ERISOMO 15

Yesu Nindi?

Ebiprintingirwe

Yesu ni mughuma w’okwa abandu abasibwe kutsibu. Abandu bangyi banasi erina lya Yesu, aliwe si bamwasiko bingyi, kandi abangyi bawithe amalengekania awathasosene awahambire oku Yesu kwenene nga nindi. E Biblia yikamubughako yithiki?

1. Yesu Nindi?

Yesu ni kihangikwa ky’ekirimu eky’amaaka oyuwikere elhubulha. Yehova Nyamuhanga mwamuhangika athali ahangika ekindi kindu kyosi-kyosi. Busana n’ekyo, akahulhawa mwa ‘kambere, oyulhabire ebyosi ebyahangikawa.’ (Abanya Kolosai 1:15) E Biblia yikahulha Yesu mwa ‘mughalha ekyusa’ kya Nyamuhanga kundi Yesu n’iyo musa oyo Yehova ahangika iyuwene-wene. (Yoane 3:16) Yesu mwakolha haghuma na Thatha wiwe, Yehova, erimuwathikya erihangika ebindi bindu byosi. (Soma Emisyo 8:30.) Yesu akalholha embere eribya iniane bughuma ndeke na Yehova. Buthaleghulha akakolha ng’embuyi ya Nyamuhanga, “Ekinywe,” erithulha omwatsi Wiwe n’obusondoli Bwiwe.—Yoane 1:14.

2. Ni kyahi ekyaleka Yesu iniasa okwa kihugho?

Myaka nga 2,000 kera, omwa nzira ey’ekithiko-thiko, Yehova mwakolesya omulimu wiwe abuyirire erihumya engebe ya Yesu erilhua elhubulha n’erihirayo omw’ibunda ly’omumbesa oyukahulhawa mwa Maria oyuwabya isyali athabana mulhume. Omwa nzira eyi, Yesu mwabuthwa ng’omundu w’omubiri n’omusasi. (Soma Luka 1:34, 35.) Yesu mwasa okwa kihugho eribya Masiya oyuwalhaghanisibawa, kutse Kristo, n’erilhamya abandu.a Amaminyereri wosi awahambire oku Masiya mwamuberererako, erithokesya abandu eriminya Yesu ku ni ‘Kristo, Mughalha wa Nyamuhanga oyuliho.’—Matayo 16:16.

3. Yesu ali hayi lino?

Yesu abere abiriholha, mwalhubukibwa n’omubiri w’ekirimu kandi amasuba elhubulha. Eyo, ‘Nyamuhanga mwamuhamya kutsibu.’ (Abanya Filipi 2:9) Lino, Yesu awithe obuthoki bunene—ni wakabiri oku Yehova.

THASYIGHA BINGYI

Thasyaminya bingyi ebihambire oku Yesu kwenene nga nindi n’ekikaleka ikyabya ini kikulhu erimwighako.

Yesu na Yoane Mubatizya ban’imene omwa maghetse ibanemuhulikirira omulenge owakalhua elhubulha Yesu imwanamabiribatizibwa.

4. Yesu si Nyamuhanga Omuthoki w’Ebyosi

Nomwakine indi e Biblia yikakangiriraya yithi Yesu ni kihangikwa ky’ekirimu ekiwithe obuthoki omwa lhubulha, akaghondera Nyamuhanga wiwe, Thatha wiwe, Yehova. Busana naki ithwabugha ekyo? Mubughaye EVIDIYO erilhangira ebya Biblia yikakangiriraya ngoku Yesu ali mbaghane oku Nyamuhanga omuthoki w’ebyosi.

EVIDIYO: Yesu Kristo Nina Nyamuhanga? (3:22)

Amasako awali ahikwa hano akathuwathikaya eriminya obughuma obuli ahakathi-kathi ka Yehova na Yesu. Soma obuli risako, mwanakania okwa bibulyo bino.

Soma Luka 1:30-32.

Omumalaika mwasoborera athi obughuma obuli ahakathi-kathi ka Yesu na Yehova Nyamuhanga, “ow’Endatha Kutsibu”?

Soma Matayo 3:16, 17.

Okw’ibatizibwa lya Yesu, omulenge owalhua elhubulha mwabugha athiki?
Wukalengekanaya abya mulenge wandi?

Soma Yoane 14:28.

