Erina lya Yehova ni ry’Omughaso Lithi Embere sya Yesu?

1-2. (a) Ni kyahi ekyo Yesu akolha omwa kiro athal’ithibwa? (b) Ni bibulyo byahi ebyo thukendi kaniako omo mwatsi ono?

KYABYA Kyakani omw’igholho-gholho, Nisani 14, 33 E.K., kandi Yesu abya iniakayaghoberibawa, eritswerwa, eritswebwa, eriaghalibwa, n’er’ithibwa. Abya imwanamaghunza erirya ekihulho ky’embaghane omwa kisenge ky’eyighulhu iniane n’abakwenda biwe abathaleghulha. Babere babirirya ekihulho ekyo, Yesu mwabwira abakwenda biwe b’ebinywe birebe ebikahimba akabalhagha. Kandi buthuku buke abosi bathe balhua omwa kisenge ky’eyighulhu ekyo, Yesu mw’imana hake n’eriha omusabe mukulhu kutsibu. Omukwenda Yohana mwahandika omusabe oyo; akabanika omu Yohana sura 17.

² Omusabe wa Yesu akathubisuliraki okw’iyilhalikirira eryo abya nalyo okwa buthuku obo? Omusabe oyo akakanganaya athi ekindu ekyo aby’akalhangira mwa kikulhu omw’ithulira liwe lyosi iniane okwa kihugho? Leka thukanaye okwa by’erisubirya by’ebibulyo ebi.

“NABIRIBAMINYISYA ERINA LYAWU”

3. Yesu mwabugha athiki okwa lina lya Yehova, kandi amanyisayaki? (Yohana 17:6, 26)

³ Omwa musabe wiwe, Yesu mwabugha athi: “Nabiribaminyisya erina lyawu.” Nibya, mirundi ibiri mwabugha athi abiriminyisya abigha biwe b’erina lya Yehova. (Soma Yohana 17:6, 26.) Amanyisayaki? Mbwino mwababisulira erina eryo bathabya basi? Abigha ba Yesu babya Bayuda, neryo babya ibanasi erina lya Nyamuhanga, Yehova. Erina eryo irikabanika omwa Masako w’Ekihebrania mwa mirundi mingyi. Neryo Yesu abya isyalikwama kyakania okwa lina lya Nyamuhanga; aliwe aby’akakania okwa ekyo erina eryo lik’imanira. Yesu abya iniabiribawathikya eriminya omwinye lina Yehova nga nindi, imwamune ebighendererwa Biwe, emibiiri, n’emibere Yiwe, omwa nzira eyo wundi mundu athe angasoborera.

4-5. (a) Ni ky’erileberyako kyahi ekyo thwangaha erisoborera ekyo kikamanyisaya eriminya erina ly’omundu? (b) Abigha ba Yesu mubaminya erina lya Yehova omwa nziraki?

⁴ Ng’eky’erileberyako, thubughe thuthi omwa kithunga kyenyu muli omusyakulhu oyukahulhawamo David kandi iniabya ini mudokita oyukasemezaya. Wamabirighunza myaka mingyi iwunasi mughalha wethu oyo. Aliwe kiro kighuma iwalhwalha obulhwere obukakuyithaghako erithambirwa omwa byalhuba. Ibakuthibithya okwa sipatara eyo mughalha wethu oyo akakolerako, neryo iniakolesya amenge wiwe w’obuthambiri erilhamya engebe yawu. Mbwino erina lya mughalha wethu oyo irinemwendyongera eribya ly’omughaso embere syawu? Ahathe erithika-thika! David isyendi subulira okw’ibya musyakulhu w’ekithunga lisa; aliwe kandi iniakendibya iniamabya dokita oyuwalhamaya engebe yawu.

⁵ Kuthya, n’abigha ba Yesu babya ibanasi erina lya Yehova. Aliwe erina eryo mulyongera eribya ly’omughaso embere syabo busana n’erithulira lya Yesu. Busana naki ithwabugha thuthya? Kundi Yesu iniakakanganaya emibere ya Thatha wiwe omwa byosi ebya akabugha n’erikolha. Neryo abakwenda biwe mubaminya Yehova ya ndeke omw’ihulikirira emibere Yesu aby’akakangiriryamo n’omw’isamalira ndeke emibere eyo aby’akakolonganiramo n’abandu.—Yn. 14:9; 17:3.

