Orekmakihn Loum nuh ke Ma Wo
“Lwelah kahs in oalihk . . . in wo ye motom, O LEUM GOD.”—PSALM 19:14.
KE KUHT UKWE MWE SRIHKASRAK LAL JESUS UH, MA INGE AC KAHSRE KUHT FUHKAH IN . . .
etuh pacl fal kuht in sramsram?
sulaclah kahs ma fal kuht in fahk?
kuhlwacng ke inkacnek in sramsram lasr uh?
1, 2. Efuh kuh Bible uh luhmahlah inkacnek in sramsram lasr uh nuh ke e?
KE YAC 1871, oasr e se tuh esuhkwack insack se fin acn Wisconsin, Macrike. E se inge sa na fahsrelihk ac esuhkwack billion luo ke sahk. Puhs liki mwet 1,200 suc misac kac. Pa inge pihsac se ma puhslac emeet ke mwet misac ke e fin acn Macrike. Kahlwem tuh nuh kihtin na e ma oreklac ke kahsruhsr luhn train ma ikihl insack se inge uh pa oraclah e na luhlahp se inge. Ma inge ahkacsmakihnye kuht ke sie fuhs in Bible: “Nuhnkuh pac ke insack na luhlahp se ac kuh in fihrihrlac ke kihtin fihrihr na srihsrihk!” (James 3:5) Efuh kuh James, sie mwet sihm luhn Bible el fahk ma inge?
2 El ahkuhtweyac pac lah: “Loh uh el oacna sie e.” (James 3:6) “Loh uh” luhmweyuck nuh ke sramsram lasr uh. Ac in oacna sie e, ma kuht fahk uh kuh in oruh mwe ahkkuluk na yohk. Kahs lasr uh ac kuh in ahkkulukyelah sie mwet. Bible uh oacyacpac fahk nuh sesr lah ma kuht fahk uh kuh in kahsruh molwelah mwet se kuh pwacnacng mwet se in misac. (Soakas 18:21) Tuhsruhktuh, yac kalmen ma inge pa kuht tiac enenuh in fahk kuhtwena ma ke srihpen sahp kuht ac fahk sie ma tuh tahfonglac kuh tiac wo? Moh. Tiac kalmac pa kuht ac tui ke orekmakihnyen e ke na srihpen kuht sensen in follah. Tuhsruhktuh, orekmakihnyac sesr pa kuht ac sensenkihn uh. Ke sie mwe puhpuhlyuck, kuht kuh in orekmakihn e uh in orek mongo, in ahkfucsrfucsrye kuht ac in tolack acn uh. Ke inkacnek se pacna inge, kuht fin arlacna taran ke inkacnek in sramsram lasr uh, kuht ac kuh in orekmakihn ma inge in kaksakihn Jeova ac in kahsruh mwet sahyac.—Psalm 19:14.
3. Meac ma tolu ma ac kahsre kuht in ahkkweye mwet sahyac uh ke pacl se kuht sramsram nuh seltahl uh?
3 Jeova el use kuh lasr in fahkwack ma kuht nuhnkuh ac puhla kacl uh nuh sin mwet sahyac, ke kuht sramsram kuh ke kuht orekmakihn pahosr. Pwacnacng, kuht ac orekmakihn fuhkah mwe sang na wowo se inge in ahkkweye mwet sahyac uh? (Riti James 3:9, 10.) Kuht enenuh in etuh lah piyac pacl fal kuht in sramsram, meac fal kuht in fahk ac kuht ac fahk fuhkah.
PIYAC PACL FAL KUHT IN SRAMSRAM?
4. Piyac pacl ma kuht tiac enenuh in kahskahs uh?
4 Kuhtuh pacl uh wo kuht in tiac sramsram. Bible uh fahk lah oasr “pacl in tiac kahskahs.” (Ecclesiastes 3:7) Ke sie mwe puhpuhlyuck, kuht tiac enenuh in kahskahs ke pacl ma mwet sahyac uh sramsram tuh in ahkkahlwemye suhnak. (Job 6:24) Oacyacpac, kuht tiac enenuh in kahskahs ke ma lukmac kuh ke ma mwet sahyac uh tiac enenuh in wi etuh kac. (Soakas 20:19) Ac ke pacl se sie mwet el oruh kuht in kasrkuhsrak, kuht ac lahlmwetmwet kuht fin srihke in mislac na ac tiac fahk kuhtwena ma.—Sie Peter 3:10, 11.
