Yelemiya
19 Yehoba waambile’mba: “Yanga ukapote mulondo wa buchimba kwi mbumbi.+ Usendepo bakulumpe bamo ba bantu ne bakulumpe bamo ba bañanga, 2 ne kuya ku Kimpachiko kya Mwana wa kwa Hinomu+ ku Kibelo kya Mbumbi. Byo ukafika kokwa, ukambe byambo byo nakubuula. 3 Ukebambile’mba, ‘Umvwai byaamba Yehoba, anweba bamfumu ba mu Yuda ne anweba mwikala mu Yelusalema. Yehoba wa mabumba, Lesa wa Isalela waamba’mba:
“‘“Katatakatu ndete bya malwa pa ino mpunzha, ne muntu yense ukekyumvwa kino ukakumya* bingi. 4 Nkeboba bino mambo bansha+ kabiji balengela ino mpunzha kubula kuyukanyikwa.+ Mu ino mpunzha mo mo babena kutapishisha bitapisho ku balesa bangi bo babula kuyuka, abo bene, bashakulu babo ne bamfumu ba mu Yuda, kabiji bakumbanya ino mpunzha na mashi a bantu babula mambo.+ 5 Bashimikile mapunzha atuntama a kwa Baela kuba’mba basokelengapo baana babo mu mujilo kwikala milambo ya kupana kwi Baela,+ kintu kyo nabuujile kwibakambizha nangwa kwikyambapo ne, kabiji kintu kyo nabujile kulangulukapo mu muchima wami.”’*+
6 “‘“Onkao mambo, umvwai! moba abena kwiya,” byo byaamba Yehoba, “ino mpunzha po ikabula kutelwa’mba Tofweta nangwa’mba Kimpachiko kya Mwana wa kwa Hinomu, bino ayo ikatelwa’mba Kimpachiko kya Bantu Bafwa.+ 7 Amiwa nkavulañanya milanguluko ya bena Yuda ne ba mu Yelusalema mu ino mpunzha, kabiji nkebalengela kwibepaya na mpoko ku balwanyi babo ne ku boba bakebelenga konauna bumi* bwabo. Ne mibiji yabo yafwa nkeipana kwikala ke kajo ka bañonyi ne ka banyama ba mungye.+ 8 Kabiji nkalengela uno muzhi kukankamika bantu ne kulengela bantu kwita milozhi pa kumumona. Muntu yense ukapitangamo ukakankamanatu ne kwita mulozhi na mambo a bintu bikamwekela uno muzhi.+ 9 Nkebalengela kuja baana babo ba balume ne baana babo ba bakazhi, kabiji muntu yense ukajanga mubiji wa mukwabo na mambo a kwibalukuka ne kubula kuyuka bya kuba, kimye kyo bakebataya mu kañumbwañumbwa ku balwanyi babo ne ku boba bakakebanga konauna bumi* bwabo.”’+
10 “Onkao mambo, ukalale mulondo banabalume bo ukaya nabo saka bamonako, 11 kabiji ukebambile’mba, ‘Yehoba wa mabumba waamba’mba: “Abino byo byo nkonauna bano bantu ne uno muzhi byonkatu muntu byo onauna kintu kya buchimba kyabumba mbumbi pa kuba’mba bakabule kwikiwamisha jikwabo; kabiji bantu bafwa bakebazhiika mu Tofweta kufikatu ne byo bakakankalwa ne pa kwibazhiika.”’+
12 “Yehoba waamba’mba, ‘Bino byo byo nkooba ku ino mpunzha ne ku bantu bekalamo, nkalengela uno muzhi kwikala nobe Tofweta. 13 Kabiji mazubo a mu Yelusalema ne mazubo a bamfumu ba mu Yuda akatamatu nobe ino mpunzha ya Tofweta,+ ko kuba’mba mazubo onse aji na misemi po batapishishanga bitapisho ku bintu byonse bya mwiulu+ kabiji po baichilanga milambo ya binyu yo bapananga ku balesa bangi.’”+
14 Yelemiya byo abwelele kufuma ku Tofweta ko bamutumine kwi Yehoba kuba’mba akaule, waimene mu kipango kya nzubo ya Yehoba ne kwambila bantu bonse amba: 15 “Yehoba wa mabumba, Lesa wa Isalela waamba’mba, ‘Amiwa mbena kuleta bya malwa byonse byo naambile kuleta pa uno muzhi ne pa tumizhi twanji tonse, mambo abo bakainetu nsalansala* kukookela byambo byami.’”+