Olhusunzo Lhw’omusabe

1, 2. Busana naki omusabe ni kihembo ky’embaghane, kandi busana naki ithwaminya ekya Biblia yikakanaya kugho?

EKIHUGHO ahakiri omwa kyanya ni kandu kake buyira. Yehova akabya akasamalira ekihugho, abandu abosi abaliko bakabya ng’akathondi k’amaghetse akakalhua omwa kalegha. (Esyonyimbo 115:15; Isaya 40:15) Nomwakine indi thukalhangirawa ng’akandu kake buyira omwa kyanya, Esyonyimbo 145:18, 19 hakabugha hathi: ‘Yehova ali hakuhi okwa bosi abakamubirikira, ali hakuhi okwa bosi abakamubirikira n’ekwenene. Akaberereraya obwagha bw’abosi abakamubaha, akowa erilhaka lyabu, akalhamayabo.’ Olhu ka ni lhusunzo lhunene olhwa thuwithe! Yehova, Omuhangiki omuthoki w’ebyosi, anzire iniabya bughuma nethu, kandi anzire iniahulikirira emisabe yethu. Kwenene, omusabe ni lhusunzo, ekihembo ky’embaghane ekya Yehova abiriha obuli mughuma w’okw’ithwe.

² Aliriryo Yehova akendi thuhulikirira ithunalyakanaya nayu omwa nzira ey’akaligha. Thwanga kolha ekyo kya thuthi? Thulebaye ekya Biblia yikakanaya okwa musabe.

BUSANA NAKI IWASABA YEHOVA?

3. Busana naki wutholere iwasaba Yehova?

³ Yehova anzire iwamusaba kutse erikania nayu. Thukakolha ekyo kya thuthi? Kisi soma Abanya Filipi 4:6, 7. Thalengekania okw’ekyo. Omuthabali ow’obuhangwa bwosi akutsomene kutsibu kandi anzire iwamubwira eriyowa lyawu n’ebitsibu byawu.

4. Erisaba Yehova mughulhu wosi likakamathaya lithi obunywani bwawu nayu?

⁴ Omusabe akathuwathikaya eribya ithune bughuma ndeke na Yehova. Abanywani bakabya bane mukanirania okwa bya bakalengekanaya, ebya banzire, n’okw’iyowa lyabu, obunywani bwabu bukaghuma. Erisaba Yehova kwa line lithya. Erilhabira omwa Biblia, abirikubwira amalengekania n’eriyowa liwe, kandi akakubwira eky’akendikolha omwa buthuku obukasa. Nawu wangana mubwira ebiri okwa muthima omw’imusaba mughulhu wosi. Wukendibya wune mukolha eki, obunywani bwawu na Yehova bukendi kamatha ndeke.​—Yakobo 4:8.

THUKOLEKI NUKU NYAMUHANGA ATHOWE?

5. Thukaminya thuthi ngoku Yehova syalihulikirira emisabe yosi?

⁵ Mbwino Yehova akanahulikirira emisabe yosi? Eyihi. Omwa buthuku bw’omuminyereri Isaya, Yehova mwabwira Abaisraeli athi: “Omughulhu mukakanyiriraya erisaba lingyi, sinendiowa. Ebyalha byenyu byoswire n’omusasi.” (Isaya 1:15) Kwesi thwamathendi yitheya, ithwangana kolha ebindu ebya Yehova aponire, neryo ikyaleka iniathowa emisabe yethu.

6. Busana naki ni kikulhu eribya n’erikirirya? Wanga kangania wuthi ku wuwithe erikirirya?

⁶ Thwamanza Yehova ahulikirire emisabe yethu, ambi ithwamwikirirya. (Mariko 11:24) Omukwenda Paulo mwahandika athi: “Ahathe erikirirya, omundu syangathoka eritsemesya Nyamuhanga, kusangwa litholere oyukahika oku Nyamuhanga in’ikirirya Nyamuhanga kw’aneho, kandi kw’akahemba abakamusonda-sonda.” (Abaebrania 11:6) Aliwe sikiri ghunza erikwama kya bugha wuthi wikirirye. Thutholere ithwakangania erikirirya lyethu lya ndeke omwowa Yehova buli kiro.​—Soma Yakobo 2:26.