5. Kuht ac ahkkahlwemye fuhkah nuh sin Jeova lah kuht srui ke el use nuh sesr kuh lasr in sramsram?
5 Tuhsruhktuh, oasr pac pacl fal in kahskahs. (Ecclesiastes 3:7) Oasr pacl in kaksakihn Jeova, in ahkkweye mwet sahyac, in ahkkahlwemye ma kuht puhla uh ac in fahk nuh sin mwet sahyac ma kuht enenuh uh. (Psalm 51:15) Ac kuht fin orekmakihn sramsram lasr uh ke inkacnek se inge, kuht ahkkahlwemye nuh sin Jeova lah kuht srui ke mwe sang se ma el use nuh sesr inge. Mweyen, ke pacl se ma kawuck se lasr el use mwe sang na wowo se nuh sesr, kuht ac ke orekmakihn ke inkacnek ma wo emeet.
6. Efuh kuh yohk srihpac kuht in sulaclah pacl fal in sramsram?
6 Efuh kuh yohk srihpac in sulaclah pacl fal in sramsram? Bible uh fahk: “Sie kahs ma fwack ke pacl fal sacohk oacna apple gold ke sie tefuro silver.” (Soakas 25:11, NW) Apple gold uh arlacna kahto. Tuh kom fin fihliyac ma inge meet liki sie ma silver, ac arlacna kahto liki na meet ah. In oacpacna, sahp oasr ma wo ma kuht ke fahk nuh sin sie mwet. Tuh, kuht fin sulaclah pacl ma fal kuht in kahskahs, kuht ac kuh in kahsruh ac ahkkweye mwet sacn yohk liki na meet ah. Kuht ac oruh fuhkah ma inge?
7, 8. Mwet lili fin acn Japan inge etahi fuhkah mwe srihkasrak lal Jesus ah?
7 Kuht fin sramsram ke sie pacl ma tiac wo, mwet uh ac tiac kahlwem kuh lohng wo ma kuht fahk uh. (Riti Soakas 15:23.) Ke sie mwe puhpuhlyuck, ke March 2011, kusrusr ac noa na luhlahp se tuh kuhnahoslah siti pucspucs fin acn eastern Japan. Puhs liki mwet 15,000 ma misac kac. Finne puhs sin Mwet Loh luhn Jeova ma sucu ac kawuck laltahl uh misac kac, eltahl ke orekmakihn Bible uh in kahsruh mwet sahyac ma wi pac sun ma upac inge. Tuhsruhktuh, eltahl etuh lah inkaiyen mwet inge alu nuh sin Buddha ac srihklac etuh laltahl ke Bible uh. Pwacnacng, eltahl tiac sa sruhmuhn ke pacl in sifwil moulyak uh, a mwet lili inge ahkkweyacltahl ac ahkuhtweyac nuh seltahl lah efuh ma upac inge sikyak nuh sin mwet wo.
8 Mwet lili inge etahel Jesus. Jesus el etuh pacl elan tiac kahskahs ac pacl fal elan kahskahs uh. (John 18:33-37; 19:8-11) Ac el sano na nuh ke pacl wo nuh sel in luti mwet tuhma lutlut lal uh ke kais kuhtuh ma. (John 16:12) Mwet lili fin acn Japan inge sano nuh ke pacl fal eltahl in sruhmuhn nuh sin mwet sahyac uh ke finsrak in sifwil moulyak. Yac luo tahfuh tukun noa na luhlahp se inge, eltahl forfor kihte mwe rit srihsrihk se inge Pwacye lah Mwet Misac Kuh in Sifwil Moulyak? Puhs mwet suc eis mwe rit se inge ac ahkkweyeyuck ke ma eltahl riteack kac inge. Kuht enenuh pac in nuhnkuh ke facsin ac luhlahlfongi luhn mwet ke acn ma kuht forfor nuh we uh tuh kuht in etuh pacl ma wo kuht in sramsram nuh seltahl uh.
