Sithuli Ithwibene

1-2. (a) Busana naki ithwabugha thuthi sithuli lhaba omwa bitsibu mw’ithwibene? (b) Thukendikania okuki omo mwatsi ono?

THWAMABANA ebitsibu ebikalire kutsibu, ithwangana yowa nga thuli ithwibene omwa bwathu buke okwa ngetse eyiri kw’ekiyagha kinene. Nomwakine, sithuli lhaba omwa bitsibu ebi mw’ithwibene. Thatha wethu w’olhwanzo ow’elhubulha syali subulira okw’isamalira ebitsibu byethu lisa, aliwe kandi akathulhaghanisaya erithuwathikya eribilhabamo. Yehova akakakasaya obuli mughuma w’okw’abaghombe biwe abathaleghulha athi: “Ngendi kuwathikya.”—Isa. 41:10.

² Omwatsi ono akendi kania ngoku Yehova akathuwathikaya (1) omw’ithusondolha, (2) omw’ithuha ebiyithawa byethu, (3) omw’ithutheya, na (4) omw’ithuhumulikania. Yehova akathukakasaya athi nomuthwangabana ebitsibu ebiri bithi omwa ngebe, syanga thw’ibirirwa. Syanga thulekerania. Busana n’ekyo, sithuli ithwibene.

YEHOVA AKATHUSONDOLHA

3-4. Yehova akathusondolha athi? (Esyonyimbo 48:14)

³ Soma Esyonyimbo 48:14. Yehova anasi ngoku sithwanga thoka eriyisondolha kandi ngoku thukayithagha obusondoli bwiwe. Munabwire, Yehova akasondolha athi abaramya biwe abathaleghulha? Enzira nguma eyo akakoleramo ekyo ly’erilhabira omwa Biblia. (Esy. 119:105) Erilhabira omwa Kinywe kiwe ekyasondolibawa, Yehova akathuwathikaya erithwamu ndeke n’erikulha-kulhania emibere eyanga leka ithwabana etseme nene lino n’engebe y’erikotha omwa buthuku obukasa.a Ng’eky’erileberyako, akathukangiriraya erithendi bika ekinigha, eribya b’okwenene omwa byosi thukakolha, n’erianza abandi erilhua okwa muthima. (Esy. 37:8; Ebr. 13:18; 1 Pet. 1:22) Thwamakangania emibere ng’eyi, thukabya babuthi babuya, abathahenie babuya, kandi banywani.

⁴ Eryongera okw’ekyo, Yehova mwahira omwa Kinywe kiwe mw’emyatsi y’abandu ng’ithwe abalhaba omwa bitsibu kandi ababya n’eriyowa eriri ng’eryethu. (1 Kor. 10:13; Yak. 5:17) Thwamasoma ebibahambireko n’erikolesya ebyo thukabighirako, thukaghasirawa omwa nzira ng’ibiri. Ey’erimbere, thukaminya ngoku sithuli ithwibene—abandi babirilhaba omwa mibere eyiri ng’eyo kandi babirithoka erighumirayo. (1 Pet. 5:9) N’eyakabiri, thuk’igha ngoku thwanga ghumira ebitsibu byethu.—Abar. 15:4.

5. Ni bahi abo Yehova akakolesaya erithusondolha omwa nzira y’engebe?

⁵ Kandi Yehova abirihiraho emitheghekere y’abikirirya balikyethu erithusondolha.b Ng’eky’erileberyako, mughulhu wosi abalebererya b’omuthimbo bakabungira ebithunga erithuhimba. Emikania yabu yikaghumaya erikirirya lyethu n’erithuwathikya erisighalha ithune bughuma. (Emib. 15:40–16:5) Abasyakulhu b’ekithunga bakakanganaya ku batsomene ebiyithawa by’obuli muthuliri. (1 Pet. 5:2, 3) Ababuthi bakasondolha abaana babu bunyakirimu, ibabawathikya erithwamu ndeke n’eribya n’esyongeso esyuwene. (Emi. 22:6) Kandi abakali Abakristayo abakulire omwa myaka bakawathikaya bali bethu abalere omw’ibahiriraho eky’erileberyako ekyuwene, omw’ibaha erihabulha ery’amenge, n’omw’ibahiramo omuhwa.—Tito 2:3-5.

