Mitonyi

16 Juba jimo Samisonyi wayile ku Gaza, kabiji wamweneko pite, ne kutwela mo ajinga. 2 Bena Gaza bebabuujile’mba: “Samisonyi waiya kuno.” Onkao mambo, bamuzhokolokele ne kumubelamina bufuku bonse ku kibelo kya muzhi. Bufuku bonse baikeletu nzoo ne kwiambila mulwabo amba: “Byo pasakutokatu, tusakumwipaya.”

3 Nangwa byonkabyo, Samisonyi walaajile konkakwa kufika pakachi ka bufuku. Kabiji pakachi ka bufuku wabuukile ne kukwata binzhilo bya muzhi ne mashiki abiji ne kwibitupwila pamo na mwamba. Wibibikile pa bipuzhi byanji ne kwibisenda kuya peulu ya mutumba watalañana na Hebulona.

4 Kepo atemenwe mwanamukazhi waikalanga mu Kimpachiko* kya Soleka, jizhina janji wajinga Delila.+ 5 Onkao mambo, bamfumu ba bena Filishitiya baishile ku mwanamukazhi ne kumwambila’mba: “Mujimbaike,*+ uyuke kimulengela’mba ekale na bulume bukatampe, ne byo twakonsha kumushinda, kumukasa ne kumukookesha. Inge ukoobe kino, atweba bonse pa muntu pa muntu tukakupa mashekele a siliva 1,100.”

6 Kepo Delila aambijile Samisonyi amba: “Mwane mbuulai kufuma bulume bwenu bukatampe, ne kintu kyo bakonsha kwimukasa ne kwimukookesha.” 7 Samisonyi wamwambijile’mba: “Inge bankasa na mizhinge* itanu na ibiji ya buta bwa mukanda ya katataka yabula kuma, nakonsha kukooka ne kwikalatu byonka biji bantu bonse.” 8 Onkao mambo, bamfumu ba bena Filishitiya bamuletejile mizhinge itanu na ibiji ya buta bwa mukanda ya katataka yabula kuma kabiji wamukashileyo. 9 Kabiji babikile bakumubelamina mu kibamba kya mukachi, ne mwanamukazhi wamwambijile’mba: “Ba Samisonyi, bena Filishitiya baiya kwi anweba!” Ponkapo wachibawile mizhinge ya buta bwa mukanda, byonkatu bichibauka swala wa bukusa* inge wapya na mujilo.+ Kyamulengelanga kwikala na ngovu kechi kyayukanyikilwe ne.

10 Kepo Delila aambijile Samisonyi amba: “Talai! Mwankosamika* ne kumbepa. Pano mwane, mbuulai kintu kyo bakonsha kwimukasa.” 11 Ponkapo wamwambijile’mba: “Inge bankasa na mizhinge yakatataka yo bakyangye kwingijishapo, nakonsha kukooka ne kwikalatu byonka biji bantu bonse.” 12 Kepo Delila ashikwile mizhinge yakatataka ne kumukasayo ne kwamba’mba: “Ba Samisonyi, bena Filishitiya baiya kwi anweba!” (Kabiji kwajinga bamubelamijile mu kibamba kya mukachi.) Ponkapo wachibawile mizhinge yo bakashile ku mikoko yanji nobe tonge.+

13 Ponkapo Delila waambijile Samisonyi amba: “Ne lunotu mubena kunkosamika ne kumbepa.+ Mbuulai kintu kyo bakonsha kwimukasa.” Kepo amubuujile’mba: “Inge ukase minyumbwe itanu na ibiji iji ku mutwe wami na tonge ye bapikula, bulume busakupwa.” 14 Onkao mambo, wiikashile kwingijisha kyo bapikwilako bisapi ne kumwambila’mba: “Ba Samisonyi, bena Filishitiya baiya kwi anweba!” Ponkapo wabuukile mu tulo ne kusopolamo kyo bapikwilako bisapi ne kufumya tonge ye bapikula.

