OMWATSI W’ERIGHA 49
Yehova Anemwendi Subirya Emisabe Yaghe?
“Mwasyanyilhakira, kandi mwasyasa n’erinyisaba, naghe nasyabahulikirira.”—YER. 29:12.
OLHWIMBO 41 Wowe Erisaba Lyaghe
EBIKENDI KANIBWAKOa
1-2. Busana naki thwangana yowa Yehova nga syali subiraya emisabe yethu?
“WUTSEMERE Omwami Mukulhu; nayu akendi syakuha eby’omuthima wawu anzire.” (Esy. 37:4) Oyu ka ni mulhaghe owakatsemesaya! Aliwe mbwino thunatholere ithwalengekania thuthi Yehova akendi thuha aho naho obuli kindu ekya thukasaba? Busana naki thwangana bulya ekibulyo ekyo? Thuthalengekania oku bino. Mwali wethu omuhuru iniasaba busana n’erighenda okwa Sukuru y’Abathuliri b’Obwami. Aliwe ihalhaba myaka mingyi isyali athakokibwa kuyo. Mughalha wethu omulere iniasaba Yehova athi amulhamaye kw’obulhwere obukalire nuku angakolha bingyi omwa kithunga. Aliwe iniathalhama. Ababuthi Abakristayo ibasaba bathi omwana wabu abye iniane omwa kwenene. Aliwe omwana wabo oyo iniathwamu erileka erikolera Yehova.
2 Obundi nawu wabirisaba Yehova y’ekindu kirebe, aliwe siwuli wakibana. Neryo iwangana ghunzerera wuthi Yehova akasubiraya emisabe y’abandi butsira eyawu. Kutse iwangana lengekania wuthi wutholere eribya iwabirikolha ekindu kirebe ekithuwene. Mwali wethu ya Janiceb mwayowa athya. Iyo na mwira wiwe mubasaba busana n’eriyisunza lyabo ly’erikolera okwa Beteli. Akabugha athi: “Munakakasya indi sihendi lhaba buthuku thuthe thwaghenda okwa Beteli.” Aliwe muhalhaba amezi n’emyaka abathahenie abo isibathabirikirwa. Janice akabugha athi: “Munabya omwa bulighe n’eriyibulha-bulha. Munabulha nga ni kyahi ekyanabirikolha ekyabiriponesya Yehova. Nabya inabirisaba, kutsibu-tsibu busana n’erihebwa obusondoli bwiwe. Ni kyahi ekyaleka iniathasubirya emisabe yaghe?”
3. Thukendi kania okuki omo mwatsi ono?
3 Okwa bundi buthuku, thwangana bulha Yehova ng’anemuhulikirira emisabe yethu. Nibya n’abalhume balebe abathaleghulha abakera mubanayowa bathya. (Yobu 30:20; Esy. 22:2; Hab. 1:2) Ni kyahi ekyanga kukakasya ngoku Yehova akendi subirya emisabe yawu? (Esy. 65:2) Erithuwathikya erisubirya ekibulyo ekyo, thukendi yithagha eritsuka erisubirya okwa bino: (1) Ni byahi ebya Yehova angakolha? (2) Yehova anzire ithwakolhaki? (3) Busana naki thwangana yithagha erihindulha ebighuma by’okwa bya thukasaba?
NI BYAHI EBYA YEHOVA ANGAKOLHA?
4. Ngoku kiri omu Yeremia 29:12, Yehova akayilhagha erikolhaki?
4 Yehova akayilhagha erihulikirira emisabe yethu. (Soma Yeremia 29:12.) Nyamuhanga wethu anzire abaramya biwe abathaleghulha, neryo syanga ghana erihulikirira emisabe yabo. (Esy. 10:17; 37:28) Aliwe, eki sikirimanyisaya kithi akendi thuha ebyosi ebya thukamusaba. Thwangana yithagha erilinda erihika aho ekihugho kihya-kihya kikendi syasira imuthwabana ebighuma by’okwa bya thukasaba.
