Ku Bena Tesalonika
3 Onkao mambo, byo twakankelwe kuchinchika na mambo a kino, twalangulukile’mba kyawama kushala mu Atene;+ 2 Kabiji twatumine Timoti+ mulongo wetu wa mwingilo* wa Lesa wa kusapwila mambo awama aamba pe Kilishitu, kuba’mba emukoseshe ne kwimutekenesha na mambo a lwitabilo lwenu, 3 pa kuba’mba muntu nangwa umo abule kutelengela* ku bino bya malwa. Mambo anwe bene mwayuka’mba kechi twakonsha kuchinuzhuka kupita mu bino bintu ne.*+ 4 Mambo byo twajinga nenu, twimubuujile jimo namba tukapita mu bya malwa, ne kumweka kyamweka, byonka byo mwayuka.+ 5 O ene mambo, byo nakankelwe kuchinchika natumine muntu namba ngyuke lwitabilo lwenu byo luji,+ mambo nalangulukilenga namba kampe wa Kwimweseka+ wimweseka ne mwingilo wetu waaluka ke watu.
6 Bino Timoti po po abwelatu kwi atweba kufuma kwi anweba+ kabiji witubuula mambo awama a bukishinka ne butemwe bwenu, kuba’mba mwatwajijila na kwituvuluka kimye kyonse, kabiji amba mubena kusakisha bingi kwitumonapo byonkatu ne atweba byo tukeba kwimumonapo. 7 O ene mambo, balongo bami, mu makatazho etu onse ne mu bya malwa, twatekeneshiwa na mambo a anweba ne na bukishinka bwenu bo mwamwesha.+ 8 Atweba tukosa* jibiji inge kya kuba mwakosela mwi Nkambo. 9 Nanchi twakonsha kumusanchila byepi Lesa na mambo a anweba pa lusekelo lukatampe lo tusekela kwi Lesa wetu na mambo a anweba? 10 Bufuku ne mute tulomba na mukoyo milombelo ya misashijilo namba tukemumonepo* ne kwimubuula bintu byo mwabula, pa kuba’mba lwitabilo lwenu lukakose.+
11 Pano Lesa wetu Tata, aye mwine ne Nkambo yetu Yesu betutangijile mu jishinda pa kuba’mba tukonshe kwiya ko muji. 12 Kabiji Nkambo emuvuzhizhe butemwe kabiji bubaye, bwa kwitemwa anwe bene na bene+ ne bwa kutemwa bantu bonse byonka byo twimutemwa, 13 kuba’mba akoseshe michima yenu, ne kwikala babula kaneneno monka mu buzhile kwi Lesa+ Tata mu kimye kya kwikalapo kwa Nkambo yetu Yesu+ na bazhijikwa banji bonse.