“ERINA LYAWU, ERYO WABIRINYIHA”

6. Yehova mwaha Yesu y’erina liwe omwa nziraki? (Yohana 17:11, 12)

⁶ Omwa musabe wiwe, Yesu mwasabira abigha biwe athi: “Wubatheghaye busana n’erina lyawu, eryo wabirinyiha.” (Soma Yohana 17:11, 12.) Mbwino ekyo mukyamanyisya indi Yesu angaminyirwe mwa Yehova? Eyihi. Lhangira ngoku omwa musabe wiwe, Yesu akakanaya okwa lina lya Yehova athi “erina lyawu.” Neryo erina lya Yehova mulyathabya lina lya Yesu. Neryo kwesi, Yesu amanyisayaki akabugha athi abirihebwa erina lya Nyamuhanga? Eky’erimbere, Yesu abya mwimaniri wa Yehova, kandi Mbuyi. Mwasa omwa lina lya Thatha wiwe, kandi amakolha ebindu eby’amaaka omwa lina eryo. (Yn. 5:43; 10:25) Eryongera okw’ekyo, erina Yesu likamanyisaya “Yehova ni Mulhamu.” Omo kwenene, erina lya Nyamuhanga lihambene ndeke n’erina lya Yesu.

7. Iha eky’erileberyako ekikakanganaya ngoku Yesu iniakabugha omwa lina lya Yehova.

⁷ Ng’eky’erileberyako, kundi ambasada akabya iniak’imanira omuthabali mulebe, inianganakania omwa lina ly’omuthabali oyo. Neryo ebinywe ebyo ambasada akabugha bikabya n’obuthoki ng’eby’omuthabali. Kuthya, Yesu mw’imanira Yehova kandi mwakanirya abandu omwa lina Liwe.—Mt. 21:9; Lk. 13:35.

8. Erina lya Yehova lyabya lithi omu Yesu athalyasa okwa kihugho? (Eriluayo 23:20, 21)

⁸ Omwa lhukwamirwa lhwiwe iyo nga Kinywe, Yesu abirikolha ng’Embuyi ya Yehova omw’ihikya omwatsi n’obusondoli okwa bandi baghalha ba Nyamuhanga b’ekirimu kuthya n’okw’abandu. (Yn. 1:1-3) Yesu angabya iy’omumalaika oyo Yehova athuma eritsomana Abaisraeli bakalhua e Misiri. Yehova abere akabwira Abaisraeli athi bowe omumalaika oyo, mwabugha athi: “Kusangwa erina lyaghe liri omw’iye.”a (Soma Eriluayo 23:20, 21.) Erina lya Yehova liri omu Yesu omwa nzira y’eribya iniak’imanira Yehova kandi y’ow’embere-mbere omw’isighika erina lya Thatha wiwe n’eriliyira mwa libuyirire.

“THATHA, IHA ERINA LYAWU LY’OLHUKENGERWA”

9. Erina lya Yehova lyabya ly’omughaso lithi embere sya Yesu? Soborera.

⁹ Ngoku thwamabirilhangira, nibya Yesu athali asa okwa kihugho, erina lya Yehova lyabya ly’omughaso munene embere siwe. Kwesi sikiriswekaya erina lya Yehova eribya irihambene ndeke-ndeke n’ebyosi ebyo Yesu akolha iniane okwa kihugho! Iniakisigha iniaghunza omubiiri wiwe w’erithulira, Yesu mwasaba athi: “Thatha, iha erina lyawu ly’olhukengerwa.” Aho n’aho, Thatha wiwe mwamusubirya omwa mulenge w’omulhumo erilhua elhubulha athi: “Nabirihalyo olhukengerwa, kandi ngendi thasyahalyo olhukengerwa.”—Yn. 12:28.

10-11. (a) Yesu mwaha athi erina lya Yehova ly’olhukengerwa? (Lebaya n’ekisasani.) (b) Busana naki erina lya Yehova litholere iryayirwa mwa libuyirire n’ery’eribwa?

¹⁰ Yesu nayu mwaha erina lya Thatha wiwe ly’olhukengerwa. Athi? Enzira nguma lyabya iry’eribisulira abandi b’emibere n’emikolere ya Thatha wiwe eyikaswekaya. Nomwabine, ni bingyi ebyabya bikayithaghisibwa bikahika okw’iha erina eryo ly’olhukengerwa. Erina lya Yehova lyabya likayithagha eriyirwa mwa libuyirire n’ery’eribwa. Yesu mwakangania ngoku eki ni ky’omughaso omughulhu akangiriraya abigha biwe b’omusabe w’eky’erileberyako. Mwabugha athi: “Thatha wethu oyuli elhubulha, erina lyawu libye libuyirire.”—Mt. 6:9.