6. Ni kyahi ekyo thutholere ithwakolha erithoka erighasirwa omwa busondoli bwa Yehova?

⁶ Yehova abiriberererya olhukwamirwa lhwiwe omw’ithuha obusondoli obwa thukayithagha. Thwanga kangania thuthi ku thukasima ebyo abirithukolera. Emisyo 3:5, 6 hakabugha hathi: “W’ikiriraye Omwami Mukulhu n’omuthima wawu wosi, siwuyeghemeraye obuminya bwawu.” Thwamakolha ekyo, iniakendi “thunganania esyonzira [syethu],” ni bugha ambu, akendi thuwathikya eriyihighulha okwa bitsibu bingyi kandi ithwabya omwa ngebe eyiri mw’etseme. Ka kikatsemesaya, eribya indi Yehova akahabulha obuli mughuma w’okw’ithwe omo lhwanzo!—Esy. 32:8.

YEHOVA AKATHUHA EBIYITHAWA BYETHU

7. Yehova akathuha ebyo thukayithagha omwa nzira nga syahi? (Abanya Filipi 4:19)

⁷ Soma Abanya Filipi 4:19. Eryongera okw’ithusondolha bunyakirimu, Yehova akatsumulha akaghalha ako thukahiraho eribana ebyalya, eby’eryambalha, n’ah’erighotsera, ebindu ebyo thukayithagha. (Mt. 6:33; 2 Tes. 3:12) Nomwakine indi ni kya buli kiro erilengekania okwa biyithawa byethu by’ekinyamubiri, Yehova akathubwira athi isithwahanga-hangaya bikahika okwa myatsi eyiri ng’eyi. (Mt. 6:25) Busana naki? Kundi Thatha wethu syanga lekerenia abaramya biwe abathaleghulha omughulhu bali omwa buyithawa. (Mt. 6:8; Ebr. 13:5) Thwangana muyikether’ighuma omughulhu akayilhagha erithuha ebyo thukayithagha.

8. Yehova mwakolera Dawudi yaki?

⁸ Thalengekania okwa mibere Yehova awathikirayamo Dawudi. Omwa myaka eyikalire eya Dawudi aghunza ng’omuthibithi, Yehova mwaha Dawudi n’abalhume biwe ebyo babya bakayithagha erithoka eribyaho. Dawudi abere akalengekania okwa mibere Yehova amutsomaniramo omwa myaka yosi eyo, mwahandika athi: “Indi mukulhu lino, singakiri mulere, nikwa sindinathalhangira Omukama akasighania omundu oyuthunganene, kandi sindinathalhangira abaana biwe bakasaba-saba akalyo.” (Esy. 37:25) Obundi omwa ngebe yawu, wabiriyilhangirira ngoku omo lhwanzo Yehova akaha abaghombe biwe abamuyikethere b’ebiyithawa byabu.

9. Munabwire, ni buwathikya bwahi obo Yehova akaha abandu biwe omughulhu hakawa ekitsinduli? (Lebaya n’ebisasani.)

⁹ Kandi Yehova akaha abandu biwe b’ebyo bakayithagha omughulhu hakawa ekitsinduli. Ng’eky’erileberyako, omughulhu habya enzalha omwa kighana ky’erimbere, Abakristayo erilhua omwa bitsweka muthina-muthina mubathuma obuwathikya oku balikyabo ababya omwa buyithawa. (Emib. 11:27-30; Abar. 15:25, 26) Namunabwire abandu ba Nyamuhanga bakakanganaya omubere ng’oyo ow’erihithya. Omughulhu hakawa ekitsinduli, omo lhwanzo Yehova akahira omwa bandu biwe mw’omuhwa ow’erihayo ebiyithawa ng’ebyalya, amaghetse, eby’eryambalha, n’omubatsi okw’abo ababirihambwako n’ekitsinduli. Abali omwa by’obuhimbe bakasuba-subanaya amanyumba n’Ebisenge by’Obwami ebyabiritsandalikanibwa. Kandi abaghombe ba Yehova bakanguha erihumulikania n’erihimba abandu ababiriherya ebindu byabu.c

10-11. Ekyalholirweko kya Borys kyamakweghesyaki?

