Soakas
24 Nimet sok sin mwet koluk, ac nimet oru kom in kawuk selos. 2 Pacl nukewa elos pwapa sulal, ac sramsram lalos mwe na purakak lokoalok.
3 Lohm uh musaiyuk fin pwelung lun lalmwetmet ac etauk. 4 Acn ma oasr etauk we, infukil uh yunla ke ma saok ac oaskulana.
5 Wo in lalmwetmet liki na in ku; aok, yohk sripa in etauk liki in fokoko. 6 Kom enenu na in akola akwoya meet liki kom srola ke sie mweun, ac kom fin eis kas in kasru wo puspis na kom ac fah ku in kutangla.
7 Kas lalmwetmet uh arulana loalla nu sin sie mwet lalfon in kalem kac. Wangin ma el ac ku in fahk ke pacl ac srumunyuk ma yohk sripa uh.
8 Kom fin orek pwapa koluk pacl nukewa, ac fah eteyuk kom lah kom sie mwet orek lokoalok. 9 Ma nukewa sie mwet lalfon ac nunkauk in oru uh ac ma na koluk. Mwet uh srunga mwet se ma kwacna aklusrongtenye mwet.
10 Kom fin munasla ke pacl kom sun ma upa, kalmac pa ku lom uh srikla.
11 Nimet alolo in molela sie mwet su akola in anwuki ke sripen nununku sesuwos. 12 Sahp kom ac fahk mu kom nikin, a God El etekom ac nunak lom. El ac fah moli nu sum fal nu ke ma kom orala.
13 Tulik nutik, kom in mongo honey, mweyen arulana wo. Oana ke honey emwem in oalum, 14 ouinge lalmwetmet uh wo nu ke ngunum. Kom fin eis lalmwetmet, na moul lom in pacl fahsru ac fah wo.
15 Nimet oana sie mwet koluk su pwapa sulal in pisrala ma lun sie mwet suwohs, ku in eisla lohm sel. 16 Finne pus pacl sie mwet suwohs el ikori, el ac sifil tuyak, a mwe ongoiya uh kunausla mwet koluk.
17 Nimet engan ke pacl mwet lokoalok lom sun ongoiya uh, ac nimet enganak ke pacl el tukulkul. 18 LEUM GOD El ac etu lah kom engankin, ac El ac tia lungse; fin ouinge, sahp El ac tia sang kai nu sel.
19 Nimet lela mwet koluk in akfosrngaye kom; ac nimet sok selos, 20 mweyen wangin finsrak lun sie mwet koluk nu ke pacl fahsru. Wangin ma el akwot nu kac.
21 Tulik nutik, kom in akfulatye LEUM GOD ac sunakin tokosra. Nimet asruoki nu sin mwet su lainulos. 22 Mwet ouinge uh ac sa na in kunausyukla. Ya kom akilen luman ongoiya ma ku in tuku sin God me ac sin tokosra me?
Kutu Pac Kas Lalmwetmet
23 Mwet lalmwetmet uh oayapa fahk ma inge:
Tia wo sie mwet nununku in wiwimwet. 24 El fin sang mwata nu fin mwet se ma suwohs, mwet nukewa ac srungal ac selngawel. 25 A kutena mwet nununku su kai mwet oasr mwata, elos fah kapkapak ac mwet uh ac kaksakunulos.
26 El su kawuk na pwaye lom el ac topuk kom ke kas pwaye.
27 Akola ima lom ac yukwiya ma kom ac moul kac, na kom fah musai lohm sum ac sou lom.
28 Nimet orek loh lain sie mwet fin wangin mwatal. Nimet fahk kutena ma sutuu kacl. 29 Nimet fahk mu, “Nga ac oru nu sel in oana ke el tuh oru nu sik! Nga ac folokunang pacna ma el oru nu sik!”
30 Nga fahsr sasla ke ima in grape lun sie mwet alsrangesr ac lalfon. 31 Kupoi ke kokul ac mah kap wel, ac pot ma kuhlasak uh mokukla. 32 Nga liye ma inge ac nunku kac, na pa inge mwe luti nga eis kac: 33 Farpoeni ac mongla kutu srisrik, eis pacl in motul lom,* 34 tusruktu ke kom srakna motul, sukasrup ac fah tuku nu fom oana sie mwet pisrapasr su us mwe anwuk inpaol.