OMWATSI W’ERIGHA 16
OLHWIMBO 87 Mwase! Mulhuhukibawe
Ni Kibuya Ithwe Erinywana Balikyethu!
“Ni ky’eriswekera, kandi ni kibuya, abandu ba Nyamuhanga bam’ikalha haghuma ng’abaana abasubeneko!”—ESY. 133:1.
EKIGHENDERERWA
Amenge awanga thuwathikya erinywana abaramya balikyethu n’emighisa mingyi eyikalhwiririra omw’ikolha ekyo.
1-2. Ni kindu kyahi ekya Yehova akalhangira mwa kikulhu, kandi anzire ithwakolhaki?
EMIBERE eyathukathwaliramo abandi yikahamba kutsibu oku Yehova. Yesu mwakangirirya athi thutholere ithwanza abaliranwa bethu ngoku thuyanzire. (Mt. 22:37-39) Ekyo mwamuli erikangania olhukeri n’okwa bathawithe erikirirya ng’eryethu. Thwamakangania olhukeri olhu, thukabya ithwamagherererya Yehova Nyamuhanga, oyukahulhukiraya “ababi n’ababuya omwisi wiwe kandi akaha abathunganene n’abathathunganene b’embulha.”—Mt. 5:45.
2 Nomwakine indi Yehova anzire abandu bosi, kutsibu-tsibu akatsemera abakakolha ebihikire. (Yn. 14:21) Anzire ithwamugherererya. Akathuhira mw’omuhwa ‘w’erianza kutsibu’ balikyethu n’eribakangania ‘olhwanzo ng’olhw’abasubeneko.’ (1 Pet. 4:8; Abar. 12:10) Thukabya thukalengekania okw’ikangania omundu mulebe y’olhwanzo ng’olhu, ithwangana lengekania okw’iyowa erya thuwithire omuhughu wethu oyo thwanzire kutse munywani wethu ow’okwa ndungu.
3. Ni kyahi ekyathutholere ithw’ibuka ekihambire okwa lhwanzo?
3 Ng’ekirimwa, olhwanzo lhukayithagha eritsomanwa nuku lhuthoke erikulha. Omukwenda Paulo mwahabulha Abakristayo athi: “Mwanzane ebiro byosi ng’abalikyethu.” (Ebr. 13:1) Yehova anzire ithw’ongera olhwanzo olhwathuwithire abandi. Omwatsi ono akendi soborera ekikaleka ithwabya ithutholere erinywana abaramya balikyethu kandi nga thwanga lholha thuthi embere erikolha ekyo.
EKIKALEKA ITHWABYA ITHUTHOLERE ERINYWANA BALIKYETHU
4. Ngoku kiri omwa Esyonyimbo 133:1, thwanga lholha thuthi embere erikangania ku thukasima obughuma bw’olhughanda lhw’abalikyethu? (Lebaya n’ebisasani.)
4 Soma Esyonyimbo 133:1. Thukalighirana n’omuhandiki w’olhwimbo oyuwahandika athi obunywani bw’okwenene n’abanzire Yehova buwene kandi bukatsemesaya. Aliwe ngoku omundu akanathwalha omuthi munene kutsibu ogho anabeghere erilhangira mwa w’obuli kiro, nethu thwangana tsuka erilhangira obubuya bw’obughuma bwethu bw’Ekikristayo ng’ekindu kya buli kiro. Mughulhu mungyi thukalholha oku balikyethu, obundi mirundi mingyi omwa wiki. Thwanga lholha thuthi embere eribalhangiramo b’omughaso? Olhwanzo olhwa thuwithire balikyethu lhukendyongera thwamahiraho obuthuku bw’erilengekania obuli mughuma nga ni w’omughaso athi okw’ithwe n’okwa kithunga.