¹⁰ Kandi ahathe eriyikukumirira, Yehova akawathikaya n’abathe batsuka erimuramya. Nethu kuthya, thukasondaya ehighisa ehy’erikangania olhukeri okwa bathawithe erikirirya ng’eryethu. (Gal. 6:10) Mughulhu mungyi erikolha ekyo kikaha obwema obuwene. Thalengekania okwa kyalholirweko kya Borys, omukulhu w’esukuru oyuwikere e Ukraine. Nomwakine indi Borys si Mwema wa Yehova, iniakakanganaya abanya sukuru Abema b’olhukeri kandi iniasikirye ebyo bikirirye. Omughulhu Borys athwamu erilhua omwa kitsweka ekyabya mw’olhuhi ekyo abya ikeremo, n’erighenda omwa kindi kitsweka ekyathabya mw’olhuhi omwa kihugho ikyan’ekyo, balikyethu mubamuwathikya. Enyuma waho, Borys mwahindana okw’Ibuka olhuholho lhwa Kristo. Akabya ak’ibuka ebya balikyethu bamukolera, Borys akabugha athi: “Abema mubanyikangania olhukeri n’erinyitsomana kutsibu. Ngasima Abema ba Yehova.”

¹¹ Nethu kuthya thwangana gherererya Thatha wethu ow’elhubulha ow’obughanyiri omw’ikangania abali omwa buyithawa b’olhwanzo, mbulha bawithe erikirirya ng’eryethu kutse eyihi. (Lk. 6:31, 36) Thuwithe amaha ngoku akaghalha ako thukahiraho erianza abandu k’akendi leka ibabya bigha ba Kristo. (1 Pet. 2:12) Mbulha ni byahi ebikendi lhwiririramo, thukendi bana etseme eyikalhwiririra omw’ihithya.—Emib. 20:35.

YEHOVA AKATHUTHEGHAYA

12. Ni butheya bwahi obo Yehova akalhaghanisaya abandu biwe ng’egurupu? (Esyonyimbo 91:1, 2, 14)

¹² Soma Esyonyimbo 91:1, 2, 14. Munabwire, Yehova akathulhaghanisaya erithuha obutheya bw’obunyakirimu. Syanga lighira nahake Sitani akatsandya eriramya ly’okwenene. (Yn. 17:15) Kandi obulighe bunene bukendibya bukatsuka, thunayikether’ighuma ngoku Yehova akendi berererya omulhaghe wiwe ow’eritsomana abandu biwe bunyakirimu na kinyamubiri.—Erib. 7:9, 14.

13. Yehova akatheghaya obuli mughuma w’okw’ithwe omwa nzira nga syahi?

¹³ Yehova akatheghaya athi obuli mughuma w’okw’ithwe? Erilhabira omwa Masako, Yehova akathuwathikaya eriminya ekihikire n’ekithahikire. (Ebr. 5:14) Omughulhu thukaghendera okwa misingyi eyiri omwa Kinywe kya Nyamuhanga, thukayitheghaya okwa bindu ebyanga thukolha nabi bunyakirimu na kinyamubiri. (Esy. 91:4) Ery’ongera okw’ekyo, Yehova akathutheghaya erilhabira omwa kithunga. (Isa. 32:1, 2) Omw’ibya hakuhi n’abanzire Yehova n’abakaghendera okwa misingyi yiwe, thukahiribawa mw’omuhwa n’akaghalha ak’eriyihighulha okwa bindu bibi.—Emi. 13:20.