7. (a) Busana naki thutholere ithwayikehya n’eribya omwa mibere y’erisikya thukasaba Yehova? (b) Thwanga kangania thuthi ngoku thukasaba erilhua okwa muthima?

⁷ Thutholere ithwayikehya n’eribya omwa mibere y’erisikya thukasaba Yehova. Busana naki? Thwamabya ithuli b’erikania n’omusinga kutse prezidenti, ithukendi kania nayu omwa mibere y’erisikya. Yehova ya Muthoki w’Ebyosi, busana n’ekyo thutholere ithwamusikya n’eriyikehya kutsibu omughulhu thukamusaba. (Enzuko 17:1; Esyonyimbo 138:6) Thutholere ithwamusaba erilhua okwa muthima, butsira eribera erisubirira omwa binywe bighumerera.​—Matayo 6:7, 8.

8. Thwamasaba ekindu, ni kindi kyahi ekya thwanga kolha?

⁸ Erighunzerera, omughulhu thukasaba ekindu kirebe, thutholere ithwalengaho erikolha ngoku thwanga thoka erihambana n’ebya thukasaba. Ng’eky’erileberyako, thwamasaba Yehova y’ebya thukayithagha buli kiro, isi thwangabya baghatha neryo thukalengekania thuthi Yehova akendi thuha obuli kindu kandi ithwangana thoka erikikolera. Thutholere ithwakolha kutsibu n’eriligha omubiiri wosi-wosi owathwangana thoka. (Matayo 6:11; 2 Abanya Tesalonika 3:10) Kutse thwamasaba Yehova y’obuwathikya obw’erileka erikolha ekibi, thutholere ithwayihighulha okwa mibere eyanga thukolya omw’irengwako. (Abanya Kolosai 3:5) Thukanaye okwa bibulyo ebikabera eribulibwa ebihambire okwa musabe.

EBIBULYO EBIHAMBIRE OKWA MUSABE

9. Thutholere ithwasabandi? Yoane 14:6 hakathukangirirayaki okwa musabe?

⁹ Thutholere ithwasabandi? Yesu mwakangirirya abigha biwe athi basabe “Thatha wethu oyuli elhubulha.” (Matayo 6:9) Kandi mwabugha athi: ‘Ingye indi nzira, ingye indi mwatsi w’ekwenene, ingye indi ngebe; sihali mundu oyukahika oku Thatha athalyalhaba omw’ingye.’ (Yoane 14:6) Busana n’ekyo thutholere ithwasaba Yehova erilhabira omu Yesu. Kikamanyisayaki erilhabya emisabe yethu y’omu Yesu? Yehova eriligha emisabe yethu, thutholere ithwakangania ngoku thukasikaya olhukwamirwa lhw’embaghane olhwa Yehova abiriha Yesu. Ngoku thw’igha, Yesu mwasa okwa kihugho erithulhamya okwa kibi n’olhuholho. (Yoane 3:16; Abanya Roma 5:12) Kandi Yehova abirisombolha Yesu eribya Muhereri Mukulhu kandi Mutsweri.​—Yoane 5:22; Abaebrania 6:20.

10. Thukasaba, mbwino hane ngoku thutholere ithwabya? Soborera.

¹⁰ Thukasaba, mbwino hane ngoku thutholere ithwabya? Eyihi, Yehova syali bugha athi ithwakukama, ithw’ikalha, kutse erimana thukasaba. E Biblia yikakangiriraya yithi thwangana saba Yehova ithune omwa mibere mirebe yosi-yosi ey’erimusikya. (1 Emyatsi y’Emigulu 17:16; Nehemia 8:6; Danieli 6:10; Mariko 11:25) Ekya Yehova akalhangira mwa kikulhu, si y’emibere eyathukabyamu thukamusaba, aliriryo ly’erimusaba ithunawithe amalengekania awuwene. Thwangana saba omwa mulenge muuli kutse bukuthu-kuthu ahosi-hosi ahathuli okwa ndambi yosi-yosi. Thwamasaba Yehova, thutholere ithwabya n’amaha ngoku akendi thwowa nibya nomuhangabya isihali omundu oyuthowire thukasaba.​—Nehemia 2:1-6.

