Ezikyo
5 “Obewa mwana muntu, tola mpoko yatwa wiingijishe kwitendelako. Utende nsuki ne myevu yobe, wiipime pa kipimo ne kwiyabanyapo pasatu. 2 Mukachi ka muzhi ukasoke nsuki imo yo waabanyapo moba a kulukukilamo muzhi byo akapwa.+ Kabiji ukashikule nsuki ikwabo ne kwiichibaula na mpoko kuzhokoloka muzhi yense,+ apa bino nsuki ikashalapo ukeyululwile mwiulu, ne amiwa nkasomona mpoko ne kwiipangisha.+
3 “Kabiji ukafumyepo nsuki imo icheche ukeikashile ku kivwalo kyobe. 4 Ukashikulepo nsuki ikwabo ukeisoke mu mujilo ikapyetu lokoto. Uno mujilo ukakumbana mu bena Isalela bonse.+
5 “Nkambo Mfumu Yehoba waamba’mba: ‘Uno ye Yelusalema. Namubika mukachi ka bisaka bya bantu ne byalo byonse byamuzhokoloka. 6 Pakuba aye walengulula mikambizho ne malamuna ami, ne kuba bintu byatama kukila bisaka bya bantu ne byalo byamuzhokoloka.+ Mambo bakana mikambizho yami kabiji kechi balamine malamuna ami ne.’
7 “Nkambo Mfumu Yehoba waamba’mba: ‘Na mambo a kuba wakatezhe bingi kukila bisaka bya bantu byakuzhokoloka, kabiji kechi walaminenga malamuna nangwa mikambizho yami ne, bino walondejilenga mikambizho ya bisaka bya bantu byakuzhokoloka,+ 8 Nkambo Mfumu Yehoba waamba’mba: “Nakutala bibi obewa muzhi,+ kabiji nkakuzhachisha bisaka bya bantu+ saka bimonako. 9 Na mambo a byubilo byobe bya bunya, nkakuba kintu kyo nkyangye kubapo kala kabiji kechi nkekyubapo jikwabo ne.+
10 “‘“Onkao mambo, bashabo bakajanga baana babo+ kabiji baana nabo bakajanga bashabo. Kabiji amiwa nkemuzhachisha, ne boba bakashalapo mwi anweba nkebapalañenya konse konse.”’*+
11 “Nkambo Mfumu Yehoba waamba’mba, ‘Byonkatu byo nji na bumi, amiwa nkemukana* kabiji kechi nkemubila lusa nangwa kifyele ne,+ mambo mwazhilulwile nzubo yami yazhila na bankishi benu bonse ba bunya ne na byubilo byenu byonse bya bunya.+ 12 Jibumba jimo mwi anweba jikafwa na mwalo* nangwa na kipowe kya nzala. Jibumba jikwabo ja busatu jikafwa ku mpoko.+ Kabiji jibumba ja busatu nkejipalañenya konse konse* kabiji nkasomona mpoko ne kwijipangisha.+ 13 Inge napwisha kuba bino, kuzhingila kwami po po kukapwa ne bukaji bwami po po bukafwomoka, kabiji nkatondwa.+ Bukaji bwami byo bukapwa, po po bakayuka’mba, amiwa Yehoba nkeba bantu kuñingijilatu amiwa bunke kwapwa.+
14 “‘Muzhi wobe nkamwalula ke masala kabiji bakamwendelekanga ku bisaka bya bantu byamuzhokoloka ne ku bantu bonse bapitamo.+ 15 Bakakwendelekanga ne kukuseka,+ kabiji bisaka bya bantu byakuzhokoloka bikafunjilako kwi obewa ne kwikala na moyo kimye kyo nkakuzhachisha na bukaji bwami ne kukukambula. Amiwa Yehoba yami naamba.
16 “‘Nkemutumina kipowe kya nzala kikemwipaya nobe bemwasa miketo. Miketo yo nkatuma ikemonauna.+ Nkabaisha kipowe kya nzala ne kukepesha kajo* kenu.+ 17 Nkemutumina kipowe kya nzala ne banyama bakaji+ kabiji bakemwipayila baana benu. Mwalo ne kwiipaya bikemuletela bulanda kabiji nkaleta mpoko pe anweba.+ Amiwa Yehoba yami naamba.’”