Erilhabira omo Bwami bwiwe, Yehova akisiya iniaghunzaho ebitsibu byethu ebyosi. Engulhu eyo yuwene kutsibu indi obuli mundu atholere iniaminyayo. Yesu aby’anzire abakamukwama ibabwira omwatsi oyu w’obuli mundu! (Matayo 28:19, 20) Abema ba Yehova bakakolha bathi ekya Yesu alhaghira eki?

1. Ebiri omu Matayo 24:14 binemubererera bithi munabwire?

Yesu mwalhaghulha athi: ‘Engulhu yuwene y’obwami eyi yasyatsuka erithulhughanibwa omwa kihugho kyosi.’ (Matayo 24:14) Abema ba Yehova batsemire erisangira omwa mubiiri mukulhu oyu. Thunemuthulhughania engulhu yuwene omwa kihugho kyosi omwa mibughe eyilhabire omu 1,000! Omubiiri munene oyu akayithagha erihiraho akaghalha kanene n’obuyithondeke. Syanga kolhwa ahathe obuwathikya bwa Yehova.

2. Ni kaghalha kahi ako thukahiraho erithulira abandu?

Thukathulira ehosi-hosi eyo thwangabana abandu. Ng’Abakristayo ab’omwa kighana ky’erimbere, thukathulira ‘omo manyumba w’abandu.’ (Emibiri 5:42) Enzira y’obuyithondeke eyi yikaleka ithwahika okwa syomiliyoni sy’abandu obuli mwaka. Kundi abandi sibalibya eka mughulhu wosi, thukathulira n’omwa myanya mingyi eyikabya mw’abandu bangyi. Mughulhu wosi thukabya ithunemusondekania akaghisa k’eribwira abandi oku Yehova n’ebighendererwa biwe.

3. Ni bahi abawithe olhukwamirwa lhw’erithulha engulhu yuwene?

Abakristayo abosi ab’okwenene bawithe olhukwamirwa lhw’eribwira abandi b’engulhu yuwene. Thukalhangira olhukwamirwa lhwethu olhu mwa lhukulhu. Thukathulira ngoku thwanga thoka erikwamana n’emibere eyo thulimu kundi thunasi ngoku engebe y’abandu yiri omwa kabi. (Soma 1 Timoteo 4:16.) Sithuli thuhawa habw’erikolha omubiiri oyu, kundi e Biblia yikabugha yithi: ‘Mwabiryangirira butsira eririha, muhe abandi butsira eririhisya.’ (Matayo 10:7, 8) Si bugha indi obuli mundu akaligha omwatsi wethu. Aliwe thukalholha embere kundi erithulira ni kitsweka ky’okw’iramya lyethu kandi likatsemesaya Yehova.

THASYIGHA BINGYI

4. Thukahiraho akaghalha erihika okwa bandu bosi

EVIDIYO: Erithulira Erihika “Oko Nduli-nduli sy’Ekihugho” (7:33)

• Ni kyahi ekikakutsemesaya busana n’akaghalha ako Abema ba Yehova bakahiraho erithulira?

Soma Matayo 22:39 na Abanya Roma 10:13-15, mwanakania okwa bibulyo bino:

• Erithulira lyethu likakanganaya lithi ku thwanzire abaliranwa bethu?

• Yehova akayowa athi busana n’abakathulha engulhu yuwene?​—Lebaya omulhondo 15.

5. Thukakolha haghuma na Nyamuhanga

Ebyalholirweko bingyi bikakanganaya ngoku Yehova anemusondolha omubiiri wethu. Ng’eky’erileberyako, e New Zealand mughalha wethu oyukahulhawamo Paul inianemuthulira nyumba okwa nyumba omw’ithungyi mweya omukali. Engyakya ey’ekiro ekyo, omukali abya iniabirisaba oku Nyamuhanga omw’ikolesya erina lya Nyamuhanga, Yehova, erimusaba athi omundu amubungire. Paul akabugha athi: “Habere hakalhaba esyosaha isathu, munamuhikako.”

Soma 1 Abanya Korinto 3:9, mwanakania okwa kibulyo kino:

• Ebyalholirweko ebiri ng’ekyabya e New Zealand eki bikakanganaya bithi ngoku Yehova anemusondolha omubiiri w’erithulira?

