Erithulira Likayithagha Eriyiyinia
1 Ahabw’emyaka eyilhabire omu 30, omukwenda Paulo mwatsemera omubiiri w’erithulhulira. Ngoku kyanganabya omwa mubiiri wosi-wosi owuwene, Paulo mwabana ebitsibu omwa mubiiri wiwe ow’erithulira. (2 Kor. 11:23-29) Aliriryo, Paulo mwathalemererwa kutse eribikyako. (2 Kor. 4:1) Mwakiminya ngoku Yehova yuwanga muha akaghalha akangaleka iniayiyinia omughulhu akaberereraya omubiiri wiwe. (Fil. 4:13, NW) Erikwamana n’eky’erileberyako kiwe eky’eriyiyinia buthaleghulha, Paulo mwabugha athi: ‘Munyigherereraye ngoku naghe nga gherereraya Kristo.’—1 Kor. 11:1.
2 Eriyiyinirya Ebitsibu Munabwire: Buli kiro, abangyi b’okw’abalikyethu bakasiningulirawa, ibendereribwa, kutse abahughu, ababakakolha nabu, kutse ababakasoma nabu ibathahulikirira omwatsi wabu. (Mt. 10:35; Yn. 15:20) Obundi eki kyabiri kuhikako. Okwa lhundi lhuhandi, wanganabya iwune murwanisya obulhwere bulebe, kutse wanganabya iwune murwanisya mughulhu wosi ebikalenga okw’ikirirya n’eriyiyinia lyawu. Thwangana bana akaghalha omw’isoma eby’erileberyako aby’abaghombe abathaleghulha ab’omwa buthuku bwakera haghuma n’Abakristayo balikyethu ababiribana n’erisingura ebitsibu.—1 Pet. 5:9.
3 Thwanganabana akaghalha ak’eribya ithuna ghumire omwa mubiiri wethu w’erithulira omw’ilhangira thuthi ‘thukambalha ebindu byosi by’amalhwa bya Nyamuhanga.’ (Efe. 6:10-13, 15) Kandi thutholere ithwasaba Yehova athuwathikaye thwanga yiyinia. Nyamuhanga akathuha omulimu abuyirire wiwe nuku thwanga yiyinirya ebitsibu. (2 Kor. 6:4-7) Erithoka erisingura amalhwa wethu ow’obunyakirimu, thutholere ithwa kenga ebihano bya Nyamuhanga. (Esy. 119:24, 85-88) Ngoku omwana anganabera erisoma ebaruha eyikalhua eyiri thatha ow’olhwanzo, kuthya erisoma e Biblia buli kiro likaghumaya enkolangana yethu na Yehova. Thukabana amenge aw’erirwanisya ebitsibu erilhabira omw’iyeghesya e Biblia mughulhu wosi, neryo ikyaleka amalengekania wa Nyamuhanga iniathusondolha omw’ithwamu lyethu n’erighumya obuthaleghulha bwethu.—Emi. 2:10, 11.
4 Eriyiyinia Likaletha Emighisa: Ngoku kyabya oku Paulo, thwama yiyinia buthaleghulha omughulhu thukaberereraya omubiiri wethu kikatsemesaya omuthima wa Yehova kandi kikathulethera emighisa haghuma n’abandi. (Emi. 27:11) Kwesi thulhole embere eriyitsingirira omw’ithulira, thwanga kangania ngoku thuwithe erikirirya erighumire kandi ‘eriwithe enzwere nene kwilhaba esyamaghetse’ esikahera nomwasikana lengawako omwa muliro.—1 Pet. 1:6, 7.