¹¹ Busana naki erina lya Yehova iryayirwa mwa libuyirire n’ery’eribwa? Kundi kera omw’irima lye Edeni, Sitani Diabolo mwathasikya Yehova Nyamuhanga kandi mwamuhangirira. Sitani mwabugha athi Yehova ni mubehi kandi athi ak’ima Adamu na Eva b’ekindu kibuya. (Enz. 3:1-5) Kandi Sitani mwabugha athi emibere eyo Yehova akakoleramo emyatsi si yihikire. Amabehi wa Sitani mwahamba nabi okwa lina lya Yehova. Enyuma waho, omwa biro bya Yobu, Sitani mwabugha athi abakakolera Yehova bakakolha ekyo busana n’eby’akabaha. Omuhangiriri oyo mwathasyabugha athi, omwa kwenene sihali oyuwanzire Yehova ya ndeke oyuwanga lholha embere erimukolera omughulhu awithe ebitsibu. (Yobu 1:9-11; 2:4) Habya hakayithagha erilhaba obuthuku erithoka eriminya omubehi nga nindi, Yehova kutse Sitani.

“NGAHAYO ENGEBE YAGHE”

12. Yesu abya inianayitheghekire erikolhaki busana n’erianza erina lya Yehova?

¹² Kundi Yesu aby’anzire Yehova, mwanza erikolha ekyosi-kyosi ekyo angathoka eriyira erina lya Yehova mwa libuyirire n’eriryerya. Yesu mwabugha athi: “Ngahayo engebe yaghe.” (Yn. 10:17, 18) Nibya abya inianayitheghekire eriholha busana n’erina lya Yehova.b Abandu b’erimbere babiri abahikene, iya Adamu na Eva, mubalholya oku Yehova kw’omughongo, bamasighika Sitani. Yesu erithendibya ng’ibo abya inianayitheghekire eryasa okwa kihugho n’erikangania kw’anzire Yehova. Yesu mwakolha eki omw’ikangania obuthaleghulha omwa nzira eyihikene. (Ebr. 4:15; 5:7-10) Mwasighalha inina muthaleghulha omwa ngebe yiwe erihika aho aholera okwa muthi w’amaghali. (Ebr. 12:2) Omwa nzira eyi, mwakangania ngoku anzire Yehova n’erina Liwe.

13. Busana naki Yesu yuwabya atholere erikangania ngoku Sitani ni mubehi? (Lebaya n’ekisasani.)

¹³ Yesu mwakangania ndeke-ndeke omwa ngebe yiwe yosi ngoku Sitani ya mubehi butsira Yehova! (Yn. 8:44) Yesu aby’asi ndeke Yehova kwilhaba owosi-wosi oyuwabirithabyaho. Ebya Sitani abugha akahangirira Yehova kubyabya ibine mw’ekwenene yosi-yosi, Yesu angabere inianasiyo. Aliwe Yesu mwasighalha inianasikire akalhwira okwa lina lya Yehova. Nibya n’omughulhu kyalhangirika Yehova ng’abirimusighania, Yesu abya inianayitheghekire eriholha omwakanya k’erilholya oku Thatha wiwe w’olhwanzo kw’omughongo.—Mt. 27:46.c

‘NABIRIGHUNZA OMUBIIRI OGHO WAMBA’

14. Yehova mwahemba athi obuthaleghulha bwa Yesu?

¹⁴ Omwa musabe ogho Yesu aha omwa kiro athali aholha, mwabugha athi: ‘Nabirighunza omubiiri ogho wamba.’ Aby’ayikethere ngoku Yehova akendi muhemba busana n’obuthaleghulha bwiwe. (Yn. 17:4, 5) Yesu aby’ahikire akayikethera Thatha wiwe. Yehova mwathaligha akasighalha omw’isinda. (Emib. 2:23, 24) Mwalhubukya Yesu kandi mwamuha ekitsumbi kinene elhubulha. (Fil. 2:8, 9) Erighunzerera, Yesu mwatsuka erithabalha ng’Omwami w’Obwami bwa Nyamuhanga. Obwami obo bwanga kolireki? Ekitsweka kyakabiri ky’omusabe w’eky’erileberyako kikabugha kithi: “Obwami bwawu bwase. Erisonda lyawu [erya Yehova] likoleke okwa kihugho ngoku liri omwa lhubulha.”—Mt. 6:10.

