Ekihongo kya Yesu ni ‘Ndongolya Busana n’Abandu Bangyi’ Omwa Nziraki?
Ekya Biblia yikasubiraya
Ekihongo kya Yesu y’enzira eyo Nyamuhanga akalhamirayamo abandu okwa kibi n’olhuholho. E Biblia yikakanaya oko musasi wa Yesu owuthika ng’endihi y’endongolya. (Abanya Efeso 1:7; 1 Petero 1:18, 19) Busana n’ekyo, Yesu mwabugha athi mwasa busana “n’eriha engebe yiwe mw’obughuli busana n’abandu bangyi.”—Matayo 20:28.
Busana naki ‘endongolya busana n’abandu bangyi’ yabya yikayithaghisibwa?
Omulhume w’erimbere, Adamu, mwahangikwa iniahikene, kutse isyawithe kibi. Abya w’eribyaho kera na kera aliwe mwaherya olhusunzo olho omw’ithwamu erithendiowa Nyamuhanga. (Enzuko 3:17-19) Abere akabutha abaana, mwabasighalirya ekibi. (Abanya Roma 5:12) Busana n’ekyo, e Biblia yikakanganaya ngoku Adamu ‘mwayighulya’ haghuma n’abaana biwe omwa bukobe bw’ekibi n’olhuholho. (Abanya Roma 7:14) Busana n’obuthahikana, sihabya n’omughuma w’okw’ibo oyuwanga thuhire ekya Adamu aheraya.—Esyonyimbo 49:7, 8.
Nyamuhanga mwakwira abaana ba Adamu b’obulighe omwa mibere eya babyamu ey’erithendibya n’amaha. (Yoane 3:16) Aliwe, ebihano bya Nyamuhanga eby’obulingirirania mubithamuyithaghisya iyo erikwama kya gheghena kutse eribaghanyira ebibi byabu isihali musingyi owahikire owakaleka. (Esyonyimbo 89:14; Abanya Roma 3:23-26) Nyamuhanga anzire abandu, neryo mwahiraho enzira eyitholere ey’erighanyiramo ebibi byabu n’eribighunzaho. (Abanya Roma 5:6-8) Endongolya y’enzira eyo.
Endongolya yikakolha yithi?
Omwa Biblia, ekinywe “endongolya” muli ebindu bisathu bino:
Ni ndihi.—Emiganzo 3:46, 47.
Yikaleka ihabya eriboholhwa, kutse erithongolibwa [erilhamibwa].—Eriluayo 21:30.
Yingene-ngene n’obughuli bw’ekindu ekyatsandibawa.a
Thulebaye ebindu bisathu ebi nga bihambene bithi n’ekihongo ky’endongolya ya Yesu Kristo.
Endihi. E Biblia yikabugha yithi Abakristayo ‘mubaghulhwa omo bughuli.’ (1 Abanya Korinto 6:20; 7:23) Obughuli obu w’omusasi wa Yesu, ogho ‘aghulhamu abandu busana na Nyamuhanga, omwa buli kihanda, n’obuli mubughe, n’obuli bandu, n’obuli kithunga.’—Eribisulirwa 5:8, 9.
Eriboholhwa. Ekihongo kya Yesu kikaleka ihabya ‘erithongolibwa’ kutse eriboholhwa okwa bibi.—1 Abanya Korinto 1:30; Abanya Kolosai 1:14; Abaebrania 9:15.
Eringana-ngana. Ekihongo kya Yesu kingene-ngene n’ekyo nyine-nyine ekya Adamu aheraya—engebe ey’omundu oyuhikene. (1 Abanya Korinto 15:21, 22, 45, 46) E Biblia yikabugha yithi: “Kusangwa busana n’erithendiowa ly’omundu mughuma [Adamu], abandu bangyi mubayirwa mo bakolha-nabi, neryo lithya busana n’eriowa ly’omundu mughuma [Yesu Kristo], abandu banene basyayirwa mo bathunganene embere sya Nyamuhanga.” (Abanya Roma 5:19) Eki kikakanganaya ngoku olhuholho lhw’omundu mughuma lhwangana thuha endongolya busana n’abakolha-nabi bangyi. Erithwalira haghuma, ekihongo kya Yesu ‘ky’ekikathongolhaya abandu bosi’ abakakolha ebiika ebitholere erithoka erighasirwa mukyo.—1 Timoteo 2:5, 6.
a Omwa Biblia, ebinywe ebya hindulhawamo “endongolya” bikamanyisaya endihi, kutse obughuli bw’ekindu, obukathuhawa. Ng’eky’erileberyako, ekinywe ky’Ekihebrania ka·pharʹ kikamanyisaya “kuningira.” Mughulhu mungyi kikamanyisaya erikuningira ebibi. (Esyonyimbo 65:3) Ekinywe ekiri ng’eki, koʹpher kikamanyisaya endihi eyikathuhawa erithoka eriberererya erikuningira eri, kutse erithongolibwa. (Eriluayo 21:30) Kuthya, n’ekinywe ky’Ekigiriki lyʹtron, mughulhu mungyi ekikahindulhawamo “endongolya,” ikyangana thasyahindulhwamo “obughuli bw’erithongolya.” (Matayo 20:28; The New Testament in Modern Speech, by R. F. Weymouth) Abahandiki b’Ekigiriki mubakolesya ekinywe ekyo erikania okwa ndihi eyikahebawayo erilhwika omunyewa w’olhuhi kutse erilhwika omukobe.