Omubiiri Wethu w’Erithulira Akayithagha Eriyitsingirira
1. Yehova abirikangania athi abandu eriyitsingirira?
1 Nyamuhanga akakanganaya eriyitsingirira akakolangana n’abandu. (Eri. 34:6; Esy. 106:41-45; 2 Pet. 3:9) Ekighuma ky’okw’eby’erileberyako bibuya eby’eriyitsingirira liwe ery’olhwanzo kikalhangirika erikwamana n’omubiiri w’Obwami ow’erithulira ow’ekihugho kyosi. Yehova amabirighunza hakuhi emyaka 2000 iniane mukolangana n’abandu, kandi kwa kina lholha embere erithunda abandu b’omuthima mwolho hakuhi nayu. (Yn. 6:44) Thwanga gherererya thuthi eriyitsingirira lya Yehova omwa mubiiri wethu w’erithulira?
2. Thwanga kangania thuthi eriyitsingirira thukathulira omwa bulhambu bwethu?
2 Erithulira Nyumba Okwa Nyumba: Thukagherereraya eriyitsingirira lya Yehova omw’ithulira ahathe ‘eriumbya’ omwa bulhambu obuli mw’abandu abathe bakangania erianzisibwa. (Emib. 5:42) Thukayitsingirira abandu bamathendi anzisibwa, bamathusiningulira, n’erithuhakanisya thukathulira. (Mk. 13:12, 13) Kandi thukayitsingirira thukalholha embere eryuthangirira embuthu y’ekwenene nomukyangabya ikikalire eribana abakanzisibawa omwa miyi yabu.
3. Busana naki eriyitsingirira likayithaghisibawa thukasuba eyiri abakanzisibawa n’eryeghesya abandu be Biblia?
3 Erigha n’Abandu: Erihera ekirimwa likayithaghisaya eriyitsingirira. Thwangana kitsukumirira, aliriryo sithwanga nguhya erikulha lyakyo. (Yak. 5:7) Kuthya, erikulha ery’obunyakirimu likaghenda lyolho-lyolho kandi omwa biika. (Mk. 4:28) Kyangana kalira abathuk’igha nabu erisighania esyonyikirirya esy’amabehi esy’amadini kutse emirwa eyitha seghemere okw’amasako. Sithutholere thukanguhya erikulha-kulhana ery’abigha bethu omw’ibakaka erikolha esyombinduka. Eriyitsingirira likayithaghisibawa eriha omwigha y’obuthuku obukaghunza nuku omulimu wa Nyamuhanga ahindule omuthima w’omwigha.—1 Kor. 3:6, 7.
4. Eriyitsingirira lyanga thuwathikya lithi erithulira ndeke abahughu abathe bikirirya?
4 Abahughu Abathikirirye: Nomwakine indi thwanzire kutsibu abahughu bethu abathikirirye bighe ekwenene, thukakanganaya eriyitsingirira omw’irinda eribana akaghisa akatholere eribabwira ebya thwikirirye, erilhangira thuthi sithuli bahwiririkanaya omwa mwatsi mungyi. (Omu. 3:1, 7) Thunalindirire eribana akaghisa aka, thukanganaye eky’erileberyako kibuya, n’eribya ithunayitheghekire eribabwira okw’ikirirya lyethu ithuna hehere kandi ithuna basikirye. (1 Pet. 3:1, 15) Omwa kwenene, thwamakangania eriyitsingirira omwa mubiiri wethu w’erithulira, ithukendi kolha gho ndeke n’eritsemesya Thatha wethu w’elhubulha.