11. Ni bindu nga byahi ebya thwanga bwira Yehova omwa musabe?

¹¹ Thwanga sabaki? Thwangana saba ekyosi-kyosi ekinahambangene n’erisonda lya Yehova. E Biblia yithi: ‘Thwamasaba ekindu omw’isonda liwe, akathowa.’ (1 Yoane 5:14) Mbwino thunatholere ithwasaba n’ebithuhambireko. Ee. Erisaba Yehova liri ng’erikania n’omunywani. Thwangana bwira Yehova y’ekyosi-kyosi ekya thukalengekanaya n’ekiri okwa muthima. (Esyonyimbo 62:8) Thwangana musaba omulimu abuyirire erithuwathikya erikolha ekihikire. (Luka 11:13) Kandi thwangana saba Yehova y’amenge aw’erithuwathikya erithwamu ndeke, n’akaghalha ak’erighumira ebitsibu. (Yakobo 1:5) Thutholere ithwa saba Yehova y’ekighanyiro busana n’ebibi byethu. (Abanya Efeso 1:3, 7) Kandi thutholere ithwasabira n’abandi, imwamuli ab’okw’ithwe n’abalikyethu ab’omwa kithunga.​—Emibiri 12:5; Abanya Kolosai 4:12.

12. Ni kyahi ekitholere eribya kikulhu omwa misabe yethu?

¹² Ni kyahi ekitholere eribya kikulhu omwa misabe yethu? Yehova n’erisonda liwe. Thutholere ithwamusima erilhua okwa muthima busana n’ebyosi eby’abirithukolera. (1 Emyatsi y’Emigulu 29:10-13) Thukaminya eki kundi omughulhu Yesu abya okwa kihugho, mwakangirirya abigha biwe ngoku bangasaba. (Soma Matayo 6:9-13.) Mwabugha athi batholere ibatsuka erisaba bathi erina lya Nyamuhanga libye libuyirire. Kandi Yesu mwakangania ngoku thutholere ithwasaba thuthi Obwami bwa Nyamuhanga bwase kandi erisonda liwe likolhawe omwa kihugho kyosi. Yesu abere abirighunza erisaba ebindu bikulhu-bikulhu ebi, mw’abya akakanganirye athi ithwasaba n’ebiyithawa byethu. Thukabya thukahira Yehova n’erisonda liwe ly’embere omwa misabe yethu, thukabya ithwamakangania ekya thukathwalha mwa kikulhu.

13. Emisabe yethu yitholere iyabya mirahi?

¹³ Emisabe yethu yitholere iyabya mirahi? E Biblia siyiri bugha. Emisabe yethu yanganabya mikuhi kutse miri erisighikira okwa mibere eyiriho. Ng’eky’erileberyako, thwangana saba musabe mukuhi thukalya aliwe ithwasaba muuli thukaha Yehova y’ewasingya kutse thukamubwira ebithuhambireko. (1 Samweli 1:12, 15) Si thutholere thukasaba misabe miri-miri habwa ndangirawe, ng’abandi ku bakolha omwa biro bya Yesu. (Luka 20:46, 47) Yehova syali tsemera emisabe eyiri ng’eyo. Ekya Yehova akanza ly’erisaba ebikalhua omwa mithima yethu.

14. Thutholere ithwasaba mirundi mingahi, kandi eki kikathweghesayaki oku Yehova?

¹⁴ Thutholere ithwasaba mirundi mingahi? Yehova akabugha athi thukanaye nayu mughulhu wosi. E Biblia yikathubwira yithi ‘thubye thukasaba,’ ‘thuyitsingirire omw’isaba,’ ‘n’erisaba butsira eriumbya.’ (Matayo 26:41, Abanya Roma 12:12; 1 Abanya Tesalonika 5:17) Yehova akabya inianayitheghekire erihulikirira emisabe yethu. Thwangana musima buli kiro busana n’olhwanzo lhwiwe. Thwangana musaba obusondoli, akaghalha n’erihumulikanibwa. Thwamabya kwenene ithukasima olhusunzo lhw’erisaba Yehova, ithukendi kolesya akaghisa kosi-kosi akathwamabana erikania nayu.

