Engulhu Yuwene Ngoku Yahandikawa na Luka
16 Neryo Yesu mwabwira abigha biwe athi: “Omulhume omugaga aby’awithe omwimaniri. Neryo mubamubwira ngoku omwimaniri abiritsandya ebindu biwe. 2 Neryo mwamubirikira n’erimubulya athi, ‘Ebya ngakwowako ebi ni bihi? Letha embaririra y’obwimaniri bwawu, kundi siwendi thasyimanira enyumba.’ 3 Omwimaniri mwayibwira athi, ‘Mukama waghe akayany’ihako obwimaniri, neryo ngakoleki? Singawithe amani w’erilima kandi ngakwa esisoni sy’erisabirirya. 4 Ahaa! Namabiriminya eky’erikolha, nuku bakendibya bakanyilhusya okwa bwimaniri, abandu bakendi nyangirira ewabu.’ 5 Neryo mwabirikira obuli mughuma oyuli mw’eribanza ly’omukama wiwe, mwabulya ow’erimbere athi, ‘Mukama waghe akakubanza singahi?’ 6 Mwamusubirya athi, ‘Ehilengyi* 100 ehy’amaghutha w’emizaituni.’ Mwamubwira athi, ‘Wusubayeyo endaghano yawu kandi wikale ahisi n’erihandika lhuba-lhuba wuthi 50.’ 7 Mwabugha n’owundi athi, ‘Nawu akakubanza singahi?’ Mwasubirya athi, ‘Ehilengyi* hinene-hinene 100 ehy’engano.’ Mwamubwira athi, ‘Subayayo endaghano yawu wuhandike 80.’ 8 Omukama mwasima omwimaniri wiwe w’ebindu, kundi nomwanabya isyathunganene mwakolesya amenge; kundi abaghalha b’omughulhu ono bawithe amenge okwa b’olhulengo lhwabo kwilhaba abaghalha b’ekyakakalha.
9 “Kandi ngababwira: Muyikolere abanywani omwa by’obugaga ebithathunganene, nuku bikendi syabya bikawa, ibabya ibangana bangirira omwa myanya y’erikalhamo eya kera na kera. 10 Oyuthaleghulha omwa bike, ni muthaleghulha n’omwa binene, n’oyuthathunganene omwa bike, syathunganene n’omwa binene. 11 Neryo mwamabya isimwathakangania ku muli bathaleghulha bikahika okwa by’obugaga ebithathunganene, nindi oyukendi syabugha athi mutheghaye eby’ekwenene? 12 Kandi mwamabya isimwathakangania ku muli bathaleghulha bikahika okwa bindu by’abandi, nindi oyukendi syabaha ebyenyu? 13 Sihali omughombe oyuwanga kolera abakama babiri, kundi iniakendi pona omughuma inianza owundi, kutse iniakendi amakirira omughuma, iniaghaya owundi. Simwangabya baghombe ba Nyamuhanga n’ab’eby’Obugaga.”
14 Neryo Abafarisayo ababya banzire esyosente sya kutsibu, babya ibanahulikirire emyatsi yosi eyi, neryo mubatsuka erimuseka. 15 Neryo mwababwira athi: “Inywe muli abakayahulhamo bathunganene embere sy’abandu, aliwe Nyamuhanga anasi emithima yenyu. Kundi ebya bandu bakahamaya n’inye embere sya Nyamuhanga.
16 “Emighambo n’Abaminyereri mubyathulhughanibwa erihika oku Yohana. Eritsuka aho, Obwami bwa Nyamuhanga bw’obukathulhughanibawa ng’engulhu yuwene, kandi obuli musindo w’abandu banemubulhandamirira. 17 Omo kwenene, kyolhobire olhubulha n’ekihugho erihwaho omwakanya k’akakwarali n’akaghuma k’enyughuta y’Emighambo eribya isikathaberera.
18 “Obuli mundu oyukakomolha mukali wiwe akathahya owundi, akabya iniamasingira, n’oyukathahaya omukali oyo mwira wiwe alyakomolha, akabya iniamasingira.
19 “Habya omulhume omugaga oyuwabya akambalha olhukimba lhw’erangyi y’olhubono-bono* kandi olhw’ekitani, iniakayitsemesaya obuli kiro omwa bindu bingyi ebyuwene. 20 Aliwe oyukasabiriraya oyukahulhawamo Lazaro oyuswire kw’ebironda, iniakabera erihirwa okwa lhukyo lhw’omugaga 21 kandi iniakayisunza erirya okwa bikathoghonga okwa meza y’omulhume omugaga. Nibya n’esyombwa isikasa isyalyatsirira ebironda biwe. 22 Neryo endambi muyahika, oyukasabiriraya amaholha n’abamalaika bamamuthwalha ahali Abrahamu.*
“N’omulhume omugaga mwaholha, amatsikwa. 23 Iniane omw’Isinda* inianemwaghalhwa, mwasumba ameso wiwe amalhangirira Abrahamu ya haali na Lazaro iniane aho ali.* 24 Neryo mwabirikira n’eribugha athi, ‘Thatha Abrahamu, nyikwire obulighe, kandi thuma Lazaro ahire omuthwe-muthwe w’omunwe wiwe w’omwa maghetse angaholhokya olhulimi lhwaghe, kundi ngaghalhawa omwa muliro owakaghulhumirira oyu.’ 25 Aliwe Abrahamu mwabugha athi, ‘Mwana, wibuke ngoku muwatsemera ebyuwene omwa ngebe yawu, aliwe Lazaro mwabana ebithuwene. Aliwe lino, anemuhumulikanibirwa hano, aliwe iwe wunemwaghalhwa. 26 Kandi eryongera okwa myatsi yosi eyi, ahakathi-kathi kethu nawu hali ekyuna kiri-kiri, neryo abakanza erilhua eno bakasa eyawuli sibangathoka, kutse abandu sibanga thoka erilhua eyo eryasa eya thuli.’ 27 Neryo mwabugha athi, ‘Kyamabya ikwakiri kithya, thatha, ngakusaba wumuthume okwa b’omwa nyumba ya thatha waghe, 28 kundi ngawithe baghalha bethu bathano, ayabathulire ndeke nuku nabo baleke erisyasa omo mwanya ono w’eriaghalhwa.’ 29 Aliwe Abrahamu mwabugha athi, ‘Banawithe Musa n’Abaminyereri; leka bahulikirire abo.’ 30 Neryo mwabugha athi, ‘Eyihi, thatha Abrahamu, aliwe omundu amalhua omwa baholi akaghenda eyo bali, ibakendi yisubamu.’ 31 Aliwe Abrahamu mwamubwira athi, ‘Bamabya isibanga hulikirira Musa n’Abaminyereri, isibang’ikirirya omundu nomw’angalhua omwa baholi.’”