Bana Erihumulikana habw’Eriminya Ngoku Yehova Akakutsemera

1. N’iyowa eriri lithi eryo abaghuma b’okwa baghombe ba Yehova babya nalyo?

KIKAHUMULIKANAYA eriminya ngoku Yehova akatsemera abandu biwe ng’egurupu! E Biblia yikabugha yithi: “Omwami Mukulhu akatsemera abandu biwe.” (Esy. 149:4) Aliwe okwa bundi buthuku, abandi bakanahwa amani ikyaleka ibayibulya bathi, ‘Mbwino Yehova akananyitsemera ingye ahabwaghe?’ Abaghuma b’okwa baramya ba Yehova abathaleghulha ab’omwa buthuku bwe Biblia muhanayira bamabya n’amalengekania ng’ayo.—1 Sam. 1:6-10; Yobu 29:2, 4; Esy. 51:11.

2. Ni bahi abo Yehova akatsemera?

² E Biblia yikakanganaya ndeke-ndeke ngoku Yehova anganatsemera abandu abathahikene. Athi? Thutholere ithw’ikirirya Yesu Kristo n’eribatizibwa. (Yn. 3:16) Neryo thukakanganaya embere sy’abandu ngoku thwabiriyisubamo n’erilhagha Nyamuhanga ku thukendi kolha erisonda liwe. (Emib. 2:38; 3:19) Yehova akatsema thukathwa ebiika ebi nuku thukulha-kulhanaye obughuma bwethu nayo. Thwamabya thunemulholha embere erikolha ngoku thwanga thoka eriberererya eriyilhagha lyethu, Yehova akathutsemera kandi akathulhangira mwa banywani biwe b’okwa ndungu.—Esy. 25:14.

3. Thukayakanaya okuki?

³ Aliwe ni kyahi ekyangabya iky’ekikaleka okwa bundi buthuku abandi ibayowa Nyamuhanga nga syalibatsemera? Yehova akakanganaya athi kw’akathutsemera? Kandi Omukristayo angaghumya athi eriyikethera liwe ngoku Nyamuhanga akamutsemera?

EKYANGALEKA ABANDI IBAYOWA YEHOVA NGA SYALIBATSEMERA

4-5. Nomuthwangayowa mwa babbule, ni kyahi ekyathutholere ithwayikethera?

⁴ Abangyi omw’ithwe babiribya ibanemurwanisya omubere w’eriyowa mwa babbule eritsuka bulere. (Esy. 88:15) Mughalha wethu Adrián akabugha athi: “Nabiribya inganemuyowa mwa wabbule. Ebighuma by’okwa byanabya ingakolha ingakine mulere, lyabya iry’erisaba indi efamile yethu yasyingira omwa Paradiso, nomwakine indi iningayowa isingatholere erisyingiramo.” Tony, oyuwakulira omw’eka eyithe y’Ekikristayo akabugha athi: “Ababuthi baghe isibali bathambwira bathi banyanzire kutse bathi bakanyiyisyethera. Eki ikikaleka ingayowa nga singwithe ekyo ngakolha ekyanga batsemesya.”

⁵ Hamabya ihakanayira ithwayowa mwa babbule, ambi ithw’ibuka ngoku Yehova iyuwene-wene yuwathuletha okw’iyo. (Yn. 6:44) Akathulhangira mw’ebibuya ebya thuthe thwanga yilhangiramo, kandi anasi emithima yethu. (1 Sam. 16:7; 2 Emy. 6:30) Neryo thwangana muyikethera omughulhu akabugha athi thuli b’obughuli.—1 Yn. 3:19, 20.

6. Omukwenda Paulo mwayowa athi okwa bibi ebyo akolha kera?

⁶ Abaghuma b’okw’ithwe bathe baminya ekwenene, mubanakolha ebindu ebikinaleka ibayowa nabi kutsibu. (1 Pet. 4:3) Nibya n’Abakristayo abathaleghulha bakinarwanisaya emibere mibi. Omuthima wawu akanakuhandikirira? Kyamabya ikwakiri kithya, humulikana omw’iminya ngoku n’abaghombe bathaleghulha ba Yehova banemurwanisya eriyowa ng’eryo. Ng’eky’erileberyako, omukwenda Paulo mwabya omwa bulighe akalengekania okwa bisobyo biwe. (Abar. 7:24) Ni kwenene, Paulo abya iniabiriyisubamo n’eribatizibwa. Aliwe mwayikaniako athi “indi muke oko bakwenda bosi” kandi “indi mukolha-nabi kwilhaba bosi.”—1 Kor. 15:9; 1 Tim. 1:15.

