Yelemiya

33 Byo bakimushinkijile mu Kipango kya kwa Kasopa,+ Yehoba waambijile Yelemiya ja bubiji amba: 2 “Yehoba walengele ntanda, kabiji Yehoba yenka wiilengele ne kwiikajika; yenka wa jizhina ja Yehoba waamba’mba, 3 ‘Ungite kabiji nsakukukumbula ne kukubuula bintu bikatampe byakatazha byo wabula kuyuka.’”+

4 “Mambo Yehoba Lesa wa Isalela waamba pa mazubo a mu uno muzhi ne pa mazubo a bamfumu ba mu Yuda o bakundula na mambo a kukeba kwizhikijila ku mishiime yalepa ya balwanyi ne ku mpoko,+ 5 ne pa mambo a boba babena kwiya na kulwa na bena Kalodeya, ne pa mambo a kuyuzha ino mpunzha na mibiji ya bantu bafwa bo naipayile na mambo a kuzhingila ne na bukaji bwami. Kabiji naamba ne pa boba baji na bubi bwandengela kufya kilungi kyami ku uno muzhi namba, 6 ‘Amiwa mbena kubuka uno muzhi ne kumukosesha+ kabiji nkebabuka ne kwibapa mutende ne bukine.+ 7 Kabiji nkabwezha bena Yuda ne bena Isalela bo batwajile mu buzha,+ kabiji nkebalengela kwikala byonkatu byo baikalanga kala.+ 8 Kabiji nkebatokesha ku mambo abo onse o bandengele+ kabiji nkebalekelako mambo pa bubi bwabo bonse ne mizhilulwila yabo yonse.+ 9 Kabiji ukekala kintu kikandetelanga bingi lusekelo, kutotwa ne kulengela bisaka byonse bya bantu bya pano pa ntanda kumpa lukumo byo bakomvwa bintu byonse byawama byo nkebobila.+ Abo bakomvwa moyo ne kuzakama+ na mambo a bintu byonse byawama ne mutende ye nkaletela muzhi.’”+

10 “Yehoba waamba’mba: ‘Ino mpunzha yo yo mukamba’mba yashalatu masala mwabula bantu ne banyama, mu mizhi ya mu Yuda ne mu mikwakwa ya mu Yelusalema yo baonauna ne kushalatu mwabula bantu nangwa banyama, mukomvwanyika jibiji 11 kyungwe kya lusekelo ne kusangalala,+ jiwi ja musongwa ne musongoshi ne jiwi ja boba bakambanga’mba: “Musanchilai Yehoba wa mabumba, mambo Yehoba wawama;+ butemwe bwanji bubula kwaluka bo bwa myaka ne myaka!”’+

“Yehoba waamba’mba, ‘Bakaleta milambo ya kusanta mu nzubo ya Yehoba,+ mambo nkabwezha bantu ba mu kyalo bo batwala mu buzha byonkatu byo naubile kala.’”

12 “Yehoba wa mabumba waamba’mba: ‘Mu ano masala mwabula bantu ne banyama, ne mu mizhi yonse, mukekala jibiji mapunzha bakafunga mo bakatwalanga banyama babo na kukokoloka.’+

13 “Yehoba waamba’mba, ‘Mu mizhi yaikela ku mitumba, mizhi yaikela mu binkunenke, mizhi ya ku kabeta ka ku bulenge, kyalo kya Benjamina, mapunzha azhokoloka Yelusalema+ ne mu mizhi ya Yuda,+ bakafunga bakabalanga jibiji mikooko yabo.’”

14 “Yehoba waamba’mba, ‘Umvwai! Moba abena kwiya o nkafikizhizhamo mulaye wawama ye nalayile kisaka kya Isalela ne kisaka kya Yuda.+ 15 Mu oa moba kabiji pa kyonkakya kimye nkalupula musele* waoloka+ mwi Davida, kabiji ukachiba mambo monka mo aolokela ne kuba bintu byaoloka mu kyalo.+ 16 Mo oa moba, Yuda bakamupulusha+ ne Yelusalema ukekala ku matwi nzoo.+ Kabiji bakamutelanga’mba: Yehoba bo Bololoke Bwetu.’”+

17 “Mambo Yehoba waamba’mba: ‘Mu kisemi kya kwa Davida kechi mukabulapo muntu wa kwikala pa jitanda ja kisaka kya Isalela ne,+ 18 kabiji mu bañanga ba bena Levi kechi mukabulapo muntu wa kwimana kwi amiwa na kupana milambo yonse ya kusoka, kusoka milambo ya kajo ne kupana bitapisho ne.’”

19 Kabiji Yehoba waambijile Yelemiya jikwabo amba: 20 “Yehoba waamba’mba, ‘Umvwe mwabula kulondela lulayañano lwami pa mambo a mute ne bufuku, na kukanya juba ne bufuku kumweka pa kimye kyafwainwa,+ 21 ko kuba’mba lulayañano lwami lo nalayañene na kalume wami Davida nalo lwakonsha konaika,+ pa kuba’mba akabule kwikala na mwana wa kwikala mfumu pa jitanda janji,+ ne kuba’mba lulayañano lwami lo nalayañene na bañanga bena Levi, ba mingilo bami+ nalo lukonaika. 22 Byonkatu byo mwakonsha kubula kubala bya mwiulu ne byo mwakonsha kubula kupima busenga bwa ku kalunga ka mema, ne amiwa byo byo nkavuzha baana* bakalume wami Davida ne bena Levi babena kuñingijila.’”

23 Kabiji Yehoba waambijile Yelemiya jibiji amba: 24 “Nanchi obewa kechi waumvwa bibena kwamba bano bantu amba, ‘Yehoba ukakana bisemi bibiji byo asajile nenyi’? Kabiji bantu bami kechi bebanemeka ne, kabiji kechi babena kwibamona ne kuba’mba kisaka kya bantu ne.

25 “Yehoba waamba’mba: ‘Byonkatu byo naikajika lulayañano lwami pa mambo a mute ne bufuku,+ mizhilo* itangijila bya mwiulu ne bya pano pa ntanda,+ 26 byo byo nkabula ne kukana baana* ba kwa Yakoba ne baana ba kalume wami Davida, pa kuba’mba nkasalepo baana* banji kuba’mba bekale bakalama mu kisemi* kya kwa Abalahama, Izaka ne Yakoba. Mambo nkabwezha bantu babo bo batwajile mu buzha+ kabiji nkebobila lusa.’”+