Isithwalhangira obubuya bw’obughuma bwethu bw’Ekikristayo ng’ekindu kya buli kiro (Lebaya enungu 4)
5. Olhwanzo olhwa thuwithirene lhwanga hamba lhuthi okw’abandi?
5 Abaghuma b’okw’abakahindana nethu omurundi w’erimbere bakatsema kutsibu bakalhangira olhwanzo olhwa thuwithirene. Ekyo kisa kyangana leka ibaghunzerera bathi babiribana ekwenene. Yesu mwabugha athi: “Busana n’eki, abandu abosi bakendi syaminya ku muli bigha baghe—mwamanzana.” (Yn. 13:35) Thalengekania okwa kyalholirweko kya Chaithra, oyuwabya ak’igha e Biblia n’Abema ba Yehova inianemusomera okwa yunivasite. Mwaligha erihindana okwa lhuhindano lhw’erijoni akakokibwa. Abere abirihindana ekiro ky’erimbere busu okwa busu, mwabwira oyukamw’eghesaya e Biblia athi: “Ababuthi baghe sibali bathanyiwako. Aliwe okwa lhuhindano lhwenyu, balikyenyu mubanyiwireko mirundi 52 omwa kiro kighuma kisa! Munayilhangirira olhwanzo lhwa Yehova erilhabira omw’ihiika ery’obunyakirimu eri. Nganzire ingabya mughuma w’okw’ihiika eryo.” Chaithra mwalholha embere erikulha-kulhana kandi amabatizibwa omwa 2024. Omo kwenene, abahyaka bakabya bakalhangira emibere yethu mibuya, imwamune olhwanzo olhwa thuwithirene, mughulhu mungyi kikaleka ibanza erikolera Yehova.—Mt. 5:16.
6. Erinywana balikyethu kyanga thutheya kithi?
6 Erinywana balikyethu kyangana thutheya. Paulo mwahira omwa Bakristayo balikyabo mw’omuhwa athi: “Musikanaye emithima omughulhu bukinahulhawa munabwire . . . Hakasyabya omundu mughuma omo kathi-kathi kenyu akathebibwa n’ebibi n’erikalya omuthima wiwe.” (Ebr. 3:13) Thwamahwa amani neryo thukatsuka erilhua omwa nzira y’erithunganene, Yehova iniangana hira omu mulikyethu oyutsomene mw’omuhwa w’erithuha obuwathikya obwa thukayithagha. (Esy. 73:2, 17, 23) Omo kwenene, obuwathikya ng’obo bukathughasira.
7. Olhwanzo n’obughuma bihambene bithi? (Abanya Kolosai 3:13, 14)
7 Thuli omwa gurupu y’abandu abakakolha kutsibu erikanganania olhwanzo, busana n’ekyo thukabana emighisa mingyi. (1 Yn. 4:11) Ng’eky’erileberyako, olhwanzo lhukaleka ‘ithwabuyirana omughulhu omundu awithe omwatsi oko wundi,’ kandi eki kikaleka ihabya ihane obughuma bw’Ekikristayo. (Soma Abanya Kolosai 3:13, 14; Efe. 4:2-6) Busana n’ekyo, thukatsemera emibere eyuwene n’erithekana ebikabya okwa mihindano yethu ebya wuthe wangabana ahosi-hosi omwa kihugho.
OBULI MUGHUMA ASIKAYE MULIKYABO
8. Yehova akathuwathikaya athi erithoka eribya bughuma n’abalikyethu?
8 Obughuma obwa thuwithe omwa kihugho kyosi ni kithiko-thiko. Yehova akaleka ekyo ikyathokekana nomwathukanasobaya. (1 Kor. 12:25) E Biblia yikabugha yithi Nyamuhanga akathukangiriraya ngoku thwanganzana. (1 Tes. 4:9) Ni bugha ambu, erilhabira omwa Masako, Yehova akathubwira ekyonyine-nyine ekyathutholere ithwakolha erithoka erinywana balikyethu. Nyamuhanga iniakendi thukangirirya thwamayithendya okwa syangangirirya siwe n’erisighenderako. (Ebr. 4:12; Yak. 1:25) Kandi ekyo kya Bema ba Yehova bakalengaho erikolha.
9. Thuk’ighaki omwa Abanya Roma 12:9-13 bikahika okw’isikya abandi?
9 Ni mwa nziraki Ekinywe kya Nyamuhanga kikathukangiriraya erinywana balikyethu? Lengekanaya okwa ebya Paulo abugha oko mwatsi oyu, ngoku kiri omwa Abanya Roma 12:9-13. (Soma) Lhangira ngoku Paulo mwabugha athi thubye b’erimbere erisikya abandi. Ekyo kikamanyisayaki? Thutholere ithwabya b’erimbere erikangania abandi b’olhwanzo lhw’eribuya-buyana omw’ibaghanyira, eribakokya, eribya benge, n’ebindi-n’ebindi. (Efe. 4:32) Si wutholere wukalinda wuthi balikyethu babakunywane. “Ibya w’erimbere” erikolha ekyo. Yesu mwabugha ndeke-ndeke athi: “Erihithya likaletha etseme nene kwilhaba erihebwa.”—Emib. 20:35.