9. Piyac pac kuhtuh pacl fal ma kuht ac enenuh in sano in sramsram uh?
9 Piyac pac kuhtuh pacl fal ma kuht ac enenuh in sano in sramsram uh? Sahp oasr mwet se ma ahktoasrye kuht. Meet liki na kuht suhlahklahk fahklah sie ma ma tiac pac wo, kuht ac lahlmwetmwet in nuhnkuh meet: ‘Yac el fahk kuh oruh ma inge in oacyac? Yac nga enenuh na pwacye in sramsram nuh sel ke ma el fahk inge?’ Sahp wo kom in tiac fahk kuhtwena ma. Tuhsruhktuh, fin oasr srihpac kom in sramsram nuh sel, sahp wo in sano nwe ke kom tilac kasrkuhsrak. (Riti Soakas 15:28.) Kuh sahp, kuht ke ahkkweye sucu lasr ma tiac mwet Loh eltahl in etwacllah Jeova. Kuht enenuh in mongfihsracsr, nuhnkaclah ahkwoyac ma kuht ac fahk uh ac konwacack sie pacl wo ma eltahl ac engan in lohng kuht uh.
MEAC FAL KUHT IN FAHK?
10. (a) Efuh kuh kuht enenuh in arlacna taran ke ma kuht fahk uh? (b) Kain in sramsram fuhkah kuht enenuh in fahsr liki uh?
10 Ma kuht fahk uh kuh in oruh mwet sahyac uh in engan kuh toasrlah. (Riti Soakas 12:18.) Mwet pucspucs ke facl lal Satan uh luhngse fahk kahs upac ma oacna mwe “pihsr” kuh “cutlass” mweyen eltahl ke ahkngalye ac ahkahsorye mwet sahyac. (Psalm 64:3) Puhs mwet suc etwaclah in sramsram ohinge ke movie ac tv ma eltahl muhta liye uh. Tuhsruhktuh, mwet Christian uh tiac fahk kuhtwena mwe ahkngal ac tiac kuhlwacng, kuh finne in mwe na ahksruhksruhk. Sramsram tahfuhnkahs uh wo ac kuh in oruh ma kuht fahk uh in pihrihk kena luhn mwet ma lohng kuht uh. Tuhsruhktuh, kuht tiac enenuh in fahk kahs tahfuhnkahs ma ac kuh in ahkmwekihnye kuh ahkkulukye sie mwet tuh in oruh na mwet sahyac uh in isracsr. Bible uh sapkihn mwet Christian in tiac “orekmakihn kahs in ahkkulukye mwet, a kahs in kahsruh muhkwena, kain in kahs ma ac muhsaheack ac suc fal nuh ke enenuh, tuh ma kowos fahk uh ac ahkwoyaclos suc lohng.”—Ephesus 4:29, 31.
11. Meac ac kuh in kahsre kuht in sulaclah kahs ma fal kuht in fahk?
11 Jesus el luti lah “oaluh el kahskahs ac fahk ma suc insiac sesseslah kac.” (Matthew 12:34) Kalmen ma inge pa, ma kuht fahk uh kuh in ahkkahlwemye ma kuht puhla na pwacye uh. Pwacnacng, kuht fin luhngse mwet uh ac nuhnkuh kacltahl na pwacye, kuht ac sulaclah kahs ma fal kuht in fahk nuh seltahl uh. Ma kuht fahk nuh seltahl uh ma ac wo ac mwe ahkkweye.
12. Meac kuhtuh pac ma ac kuh in kahsre kuht in sulaclah ahkwoyac kahs lasr uh?
12 Kuht enenuh in arlacna kwacfeacng in konwacack kahs ma fal kuht in fahk uh. Tohkohsrah Solomon el finne lahlmwetmwet, el ‘lutlutkihn . . . ac srihke in konwacack na pwacye kalmen’ ma el sihmihs uh tuh in suwohs ac mwet uh in luhngse riti. (Ecclesiastes 12:9, 10) Meac ac kuh in kahsre kuht in etuh ke ma kuht ac fahk uh? Kuht kuh in liye ke Bible ac mwe rit nahtuhsr uh in konwacack inkacnek sahyac ma kuht kuh in fahkwack puhlakihn lasr kac uh. Kuht kuh in etwaclah kalmen kahs ma kuht tiac kahlwem kac uh. Kuht kuh pac in lutlutkihn mwe srihkasrak lal Jesus in etwaclah sramsram ke inkacnek ma ac kahsruh mwet sahyac uh. El etuh na pwacye ma el ac fahk mweyen Jeova el lotwel ‘ma el in fahk, tuh el in kuh in ahkkweye mwet muhnahs.’ (Isaiah 50:4) Ke kuht nuhnkaclah ahkwoyac ke ma kuht ac fahk uh, ac kuh in kahsre kuht in konwacack kahs ma fal kuht in fahk uh. (James 1:19) Kuht kuh in siyuck sesr sifacna: ‘Nga fin fahk ma inge, yac el ac kahlwem ke ma nga srihke in fahk nuh sel uh? Meac el ac puhla?’
