38 Mu oa moba, Hezekiya wakolelwe bingi kabiji kwashajiletu pacheche kufwa.+ Ngauzhi Isaya+ mwana wa kwa Amozi wayile kwi aye ne kumwambila’mba: “Yehoba waamba’mba: ‘Pana mikambizho ku ba mu kisemi kyobe, mambo obewa ubena kufwa; kechi usakukosa ne.’”+ 2 Ponkapo Hezekiya wakungamijile ku lubumbulu ne kulomba kwi Yehoba amba: 3 “Kine, anweba Yehoba nemusashijilapo, vulukai+ byo naenda mu bukishinka ku meso enu ne na muchima yense,+ kabiji nauba bintu byawama ku meso enu.” Kabiji Hezekiya wajijile bingi.