Soma Emibiri 1:8, mwanakania okwa kibulyo kino:

• Busana naki thukayithagha obuwathikya bwa Yehova eriberererya omubiiri wethu w’erithulira?

Wunalhue wasi?

Obuli wiki, okwa mihindano yethu y’ahakathi-kathi k’eyenga, thukathendekawa ngoku thwanga thulira. Wamabya iwanahindene okwa mughuma w’okwa mihindano eyi, muwalengekania wuthiki okw’ithendekwa eryo?

6. Thukaghondera ekihano kya Nyamuhanga eky’erithulira

Omwa kighana ky’erimbere, abahakani mubalengaho erilemesya abakakwama Yesu erithulira. Abakristayo abakera mubalhwira okwa bughabe bwabu obw’erithulira ‘omw’ihangania engulhu yuwene.’ (Abanya Filipi 1:7) Namunabwire Abema ba Yehova banemukolha ekyo.a

EVIDIYO: Erilhwira Okwa Ngulhu Yuwene (2:28)

Soma Emibiri 5:27-42, mwanakania okwa kibulyo kino:

• Busana naki sithwanga leka erithulira?​—Lebaya omulhondo 29, 38, na 39.

OMWA BIKUHI

Yesu mwalhaghira abakamukwama athi bathule engulhu yuwene okwa bihanda byosi. Yehova anemuwathikya abandu biwe erikolha omubiiri oyu.

Eriyibukya

• Engulhu yuwene yinemuthulhughanibwa yithi omwa kihugho kyosi?

• Omubiiri wethu w’erithulira akakanganaya athi ku thwanzire abaliranwa bethu?

• Wukalengekanaya omubiiri w’erithulira anganathulethera etseme? Busana naki?

MINYA BINGYI

Lhangira ngoku Abema ba Yehova bakathulira abandu omwa syotawuni nene-nene.

Erithulira Ahakabya Abandu Bangyi e Paris (5:11)

Abema ba Yehova babirikolhaki erithulira abathibithi?

Erighunza Enyotha y’Obunyakirimu ey’Abathibithi (5:59)

Hulikirira omundu akasoborera ngoku abiribana etseme busana n’erikolha mubiiri w’Obwami ow’omughulhu wosi.

Ngatsemire Eribya Imunasombolha Omubiiri oyu (6:29)

Minya ngoku erisinga emisango omwa koti kyabirileka engulhu yuwene iyalholha embere erithulhughanibwa.

“Abathuliri b’Obwami Bakathwalha Omusango Wabu Omwa Koti” (God’s Kingdom Rules!, esura 13)

Yesu mwakangirirya athi Abakristayo batholere ibabatizibwa. (Soma Matayo 28:19, 20.) Aliwe olhubatizo niki? Kandi omundu atholere iniakolhaki erihika okwa kilhubirirwa ekyo?

1. Olhubatizo niki?

Ekinywe “eribatizya” kilhuire omwa kinywe kye Kigiriki ekikamanyisaya “erilubba” omwa maghetse. Yesu abere akabatizibwa, mwalubbwa omwa Lhusi Yorodani, neryo ‘mwalhua omwa maghetse.’ (Mariko 1:9, 10) Kuthya, Abakristayo ab’okwenene bakabatizibawa omw’ilubbwa ndeke omwa maghetse.

2. Eribatizibwa likakanganayaki?

Omundu akabya akabatizibwa akabya iniamakangania kw’abiriyihayo oku Yehova Nyamuhanga. Omundu akayihayo athi? Athe abatizibwa, akaha omusabe iniane iyuwene, eribwira Yehova kw’anzire erimukolera kera na kera. Akayilhagha eriramya Yehova musa n’erilhangira erikolha erisonda lya Nyamuhanga mwa kindu kikulhu kutsibu omo ngebe yiwe. Akathwamu ‘eriyighana n’erikwama’ esyongangirirya n’eky’erileberyako kya Yesu. (Matayo 16:24) Eriyihayo n’eribatizibwa liwe likaleka ikyathokekana iyo eribya n’obunywani obughumire na Yehova n’abaramya balikyabu.

