Esyombinga ni Nyithi!
Sitani n’esyombinga bulikiro balhwe ibanatsurumire kandi ni bakabi. Omughulhu wa kera Sitani mw’itha ebisoro n’abakobe b’omuyisiwa Yobu. Neryo mw’itha abana ba Yobu ikumi akaletha “ekihunga kinene” eribathererya kw’enyumba babyamo. Enyuma w’ebyo Sitani mwaswirya Yobu omwa ‘bimatha bibi eritsuka okwa bulyathiro bw’ebisando biwe erihika okwa kahulihuli k’omuthwe wiwe.’—Yobu 1:7-19; 2:7.
Omwa biro bya Yesu, esyombinga isikakolha abandu mwa bikiru n’abandi mwa ndimethime. (Matayo 9:32, 33; 12:22) Musyanubya omulhume mughuma isikaleka inyayihuthangalya omwa mabwe. (Mariko 5:5) Kandi musyaleka n’omulhwana inyalira kutsibu, n’eriyisina ahisi, kandi ‘athutsa nabi.’—Luka 9:42.
Emighulhu eyilhabire, esyombinga isikalhwalhaya abandu n’erighusa abandi mwa bathutsa
Munabwire, Sitani n’esyombinga ni bithi nga kera. Kwenene emibiiri yabo ey’obubi yabiryongera erilhwa aha bakathabaghusira erilhwa elhubulha. Emyatsi erilhwa omwa kihugho kyosi yikaha obwema okwa butsibu bwasyo. Sikahira okw’abandu kw’amalhwere. Abandi sikabalyambaya omwa kiro, isyabalethera erithendiyatho kutse n’eribalhothesya nabi. Abandi sikabakolhako emyatsi y’obusingiri. Abandi sikabakolha mwa basire, n’abandi ibitha, kutse n’abandi ibayitha.
Esyombinga munabwire sikakolha abandi bandu mwa batsibu; isyalyambya abandi b’omwakiro, isyabaha ebilhotho bibi
Lintina, oyuwikere e Suriname, akabugha athi: Embinga, kutse ekirimu kibi, mwak’itha abahughu biwe 16 kandi kyamunubya kinyamubiri n’omwa birengekanio ahabw’ebirimo 18. Erisighikira okwa byabya byamuhikireko iyo iyowene-wene akabugha athi esyombinga “sikatsema sikaghalya abandu aba syabirihambiriryako erihika okwa lhuholho.”
Aliriryo sikikalire oku Yehova eritheya abaghombe biwe okw’inubya lya Sitani.—Emisyo 18:10.