10. Thwangabya thuthi b’omuhwa bikahika okw’isikya abandi? (Lebaya n’ekisasani.)
10 Paulo abere abirithubwira athi thubye b’erimbere erikangania abandi b’erisikya, mwathuhira mw’omuhwa ‘ow’erikolha n’omuhwa butsira bughatha.’ Omundu omukoli akabya n’omuhwa kandi akakolha kutsibu. Amahebwa omubiiri, akakolhagho n’omuhwa. Emisyo 3:27, 28 hakathubwira hathi: “Siwime obubuya okw’abo batholerebo, omughulhu wuwithe amaaka omo byalha byawu erikolhakyo.” Busana n’ekyo, thwamalhangira omundu iniali omwa buyithawa, thutholere ithwakolha ngoku thwanga thoka erimuwathikya. Sithuli lindiriraya; kutse erilengekania thuthi owundi mundu akendi mutsomana.—1 Yn. 3:17, 18.
Thutholere ithwayira eky’erikolha eriwathikya balikyethu abali omwa buyithawa (Lebaya enungu 10)
11. Ni kyahi ekyanga thuwathikya eribya banywani?
11 Eyindi nzira eya thwanga kanganiryamo ku thusikirye abandi ly’eribaghanyira omwa byalhuba bamathuhithania. Abanya Efeso 4:26 hathi: “Simuleke eryuba likalenga imunahithene.” Busana naki? Omulhondo 27 hakabugha hathi erikolha ekyo, ikikend’iha “Sitani y’omwanya.” Omwa Kinywe kiwe, Yehova akathubwira mirundi mingyi athi thughanyirane. Abanya Kolosai 3:13 hakathuhira mw’omuhwa w’erilholha embere ‘erighanyirana.’ Ekighuma ky’okwa bindu ebyanga thuwathikya erinywana abandi ly’erithendi handa omunwe okwa bisobyo byabu. Thwamakolha ekyo, thukabya ithwamalengaho ‘eribya n’obughuma obukalhua oko mulimu abuyirire, n’eribya n’obuholho obukathumathanaya haghuma.’ (Efe. 4:3) Omwa bikuhi, erighanyira likaleka ihabya obughuma n’obuholho.
12. Yehova akathuwathikaya athi eribya abakaghanyira?
12 Nomwabine, ikyangana thukalira erighanyira ababirithuhithania. Aliwe omwa buwathikya bw’omulimu wa Nyamuhanga, thwangana thoka. Amasako akabya abirithuhiramo omuhwa ow’eribya ‘n’olhwanzo lhw’eribuya-buyana’ kuthya ‘n’erikolha n’omuhwa,’ akathasyathuhabulha athi: “Muleke omulimu abahuha-huhanaye.” Neryo omulimu wa Nyamuhanga anganathuwathikya erikangania olhwanzo lhw’eribuya-buyana n’erighanyirana. Ekyo ky’ekikaleka ithwasaba Yehova y’obuwathikya erilhua okwa muthima.—Lk. 11:13.
“SIHABYE ERIGHABANA OMWAKATHI-KATHI KENYU”
13. Ni kyahi ekyangaleka ihabya erighabulhana?
13 Ekithunga kirimo abandu b’emisindo yosi abalhuire omwa mibere muthina-muthina. (1 Tim. 2:3, 4) Thwamathendi yitheya, erithendi sosana eri lyangana leka ihabya erighabulhana bikahika okwa myatsi y’eriyithwiramo, ng’emyambalire n’emiyipambire, emithambirire, kutse eby’eriyitsemesya. (Abar. 14:4; 1 Kor. 1:10) Kundi Nyamuhanga akathukangiriraya ngoku thwanganzana, thutholere ithwayitheya okw’ihathikana thuthi ebya thwanzire bilengire eby’abandi.—Fil. 2:3.