15 Kepo mwanamukazhi amwambijile’mba: “Mwambila ka amba, ‘Mwantemwa,’+ bino mu muchima wenu saka mwabula kuntemwa? Abino bimye bisatu mwankosamika, kabiji kechi mwambuula kufuma bulume bwenu bukatampe ne.”+ 16 Na mambo a kuba wamukatezhenga bingi pa juba pa juba, aye* wakookele kya kuba kakebe ne kufwa.+ 17 Onkao mambo wamubuujile byonse byajinga mu muchima wanji amba: “Bakyangye kuntendapo kala nsuki, mambo yami Munazili wa Lesa kufumatu kimye kyo nasemekelwe.*+ Inge bantenda, bulume bwami busakupwa, kabiji nakonsha kukooka ne kwikalatu byonka biji bantu bonse.”

18 Delila byo amwene’mba Samisonyi waamba byonse byajinga mu muchima wanji, ponkapotu waichile bamfumu ba bena Filishitiya+ amba: “Mwakonsha kwiya pa kino kimye, mambo wambuula byonse biji mu muchima wanji.” Ponkapo bamfumu ba bena Filishitiya baishile ku mwanamukazhi saka basenda ne mali. 19 Wamulaajikile pa maulu anji; kepo aichile muntu ne kumutenda minyumbwe itanu na ibiji yajinga ku mutwe wanji. Ponkapo mwanamukazhi watendekele kumutangijila, mambo ngovu yanji yafuminemo. 20 Kepo amwambijile’mba: “Ba Samisonyi, bena Filishitiya baiya kwi anweba!” Aye wabuukile mu tulo ne kwamba’mba: “Nsakulupuka byonkatu byo nguba kimye kyonse+ ne kwipokolola.” Bino aye kechi wayukile’mba Yehoba wafumako kwi aye ne. 21 Onkao mambo bena Filishitiya bamukwachile ne kumusaba meso. Kabiji bamutwajile ku Gaza ne kumukasa na minyololo ya mukuba, kabiji wapelelenga kajo monka mu kaleya. 22 Bino nsuki ya ku mutwe wanji yo bamutendele yatendekele kukoma.+

23 Bamfumu bena Filishitiya bakonkene pamo na kutapisha kitapisho kwi Dagona+ lesa wabo ne kusangalala, mambo baambile’mba: “Uno lesa wetu wapana Samisonyi mulwanyi wetu mu maboko etu!” 24 Bantu byo bamumwene, batotele lesa wabo ne kwamba’mba: “Uno lesa wetu wapana mulwanyi wetu mu maboko etu, yenka waonawine kyalo kyetu+ ne kwipaya bantu betu bavula.”+

25 Na mambo a kuba michima yabo yasangalele, baambile’mba: “Mwitai Samisonyi kuba’mba etusekesheko.” Byonkabyo bamwichile Samisonyi kufuma mu kaleya kuba’mba ebasekeshe; bamwimikile pakachi ka mashiki. 26 Kepo Samisonyi aambijile kalombwana wamukwachile ku maboko amba: “Aki ndeke nkwate ku mashiki akosesha ino nzubo, pa kuba’mba nshakamineko.” 27 (Mu nzubo mwayujile banabalume ne banabakazhi. Bamfumu bonse ba bena Filishitiya bajinga monka, kabiji pa musemi pajinga banabalume ne banabakazhi nobe 3,000 batambilenga Samisonyi byo aubilenga bya kusekesha.)

28 Kepo Samisonyi+ amwichile Yehoba amba: “Anweba Nkambo Mfumu Yehoba, napopwela mvulukai, ne kunkosesha,+ napopwela, jonka jino japelako, anweba Lesa, kabiji ndekai nshinkanye na bena Filishitiya, nangwatu pa jiso jami jimo.”+

29 Kepo Samisonyi akwachile mashiki abiji a pakachi onka akoseshe nzubo ne kushakaminako, kuboko kwanji kwa kilujo kwakwachile ku jimo, ne ku kuboko kwanji kwa kipiko kwakwachile ku jishiki jikwabo. 30 Samisonyi wabijikile’mba: “Mfwile* pamo na bena Filishitiya!” Kepo eashinjikile na bulume bwanji bonse ne nzubo yaponejile pa bamfumu ne pa bantu bonse bajingamo.+ Onkao mambo, waipayile bantu bavula pa kufwa kukila bo aipayile kimye kyo ajinga na bumi.+

31 Balongo banji ne bonse ba mu kisemi kya bashanji, baishile ne kumusenda. Bamutwajile ne kumuzhiika pakachi ka Zola+ ne Eshitaola mu kilende kya kwa Manowa+ shanji. Wachibijilenga bena Isalela mambo pa myaka 20.+