwira athi, “Ebihandikire bya bino: Kristo angaghalibirwe kandi inialhubukibwa okwa baholi okwa kiro kyakasathu, 47 kandi erisighikira n’erina liwe, eriyisubamo busana n’erighanyirwa ebibi lyangathulhughanibirwe omwa bihanda byosi—eritsuka e Yerusalemu. 48 Inywe mukendibya bema b’emyatsi eyi. 49 Neryo lebaya! ngabathumira ebya Thatha waghe alhaghanisaya. Aliwe inywe mubye omwa tawuni erihika aho mwasyabanira obuthoki erilhua endatha.”
50 Neryo mwaghenda nabo erihika e Betania, kandi mwabahirako ebyalha, amabatsumulha. 51 Abere anemubatsumulha, mwalhusibwa kubo n’erithwalhwa elhubulha. 52 Neryo mubamunamira bamasuba e Yerusalemu ibanatsemire kutsibu. 53 Kandi mubalholha embere eribya omwa hekalhu eripipa Nyamuhanga.