Kibye Kilhubirirwa Kyawu Eribana ow’Eryeghesya e Biblia
1 “Musumbe ameso wenyu, musamalire amalima erire, amahika erig[h]eswa.” (Yn. 4:35) Ahathe erithika-thika ebinywe ebi ebya Yesu Kristo abugha, bihambire okwa mibere eya Abakrisitayo bakabana munabwire.
2 Abandu ab’omuthima mwolho abanzire erikangiriribwa esyonzira sya Yehova bakina banika. Eki kikalhangirika omwa mughanzu ow’abigha bahya-bahya abakabatizibawa buli mwaka. Kwenene wamabya wanzire eribana omwigha ow’eryeghesya e Biblia, ni kyahi ekya wanga kolha?
3 Hira h’Ekilhubirirwa: Eky’erimbere, hira h’ekilhubirirwa eky’eribana omwigha n’erimw’eghesya e Biblia mughulhu wosi. Wubye iwune mulengekania okwa kilhubirirwa ekyo wukasangira omwa mubiiri w’erithulira. Kundi omubiiri wethu ow’Ekikrisitayo mwamuli erithulhughania n’erikangirirya, ithwe abosi thutholere ithwanza eryongera erisangira omwa mubiiri ow’eritsuka erigha n’abandu e Biblia.—Mt. 24:14; 28:19, 20.
4 Esindi Nzumwa esy’Erilengekaniako: Abathuliri bw’Obwami batholere ibasaba ebikalhua omwa muthima. Okwa bundi buthuku thukanabana abandu ababirisaba Nyamuhanga y’obuwathikya obw’eriminya eby’obunyakirimu. Ka ni mughisa erikolesibwa na Yehova erisondekania n’erikangirirya abandu ng’aba!—Hag. 2:7; Emib. 10:1, 2.
5 Mwali wethu mughuma mwasaba athi anzire iniabana omwigha ow’eryeghesya e Biblia neryo mwasanza esyotrakit esya Wunanzire Eriminya Bingi Okwa Biblia? sy’aha akakolera. Omukali mughuma abere abimya etrakit nguma n’erisomayo, n’eritsuka erisulirirya efomu eyiriko, mwali wethu mwakania nayu n’erithoka eritsuka erimw’eghesya e Biblia.
6 Abathuliri balikyethu abasi ndeke eritsukisya n’eryeghesya abigha be Biblia bangana kuwathikya eriberererya ekilhubirirwa kyawu eky’eribana omwigha ow’eryeghesya e Biblia. Bwira Nyamuhanga y’ekilhubirirwa kyawu eky’erisondekania omwigha, kandi kolesaya obuwathikya bwosi obuliho obw’eriberererya ekilhubirirwa eki. Obundi omwa buthuku obuthe bwahali wukendi bana etseme ey’eryeghesya omundu ye Biblia.