5. Ni byahi ebya Yehova akalebaya akahulikirira emisabe yethu? Soborera.
5 Yehova akalebaya emisabe yethu nga yinahambene n’ekighendererwa kiwe kikulhu. (Isa. 55:8, 9) Ekitsweka ky’okwa kighendererwa ekyo mwamuli eryusulya ekihugho mw’abalhume n’abakali abatsemire kandi abali bughuma ahisi sy’obuthabali bwiwe. Aliwe Sitani akabugha athi abandu ibakendibya ndeke bamayithabalhako. (Enz. 3:1-5) Erianza erikangania ngoku ebya Sitani abugha ni mabehi, Yehova abirilighira abandu eriyithabalhako. Nomwabine, obuthabali bw’abandu bwabirileka ihabya ebingyi by’okwa bitsibu ebya thukabana munabwire. (Omu. 8:9) Thunasi ngoku Yehova syendi ghunzaho ebitsibu byosi ebi okwa buthuku buno. Alyakolha ekyo, abandi ibangana ghunzerera bathi obuthabali bw’abandu bukakolha, bathi bwangana thoka erighunzaho ebitsibu by’abandu.
6. Busana naki thukayithagha eriyikethera ngoku mughulhu wosi Yehova akendi subirya emisabe yethu omwa lhwanzo n’omwa bulingirirania?
6 Yehova anganasubirya omwa nzira muthina-muthina emisabe y’abandu abalyasaba ebisosene. Ng’eky’erileberyako, omughulhu Omwami Hezekia aby’alhwere kutsibu, mwalemba-lemba Yehova athi amuwuthikaye alhame. Neryo Yehova mwamulhamya. (2 Bam. 20:1-6) Okwa lhundi lhuhandi, omughulhu omukwenda Paulo alemba-lemba Yehova athi amulhusayeko “erihwa omwa mubiri, NWT,” obundi endwalha, Yehova mwathamulhusyayoko. (2 Kor. 12:7-9) Thulebaye n’eky’erileberyako ky’omukwenda Yakobo na Petero. Abosi Omwami Herode mwanza eribitha. Ekithunga mukyasaba busana na Petero kandi obundi na busana na Yakobo. Nomwabine, Yakobo mwithibwa, aliwe omwa nzira y’ekithiko-thiko Petero mwalhamibwa. (Emib. 12:1-11) Ithwangana yibulya, ‘Busana naki Yehova mwalhamya Petero aliwe amaghana erilhamya Yakobo?’ E Biblia siyiribugha.c Ekyo thwangana yikethera kiri kithi esyonzira sya Yehova ni sy’obulingirirania. (Ebi. 32:4) Kandi thunasi ngoku Yehova aby’asimire Petero na Yakobo. (Erib. 21:14) Okwa bundi buthuku, emisabe yethu yangana subwamo ngoku thuthalhue thulengekenie. Aliwe kundi thuyikethere ngoku erisubirya lya Yehova oko misabe yethu mughulhu wosi ni ry’olhwanzo kandi ery’obulingirirania, sithuli thika-thikira emibere akathwamu erisubirya emisabe yethu.—Yobu 33:13.
7. Ni kyahi ekya thukalengaho eriyihighulhako, kandi busana naki?
7 Thukalengaho eriyihighulha okw’ilinganisya emibere eya thulimo n’ey’abandi balimo. Ng’eky’erileberyako, thwangana saba Yehova thuthi athuwathikaye omwa nzira ndebe, aliwe iniathathusubirya. Enyuma waho, ithwaminya ngoku owundi mundu mwasaba ikyan’ekyo, kandi ikyabya Yehova nga mwamusubirya. Ekiri ng’ekyo mukyabya oku mwali wethu ya Anna. Mwasaba athi ekansa ya mwira wiwe ya Matthew yilhame. Okwa buthuku ibwan’obo, bali bethu babiri abakulire omo myaka nabo babya ibanalhwere ekansa. Anna mwasabira mwira wiwe Matthew n’abali bethu abo ba kutsibu. Bali bethu abo mubalhama, aliwe mwira wiwe ya Matthew mwaholha. Okw’itsuka, Anna mwabulha bali bethu abo ngamubalhama kundi Yehova mwayira eky’erikolha. Kandi kyamabya ikwakiri kithya, ni kyahi ekyaleka Yehova iniathasubirya emisabe yiwe ey’erisaba athi mwira wiwe alhame? Ni kwenene sithwasi nga ni kyahi ekyaleka bali bethu babiri abo ibalhama. Ekya thwasi kiri kithi Yehova akendi syaghunziraho ighuma eriaghalhwa lyethu eryosi, kandi akakandira erisyalhubukya abanywani biwe ababiriholha.—Yobu 14:15.
