Ekitsweka 1
Kwenene Nyamuhanga Ana Thutsomene?
1, 2. Ni kibulyo ki ekihambire oku Nyamuhanga ekya abandu bakabulhaya, kandi busana naki?
OKWA buthuku bulebe wanganabya imuwanayibulya wuthi: ‘Kwenene hamabya ihane Nyamuhanga oyuthutsomene, ekikaleka inialekerera h’eriaghalhwa lingyi niki?’ Ithwe abosi thwabiri aghalhwa kutse thwanganabya ithunasi omundu oyuwabiri aghalhwa.
2 Omwa kwenene, erilhua kera abandu babirinuba busana n’esyonyuhi, obutsindi, erithwa ebilhaghiro, obuthe bulingirirania, obusama, amalhwere, n’eriholerwa abanze babu. Omwa kighonye ekya 20 kisa, abandu abalhabire omwa syomiliyoni 100 mubakwira omwa syonyuhi. Abandi bandu banene babirihuthangalha kutse eriherya amanyumba n’ebindu byabu. Omwa buthuku bwethu buno, mwabiribya ebindu ebikathikaya kutsibu ebikalhwiririra mw’obulighe bunene, emisoni, n’erileka abandu bangyi ibathabya n’amaha.
3, 4. Abandu banene bakayowa bathi Nyamuhanga akalekerera h’eriaghalhwa?
3 Abandi bakahiririkana n’eriyowa bathi hamabya ihane Nyamuhanga, isyathutsomene nahake. Kutse ibangana yowa bathi sihali Nyamuhanga. Ng’eky’erileberyako, omulhume oyuwaghalhawa busana n’erihigha-highanibwa ery’ebihanda eryaleka abanywani n’ab’omw’ihiika liwe ibakwira omwa Lhuhi Olhw’Ekihugho Kyosi I mwabulya athi: “Nyamuhanga abya hayi omughulhu thwamuyithagha?” Owundi, oyuwalhama okw’ithibwa ery’Abanazi omwa Lhuhi Olhw’Ekihugho Kyosi II, mwakwa obulighe bunene busana n’eriaghalhwa ery’alhangira eryaleka iniabugha athi: “Wama lyatsa okwa muthima waghe, iwukendibya iwamalya obutwa.”
4 Busana n’ekyo, abandu banene sibali yitheghereraya ekikaleka Nyamuhanga omubuya inialekerera h’ebindu bibi. Bakayibulhaya kwenene ngana thutsomene kutse ngane naho. Kandi abanene b’okw’ibo bakayowa bathi eriaghalhwa siryendi syahwa omw’abandu.
[Ekisasani okwa lhupapura 2, 3]
Ekihugho kihya-kihya ekithe mw’eriaghalhwa kine museghera hakuhi?