14. Ni byahi ebya thutholere ithwalengaho erikolha, kandi busana naki?
14 Kandi thwangana kakirya erighabulhana omwa kithunga omw’ilengaho eribya abakahumulikanaya abandi mughulhu wosi n’eribahimba. (1 Tes. 5:11) Omwa buthuku bwa lino-lino, abangyi ababya ibabirisebebera kutse ababya ibabirilhusibwa omwa kithunga babirisubulha. Thukabathangirira ithunatsemire! (2 Kor. 2:8) Thalebya ekyabya oku mwali wethu mughuma oyuwathasyahika okwa Kisenge ky’Obwami enyuma w’erisebebera ahabw’emyaka ikumi. Akabugha athi, “Mubanyiramukya ibanasenyenyirye n’erinyihamba omwa byalha.” (Emib. 3:19) Ehindu hike-hike ehy’olhukeri ehyo muhyamuhambako hithi? Akabugha athi: “Mukyaleka inayowa ebyalha bya Yehova ibinemunyisondolha erithasyabana etseme.” Kristo anganathukolesya omw’ihimba n’erihumulikania abosi “abakanuba n’eriheka ebirithohire.”—Mt. 11:28, 29.
15. Ni yindi nzira yahi eya thwanga kulha-kulhaniryamo obughuma? (Lebaya n’ekisasani.)
15 Eyindi nzira eya thwanga kulha-kulhaniryamo obughuma ly’erilhabira omwa mibughire yethu. Yobu 12:11 hakabugha hathi: “Ko okuthu sikwelenga ebinywe, ng’olhulimi lhukagheraya akalyo kwehi?” Ngoku omutsumbi mubuya akanabya inianemugherya okwa eby’akatsumba erilebya nga binasihire athali abihukulira abandi, nethu kuthya thutholere ithwalengekania okwa byathukayabugha thuthe thwabibugha. (Esy. 141:3) Ekighendererwa kyethu ly’erilhangira thuthi ebya thukabugha bikahimba, erihumulikania n’erighasira abakowa.—Efe. 4:29.
Lengekanaya okwa ekya wukendi bugha wuthe wakibugha (Lebaya enungu 15)
16. Kutsibu-tsibu, ni bahi abatholere ibalhangira bathi bakabya n’emibughire eyikahimba?
16 Abiba n’ababuthi batholere ibalhangira bathi emibughire yabo yikahimba. (Kol. 3:19, 21; Tito 2:4) Abasyakulhu b’ekithunga nabo batholere ibabya abakahumulikanaya n’abakakiranaya, ibo ng’abalisya b’ekihangulho kya Yehova. (Isa. 32:1, 2; Gal. 6:1) Omusyo ow’omwa Biblia akathw’ibukaya athi: “Ekinywe oko mughulhu uwene—ni kibuya kingahi!”—Emi. 15:23.
MWANZE “OMWA MIBIIRI N’EKWENENE”
17. Thwanga kolhaki erilhangira thuthi olhwanzo olhwa thuwithire balikyethu lhukalhua okwa muthima?
17 Omukwenda Yohana akathuhira mw’omuhwa athi ‘sithwanze omwa binywe kutse omwa lhulimi lhusa, nikwa thwanze omwa mibiiri n’ekwenene.’ (1 Yn. 3:18) Thwanzire olhwanzo olhwa thuwithire balikyethu ilhwalhua okwa muthima. Ekyo thwanga kikolha thuthi? Thukabya thuk’ongera eribya haghuma n’abalikyethu, kwathukan’ongera thuthya eribya banywani n’olhwanzo olhwa thuwithirene ilhwaghuma. Sondaya ehighisa ehy’eribya haghuma n’abandi—okwa mihindano n’omw’ithulira. Ibya iwunemubungira abandi. Thwamakolha ekyo ithukendibya ithwamakangania ngoku Nyamuhanga anemuthukangirirya ku thwanganzana. (1 Tes. 4:9) Kandi ithukendi lholha embere eriyilhangirira ngoku kyuwene kandi kikatsemesaya abandu ba Nyamuhanga bam’ikalha haghuma ng’abaana abasubeneko!—Esy. 133:1.
OLHWIMBO 90 Thuhimbangane