15. Ni kindi kyahi ekyo Yesu akendi syakolha?

¹⁵ Omwa buthuku obuthe bwa haali, Yesu akendilhwa n’esyonzighu sya Nyamuhanga n’erithoghothya ababi okwa Harmagedoni. (Erib. 16:14, 16; 19:11-16) Enyuma waho, akendi ghusa Sitani y’omwa “buhya,” iniabya ng’oyuholire. (Erib. 20:1-3) Yesu akendi syaleka abandu ibabana obuholho omwa Buthabali bwiwe obw’Emyaka Rukumi. Akendi syalhubukya abaholi. Akendisyakolha ekihugho kyosi mwa paradiso. Ekighendererwa kya Yehova kikendi syabererera!—Erib. 21:1-4.

16. Ni byahi ebikendisyabya ibyamabirikolhwa Erithabalha ly’Emyaka Rukumi likahwa?

¹⁶ Ni byahi ebyo thulindirire eribya okw’ihwererera ly’Erithabalha ly’Emyaka Rukumi? Ekibi ky’abandu n’obuthahikana bikendisyabya isibikiriho. Abandu bakendisyabya isibakisaba erighanyirwa ebibi byabo erilhabira omwa ndongolya; kandi sibendi syayithagha omusangania kutse abahereri. ‘N’enzighu y’erighunzerera, olhuholho [lhwa Adamu], yikendisyabya iyabirithoghothibirwa ighuma.’ Omwa masinda mukendi syabya isimukiriki. Abaholi bakendisyabya ibabirilhubukibwa. Obuli mundu okwa kihugho akendisyabya iniabirihikana.—1 Kor. 15:25, 26.

17-18. (a) Ni kyahi ekikendi syabya okw’ihwererera ly’Obuthabali bw’Emyaka Rukumi? (b) Ni kyahi ekyo Yesu akendi syakolha endambi yiwe y’erithabalha yikahwa? (1 Abanya Korinto 15:24, 28) (Lebaya n’ekisasani.)

¹⁷ Ni kindi kyahi ekikendisyabya okw’ihwererera ly’Erithabalha ly’Emyaka Rukumi? Okwa buthuku obo, ekindu ky’embaghane kikendisyabya. Omwatsi owahambire okw’iyira erina lya Yehova mwa libuyirire akendi syahwa. Athi? Omw’irima ly’Edeni, Sitani mwabugha athi Yehova ni mubehi kandi athi syalithabalha abandu busana n’olhwanzo. Eritsuka-tsukana n’obuthuku obo, abakamusikaya n’erimuha ekitsumbi babiribya ibanemuyira erina liwe mwa libuyirire. Neryo okw’ihwererera ly’Obuthabali bw’Emyaka Rukumi, erina lya Yehova likendi syabya iryabiryeribwa ndeke. Akendi syabya iniabirikikangania ndeke-ndeke ngoku ni Thatha wethu w’elhubulha ow’olhwanzo.

¹⁸ Erighunzerera, ebyosi ebya Sitani abiribugha, bikendi syalhangirika ku ni mabehi. Ni kyahi ekyo Yesu akendisyakolha endambi yiwe y’erithabalha yikahwa? Mbwino anemwendi syakwama eky’erileberyako kya Sitani n’eriyisamambulha oku Yehova? Eyihi! (Soma 1 Abanya Korinto 15:24, 28.) Yesu akendi syasubulirya Thatha wiwe y’Obwami. Akendi syaghondera obuthabali bwa Yehova. Omo kwenene, erithendibya nga Sitani, Yesu anayitheghekire eriherya obuli kindu busana n’erianza Yehova.

19. Erina lya Yehova ni ly’omughaso lithi embere sya Yesu?

¹⁹ Kwesi ky’ekyaleka Yehova iniaha Yesu y’erina Liwe! Yesu abirikangania kw’ak’imanira ndeke-ndeke Thatha wiwe. Neryo kwesi, erina lya Yehova ni ly’omughaso lithi embere sya Yesu? Ni ly’omughaso embere siwe kw’ilhaba ekindi kindu kyosi-kyosi. Abya inianayitheghekire eriholha busana n’erina eryo, kandi ahathe erikakwa akendi syasubulirya Yehova y’ebyosi okw’ihwererera ly’Erithabalha ly’Emyaka Rukumi. Thwanga gherererya thuthi eky’erileberyako kya Yesu? Thukendi syakania okwa ky’erisubirya ky’ekibulyo ekyo omo mwatsi owakakwamako.