7. Thutholere ithwabya ithun’ibukireki bikahika okwa bibi ebyo thwakolha kera?

⁷ Thatha wethu w’elhubulha akayilhagha erithughanyira thwamayisubamo. (Esy. 86:5) Neryo thwamayikubyabwomo omwa kwenene busana n’ebibi ebyo thwabirikolha, ithwangana yikethera ebyo Yehova abiribugha—abirithughanyira.—Kol. 2:13.

8-9. Thwanga singura thuthi omubere w’eriyowa nga sithwanga kolha ebikaghunza eritsemesya Yehova?

⁸ Ithwe bosi thwanzire ithwakolera Yehova ya ndeke ngoku thwanga thoka. Aliwe abandi banganayowa nga sibanga thoka erikolha ebikaghunza nuku Yehova abatsemere. Mwali wethu Amanda akabugha athi: “Ngalengekanaya indi eriha Yehova y’ekyuwene kutsibu ly’eribya inganemukolha ekyo mughulhu wosi. Mughulhu mungyi ngalengekanaya indi ngatholere ingakolha bingyi kwilhaba ebyo nangathoka. ‘Namalemwa,’ ngalengekanaya indi Yehova abiriyiponera ngoku naghe nabiriyiponera.”

⁹ Thwanga singura thuthi omubere w’eriyowa nga sithwanga kolha ebikaghunza erithoka eritsemesya Yehova. Ambi ithw’ibuka ngoku Yehova syalimaghirira ekiwe aliwe ngoku akaghenda-ghendanaya n’emibere eyiriho. Syali thuyithaghako bingyi kwilhaba ebyo thwanga thoka. Akasima ekyosi-kyosi ekya thukamukolera kyamabya ikinemulhua oko muthima. N’ekindi, lengekanaya okwa by’erileberyako bye Biblia eby’abakolera Yehova n’omuthima wosi. Thalengekania oku Paulo. Mwakolha n’omuhwa munene ahabw’emyaka, amaghenda esyongumi sy’esyomayiro kandi amatsukisya ebithunga bingyi. Aliwe emibere eyo abyamo yabere yikamulemesya erisangira omwa mubiiri w’erithulira, mbwino Nyamuhanga mwabya isyakimutsemera? Eyihi. Mwalholha embere erikolha ebyo angathoka, kandi Yehova mwamutsumulha. (Emib. 28:30, 31) Kuthya, ebya thwangaha Yehova byanganabya ibinemuhinduka-hinduka. Aliwe okw’iyo ekilhubirirwa kyethu kya kikulhu. Leka thulebaye esyonzira ndebe esyo Yehova akakanganirayamo kw’akathutsemera.

YEHOVA AKAKANGANAYA ATHI KW’AKATHUTSEMERA?

10. Thukowa thuthi Yehova akakangania kw’akathutsemera? (Yoane 16:27)

¹⁰ Erilhabira omwa Biblia. Yehova anzire iniakangania kw’akatsemera abo anzire. Amasako akakanaya okwa mighulhu ibiri omughulhu Yehova abwira Yesu athi ni Mughalha wiwe mwanzwa, akamutsemera. (Mt. 3:17; 17:5) Wunanzire iwowa Yehova akakukakasya kw’akakutsemera? Yehova syali kanaya nethu omwa mulenge owakowika, aliwe akakanaya nethu erilhabira omwa Kinywe kiwe. Thwangan’owa omulenge wa Yehova ow’erithutsemera thukasoma ebinywe bya Yesu ebiri omwa bitabu by’Enjiri. (Soma Yoane 16:27.) Yesu mwakangania ndeke-ndeke emibere ya Thatha wiwe. Neryo thukabya thukaminya ngoku Yesu mwakangania kw’akatsemera abigha biwe abathaleghulha kandi abathahikene, ithwangana thera akasasani Yehova inianemuthubwira ebinywe ebyo.—Yn. 15:9, 15.

11. Busana naki eribana ebitsibu sikirimanyisaya kithi Yehova syakithutsemere? (Yakobo 1:12)

¹¹ Erilhabira omwa eby’akakolha. Yehova anzire kutsibu erithuwathikya, ng’erithuha ebiyithawa byethu by’ekinyamubiri. Okwa bundi buthuku, Yehova anganakilighira ithwaghalhwa ngoku kyanabya oku muthunganene Yobu. (Yobu 1:8-11) Ebitsibu sibirimanyisaya bithi Nyamuhanga syakithutsemere. Omwakanya k’ekyo, bikathuha ehighisa hy’erikangania nga thwanzire Nyamuhanga ya bungahi kandi nga thukamuyikethera bungahi. (Soma Yakobo 1:12.) Thukendi yilhangirira eritsomana liwe ery’olhwanzo n’obuwathikya obw’akathuha anemuthuwathikya eriyiyinia.

