Ebibulyo Erilhua Omwa Basomi

Busana naki ebya Matayo ahandika okw’itsuka ly’engebe ya Yesu okwa kihugho ni bya mbaghane okwa bya Luka?

Matayo iyo akamukanayako erikwamana n’ebihambire oku Yozefu. Akakanaya okwa bya Yozefu athwamu akaminya Maria ku ni mukule, omulaika akasoborera Yozefu omwa nzoli ekyo nga kyasire kithi, kandi ngoku aghendera okwa busondoli bw’omumalaika. (Matayo 1:19-25) Kandi akathasya kanaya ngoku omulaika ahabulha Yozefu omwa nzoli athi athibithaye eka yiwe e Misiri, kandi ngoku owa obusondoli obo. Matayo akathasya thubwira ngoku Yozefu mwathunga ekindi kilhotho omumalaika akamubwira athi asube e Israeli, neryo indi mwasubulha, amathwamu eriyikalha e Nazareti n’eka yiwe. (Matayo 2:13, 14, 19-23) Omwa syosura ibiri esy’erimbere omwa Njiri eyi, Matayo ak’ahulha erina lya Yozefu ngendo munani, aliwe erya Maria ngendo ini nyisa.

Aliwe, Luka iyo akahira omuwatho w’oku Maria. Akakanaya oku malaika Gabrieli eribungira Maria, ngoku Maria abungira mwali wabu iya Elizabeti, n’ebinywe bya Maria eby’eripipa Yehova. (Luka 1:26-56) Luka akakanaya n’okwa binywe ebyo Simeoni abwira Maria ngoku Yesu akendi syaghalhwa. Neryo akathasya soborera omughulhu Yesu aghenda okwa hekalu iniane w’emyaka 12. Nibya n’omo mwatsi oyu, Luka mwahandika ebya Maria abugha butsira ebya Yozefu, kandi akathubwira athi ebyabya ebi mubyahamba kutsibu oku Maria. (Luka 2:19, 34, 35, 48, 51) Omwa syosura ibiri esy’erimbere omwa Njiri ya Luka, akabugha erina lya Maria ngendo 12, aliwe erya Yozefu, ngendo 3. Neryo kutsibu-tsibu, Matayo akathubwira okwa bya Yozefu alengekanaya n’erikolha. Aliwe Luka iyo akahira omuwathu okwa bya Maria alengekanaya n’erilhabamu.

N’endondekania y’ekihanda kya Yesu yiri mbaghane omwa Syonjiri ibiri esi. Matayo akathondekanaya olhubutho olhwa Yozefu alhuiremo n’erikangania ngoku Yesu oyuwakulibawa na Yozefu, abya n’ehamuli omwa bilhaghiro ey’erikalha okwa kithumbi ky’Obwami bwa Dawudi. Busana naki? Kundi Yozefu abya mwitsikulhu w’Omwami Dawudi erilhabira omu mughalha wiwe Solomona. (Matayo 1:6, 16) Aliwe Luka iyo akathondekanaya olhughanda lhwa Maria n’erikangania athi Yesu abya n’ehamuli y’obubuthiranwa er’ikalha okwa kithumbi ky’obuthabali bwa Dawudi. (Abanya Roma 1:3) Busana naki? Kundi Maria abya mwitsikulhu w’Omwami Dawudi erilhabira omu mughalha wiwe Natani. (Luka 3:31) Aliwe busana naki Luka syalihira Maria y’omo ndondekania y’abaana ba Heli, thatha wiwe? Kundi omwa bisakango by’olhughanda imukahandikawa abalhume basa. Neryo Luka akabya ak’ahulha Yozefu mwa mughalha wa Heli, kikakengawa ngoku amanyisaya athi Yozefu ni mukwe wa Heli.—Luka 3:23.

Endondekania y’olhughanda lhwa Yesu ngoku yiri omwa Njiri ya Matayo n’eya Luka, sikakanganaya ndeke-ndeke ngoku Yesu abya ini Masiya oyo Nyamuhanga alhaghanisaya. Yesu eribya iniabya inialhuire omwa lhubutho lhw’Omwami Dawudi kyabya ikinasibwe ndeke-ndeke indi nibya n’Abafarisayo n’Abasadukayo isibangaghania. Ebya Matayo na Luka babugha okwa ndondekania y’olhughanda lhwa Yesu ni by’omughaso omw’ikirirya lyethu kandi bikaleka ithwakakasya ngoku ebindi ebyo Yehova abirithulhagha bikendi syabererera.