2. Ni byahi ebinemubya kandi abandu babiribya na mibereki eritsuka 1914?

Abigha ba Yesu mubamubulya bathi: “Ekiminyikalho ky’erihika lyawu ni kyahi, n’erihwererera ly’emighulhu eyi ni kiro kyahi kwehi?” (Matayo 24:3) Yesu mwasubirya omw’ibabwira ebindu bingyi ebyangabere abiritsuka erithabalha elhubulha ng’Omwami w’Obwami bwa Nyamuhanga. Ebighuma by’okw’ibyo mwamuli esyonyuhi, enzalha, n’emisiki. (Soma Matayo 24:7.) E Biblia kandi muyalhaghulha yithi emibere y’abandu ‘b’ebiro by’enyuma-nyuma’ yangalekire engebe ‘iyakalha.’ (2 Timoteo 3:1-5) Ebikabya ebi n’emibere y’abandu kutsibu-tsibu byabirilhangirika eritsuka 1914.

3. Busana naki ekihugho kyabiritsanda kutsibu eritsuka aho Obwami bwa Nyamuhanga bwa tsukira erithabalha?

Buthuku buke Yesu alibere Mwami w’Obwami bwa Nyamuhanga, mwalhwa na Sitani n’esyombinga siwe omwa lhubulha. Sitani mwasingwa. E Biblia yikabugha yithi ‘mwaghuswa ahisi oko kihugho, n’abamalaika bayo mubaghuswa ahisi haghuma nayu.’ (Eribisulirwa 12:9, 10, 12) Sitani ahithene kutsibu kundi anasi kw’akendi thoghothibwa. Neryo akaletha omwa kihugho kyosi mw’obulhumi n’eriaghalhwa. Ky’ekilekire kwesi ekihugho ikyatsanda kithya kutsibu! Obwami bwa Nyamuhanga bukendi ghunzaho ebitsibu ebyosi ebi.