12. Ekyalholirweko kya Dmitrii kyamathweghesyaki?

¹² Thulebaye eky’erileberyako kya mughalha wethu owe Asia ya Dmitrii. Mwabya isyakiwithe mubiiri kandi mwaghunza mezi manene isyali abana owundi. Neryo mwathwamu erikanyirirya omubiiri wiwe w’erithulira, kyamaleka iniakangania kw’ayikethere Yehova. Muhalhaba mezi manene, aliwe amabya isyangabana omubiiri. Neryo mwabana ebitsibu by’amaghalha amabya ini w’erikwama kyabya omwa ngyingo. Mwatsuka eriyowa mwa wabbule iyo ng’iba kandi thatha, kandi mwalengekania athi Yehova syakimutsemere. Neryo erigholho lighuma mwali wiwe mwahandika okwa lhupapura kw’ebinywe ebiri omu Isaya 30:15: “Omw’iyibombeka n’eriyikethera ni maaka wenyu.” Mwamulethera olhupapura olho okwa ngyingo n’erimubwira athi, “Thatha, wamayowa nabi, ambi iwibuka erisako eri.” Dmitrii mwaminya ngoku Yehova ni w’eriha ewasingya, kundi efamile yiwe yikinawithe eby’erirya, eby’eriambalha, n’ah’erikalha. Akabugha athi: “Ekyo nabya ngatholere erikolha lyabya iry’erisighalha inganathekene n’erilholha embere eriyikethera Nyamuhanga waghe.” Wamabya iwunemulhaba omwa kitsibu ekiri ng’eki, ambi iwayikethera ngoku Yehova akutsomene kandi kw’akendi kuwathikya eriyiyinia.

13. Ni bahi abo Yehova angakolesya erikangania kw’akathutsemera, kandi athi?

¹³ Erilhabira omu balikyethu. Yehova akakolesaya balikyethu erikangania kw’akathutsemera. Ng’eky’erileberyako, anganahira omwa bandi mw’omuhwa w’erithubwira ebinywe ebikahimba okwa ndambi eyitholere. Mwali wethu e Asia mwayilhangirira eki omughulhu abya omwa bitunturo binene. Abya isyakiwithe mubiiri kandi inialhwere kutsibu. Neryo mwira wiwe mwakolha erilholho erikalire kandi amabya isyakiri musyakulhu w’ekithunga. Mwabugha athi: “Munathayitheghererya ekyamaleka eki ikyabya. Munalengekania indi obundi nabirikolha ekibi kandi Yehova syakinyitsemere.” Mwali wethu mwalemba-lemba Yehova athi amukakasaye ngoku akamutsemera. Mwakolha ekyo kyathi? Mwali wethu akabugha athi, “Abasyakulhu b’ekithunga mubakania naghe kandi mubanyikakasya ngoku Yehova ananyanzire.” Enyuma waho kandi mwasaba Yehova y’obuwathikya. Akabugha athi: “Ekiro ikyan’ekyo munahebwa ebaruha erilhua okwa gurupu y’abalikyethu omwa kithunga. Nabere ingasoma ebinywe byabo ebikahumulikanaya, munaminya ngoku Yehova abirinyowa.” Kwesi, mughulhu mungyi Yehova akakanganaya kw’akathutsemera erilhabira omwa binywe by’olhukeri eby’abandi.—Esy. 10:17.

14. Ni yindi nzira yahi eyo Yehova akakanganirayamo kw’akathutsemera?

¹⁴ Kandi Yehova akakanganaya kw’akathutsemera omw’ikolesya balikyethu erithuha erihabulha thukaliyithagha. Ng’eky’erileberyako, omwa kighana ky’erimbere, Yehova mwakolesya Paulo erihandikira balikyabo by’esyobaruha 14 esyasondolibawa n’omulimu. Esyobaruha esyo mwabya erikunga erilhangirikire aliwe eryahebawa omo lhwanzo. Ni kyahi ekyaleka Yehova iniasondolha Paulo erihira omwa syobaruha esyo mw’erikunga ng’eryo? Yehova ni Thatha mubuya kandi akakunga abaana biwe abo “akatsemera.” (Emi. 3:11, 12) Neryo thwamahebwa erihabulha eriseghemere okwa Biblia, ambi ithwalilhangira ng’obwema obukakanganaya ngoku Nyamuhanga anathutsemere, butsira indi syakithutsemera. (Ebr. 12:6) Ni bindi byahi ebikakanganaya ngoku Yehova akathutsemera?

