WUNALHUE WASI?
Kera, olhuso lhwabya lhukakolesibwa lhuthi?
Olhuso lhwabya lhukakolesibwa eriswa esyonguma mw’isyano ey’erikolha emiggati. Eriswa okwa mabwe aya abya mubiiri wa buli kiro ow’abakali kutse abaghombe hakuhi omwa buli nyumba. Kera, ebinywe ‘omulenge w’olhuso’ ibikanakolesibawa abandu bakakania okwa mibere eya buli kiro.—Eriluayo 11:5; Omugambuli 12:4.
Ebisasani ebya kera erilhua e Misiri bikakanganaya ngoku olhuso lhwabya lhukakolesibwa. Esyonguma isikahirawa okwa lhuso. Oyukaswa iniakakukama ahali olhuso, inyimya engasirya, neryo iniatsuka eriswa. Kikabughawa indi engasirya iyikanabya y’esyokilo ng’ibiri erihika okw’ini. Iyikabya yamaghuswa okwa mundu, iyangana mwitha.—Abatsweri 9:50-54.
Eriswa lyabya likawathikya kutsibu amaka. Nibya ihali n’ekihano omwa Biblia ekikathanga er’imya olhuso mwa mutsimbo. Eryibuka Ebihano 24:6 hakabugha hathi, ‘Simusy’imaya olhuso kutse engasirya mwa muwatho; kusangwa imuk’imaya engebe y’omundu mwa muwatho.’
Omwa Biblia, ‘Eribya omwa kikuba’ kikanamanyisaki?
E Biblia yikabugha yithi Yesu ‘ali okwa kikuba kya Thatha.’ (Yoane 1:18) Ebinywe ebi bikakanganaya obunywani bw’ahakuhi obwa Yesu awithe na Nyamuhanga. Ebinywe ebi bilhuire okwa mibere eya Bayuda babya bak’ikaliramu okwa meza bakalya.
Omwa buthuku bwa Yesu, Abayuda ibak’ikalha okwa hiri nga hikingo ehithimbire okwa meza. Obuli mundu iniak’ikalha omuthwe wiwe inianalholire eyiri emeza inianalhambirye amaghulhu, inianatsimbire engokolho y’okuboko kw’amalembe okwa museghemu n’eriyihirikirira muko. Eki ikikaleka okuboko kw’amali ikwabya ikune kuthya. Kundi abali okwa meza ibak’eghemera okwa lhuhandi lhw’amalembe, ibane hakuhi na hakuhi, kikabughawa indi “omuthwe ow’owundi iniakabya hakuhi n’ekikuba ky’oyuli enyuma siwe, neryo ikikaleka ikyabuwa indi ‘ali omwa kikuba’ ky’owundi.”
Eribya omwa kikuba ky’omwinye nyumba kutse oyulyakokaya, ilhukabya ini lhusunzo lhunene kutsibu. Neryo kwesi, ky’ekyaleka okwa mukonga w’Erikyuruka ow’erighunzerera owa Yesu, omukwenda Yoane “oyo Yesu abya anzire” iniabya iyuli omwa kikuba kya Yesu. Ky’ekyaleka Yoane iniabya inianganathoka ‘eryeghemera oko kikuba kya Yesu’ akamubulya.—Yoane 13:23-25; 21:20.