8. (a) Ngoku kiri omu Isaya 43:2, Yehova akathuwathikaya athi? (b) Erisaba lyanga thuwathikya lithi erighumira ebitsibu ebikalire? (Lebaya evidiyo Omusabe Akaleka Ithwaghuma.)
8 Yehova akendi thuwathikya mughulhu wosi. Iyo nga Thatha wethu w’olhwanzo, Yehova syalyanza erilhangira thukaghalhwa. (Isa. 63:9) Nomwabine, syali ghunzaho ebitsibu byethu ebyosi, ebyanga linganisibwa n’esyonyusi kutse omuliro. (Soma Isaya 43:2.) Aliwe akayilhagha erithuwathikya ‘eribilhabamo.’ Kandi syendi lighira ebitsibu byethu bikathwaghalya kera na kera. Kandi Yehova akathuha omulimu wiwe abuyirire ow’amaaka erithuwathikya eriyiyinia. (Lk. 11:13; Fil. 4:13, NWT) Busana n’ekyo, thwangana yikethera ngoku mughulhu wosi akendibya inianemuthuha ebyonyine-nyine ebya thukayithagha nuku thuyiyinaye n’erisighalha ithune bathaleghulha okw’iyo.d
YEHOVA ANZIRE ITHWAKOLHAKI?
9. Ngoku kiri omu Yakobo 1:6, 7, busana naki thukayithagha eriyikethera ngoku Yehova akendi thuwathikya?
9 Yehova anzire ithwamuyikethera. (Ebr. 11:6) Hakanayira, ebitsibu byethu ibyabya nga ni binene kutsibu. Nibya ithwangana tsuka eribulha Yehova ng’anemwendi thuwathikya. Aliwe e Biblia yikathukakasaya ngoku busana n’amaaka wa Nyamuhanga thwangana ‘lenga oko lhuhimbo.’ (2 Sam. 22:30) Neryo omwakanya k’erithika-thika, thutholere ithwasaba ithunawithe erikirirya linene, ithunayikethere ngoku Yehova akendi subirya emisabe yethu.—Soma Yakobo 1:6, 7.
10. Iha eky’erileberyako ekikakanganaya ngoku thwanga kolha erikwamana n’emisabe yethu.
10 Yehova anzire ithwakolha erikwamana n’emisabe yethu. Ng’eky’erileberyako, mughalha wethu anganasaba athi Yehova amuwathikaye alighirawe eryusa okwa mubiiri nuku ahindane okwa lhuhindano. Yehova angasubirya athi emisabe ng’eyo? Yehova anganaha mughalha wethu y’obuthubaha obw’akayithagha erithoka erihika oko yumuhere omubiiri. Aliwe mughalha wethu iniakendi yithagha erihiraho akaghalha ak’eriyahika oko yumuhere omubiiri. Angana yithagha erimuhikako ngendo nyingyi. Inianganabya inianayitheghekire erikolha omwa bw’owundi mukoli mulikyabo. Kandi kyamayithaghisibwa, inianganusa okwa mubiiri neryo iniabya isyendi thuhwa.
11. Busana naki thutholere ithwasaba buthumbya bikahika okwa bikathulyambaya?
11 Yehova anzire ithwasaba buthumbya busana n’ebikathulyambaya. (1 Tes. 5:17) Yesu mwakangania ngoku thwangana ghana erihebwa aho naho ebighuma by’okwa bya thukasaba. (Lk. 11:9) Neryo siwulhuhirire! Saba erilhua okwa muthima kandi buthumbya. (Lk. 18:1-7) Thukabya thukalholha embere erisaba busana n’ekindu, thukakanganaya Yehova ku thukakimanyisaya. Kandi thukakanganaya ku thuyikethere amaaka wiwe w’erithuwathikya.
BUSANA NAKI THWANGANA YITHAGHA ERIHINDULHA EBIGHUMA BY’OKWA BYA THUKASABA?
