‘Muleke Ekyakakalha Kyenyu Kikoleraye’
1. Thuwithe olhusunzo olhw’erighabana ki n’abandi?
1 Erilhua omwa ngyakya-ngyakya erihika erigholho-gholho, obubuya obw’ekyakakalha bukaha Nyamuhanga Yehova y’olhukengerwa. Nomwabine, ekyakakalha ekya Yesu abwira abigha biwe athi babye nakyo ni ky’embaghane—‘ekyakakalha eky’engebe.’ (Yn. 8:12) Eribya n’ekyakakalha eky’obunyakirimu eki ni lhusunzo olhw’embaghane, omuli olhukwamirwa olhukalire. Yesu mwalhaghira athi: ‘Muleke ekyakakalha kyenyu kikoleraye embere sy’abandu,’ nuku abandi banga ghasirwa. (Mt. 5:16) Omwa kihugho ekiri mw’omwirimya nyahinda ow’obunyakirimu, ekyakakalha eki kitholere ikyakolerya, kandi erilhua kera sihali hathabya ekiyithawa kinene ng’eki! Nga Kristo, thwanga leka thuthi ekyakakalha kikoleraye?
2. Yesu mwakangania athi omughaso ow’erikangania ekyakakalha eky’obunyakirimu?
2 Omw’Ithulhughania: Yesu mwakolesya endambi yiwe, akaghalha kiwe, n’ebyawitheko erileka abandu baminye ekyakakalha eky’ekwenene omwa miyi yabu, omwa myanya eyikabanika mw’abandu banene, n’okwa bithwe—n’ahosi-hosi aha babya bakabanika. Mwaminya omughaso munene ow’erikangania abandu b’ekyakakalha eky’ekwenene eky’obunyakirimu. (Yn. 12:46) Erithoka erihika okw’abandu banene, Yesu mwatheghekania abigha biwe eribya ‘kyakakalha ky’ekihugho.’ (Mt. 5:14) Mubaleka ekyakakalha kyabu kikoleraye omw’ikolera abaliranwa babu b’ebibuya n’omw’ibabwira ekwenene ey’obunyakirimu.
3. Thwanga kangania thuthi ngoku thukasima kundu ekyakakalha eky’ekwenene?
3 Abandu ba Nyamuhanga bakathwalha olhukwamirwa ‘olhw’erisiba ng’abaana b’ekyakakalha’ mwa lhukulhu kutsibu, kandi bakathulhughanaya ahosi-hosi aha bakabana abandu. (Efe. 5:8) Erisomera e Biblia kutse ebindi bitabu byethu eby’Ekikrisitayo aho abandu banga kulhangirira okwa ndambi y’erilhuhuka iwune okwa mubiiri kutse okwa sukuru lyangana leka iwatsuka erikania n’abandu omwatsi we Biblia. Omwa nzira eyi, mwali wethu mughuma oyukine mulere mwatsuka erigha n’omundu e Biblia kandi mwaghabira abanya sukuru balikyabo b’ebitabu!
4. Busana naki ‘erileka ekyakakalha kyethu kikoleraye’ mwamuli n’emighendere yethu mibuya?
4 Omwa Mighendere Mibuya: Erileka ekyakakalha kyethu kikoleraye mwamuli n’emighendere yethu eya buli kiro. (Efe. 5:9) Okwa mubiiri, okwa sukuru, n’eyindi myanya eyiri mw’abandu bangyi, emighendere ey’Abakrisitayo yikabya y’embaghane kandi kikaleka iwabana akaghisa ak’eribwira abandi emyatsi ey’ekwenene eye Biblia. (1 Pet. 2:12) Ng’eky’erileberyako, emibere mibuya ey’omulhwana ow’emyaka ithano muyaleka omusomesya wiwe iniatherera ababuthi biwe. Omusomesya ow’obukali oyo mwabugha athi: “Sindinathabana omwana oyuli ng’oyu oyukakwama-kwamanaya ndeke ekihikire!” Kwenene, omubiiri wethu ow’erithulira n’emighendere yethu mibuya bikaleka abandu ibasa omwa ‘kyakakalha eky’engebe’ kandi bikaha Nyamuhanga y’olhukengerwa.