Ezikyo
29 Mu mwaka wa bujikumi mu ñondo wa bujikumi pa juba ja bu 12 ja ñondo, Yehoba wañambijile’mba: 2 “Obewa mwana muntu, tala kwi Felo mfumu wa Ijipita ne kwaula bintu bikamumwekela aye ne kyalo kyonse kya Ijipita.+ 3 Ukamubuule’mba: ‘Nkambo Mfumu Yehoba waamba’mba:
“Nakuzhingijila obewa Felo mfumu wa Ijipita,+
Kilengwa kikatampe kya mu kalunga ka mema kikala mu tukola twa Nile,*+
Yenka obewa wamba’mba, ‘Mukola wa Nile wami.
Kabiji yami namulengele.’+
4 Bino amiwa nkakukoba twanda mu mibanga yobe ne kulengela masabi a mu Mukola wa Nile kulamachila ku mabamba obe.
Nkakutuntulamo mu Mukola wa Nile pamo na masabi onse alamachila ku mabamba obe.
5 Amiwa nkakutaya mungye, obewa ne masabi onse a mu Mukola wobe wa Nile.
Ukapona panshi, kabiji kechi bakakutola nangwa kukuzhiika ne.+
Nkakupana ku banyama ba mungye ne bañonyi kuba’mba bakakuje.+
6 Kepo bantu bonse bekala mu Ijipita bakayuka’mba amiwa yami Yehoba,
Mambo abo bajinga nobe mukombo wa jitete ku kisaka kya bena Isalela.+
7 Byo bakukwachile ku kuboko walajikile,
Kabiji wibatelumwine bipuzhi byabo.
Byo bashakamijile kwi obewa, wachimaukile,
Kabiji obewa walengejile maulu* abo kubalangila pa kwenda.”+
8 “‘Onkao mambo, Nkambo Mfumu Yehoba waamba’mba: “Nkaleta mpoko pe obewa+ kabiji nkepaya bantu ne banyama. 9 Kyalo kya Ijipita kikonaika ne kushalatu masala;+ kabiji bantu po po bakayuka’mba amiwa yami Yehoba, mambo obewa* waambile’mba, ‘Mukola wa Nile wami; kabiji yami namulengele.’+ 10 Byonkabyo, amiwa nakuzhingijila obewa ne mukola wobe wa Nile, kabiji nkalengela kyalo kya Ijipita kushalatu masala,+ mwabula kintu, kufuma ku muzhi wa Migidolo+ ne Sayene+ kukafika ne ku mupaka na kyalo kya Etiopya. 11 Mu kino kyalo, kafwako muntu nangwa nyama ukapitamo ne,+ kabiji pakapita myaka 40 kwa kubula kwikalamo muntu. 12 Nkalula kyalo kya Ijipita kwikala ke masala kukila byalo bikwabo, ne mizhi ijimo nayo ikekala ke masala myaka 40+ kukila mizhi ikwabo. Kabiji bena Ijipita nkebapalañenya mu bisaka bya bantu ne mu byalo bingi.”+
13 “‘Mambo Nkambo Mfumu Yehoba waamba’mba: “Myaka 40 byo ikapwa, nkabwezha bena Ijipita kufuma mu mitundu ya bantu mo bapalañenejile.+ 14 Nkafumya bena Ijipita mu buzha ne kwibatwala mu kyalo kya Patalosa,+ mu kyalo mo bafumine. Kabiji bufumu bwabo kechi bakebunemeka ne. 15 Bufumu bwa Ijipita kechi bukesakanapo jibiji na bufumu bukwabo ne, kabiji kechi buketumbijikilanga pa bisaka bya bantu bangi ne.+ Amiwa nkebukepesha kya kuba kechi bukalamapo jibiji bisaka bya bantu bangi ne.+ 16 Bena Isalela kechi bakakinka manungo jibiji mu buno bufumu ne,+ pakuba kino kikebavululangamo kuba’mba balubankenye pa kukeba bukwasho ku bena Ijipita. Kabiji bena Isalela bakayuka’mba amiwa yami Nkambo Mfumu Yehoba.”’”
17 Kabiji mu mwaka wa bu 27 mu ñondo mutanshi, pa juba jitanshi ja ñondo, Yehoba wañambijile’mba: 18 “Obewa mwana muntu, Nebukaneza Mfumu+ wa Babilona wapele bashilikale banji mwingilo wakosa wa kulukuka muzhi wa Tila.+ Kabiji mitwe ya bantu bonse yasebekele mabala, ne bipuzhi byabo byonse byapobokele. Pakuba aye ne nzhita yanji kafwako kintu nangwa kimo kyo bamwenejilemo pa kulukuka muzhi wa Tila ne.
19 “Onkao mambo, Nkambo Mfumu Yehoba waamba’mba, ‘Kyalo kya Ijipita mbena kwikipana kwi Nebukaneza Mfumu wa Babilona,+ kabiji aye ukangata bya bunonshi bijimo ne kwibisenda; kabiji abino bintu byo byo akafweta bashilikale banji.’
20 “Nkambo Mfumu Yehoba waamba’mba, ‘Amiwa nkamufweta kyalo kya Ijipita pa mwingilo wakosa ye añingijileko kwi aye.’*+
21 “Pa joja juba, nkalengela lusengo kumena mu ba mu nzubo ya Isalela,*+ kabiji nkakulengela obewa Ezikyo kwamba nabo; ne abo po po bakayuka’mba amiwa yami Yehoba.”