12. (a) Ni kibulyo kyahi ekya thutholere ithwayibulya bikahika okwa bya thukasaba, kandi busana naki? (b) Thutholere ithwakolhaki erilhangira thuthi emisabe yethu yikakanganaya ku thusikirye Yehova? (Lebaya akasanduko “Ebya Ngasaba Bikanakanganaya ku Ngasikirye Yehova?”)
12 Thwamathendi bana ebya thulyasaba, ithwangana yibulya ebibulyo bisathu bino. Eky’erimbere, ‘Mbwino nganemusaba ekitholere?’ Mughulhu mungyi thukalengekanaya thuthi thunasi ekithutholere. Aliwe ebya thukasaba byangana ghana erithughasira. Thwamabya ithunemusaba busana n’ekitsibu, ihanganabya ihane eyindi nzira eyuwene ey’erikighunziramo kwilhaba eyo thukasaba. Kandi ebindi ebya thukasaba byanganabya isibihambangene n’erisonda lya Yehova. (1 Yn. 5:14) Ngahathya, thalengekania okwa ky’erileberyako ky’ababuthi abakanibweko okw’itsuka. Babya ibabirisaba Yehova bathi awathikaye omwana wabu abye omwa kwenene. Eyo yikabya nga ni misabe eyitholere. Aliwe, Yehova syali kaka owosi-wosi w’okw’ithwe erimukolera. Anzire ithwe bosi imwamune n’abaana bethu, ithwayithwiramo erimuramya. (Ebi. 10:12, 13; 30:19, 20) Neryo ababuthi abo bangasabire bathi Yehova abawathikaye bahike okwa muthima w’omwana wabo nuku abye n’omuhwa w’erianza Yehova n’eribya munywani Wiwe.—Emi. 22:6; Efe. 6:4.
13. Ngoku kiri omwa Abaebrania 4:16, Yehova akendi thuwathikya mughulhu wahi? Soborera.
13 Ekibulyo ekyakabiri kyakino, ‘Nina buthuku bwa Yehova obw’erinyiha ebyo ngalyasaba?’ Ithwanganayowa thuthi thwanzire iniasubirya emisabe yethu aho naho. Aliwe okwenene kuli kuthi Yehova anasi endambi eyitholere ey’erithuwathikiryamo. (Soma Abaebrania 4:16.) Thwamathendi hebwa aho naho ebya thulyasaba, ithwangana lengekania thuthi erisubirya lya Yehova ni ‘Eyihi.’ Aliwe erisubirya liwe iryanganabya ini, ‘Endambi siyiriyahika.’ Ng’eky’erileberyako, thasyalengekanaya oku mughalha wethu omulere oyuwasaba athi endwalha yiwe yilhame. Yehova kwa mulhamya omwa nzira y’ekithiko-thiko, Sitani angabughire athi mughalha wethu oyo akalholha embere erikolera Yehova kundi mwalhamibirwe. (Yobu 1:9-11; 2:4) Eryongera okw’ekyo, Yehova abirisangwa ahiraho endambi y’erilhamiryamo amalhwere awosi. (Isa. 33:24; Erib. 21:3, 4) Neryo thunalindirire obuthuku obo, isithwalengekanaya thuthi thukendi lhamibwa omwa nzira y’ekithiko-thiko. Neryo mughalha wethu oyo angasabire Yehova athi amuhe akaghalha n’erithekana nuku ayiyiniraye obulhwere bwiwe n’erilholha embere erikolera Nyamuhanga buthaleghulha.—Esy. 29:11.
14. Ekyalholirweko kya Janice kyamakweghesyaki?
14 Ibuka ekyalholirweko kya Janice, oyuwasaba busana n’erianza erikolera okwa Beteli. Muhalhaba myaka ithano isyali aminya Yehova ng’amasubirya athi emisabe yiwe. Akabugha athi: “Yehova mwakolesya obuthuku obo erinyikangirirya n’erinyiwathikya eribya Mukristayo mubuya. Eriyikethera lyaghe omw’iyo lyabya likayithagha eriyongera. Emibere yaghe y’eriyeghesya yabya yikayithagha eryuwanibwa. Kandi munayithagha eribana etseme y’omwakathi, eyithaseghemere okwa mibere eya ngalimo.” Enyuma waho, Janice na mwira wiwe mubahebwa omubiiri w’obulebererya. Akabya akasubya ameso w’enyuma, Janice akabugha athi: “Yehova mwasubirya emisabe yaghe, aliwe omwa nzira eyo ngathalengekenie. Mukyanyithwalira buthuku erilhangira obubuya bw’erisubirya liwe, aliwe ngasima kutsibu eribya ingabiriyilhangirira olhwanzo n’olhukeri lhwiwe.”
