Ezikyo
1 Mu mwaka wa bu 30 pa juba ja butanu mu ñondo wa buna, byo naikelenga pamo na bantu bajinga mu buzha+ ku mukola wa Keba,+ mwiulu mwashinkukile kabiji namwene bimwesho bya Lesa. 2 Pa juba ja butanu ja ñondo, mu mwaka wa butanu Mfumu Yehoyakimu+ ye ayijilemo mu buzha, 3 Yehoba wisambile ne Ezikyo,* mwana Buzi wajinga ñanga, waikalanga ku mukola wa Keba mu kyalo kya bena Kalodeya.+ Byo ajinga mu kyokya kyalo, bulume bwa Yehoba bwaishile pe aye.+
4 Byo nakitajilenga, naumvwine mwela wa kinkunkwila+ wapupilenga kufuma ku kabeta ka ku buyeke, kabiji kwajinga jikumbi jikatampe kwazhokolokele kyeya ne mujilo*+ saka alakauka, ne mu mujilo mwajinga kintu kyabembejilenga kyamwekelenga nobe kyela kya ngolode ne siliva.+ 5 Mu mujilo mwajinga bintu byamwekelenga nobe bilengwa byumi bina,+ kabiji kilengwa kyonse kyamwekelenga nobe muntu. 6 Byonse byajinga na bilungi bina ne byapi bina.+ 7 Kabiji maulu abyo atanaminetu tana, ne mu maulu abyo mwamwekelenga nobe mikono ya mwana ñombe, kabiji maulu abyo abembejilenga nobe mukuba ye batubula bulongo.+ 8 Munshi ya byapi byabyo byonse bina, mwajinga maboko a muntu, kabiji bilengwa byonse bina byajinga na bilungi ne byapi. 9 Byapi byabyo byalamankene. Byayilengatu kwa kubula kwaluluka; byonse byayilengatu kulutwe.+
10 Bilungi byabyo byajinga bino: Bilengwa byonse bina byajinga na kilungi kya muntu, kilungi kya bokwe+ ku kilujo, kya ñombe+ ku kipiko, kabiji byonse bina byajinga ne na kilungi kya mpungu.+ 11 Abino byo byamwekelenga bilungi byabyo. Byapi byabyo bebitanyikile mwiulu. Kilengwa kimo kimo kyajinga na byapi bibiji byalamankene ne byapi bikwabo bibiji byavwetele mibiji yabyo.+
12 Bilengwa byonse byayilenga kulutwe, konse kwibitangijilenga mupashi.+ Byayilengatu kwa kubula kwaluluka. 13 Kabiji bilengwa byumi byamwekelenga nobe makala abena kunyekula, kabiji kintu kyamwekelenga nobe nsoko ya mujilo, kyayilenga kulutwe ne kunyuma pakachi ka bilengwa byumi, kabiji kyeya kya mujilo kyabesheshenga nobe mvula.+ 14 Bilengwa byumi byo byayilenga kulutwe ne kunyuma, kwenda kwabyo kwamwekelenga nobe kubesha kwa mvula.
15 Byo natajilenga, namwene bilengwa byumi byajinga na bilungi bina saka byaimana ku kitanga kimo kimo panshi.+ 16 Mwekelo ya bino bitanga yabembejilenga nobe jibwe ja kisolite, kabiji byonse bina bipashishe. Kitanga kimo kimo kyamwekelenga nobe kipika mu kitanga kikwabo. 17 Pa kwenda, byayilengatu konse konse kwa kubula kwaluluka. 18 Bitanga byazandamine bingi ne kulenga moyo, kabiji ku bino bitanga bina kwazhokolokele meso.+ 19 Umvwe bilengwa byumi ke byende, bitanga nabyo byalondejilenga, kabiji umvwe bilengwa byumi bebishikula kuya peulu ne bitanga nabyo byashikukilenga.+ 20 Byayilenga konse konse kwibitangijilenga mupashi. Bitanga bebishikwijilengatu pamo nabyo, mambo mupashi waingijilenga mu bilengwa* byumi ye wajinga ne mu bitanga. 21 Inge bilengwa byumi ke byende ne bitanga nabyo byaendelenga; umvwe byaimana nabyo byaimenenga; kabiji inge bebishikula kuya peulu, bitanga bebishikwijilengatu pamo nabyo, mambo mupashi waingijilenga mu bilengwa byumi ye wajinga ne mu bitanga.
22 Peulu ya mitwe ya bilengwa byumi pajinga kintu kyamwekelenga nobe jiulu saka kibena kubembela nobe mema achimba alenga moyo, kyo batandubwijile peulu ya mitwe yabyo.+ 23 Munshi ya kintu kyamwekelenga nobe jiulu mwajinga bilengwa byumi byatanyikile mwiulu byapi byabyo byalamankana. Kilengwa kimo kimo kyajinga na byapi bibiji byavwetele lubaji lumo lwa mubiji, ne byapi bikwabo bibiji byavwetele lubaji lukwabo. 24 Byo naumvwine kubakama kwa byapi byabyo, naumvwinengatu nobe mpoota ya mema kabiji nobe jiwi ja wa Bulume Bonse.+ Pa kwenda, byaumvwanyikilengatu nobe mituutu ya bashilikale. Umvwe byaimana, byaponeshenga byapi byabyo.
25 Peulu ya kintu kyamwekelenga nobe jiulu kyajinga peulu ya mitwe yabyo, paumvwanyikilenga jiwi. (Umvwe byaimana, byaponeshenga byapi byabyo.) 26 Peulu ya kintu kyamwekelenga nobe jiulu kyajinga peulu ya mitwe yabyo, pajinga kintu kipashishe na jibwe ja safila+ kabiji kyamwekelenga nobe jitanda.+ Peulu ya jitanda paikele wamwekelenga nobe muntu.+ 27 Namwene kyabembejilenga nobe kyela kya ngolode ne siliva+ kyajinga nobe mujilo, kufuma mu musana wanji kuya kwiulu. Kabiji kufuma mu musana wanji kuya kunshi, namwene kintu kyamwekelenga nobe mujilo.+ Kwajinga kyeya kyamuzhokolokele 28 kyamwekelenga nobe kakongolo+ mu jikumbi ja mvula ubena kunoka. Abino byo byajinga kyeya kyamuzhokolokele. Kyamwekelenga nobe lukumo lwa Yehoba.+ Byo nekimwene, naponene kinkuvumene, kabiji naumvwine muntu saka abena kwamba.