13. Efuh kuh kuht enenuh in sramsram ke inkacnek ma fihsracsr ac kahlwem?
13 Mwet Israel ah orekmakihn mwe ukuk uh in ahkkahlwemye sie ma. Kalmen sie puhsra inge pa mwet we inge enenuh in toeni. Kalmen sie pac puhsra inge pa solse uh enenuh in som mweun. Srihke petsacelah ke nuhnak lom an lah meac ac sikyak nuh sin solse inge fin puhsren mwe ukuk sac tiac kahlwem! Bible uh ahkkahlwemye ma oacna sie ke puhsra kahlwem ke mwe ukuk se nuh ke kahs ma fihsracsr ac kahlwem. Kuht fin tiac ahkuhtweyac ma se in kahlwem, mwet uh ac kuh na in fohsack kuh luhlahlfongi muh sahp suhtuh uh. Kuht finne ke ahkkahlwemye puhlakihn lasr uh in arlac kahlwem, kuht enenuh in taran tuh ma kuht fahk uh in tiac upac kuh ahktoasrye mwet uh.—Riti Sie Corinth 14:8, 9.
14. Mwe srihkasrak fuhkah ahkkahlwemye lah inkacnek in sramsram lal Jesus uh fihsracsr ac kahlwem?
14 Ke Matthew sapta 5 nuh ke 7, pa inge kuhtuh mwe srihkasrak na wo ke suleyacn kahs ma fihsracsr ac kahlwem ma Jesus el ahkkahlwemye uh. Ke sramsram se lal inge, el tiac orekmakihn kahs ma mwet uh tiac kahlwem kac. El tiac pac fahk kahs ma ac ahkngalye mwet sahyac uh. Ma na yohk srihpac ac loal pa Jesus el luti inge, ne ohinge kahs ma el orekmakihn inge fihsracsr nuh sin mwet uh in kahlwem kac. Ke sie mwe puhpuhlyuck, Jesus el ke ahkkweye luhlahlfongi luhn mwet tuhma lutlut lal uh lah eltahl tiac enenuh in elyah kac lah meac eltahl ac kang ke kais sie lwen. Pwacnacng, el ahkuhtweyac lah Jeova el kihte won uh pacl nuhkewa. Tohkohyang, el siyuck seltahl: “Yac kowos tiac arlacna sacohk luhkelos?” (Matthew 6:26) Ke kahs na fihsracsr inge, Jesus el kahsreltahl in kahlwem ke mwe lutlut na yohk srihpac se ac in eis mwe ahkkweye.
FUHKAH SRAMSRAM LASR NUH SIN MWET SAHYAC UH?
15. Efuh kuh kuht enenuh in kuhlwacng ke sramsram lasr uh?
15 Ohiyen sramsram lasr nuh sin mwet sahyac uh yohk srihpac oacna ke ma kuht fahk uh. Mwet uh luhngse lohngohl Jesus ke srihpen el sramsram nuh selos ke inkacnek kuhlwacng. (Luke 4:22) Kuht fin kuhlwacng ke sramsram lasr uh, mwet sahyac uh ac engan in lohng kuht. (Soakas 25:15) Kuht ac kuh in sramsram nuh sin mwet sahyac ke inkacnek kuhlwacng kuht fin ahkkahlwemye suhnak ac nuhnkuh ke puhlakihn laltahl uh. Pa inge ma Jesus el oruh ah. Ke sie mwe puhpuhlyuck, ke pacl se Jesus el liye lah un mwet se inge arlacna kwacfeacng in lohngohl, el arlacna engan in weluhltahl ac lotweltahl. (Mark 6:34) Finne ke pacl ma mwet ah ahkkulukyacl, Jesus el tiac fohlohkihn nuh seltahl.—Sie Peter 2:23.