14. (a) Busana naki Nyamuhanga syali thutheghaya okwa bitsibu byosi? (b) Esyonyimbo 9:10 hakathukakasaya hathiki? (Lebaya n’omwatsi ahikwa.)

¹⁴ Ihakanayira Yehova iniatheya abaramya biwe ba kera okw’ihuthalibwa kinyamubiri. Aliwe, isyali kolha ekyo mughulhu wosi. Hakanayira ithwabana ebitsibu busana n’ebikawa kitsumbukirania. (Omu. 9:11) Kandi erilhua kera, Yehova abirilighira abaghombe biwe eriendereribwa nibya n’erihika okw’iholha nuku kilhangirike ngoku Sitani ni mubehi. (Yobu 2:4-6; Mt. 23:34) Kwabine bithya namunabwire. Nomwakine indi Yehova syang’ihaho ebitsibu byethu, thukakasirye ngoku syanga sighania abamwanzire.d—Esy. 9:10.

YEHOVA AKATHUHUMULIKANAYA

15. Thukahumulikanibawa thuthi erilhabira omwa musabe, Ekinywe kya Nyamuhanga, n’Abakristayo balikyethu? (2 Abanya Korinto 1:3, 4)

¹⁵ Soma 2 Abanya Korinto 1:3, 4. Okwa bundi buthuku, thukabya omwa bulighe, ithwahangya-hangya kutse ithwabya omwa maghaniryo. Obundi lino wuli omwa mibere eyikalire eyikaleka iwayowa iwuli iwuwene. Mbwino hane owosi-wosi oyukayitheghereraya eriyowa lyawu? Yehova akakuyitheghereraya. Syali subulira okw’owa obulhumi bwethu lisa aliwe kandi ‘akathukiranaya omo malighe wethu wosi.’ Athi? Thukabya thukabwira Yehova y’ebyosi omwa musabe, akathuha “obuholho bwa Nyamuhanga, obulhabire amenge wosi.” (Fil. 4:6, 7) Kandi thukahumulikana thukasoma ebinywe ebyo Yehova akathubwira ebiri omwa Biblia. Ebinywe by’olhwanzo, eby’amenge, kandi eby’amaha ebyasondolibawa ebiri omwa kitabu ky’obughuli ekyo bikathuhumulikanaya. Kandi emihindano y’Ekikristayo yikathuhumulikanaya omw’ibya haghuma n’abalikyethu Abakristayo kuthya n’omw’igha emyatsi eyikathuhimba eyiseghemere okwa Biblia.

16. Ekyalholirweko kya Nathan na Priscilla kyamakweghesyaki?

¹⁶ Eriminya ngoku Yehova akathuhumulikanaya n’erithuhimba erilhabira omwa Kinywe kiwe, thulebaye ekyalholirweko ekya Nathan na Priscilla ab’ikere omwa United States. Myaka mingyi enyuma, mubathwamu erighenda eyiri obuyithawa obw’abathuliri b’Obwami. Nathan akabugha athi: “Muthwayikethera ngoku Yehova akendi tsumulha akaghalha kethu. Aliwe, enyuma w’erihika omwa lhusunzo lhwabu lhuhyaka olho, kitsumbukirania mubabana ebitsibu by’amaghalha n’eby’emingirirye. N’erighunzerera abathahenie aba mubabya b’erisuba ewabu, eyo, mubalholha embere ibanawithe ekitsibu ky’emingirirye. Nathan ak’ibuka bino: “Munayibulya nga ni kyahi ekyamaleka Nyamuhanga iniathathutsumulha ngoku thulhwe thulengekenie. Nibya munatsuka eriyibulya nga hane ekindu kibi ekya nakolire.” Aliwe, habere halhaba buthuku, Nathan na Priscilla mubakiminya ngoku Nyamuhanga abya isyathabasighania omwa buthuku babya omwa buyithawa. Nathan ak’ongerako athi: “Omwa buthuku obukalire obo, e Biblia muyabya ng’omunywani ow’amenge oyukathuhira mw’omuhwa n’erithusondolha. Erihwerya amalengekania okwa mibere Yehova athuwathikirayamo erighumira ekitsibu ekyo omwakanya k’erihweryagho okwa kitsibu mukyaleka ithwabya ithunayitheghekere ebitsibu ebyangasire omwa buthuku bw’embere ithunawithe erikirirya.”