Wamayowa Yehova nga syali subiraya emisabe yawu, lengekanaya okw’isaba ebindi (Lebaya enungu 15)f
15. Busana naki thwangana yithagha erisaba bindu muthina-muthina? (Lebaya n’ebisasani.)
15 Ekibulyo kyakasathu, ‘Mbwino ngatholere ingabya inganemusaba ekindi kindu?’ Nomwakine indi ni kibuya erisaba ekyonyine-nyine, ithwangana thoka eriminya erisonda lya Yehova omw’isaba bindu muthina-muthina. Thalengekania okwa ky’erileberyako kya mwali wethu omuhuru oyuwabiribya inianemusaba erighenda okwa Sukuru y’Abathuliri b’Obwami. Anzire iniasoma okwa sukuru eyo nuku angakolera eyiri obuyithawa bunene. Neryo anemulholha embere erisaba erighenda okwa sukuru eyo, kandi iniangana saba Yehova athi amuwathikaye erilhangira ehindi highisa ehy’erikanyiriryamo erithulira liwe. (Emib. 16:9, 10) Neryo iniangana kolha erikwamana n’erisaba liwe omw’ibulya omulebererya w’omuthimbo athi nga hane ekithunga ekiri hakuhi ekiri mw’obuyithawa bw’abatemburi. Kutse iniangana handikira ekyaghanda ky’omuthahulha athi kimubwire ahali obuyithawa bw’abathuliri b’Obwami.e
16. Thwanga yiketheraki?
16 Ngoku thwamabir’igha, thwangana yikethera ngoku Yehova akendi subirya emisabe yethu omwa nzira y’olhwanzo kandi ey’obulingirirania. (Esy. 4:3; Isa. 30:18) Okwa bundi buthuku emisabe yethu yangana ghana erisubwamo ngoku thulhue thulengekenie. Aliwe Yehova syanga ghana erihulikirira emisabe yethu. Athwanzire kutsibu. Syendi syathusighania. (Esy. 9:10) Neryo lholha embere eriyikethera “Nyamuhanga emighulhu yosi,” erimubwira ebyosi ebiri okwa muthima omwa musabe.—Esy. 62:8.
OLHWIMBO 43 Omusabe ow’Eriha Ewasingya
a Omwatsi ono akendi soborera ekyanga leka ithwayikethera ngoku Yehova mughulhu wosi akendi subirya emisabe yethu omwa nzira y’olhwanzo kandi ey’obulingirirania.
b Awandi mena abirihindulhwa.
c Lebaya omwatsi “Wukana Yikethera Emibere Yehova Akakoleramo Emyatsi?” omwa Akaleberyo ak’Okwakabiri 2022, enu. 3-6.
d Eriminya bingyi okwa mibere Yehova akathuwathikirayamo eriyiyinirya ebitsibu ebikalire, lebaya okwa jw.org evidiyo Omusabe Akaleka Ithwaghuma.
e Eriminya ngoku wanga yihayo erikolera omwa bulhambu bw’owundi muthahulha, lebaya ekitabu Organized to Do Jehovah’s Will, esura 10, enu. 6-9.
f ERISOBORERA EBISASANI: Bali bethu babiri banemusaba bathe busulirirya efomu y’erighenda okwa Sukuru y’Abathuliri b’Obwami. Enyuma waho, omughuma akakokibawa, owundi eyihi. Omwakanya k’eriyiponera kutsibu, mwali wethu oyuthalyakokibawa akasaba Yehova athi amuwathikaye erilhangira ehindi highisa hy’erikanyiriryamo omubiiri wiwe w’erithulira. Neryo akahandikira ekyaghanda ky’omuthahulha, erisaba eriyawathikya ahali obuyithawa bunene.