Omukulhu okwa wundi kandi oyuwithe obuthoki bunene nindi? Ni thatha kutse mughalha?
Yesu amanyisayaki akahulha Yehova mwa Thatha wiwe?

Soma Yoane 12:49.

Mbwino Yesu akanayowa athi iyo na Thatha wiwe ni mundu mughuma? Wukabugha wuthiki?

5. Ebyakanganaya ngoku Yesu ya Masiya

E Biblia yiri mw’amaminyereri mangyi awanga wathikirye abandu eriminyerera Masiya—oyo Nyamuhanga abirisombolha erilhamya abandu. Mubughaye EVIDIYO eriminya amaminyereri malebe agho Yesu aberereraya akasa okwa kihugho.

EVIDIYO: Yesu Akaberereraya Obuminyereri (3:03)

Soma amaminyereri we Biblia, mwanakania okwa bibulyo bino:

Soma Mika 5:2 eriminya eyo Masiya anga buthirwe.b

Eributhwa lya Yesu mulyanaberererya obuminyereri obu?—Matayo 2:1.

Soma Esyonyimbo 34:20 na Zekaria 12:10 eriminya bingyi ebyalhaghulhawa ebihambire okwa lhuholho lhwa Masiya.

Amaminyereri aya mwanabererera?—Yoane 19:33-37.
Mbwino wukalengekanaya Yesu mwanayira ekyakakolha erileka amaminyereri aya abererere?
Eki kikakukanganayaki oku Yesu?

6. Thukaghasirawa omw’igha oku Yesu

E Biblia yikakanganaya omughaso w’erigha oku Yesu n’olhukwamirwa lhwiwe. Soma Yoane 14:6 na 17:3, mwanakania okwa kibulyo kino:

Busana naki ni kikulhu erigha oku Yesu?

Yesu anakanganirye elhubulha akakangirirya endeko y’abalhume, abakali, n’abaana. — Yesu mwakyungulha *enzira* y’eriberamu munywani wa Nyamuhanga. Mwakangirirya *ekwenene* eyihambire oku Yehova, kandi erilhabira omw’iyo, thwangana syabana *engebe* y’erikotha

ABANDI BAKABUGHA BATHI: “Abema ba Yehova sibikirirye Yesu.”

Iwukendi subirya wuthiki?

OMWA BIKUHI

Yesu ni kihangikwa ky’ekirimu eky’amaaka. Ni Mughalha wa Nyamuhanga kandi ya Masiya.

Eriyibukya

Busana naki Yesu akahulhawamo “akambere, oyulhabire ebyosi ebyahangikawa”?
Yesu mwakolhaki athali asa okwa kihugho?
Thukaminya thuthi ngoku Yesu ya Masiya?

Erisomo lino lyamahwa ebiro:

Ekilhubirirwa

Lebaya omusathu‘Nyamuhanga Mwayira Yesu Mwa Mukama Kandi Kristo’—Ekitsweka I kutse soma Luka sura 2 na 3 eriminya bingyi ebihambire okwa ngebe ya Yesu okwa kihugho.

Ekindi:

Your other goal

MINYA BINGYI

Minya bingyi okwa lhukwamirwa lhwa Yesu nga Masiya.

“Mbwino Amaminyereri Awahambire oku Masiya Akakanganaya Ngoku Yesu Yuwabya Masiya?” (Omwatsi okwa muthahulha)

Minya e Biblia nga yikanakangiriraya yithi Nyamuhanga mwabutha Yesu ngoku abandu bakanabutha abaana.

“Busana Naki Yesu Akahulhawamo Mughalha wa Nyamuhanga?” (Omwatsi okwa muthahulha)

Minya ekikaleka Obusathu iyabya isi ngangirirya ye Biblia.

“Yesu Nina Nyamuhanga?” (The Watchtower, Okwakani 1, 2009)

Minya ngoku engebe y’omukali yahinduka abiriminya ebya Biblia yikabugha oku Yesu.

“Omukali ow’Edini y’Ekiyuda Akasoborera Ekyaleka Iniathasyalebya Ndeke Erikirirya Liwe” (Awake!, Okwakathano 2013)

a Amasomo, 26 na 27, akendi syakania okwa kikaleka abandu ibayithagha erilhamibwa kandi Yesu ng’akathulhamaya athi.

b Lebaya Endomeko 2 eriminya obuminyereri obwalhaghulha obuthuku obwonyine-nyine obwa Masiya angabanikiremo okwa kihugho.