17. Mwali wethu oyukahulhawamo Helga mwahumulikanibwa athi? (Lebaya n’ekisasani.)

¹⁷ N’abalikyethu bangana thuhumulikania. Bathi? Thalengekania okwa ky’erileberyako kya Helga, oyuwikere e Hungary. Ahabw’emyaka mingyi, mwabana ebitsibu muthina-muthina ebyaleka iniabya omwa bulighe n’eriyowa mwa wabbule. Akabya akasubya ameso w’enyuma, akalhangira emibere Yehova amuhulikanirayamo erilhabira omwa kithunga. Akabugha athi: “Yehova abiribya iniane munyiwathikya omughulhu akalhangira ngoku akaghalha kaghe kanemukeherera ahabw’emibiri ya buli kiro, eritsomana omwana waghe oyulhwere, n’ebindi bitsibu. Sihali hathalhaba kiro n’ekighuma omwa myaka 30 eyamabirithalhaba ekya Yehova alemerawamo eriberererya omulhaghe wiwe ow’erinyihumulikania. Mughulhu wosi akanyighumaya erilhabira omwa binywe by’olhukeri, ebisombwerwe ndeke, kandi eby’erisima ebya bandi bakabugha. Mughulhu mungyi ngabana akameseji, akabaruha kutse erisimwa okwa buthuku obutholere.”

18. Thwanga humulikania thuthi abandi?

¹⁸ Thuwithe olhusunzo olhw’erigherererya Nyamuhanga wethu omw’ihumulikania abandi. Thwanga kolha ekyo kya thuthi? Thwangana bahulikirira omw’ighumisirizya, ithwakania nabo omw’ibahumulikania n’eribaha obuwathikya. (Emi. 3:27) Thukalengaho erihumulikania abosi abakaghalhawa, imwamune n’abathe batsuka erikolera Nyamuhanga. Abataka bethu bamabya omwa bulighe, erilhwalha, kutse eribya omwa maghaniryo, thukababungira, ithwabahulikirira, n’eribakanirya okwa binywe ebikahumulikanaya ebiri omwa Biblia. Thwamagherererya Yehova, “Nyamuhanga w’erikirania lyosi,” thukawathikaya abikirirya balikyethu erighumira ebitsibu n’eriwathikya abathawithe eriramya ng’eryethu eryasa omw’iramya ly’okwenene.—Mt. 5:16.

MUGHULHU WOSI YEHOVA AKATHUWATHIKAYA

19. Ni kyahi ekya Yehova akathukolera, kandi thwanga mugherererya thuthi?

¹⁹ Yehova atsomene kutsibu abosi abamwanzire. Syali thusighanaya omughulhu thuwithe ebitsibu. Ngoku omubuthi akanatsomana omwana wiwe omwa lhwanzo, Yehova akatsomana abaramya biwe abathaleghulha. Akathusondolha, iniathuha ebiyithawa byethu, iniathutheya, n’erithuhumulikania. Thukagherereraya Thatha wethu w’olhwanzo w’elhubulha omw’isighika n’erihumulikania abandi omughulhu bali omwa bitsibu. Nomuthwangabana bitsibu n’ebikabbuna muthima, thukakasirye ngoku Yehova ane haghuma nethu. Kundi nibya abirilhaghanisya athi: “Siwubahe, kusangwa indi haghuma nawu.” (Isa. 41:10) Eki ka kikahumulikanaya! Omo kwenene, sithuli ithwibene.