16, 17. (a) Ke pacl ma kuht sramsram nuh sin mwet in sucu kuh kawuck lasr, kuht ac etahi Jesus fuhkah? (Liye petsac se meet ke mwe lutlut se inge.) (b) Ke inkacnek fuhkah sie ninac el ahkkahlwemye ohiyac kuhlwacng ke sramsram lal uh?
16 Pwacye lah kuht luhngse mwet in sucu lasr ac kawuck lasr uh. Tuhsruhktuh, sahp oasr pacl ma kuht tiac kuhlwacng ke inkacnek in sramsram lasr nuh seltahl uh mweyen kuht etwacltahl na pwacye. Sahp, kuht nuhnkuh muh kuht tiac enenuh in taran ke inkacnek in sramsram lasr nuh seltahl uh. Tuhsruhktuh, wacngihn sie pacl ma Jesus el tiac kuhlwacng ke el sramsram nuh sin kawuck lal ah. Ke pacl se ma kuhtuh seltahl akuhkuhinlac lah suc kac fuhlwact seltahl uh, el ahksuwohsyacltahllah ke inkacnek na kuhlwacng se ac el orekmakihn mwe puhpuhlyuck se ke sie tuhlihk srihsrihk in kahsreltahl ekuhllah nuhnak laltahl uh. (Mark 9:33-37) Mwet elder uh kuh in etahi mwe srihkasrak lal Jesus inge ke eltahl sang kahs in kahsruh nuh sin mwet sahyac ke inkacnek kuhlwacng.—Galatia 6:1.
17 Mwet se finne fahk kahs in ahkkasrkuhsrak, kuht srackna kuh in ahkkahlwemye ohiyac kuhlwacng ke inkacnek in sramsram lasr uh. (Soakas 15:1) Ke sie mwe puhpuhlyuck, tuhlihk mukul fuhsr se nuhtin sie ninac el oruh ma kuluk ac ke pacl sac pacna el kuhlwacnsuhpuh Jeova. Sie muhtwacn lili ma pahkomuhta ninac se inge el fahk nuh sel: “Pahkomotom ke inkacnek in ahkpah lom nuh sin tuhlihk nuhtum an tiacna wo.” Ninac sac nuhnkaclah meet liki el fahk: “Pwacye lah tiac arlac wo ingena, tuh el srackna ahkpah. Soano in tukun Armageddon na kom sulpac tuhkuh sramsram nuh sihk kacl.” Ke srihpen ninac se inge mongfihsracsr ac kuhlwacng na nuh sin muhtwacn lili se inge oruh eltahl tahfwelah na in kawuck. Oacyacpac, tuhlihk mukul fuhsr sac lohng ma ninac kiyacl uh fahk inge ac akihlenack lah ninac kiyacl uh srackna luhlahlfongi muh el kuh in eklac. Pwacnacng, el tui ke asruoki kuluk lal ah, bacptaislac ac tok el wi orekma ke Bethel. Kuht finne sramsram nuh sin mwet lili wiyacsr, mwet in sucu lasr kuh mwet suc kuht tiac etuh, pacl nuhkewa kuht enenuh in ‘oruh sramsram lasr nuh selos in ahkinsewowoyaclos.’—Colossae 4:6.
18. Kuht ac ukwe fuhkah mwe srihkasrak lal Jesus ke sramsram lal uh?
18 Sie mwe sang na wowo sin Jeova me pa kuh se lasr in fahk nuh sin mwet sahyac ke ma kuht nuhnkuh ac puhla uh. Kuht kuh in ukwe mwe srihkasrak lal Jesus uh ke kuht sulaclah pacl ma fal kuht in sramsram, ma fal kuht in fahk ac inkacnek kuhlwacng in fahk ma inge. Pwacnacng, lwelah kuht in sulaclah ahkwoyac kahs lasr in ahkkweye mwet sahyac ac in ahkenganye Jeova.
[Pohk ke sra 22]
OREKMAKIHN LOUM NUH KE MA WO
NGAC: Sulaclah pacl fal in sramsram
MEAC: Sulaclah kahs ma wo ac fal kom in fahk
FUHKAH: Kwacfeacng in sramsram nuh sin mwet ke inkacnek kuhlwacng