3. Omundu angakulha-kulhana athi erihika okw’ibatizibwa?

Wangana yitheghekera eribatizibwa omw’igha oku Yehova n’erithunga erikirirya omw’iyo. (Soma Abaebrania 11:6.) Eriminya n’erikirirya lyawu bikendibya binemwongera, n’olhwanzo olhwa wuwithire Yehova kwa lhunemwendyongera lhuthya. Ahathe erithika-thika iwukendi anza erimubwirako abandi n’erighendera okwa bihano biwe. (2 Timoteo 4:2; 1 Yoane 5:3) Omundu amalendera ‘ngoku Omukama anzire, n’erikolha ebyosi ebikamutsemesaya,’ iniangana thwamu eriyihayo oku Nyamuhanga n’eribatizibwa.​—Abanya Kolosai 1:9, 10.a

THASYIGHA BINGYI

4. Thwanga n’ighira okwa lhubatizo lhwa Yesu

Soma Matayo 3:13-17 eriminya bingyi okwa lhubatizo lhwa Yesu. Neryo mukanaye okwa bibulyo bino:

• Mbwino Yesu abatizibawa inina lhumekeke?

• Mwabatizibwa athi? Mbwino mwatsatsangwako amaghetse?

Yesu atsuka omubiiri wiwe w’embaghane agho Nyamuhanga amuha hano okwa kihugho akabatizibwa. Soma Luka 3:21-23 na Yoane 6:38, mwanakania okwa kibulyo kino:

• Yesu abere abiribatizibwa, ni mubiiri wahi ogho ahira embere omo ngebe yiwe?

5. Eribatizibwa ni kilhubirirwa ekya wangana hikako

Okw’itsuka, omwatsi w’eriyihayo n’eribatizibwa angana kuhahamya muthima. Aliwe, wangana kulha-kulhana erihika okw’iyowa iwabirisika eribya iwangana kolha ekiika kikulhu eki. Eriminya abandi abakolha ekyo, mubughaye EVIDIYO.

EVIDIYO: Erikulha-kulhania Obughuma na Yehova (1:11)

Soma Yoane 17:3 na Yakobo 1:5, mwanakania okwa kibulyo kino:

• Ni kyahi ekyanga wathikya omundu eriyitheghekera eribatizibwa?

1. Thukayihayo omw’ibwira Yehova omwa musabe ngoku thwanzire erimukolera kera na kera

2. Thukabya thukabatizibwa, thukakanganaya abalhangiri ngoku thwabiriyihayo oku Nyamuhanga

6. Eribatizibwa kikamanyisaya eribya mughuma w’okw’ihiika lya Yehova

Thukabya thukabatizibwa, thukabya baghuma b’okwa lhughanda olhuli bughuma olhw’ekihugho kyosi. Nomwakine indi thulhuire omo myanya n’emibere eyithasosene, ithwe bosi thw’ikirirye bighuma kandi thukaghendera okwa bihano bighumerere ebiri omo Biblia. Soma Esyonyimbo 25:14 na 1 Petero 2:17, mwanakania okwa kibulyo kino:

• Erikwamana n’emilhondo eyi, omundu akaghasirawa athi omw’ibatizibwa?

OMWA BIKUHI

Yesu mwakangirirya athi Abakristayo batholere ibabatizibwa. Erihika okwa kilhubirirwa ekyo, omundu atholere iniathunga erikirirya erighumire omu Yehova, iniaghendera okwa bihano Biwe, n’eriyihayo okw’Iyo.

Eriyibukya

• Olhubatizo niki, kandi busana naki ni kikulhu eribatizibwa?

• Eribatizibwa likakanganayaki?

• Ni biika byahi ebikakolhaya okw’iyihayo n’eribatizibwa?

MINYA BINGYI

Minya ekya olhubatizo lhukamanyisaya n’ekya lhuthemanyisaya.

“Olhubatizo Niki?” (Omwatsi okwa muthahulha)

Yibukaye esyonzira esyo mundu angakulha-kulhaniramo erihika okw’ibatizibwa.

“Erianza n’Erisima Yehova Bikendileka Iwanza Eribatizibwa” (Akaleberyo, Okwakasathu 2020)

Minya ekyahira omwa mulhume mughuma mw’omuhwa w’eribatizibwa.

“Mubanza Ngayikakasiraye Ekwenene” (The Watchtower, Okwakabiri 1, 2013)

Lebaya ekikaleka ikyabya ini ky’omughaso erihiraho akaghalha erihika okw’ibatizibwa.

“Nganabatizibawe?” (Questions Young People Ask​—Answers That Work, Volume 2, esura 37)