15. Busana naki thutholere ithwabugha thuthi “amina” okwa muhindo w’omusabe?

¹⁵ Busana naki thutholere ithwabugha thuthi “amina” omusabe akahwamu? Ekinywe “amina” kikamanyisaya “kwenene” kutse “kwabinabye bithya.” Ni nzira ey’erikanganiryamu ngoku ebya thulyasaba bikalhua okwa muthima kandi thulyabimanyisaya. (Esyonyimbo 41:13) E Biblia yikathubwira yithi ni kibuya eribugha thuthi “amina,” obundi omwa bukuthu kutse omwa mulenge owakowika okwa muhindo w’omusabe erikangania ngoku thukalighirana n’ebya mabuwa.​—1 Emyatsi y’Emigulu 16:36; 1 Abanya Korinto 14:16.

NGOKU NYAMUHANGA AKASUBIRAYA EMISABE YETHU

16. Kwenene Yehova akanasubiraya emisabe yethu? Soborera?

¹⁶ Kwenene Yehova akanasubiraya emisabe yethu? Ee! E Biblia yikabugha yithi, ‘akasubiraya erisaba.’ (Esyonyimbo 65:2) Yehova akasubiraya emisabe y’esyomiliyoni sy’abandu abakamusaba erilhua okwa muthima, kandi akakolha ekyo omwa nzira muthina-muthina.

17. Yehova akakolesya athi abamalaika n’abaghombe biwe b’okwa kihugho erisubirya emisabe yethu?

¹⁷ Yehova akakolesaya abamalaika n’abaghombe biwe b’okwa kihugho erisubirya emisabe yethu. (Abaebrania 1:13, 14) Hali ebyalholirweko bingyi ebya bandu abasaba Nyamuhanga y’obuwathikya obw’eriyitheghererya e Biblia n’enyuma waho bamabungirwa n’Abema ba Yehova. E Biblia yikakanganaya ngoku abamalaika bakasangira omw’ithulhughania “engulhu yuwene” omwa kihugho kyosi. (Soma Eribisulirwa 14:6.) N’abangyi omw’ithwe thwabirisaba Yehova busana n’ekitsibu kirebe kutse ekiyithawa neryo ithwabana obuwathikya erilhua okwa Mukristayo mulikyethu.​—Emisyo 12:25; Yakobo 2:16.

18. Yehova akakolesaya athi omulimu wiwe abuyirire ne Biblia erisubirya emisabe yethu?

¹⁸ Yehova akakolesaya omulimu wiwe abuyirire erisubirya emisabe yethu. Omughulhu thukasaba obuwathikya bw’erirwanisya ekitsibu kirebe, angana kolesya omulimu abuyirire erithuha obusondoli n’akaghalha. (2 Abanya Korinto 4:7) Kandi Yehova akakolesaya e Biblia erisubirya emisabe yethu n’erithuwathikya erithwamu ndeke. Thukabya thukasoma e Biblia thwangana bana erisako erikendi thuwathikya. Kandi Yehova angana kolesya omundu oyukasubiraya omwa mihindano eribugha ekya thukayithagha eriminya kutse iniakolesya omusyakulhu w’ekithunga erithubwira enzumwa eyiri omwa Biblia.​—Abanya Galatia 6:1.

19. Busana naki thwangana yowa Yehova nga syathasubirya emisabe yethu?

¹⁹ Aliwe okwa bundi buthuku ithwangana yibulya, ‘Busana naki Yehova syathasubirya emisabe yaghe?’ Wibuke ngoku anasi ng’angasubirya emisabe yethu yathi kandi mughulhu wahi. Anasi ebya thukayithagha. Kyangana thuyithaghisya eribya ithunemubera erisaba habw’omughulhu mulebe erikangania ngoku ebya thukasaba thukabimanyisaya n’erimukangania ngoku thumuyikethere. (Luka 11:5-10) Obundi buthuku, Yehova akanasubiraya emisabe yethu omwa nzira eya thuthalhue thuyitsulirye. Ng’eky’erileberyako, thwangana saba busana n’ekitsibu ekikalire, aliwe omwakanya k’erikilhusyaho, angana thuha akaghalha k’erikiyiyinirya.​—Soma Isaya 40:29.

20. Busana naki thutholere ithwasaba Yehova mughulhu wosi?

²⁰ Ka thuwithe olhusunzo olhw’erisaba Yehova! Thutholere ithwakiminya ngoku akendi hulikirira emisabe yethu. (Esyonyimbo 145:18) Thukendibya thunemusaba Yehova mughulhu wosi erilhua okwa muthima, obunywani bwethu nayu bukendi ghuma.