OBUNDI BWEMA OBUKAKANGANAYA NGOKU YEHOVA AKATHUTSEMERA

15. Ni bahi abo Yehova akaha omulimu wiwe abuyirire kandi busana naki eki kikaleka ithwasika?

¹⁵ Yehova akaha omulimu abuyirire wiwe okw’abo abo akatsemera. (Mt. 12:18) Ithwangana yibulya, ‘Mbwino nganemuthoka erikangania emighuma y’okwa mikolere y’okwa kighuma ky’omulimu wa Nyamuhanga omwa ngebe yaghe?’ Mbwino wanabiryongera erighumisirizya abandi kwilhaba ngoku wabya wuthe waminya Yehova? Okwenene kuli kuthi, wukabya wuk’ongera erigha erikangania emikolere y’omulimu wa Nyamuhanga, kwa wukanongera wuthya eriyilhangirira ngoku Yehova akakutsemera!—Lebaya akasanduko “Emikolere Eyikalhua oko Mulimu y’eyi . . .”

16. Ni bahi abo Yehova akakolesaya erithulha engulhu yuwene, kandi ekyo kikaleka iwayowa wuthi? (1 Abanya Tesalonika 2:4)

¹⁶ Yehova akatsema akaha abo akatsemera b’omubiiri w’erithulha engulhu yuwene. (Soma 1 Abanya Tesalonika 2:4.) Lhangira ngoku mwali wethu Jocelyn aghasirawa akabwira abandi okwa ngulhu yuwene. Kiro kighuma, Jocelyn mwabuka isyatsemire. Akabugha athi: “Munayowa nga singwithe n’akaghalha. Aliwe nabya mutemburi kandi ini kiro kyaghe ky’eriyathulira. Neryo munasaba, namaghenda omw’ithulira.” Engyakya eyo Jocelyn mwabana Mary, omukali mubuya oyuwaligha erigha e Biblia. Mezi malebe enyuma waho Mary mwabugha athi abya inianemusaba Nyamuhanga athi amuwathikaye omughulhu Jocelyn akongotha okwa lhuyi lhwiwe. Akabya akalengekania okwa kyalholirweko eki, Jocelyn akabugha athi, “Munayowa Yehova ng’akambwira athi, ‘Ngakutsemera.’” Ni kwenene, si bugha indi obuli mundu akendi ligha ebya thukabugha thukathulira. Aliwe thwangana yikethera ngoku Yehova akatsema thukalengaho ngoku thwanga thoka eribwira abandi b’engulhu yuwene.

17. Wam’ighaki okwa bya Vicky abugha okwa ndongolya? (Esyonyimbo 5:11)

¹⁷ Yehova anzire abo akatsemera ibaghasirwa omwa ndongolya. (1 Tim. 2:5, 6) Aliwe ibbwa omuthima wethu amaghana eky’eribugha indi Yehova akathutsemera, nomwakine indi thun’ikirirye omwa ndongolya kandi thunabatizibirwe? Wibuke, mughulhu wosi sithwanga yikethera eriyowa lyethu, aliwe thwangana yikethera Yehova. Akalhangira ab’ikirirye omwa ndongolya ng’abathunganene embere siwe kandi akayilhagha eribatsumulha. (Soma Esyonyimbo 5:11; Abar. 3:26) Erighanirya okwa ndongolya mukyawathikya Vicky. Kiro kighuma, abere abirilengekania kutsibu okwa ndongolya, mwabugha athi: “Yehova abirinyighumisirizya ahabw’obuthuku buuli. . . . Aliwe munabya ng’oyukamubwira indi: ‘Olhwanzo lhwawu ni lhuke silhwanga nyihikako. Ekihongo kya Mughalha wawu sikyanga ghunzaho ebibi byaghe.’” Omw’ighanirya okwa kihembo eky’endongolya eki, mwatsuka eriyowa Yehova inianamwanzire. Nethu thukendi yowa Yehova inianathwanzire kandi ithwaminya kw’athutsemere thukaghanirya okwa ndongolya.

18. Ni yikethera lyahi erya thutholere ithwabya nalyo thwamalholha embere erianza Thatha wethu w’elhubulha?

¹⁸ Nomwakine indi thwangana lengaho erighendera okwa menge awali ahighulhu aya, hanganayira ithwahwa amani kandi ithwabulha Yehova ng’akanathutsemera. Ekyo kyamabya, ambi iwibuka ngoku Yehova akatsemera abakalholha embere ‘erimwanza.’ (Yak. 1:12) Neryo lholha embere eriyithunda hakuhi na Yehova n’eribya iwunemulebya ebikakanganaya kw’akakutsemera. Mughulhu wosi ibya iwun’ibukire ngoku Yehova ‘syali haali oko buli mundu.’—Emib. 17:27.